باب ماجاء في الرد على غلمان بني علمان!! - نادي الهلال السعودي - شبكة الزعيم

هلالي الظهران · #1 11/06/2007, 02:51 PM

السلام عليكم أجمعين ولاعدوان الا على الظالمين.. وبعد:

فقد وردني من بعض الأوباش بان هناك من سأل عني.. فأقول والله الهادي الى سواء السبيل:

مساكم الله بالخير جميع.. يا اخوان متى تتركون عنكم اللقافة والتثريب؟!

لااحد يسألني وين الناس ومهو بشغلكم

وعلى كيفي أطس وعلى كيفي أجي.. بالعربي مابي اشوف ردود من طقة الحمدلله على السلامه ولا وين الغيبات ولا قلب ولا بوسه ولا علاقه رومنسيه ..

دعونا من البربسه ودعوني اخش بموضوعي اللي الى الان مدري وش ابكتب فيه لكن ان شاء الله تتدفق الافكار كتدفق العواصف وكأنها أوراق لعب تناثرت وأنت قاعد تلعب بلوت قدام مكيف صحراوي أو كأهنا قطعة ملابس تتلاعب بها المياه المتلاطمه داخل غساله

(<<ياخي تكفى لاعاد تشبه.. أجل العواصف تتدفق

).. على طاري العواصف والأعاصير.. جاتني رسالة sms تقول: نذل يهدي أهالي سلطنة عمان أغنية جاكم الاعصار ماشين يعيقه

..

المهم هذا الموضوع ليس بموضوع (<<ياخي رح ارقد اصرف

) ..أنا شفت اصدقاي الهاوي وماجد مقبل منزلين مواضيع فقلت انزل موضوع واكسر اسوقهم(اعنبوا الهياط

).. في الحقيقة ماسيأتي ذكره هو عباره عن موقف حصل معي حبيت أطرحه لكم ثم نتطارح سوياً في تحليله وتمحيصه.. تلاه توارد خواطر عباره عن قراءه نقديه مستقبليه لواقع الأمه في القرن الحادي والعشرين (منيب عاقل عايض القرني

).. فحياكم الله على قل الكلافه..

=.=.=.=.=.=.=.=.=

طلبت مني جهة العمل كشف طبي متكامل.. ووجهوني الى احد المستشفيات الخاصه الكبرى بالمملكه.. بدون ما اسميها وهي على وزن البنك السعودي الهولندي او البنك السعودي الالماني

(<<يسمع بالتشفير:p ).. المهم توجهت الى المستشفى وكان في الاستقبال موظفتين شابتين سعوديتين.. علمتهم اني من الجهه الفلانيه وانهم طالبين مني كشف طبي متكامل.. كلها دقايق وسلموني ايضا لموظفه شابه سعوديه وكانت هي المسؤوله عن فحوصاتي.. وابتدت تاخذني من قسم للثاني.. من عيادات فحص الضغط والسكر ومدري ايش.. لمختبر فحص الدم.. لقسم الاشعه وهكذا..

أقسم بالله غثتني هالشابه تقول كأنها ابوي وماسكه بيدي وبتوديني للمدرسه

.. المشكله انها تروح للقسم الفلاني وتسلمني بيد وحده ثانيه واذا جيت طالع من هالقسم القاها تنتظرني.. ثمن تاخذني للقسم اللي بعده.. الله وكيلكم صرت في يدهم مثل الكوره يلعبون فيني ون تو

.. والغريب ان غالبية الطاقم من الشابات السعوديات!!

وانا على هالحاله الين وصلت مختبر تخطيط القلب (وهنا مربط الفرس).. دخلت المختبر وكانت المسؤوله او الممرضه ايضا شابه سعوديه..

المهم دخلت وسلمت وجلست على الكرسي.. ردت السلام وسكتت شوي وهي تقلب بالاوراق.. وبينما هي مستمره في التقليب قالت: افسخ ملابسك!!

قمت نزلت الشماغ ورجعت جلست على الكرسي!

ناظرتني باستغراب وقالت: لو سمحت افسخ ملابسك واطلع على السرير!!

بلعتها وقلت هي اعرف وخلينا نشوف اخرتها.. قمت فسخت الثوب وعلقته واتجهت للسرير لكي انبطح..

