بسم الله الرحمن الرحيم
السلام عليكم ورحمة الله وبركاته
مساء/صباح الخير
ابي ادخل على طول بالموضوع<<مره معصب
سلمكم الله انا كنت حاجز (جده -القيصومه) قبل موعد الرحله تقريبا بثلاثة اشهر ..
المهم يوم صار باقي على موعد الرحله يوم .. وصلتني أربع رسائل من الخطوط .. مره
يقولون موعد الرحله تأخر ومره يقولون تقدم ومره يقولون بنفس الموعد.. المهم جاء من
بكره(مع العلم أن موعد الرحله الساعه 4:45 دقيقه) .. رحت الساعه( الواحده) لأقرب
مكتب خطوط وسألته عن موعد الرحله وتفاجأت بجوابه يقول الرحله الساعه2
(مع العلم ان آخر رساله جتني من الخطوط تقول الرحله الساعه
((6:45)))..
وأنا اللي اجيك طاير تقطيع اشارات تهور{هم اللي يجبرونك تسوي كذا} >>ماباقي شي
على الرحله
وآخذ أهلي وعلى طول على المطار ... وصلت المطار تقريبا 1:45
وجيت موظف الخطوط وعطيته التذاكر ابيه يخلصني ...قال: وش فيك مستعجل
رحلتك مابعد جا وقتها.. رحلتك الساعه 4:45 >> يعني أنا ارجع للموظوف الاول و أفقع
وجه والا أسوي فيه مصيبه
المهم قلت له قص لي البوردنق .. الا يوم تغير وجهه... وش السالفه ؟ قال : بس انتظر
شوي ربع ساعه وارجع لي.. جيته بعد ربع ساعه أرسلني للمشرف<<الله من زين
الاخلاق
المشرف لطعني أكثر من ساعه .. بعدها أرسلني للموظف ..ابي أعرف وش المشكله ماهم
راضين يقولون لي!!!!!!!!!... بس يقولون اصبر شوي ...لين جت الساع 4:15
يعني مابقى شي على الرحله .. بالأخير قال لي أنتم 8 أشخاص ومالقينا الا 5 مقاعد!!!؟
{{{{ يعني حاجز قبل ثلاث شهور ومأكد وتجي تقول مافيه الا خمس مقاعد}}}
قال: مو ذنبي
... المهم كلمت من هنا ومن هناك (يعني واسطه) << لأنك مع
الاسف الحين ماتمشي الا بالواسطه ... طيب واللي ماعنه واسطه؟؟ له المولى عز وجل
دبرونا الرجال وصعدونا الطائره بعد مانشف دمنا!!!
الساعه((((((((((((( الخامسه)))))))))))))) يعني خذ كذب بالمواعيد ..وماأقلعنا الا
الساعه 5:45 <<ماأدري يمكن الطائره متعطله((لأن ماشاء الله طائراتنا كلها جديده ماتمسك قلبك من يوم تطير إلين توصل من الاصوات ومن الاعطال ومن ومن ..... ))
المهم
بعد كل هالعناء وصلنا الحمد لله.. ويوم جيت آخذ العفش 8 قطع .. ماحصلت الا 7 قطع ..
وسألت مسؤول العفش الضائع قال: سجل رقم الشنطه وأنا أرسل للي بجده وأكلمك اذا
صار اي جديد..واعطاني ورقه وقال سجل عليها بيانات العفش الضائع عشان يمكن يعوضونك والمضحك في
هالورقه انه مكتوب فيها :
بما معناه وش الأغراض اللي بالشنطه وكم أسعارها والماركه ومن اي محل وفي اي يوم
يعني لو انا مفصل ثوب والا شاري جزمه ((الله يعزكم)) قبل شهرين .. ابي اروح ادور
المحل والماركه ووو... بصرااااحه (( يعني انسى تعويض يابابا))... والا يومك هذا
وانا وياهم .. ولكن لاحياة مع الخطوط الجويه السعوديه...!
بالعربي الخطوط الجويه السعوديه ضايعه ... لا من ناحية الحجوزات ولا من
ناحية الاسعار
ولامن ناحية الطائرات اللي كنك راكب لك ماصوره ولا من ناحية
اخلاق الموظفين ولا من ناحية المطارات((مطار جده كنك بوسط الحج من الزحمه...
وسعوه شوي انفضحنا قدام الاجانب))
ولا من ناحية المواعيد وياليل ماأطولك يالمواعيد!!!
وآسف على الاطاله.
##أكتب معاناتك مع الخطوط الجويه السعوديه## 
في مبيعات التذاكر بمطار الملك خالد
الوضع العادي