التفتت علي بعصبيه ونفخت فيني: ياخي انت ماتعرف تفسخ زي العالم؟!!

قلت: وش اللي ماتفسخ زي العالم؟ شايفتن التفسيخ طلعت بر!!

بعدين وش افسخ اكثر من كذا؟!

ارتسمت على ملامحها ضحكه مكتومه بغيظ وقالت: اسفه بس لو سمحت ممكن تشيل الفانيله وتروح السرير وعندك الغطاء وخلني اشوف شغلي (كنها تكلم بزر

) ..

المهم ابطحت على ظهري وتغطيت بهالغطاء.. وجات وهي تدف طاوله صوبي عليها انواع المحاليل والكريمات وعلب أشكال والوان مدري وش سنعها!! لو تشوفونها تقول ذا واحد طالع للبر ويصلح فطور

..

الشاهد انها غسلت يدها وبدأت تدهن من هالكريمات على صدر خويكم الطاهر.. وانا اناظرها شوي وأغمض شوي.. او أغمض شوي وأناظرها شوي.. ومافيها شي لو عكستها ترى كلها واحد لااحد يدقق (<< طيب ياخي احد قالك شي يومك تسوي هالزحمه:p

).. بالمناسبه كانت ترتدي لباسا فاخرا.. هو عباره عن بزة (الا سؤال محيرني من زمان.. الحين البزه هي التنوره؟:p ) وتيشرت واسع من الاعلى ولابسه هالبالطو ومغطيه شعرها بطرحه فقط..

صرت أناظر السقف وأحاول اني اضيع السالفه وما أناظر حتى لاتصير لي أمور سيكولوجيه فالمنظر الذي يتدلى أمامي لايسر الناظرين

.. ففكرت بأن أطلب منها ان تقول " زوجتك نفسي ياهلالي الظهران" (<< اي بنت قرت هالجمله تعتبر زوجتني نفسها

.. ومنيب مطلق الا بــ50 الف ريال;) ).. وبعد ماتنتهي من الفحص اطلقها حتى لا أقع بالمحظور لكن ولله الحمد قطع تفكيري صوتها وهي تطلب مني ان أتجهز لانها بتشبك فيني الاسلاك وتبدأ الفحص.. فعلا بدأ الفحص وانا اهوجس بحاجتين.. هالاسلاك اللي مشبكه فيني.. وهالكريمات التي تلطخت بجسدي الطاهر من بيمسحها

..

انتهت من الفحص وبدأت تشيل الاسلاك.. فكسرت جدار الصمت بسؤال وجيه: من اللي بيمسح هالدهان الحين؟

قالت: من يعني اكيد انا..

قلت: الله يعطيك العافيه.. على هالخدمه مابقى الا تضبطيلي رويس معسل

( والله اني قايل هالجمله بعفويه وتوقعت بقس.. قرصه.. عظه.. صرخه.. اي شي)..

قالت: وايش تبي تفاحتين ولا عنب؟

انا تنحت شوي على هالرد غير المتوقع.. ثمن قلتلها: ماشاء الله عندك خبره

..

قالت: ليه انتم شايفين انفسكم؟ وش ينقصنا عنكم.. جيزنا جيزكم!!

واستمر النقاش وانا اهوجس بنفسي ان هالبنيه عندها أفكار مهيب مضبوطه فبادرتها بسؤال.. انتي او الوالد عشتوا برا السعوديه.. مثلا امريكا؟

قالت: امريكانا ولا حلواني هههههههه (حسيتها اخت محمد الكنهل على هالذبه السقيمه

).. يلعن ابو الحظ لو اني رايحتها ماشفتني هنا..

رديت بنوع من الخباثه: طيب لاتلعني الحظ.. فاذا لعنتي الحظ فكانك لعنتي الدهر.. وتخبرين هالشي درسناه بالمتوسط واذكر الاستاذ ابو مصعب نشب لنا بهالنقطه

..

قالت: بلا تخلف انت وابو مصعب حقك

.. اساسا مابهذلنا الا هالعينات..

قلت: وش دخلهم؟

قالت كلام فيما معناه وخلاصته.. انهم سبب التخلف والرجعيه وان ماحاجرنا الا هم.. واستمرت تفضفض وتخربط الين ما انتهت من ازالة الدهان..

وهذا اللي دار بيننا بدون أي زياده وكثييير من النقصان

.. خرجت من عندها ولسان حالها يردد رائعة ابو وسام.."سلمتك بيد الله يامحملني اسيه.. ياريت ماشفتك وش جابك عليه.. ياخسارة تعبي ويا...."

المهم خرجت من مختبر تخطيط القلب وألقى خويتي الاولى تنتظرني(<<مسرع صارت خويتك).. انتهيت من باقي الفحوصات ولله الحمد وخرجت من المستشفى بعد مرمطة 3 ساعات..

يا الربع والله اني منصدم من اللي شفته بعيني!! هل يعقل الى هالدرجه وصل حالنا المايل بالمراكز الصحيه؟!

حدثني من اثق به.. يعمل في احد المستفشيات الخاصه الكبرى بالخبر.. يقول: اذا جائت فتيات سعوديات يطلبون العمل في المستشفى يوجهون الى مدير المستشفى مباشره بطلب منه.. وقبل أن ينظر في ملفاتهم يجب أن يتحقق امرين..
الاول: ان تكشف غطاء وجهها ان لم تكن كاشفه ويتأكد ان شكلها مقبول!
الثاني: يسألها هل تمانع بان تعمل بدون غطاء للوجه!

وتصديقا لهالكلام بالامكان مراجعة المستشفيات الكبرى مثل سعد التخصصي والمانع والتأكد من الامر.. حتى أن جميع الطاقم المخصص للرد على هواتف المستشفى من الفتيات السعوديات..

طيب وش سبب هالتجاوزات ومن ورائها؟ هذا غير مانسمع عنه من تجاوزات تحدث داخل العيادات وغرف العمليات وأهل التخصص ادرى بهالامور وبامكانهم افادتنا..

جلست وأنا سارحٌ هائمٌ أفند أسباب القضية وملابساتها.. مما يسبب تضييع العقل ويجعل الناس يتوهون(<< تحسون كأنه تعبير واحد في ثاني ابتدائي

).. مما يضيع بالواحد (<<ايه الحين صح).. وبينما يدي تحك رأسي لتحضه على التفكير ويدي الاخرى ممسكة الريموت وتقلب بين القنوات.. اذ باحدى المحطات تعرض برنامجا يستضيف اثنين من محدثي هذا الزمن وهم يتلقون الصفعه تلو الصفعه من شيخين وقورين.. وكلما زاد تهزيئهم ازدادت جرئتهم ووقاحتهم.. فشعرت باحساس نيوتن حينما سقطت التفاحة على دميجته وأصبح يردد وجدتها وجدتها..

نعم نعم وجدتها.. فالقد ابتلينا في عصرنا هذا بشرذمة من ابنائنا غسلت أدمغتهم بأفكار غريبة مريبه.. أبعد ماتكون عن تعاليم ديننا الاسلامي وتوجهاته.. فأصبحوا دعاة للسفور والاختلاط والرذيله من دون أي حياء..

ومن وين لهم الحياء وهم حيلتهم حيلة وفاء عامر.. يوم تفصخت علشان تشتهر وبعد ماكانت تمثل دور الشغاله صارت البطله المغواره

.. ولاتهون الهام شاهين صاحبة المقوله الشهيره " احسن من الشرف مافيش"

.. وربعنا مافرقوا عنهم كثير وعشان تشتهر وتصير المصلح الاول والمثقف الفريد.. خبص في أمور الدين وتهجم على أصحاب الفضيله وادعوا للاختلاط والفحش والرذيله.. مع فارق التشبيه والاحترام لوفاء والهام

..

وللأسف نجحت الشرذمه في تحقيق بعض مبتغياتهم كتسميم عقول بعض فتياتنا والتغرير بهن بحجة المساواه بين الرجل والمرأه.. ورأينا تأثيرهم في قطاعات معينه كما يحدث على سبيل المثال في القطاع الصحي او مايحدث في الاعلام المرئي والمقروء.. ومازالوا يعملون على تحقيق أهداف اخرى..

أصابتني الغلقه والزهقة مما يحدث ويقع فقفلت معي فأقفلت التلفاز.. ثم أغمضت عيني وبدأت أشطح بخيالي لأرى الحال بعد نيفٍ من السنين اذا استمرت الشرذمه في تحقيق أهدافها..

أول ماطرالي انهم سمحوا للمرأه بقيادة السياره.. طيب هالموضوع فيه تعدي على خصوصية الشباب.. بعد فيه تعدي على كرامته.. تخيلوا شاب معه كورولا وواقف بكل وداعه عن الاشاره وتجيه ذيك البنت معها فياقرا وتوقف جنبه بالاشاره.. قسم بالله انها غبنه.. عني انا اذا ولعت الاشاره بنشبها في أول عمود

..

طيب الحريم اذا ساقن أكيد بتكثر الحوادث والا يمكن يحطون ضوابط جديده.. مثلا يمنعون استخدام الجوال اثناء القياده..او مثلا يشيلون المرايات من السياره حتى ماتنشغل الوحده بتعديل مكياجها

.. او حتى ممكن يمنعون استخدام الكاسيت حتى لاتستنزل الوحده ويحدث مالا يحمد عقباه

..

طيب خلوا الحوادث على جنب وتعالوا نشوف كيف بيصير المغازل والترقيم على قفا من يشيل.. لكن تظل في سواقة المرأه نقطه ايجابيه حيث انها بتقضي على البطالة عن بكرة أبيها.. طرحت الموضوع على شباب وبدأته باقتراح.. انه اذا ساقن الحريم بشتغل في مطعم عشان الطلبات الخارجيه وبكثر لهم من الكاتشاب والمايونيز عشان يصيرون زبونات عندي

.. فاقترح واحد من الشباب انه بيشتغل في محطة بنزين واللي تعبي بــ20 لها دبدوب هديه

.. واقترح اخر انه يشتغل بمغسلة سيارات واللي تغسل سيارتها لها بطاقة شحن.. واقترح ثالث انه يبيع ورد وعلوك عند الاشاره

.. وتتالت الاقتراحات حتى تيقنت بأن البطالة زائله لا محاله

..

طيب لو هاك الوقت صار البنات هم اللي يغازلون.. تخيلوا مثلا انا والهاوي ناوين ندخل الملاهي والا عند البوابه ثنتين ورانا يقولون: لو سمحتوا شباب ممكن تدخلونا معكم

.. طبعا أنا بكل ثقه بقول لهم وجع.. بعدين احنا مانبي نطيح بالحرام(<< ماعنده وقت

).. وأسحب الهاوي مع شنطته (المقصود بالشنطه هنا اللي تنحط بها الاغراض.. اعرف فيه ناس تفكيرهم نص استوا

) وندخل الملاهي والهاوي يلتفت ويناظر فيهم.. لاتحسبونه خق او يكحل لا ابشركم مستحقرهم

(يعيشون الشباب الثقل

)..

طيب اذا يبون يسوون موكب او يبون يفحطون أو أو... الظاهر مابننتهي من هالسالفه(<< اذا اكتشفت ان الفرامل تعطلت اسحب جلنط

)..

بدأ خيالي يشطح شطاحاً قوياً(<< مشكله اللي يتفلسف ولاهو بقدها

).. فتخيلت لو سمحوا للمرأه بمزاولة الرياضه ومشاركتها وتمثيلها للوطن في المحافل الدوليه..

تخيلوا معي المنتخب السعودي النسائي لكرة القدم.. وتشكيلته المكونه من: انتصار خوجه.. فوزيه معاذ.. حليمه تكر.. سميه المنتشري.. شهرزاد عبدالغني.. نوره عزيز.. سعاد الغامدي.. عيشه عطيف.. فاطمه الشلهوب.. ليان القحطاني.. ميرفت معاذ

..

ومع أول خمس دقايق تجي كوره سهله لانتصار خوجه وتتركها تدخل قوول.. جوها حليمه وسميه يهاوشونها ليه مامسكتي الكوره.. تقول جالسه ادور على شباصتي

..

عاد يحلفون انه ماتعدي ربع ساعه الا والفريق كله منطرد.. نصهم هواش مع الحكم والنص الثاني يعدلون الميك اب بغرفة الملابس..

طيب خلوا الكوره على جنب.. وتخيلوا وضحى البيشي داخله سباق 3000 متر.. وطول السباق وهي بالمركز الاول الين وصلت اللفه الاخيره لكن عند خط النهايه وصلوا كل المتسابقات الا وضحى!! وبعد مادوروها لقوها بوسط الجمهور تهاوشهم وتقول من ابن الكلب اللي رمى الشروخه

..

وتخيلوا أفراح صوعان وهي مشاركه في سباق قفز الحواجب وترتكب غلطه كبرى وتقط بالحواجز حق المتسابقه اللي جنبها!! وبعد ماانطردت من السباق سألوها ليش سويتي كذا؟ قالت: ابي اشوف حواجزها اقصر من حواجزي ولا مثلها.. تخبرون هم كفار ويغشون مع بعض

..

وصل خيالي لمرحلو ميؤسه منها.. يعني شبابنا مافلحوا بيفلحون البنات!! والله لو انه تلفون خربان مافلحوا فيه

..

طيب الحين سواقه يبون يصيرون مثلنا ورياضه يبون مثلنا.. وش خلوا للشباب؟ مابقي الا يطالبون مساواة المرأه بالرجل ويفتحون لهم استراحات!!

عاد تخيلوا البنات متقاطين باستراحه.. اللي تلعب بلوت.. واللي تناظر الدش واللي تسحب في ذا المعسل بيد والبلايستيشن بيد.. واللي تتشكى من رجلها.. واللي ماسكه زاويه وتحنحن بالجوال.. وفي زاويه بعيده تلقى ثنتين لالهم ولا عليهم يتناقشون في مستقبل العلاقات السعوديه الاميركيه.. وفجأه يسكتون كل اللي بالاستراحه وأنواع الضحك عليهم.. ويبدأون يعلقون.. اللي تقول: ياشين السرج على البقر.. وثانيه تذب: بالله ياهيلاري كيلنتون مدي لي المعسل.. وثالثه تقول: ترى كونداليزا رايس توها داقه وتقول انا جايه للاستراحه الحين تبون اجيب لكم شي على الدرب

..

وبينما انا على حالتي من التخيل قطع حبل أفكاري صوت كابتن الطياره وهو يعلن عن ربط الأحزمه والاستعداد للهبوط!! حيث اني اكتب لكم على ارتفاع 35 الف قدم.. اذا شطحت افكاري فاعذروني فأنا مرتفع عن سطح الارض تماما

.. والحين استأذنكم مضطر اقفل على الموضوع فالمضيفه ترمقني بنظرات حاده يعني يالهيس قفل الجهاز

..

[مخرج]

اللهم من اراد الأسلام والمسلمين بسوء فرد كيده في نحره ...

تقبلوا تحياتي وأشواقي وقبلاتي.. أخوكم أبو سباستيان .. وداعاً جزيلاً

juve1897 · #2 11/06/2007, 03:07 PM

يا هلا و يا مسهلا بهلالي الظهران من طول الغيبان جاب الغنايم

و الله لك وحشة , مفتقدينك يالهيس الأربد وين المواضيع قسم بالله المنتدى له مدة طويله ماله طعم و السبب هلالي الظهران

و كل فترة و فترة أدخل أشيك هاااااااااا هلالي كتب موضوع ولا قاعد يسربت مع بنات خلق الله

.

و المشكله بينما نحن نسأل عنك و نقول هالهيس وين هج و في النهاية رايح تسربت مع بنات خلق الله و الله ما تلام و الي جاك شوي أجل من يد بنت لبنت و الجنس الناعم كله كوم و المساج كوم ثاني

, و الله شكلك دخت من الكلام و لا بعد مهيب هينه تعرف معسل تفاحتين و و العنب على أني أعرف إنهم لما يعسلون بيكون معسل فراولة

بس ولو يعرفون لهالخرابيط

وشكل البنات صارو أدشر منا هالأيام و الله يستر من الجاي النساء بيدخلون بشكل جامد سواقة السيارات و دخول مقاهي الشيشة و يشيشون أشكال و ألوان و طلعات إستراحات و تلقى الحريم يلعبون بلوت و بعضهن قاعدات يطقن عود و الي تطق طبول و الي تستنزل

و الألعاب الرياضية و الله يعين لا ياخذون منا رياضة التطعيس ما بقى إلا هي ولا نروح و نلقى الثمامه كلها بنات و الواحدة تقعد تعلك بهالعلوك تقول ماكله علبه كاملة

و لا تستغرب مادام فيه بنات سعوديات يسوقن طيارات ( مهوب بس سيارات

) و بعضهم صاروا خيالات و يدعون النساء السعوديات على التفتح الأعمى و يصيرون زيهم و إنهم ناوين يسون نوادي لهم من أجل الدشارة و إفساد المجتمع السعودي بمباركة من الوليد بن طلال

و الله يعين لا ينقلب الحال و يصيرون حتى يوقفون عن الإشارات و يسوقون الدوريات و يتجندون بالجيش و البحرية

و الشرطة و الدفاع المدني و الحرس الوطني

بس تخيل لما يجي حفل الجنادري و تطلع لك وحدة أسمها أريج بنت هذال العتيبي و تلقي قصيدة بمناسبة مهرجان الجنادرية

ولا توقفك عسكرية و تقولك لك هات الرخصة و الإستمارة و أنرزع على جنب و بعدها تقولك إركب بنقطك بالحبس << أشوه إن كل العالم بيخالفون علشان ينامون بالناصرية

بس أحلى شيء منتخب الكورة يا أني فطست من الضحك على الأسماء تخيل منتخب النساء يفلح أكثر من منتخبنا الداج و يحقق كأس العالم لنساء قسم بالله بحط راسي بالأرض و أقعد أعييييييييييييييييييييييييييط و أقول يا حسافة الرجوله

<<و مع ذلك بيكون أرحم من أن الواحد يدخل السوق و يلقى وحدة تتحرش فيك و تقول ياهو يا حلو و تقط الرقم في جيبك

بس أهم شيء أن خديجة المولد و فطوم نور ما يطلعن لمشجعات ناديهن و يطاقن معهن و لا خديجة المولد تلكم المصورة

بس الله يستر لا تطلع لنا رياضيات في بطولة المصارعة و كمال الأجسام

عاد من يوقف قدامهم و المشكله يجيك واحد يتهور ويغازلهم و بقس ما يدري إلا مرقد بمستشفى الشميسي غرفة 407

و إذا على المشاريع ما عليك بسوي لي مشروع ورشة نسائيه تصبغ السيارات بالألوان البناتيه خاصة الوردي

و جنبه إكسسوارات سيارات نسائية

و شكمان يطلع ريحة عطور

و جنبه محل يحول صوت المكينة لصوت موسيقى بتهوفن

بس فعلا زي ما قلت يا هلالي الظهران أن الوضع الحين صار متأزم و يدعوا لتدخلات عاجلة لحل هالمشكلة العويصة <<< قالك مثقف

و الي صار لك مهوب غريب يا ما شفنا و شفنا في مستشفيات أشياء فاضحه و ياما نساء سعوديات تعمل في المستشفى و تلقى صوتها ضحكتها في أخر الدنيا لدرجه أنك تتروع من هالضحكه تخاف ديناصور

و كله كوم و التفصيخ و غز الإبر في أماكن مش ولا بد كوم ثاني

و حتى هم صار عندهم الوضع عاااااااااادي نعنبوا بليسكم خلوا الرجال لرجال و النساء لنساء و بلاش فلسفة <<< هلالي الظهران تخيل لو كان الي يدلك بدال الجنس الناعم و احد من الجنس الخشن و يا حبذا كان عربشي و صار صدرك يعورك من كثر العجن

الظاهر مب طاب المستشفيات مرة ثانية

و تشوف الحين الناس مشتغلين بحقوق المراء نعبنوا بليسكم الإسلام كرم المراء و حطها في مكانه في أعلى المكانات و حفظ حقوقها و عفتها و طهارتها و هذا من فضل الله و نعمتة علينا بين مدعين المثاليه و الافكار الهدامه تشوف حريمهم الله لا يبلانا صار البغاء عندهم زي السلام عليكم و صاروا يتاجرون فيهم و نزلوا من قدر النساء و خلوهم كالحيوانات تباع و مع هذا يأتي أصحاب الافكار الهدامة و يشد بحرية المراء ,, بس المشكله الي ماخذ التطور خطاء كل ما لبست أقصر كل ما كان أفضل

على الطاري من أكثر من ثلاث سنوات كنت داخل في أحد المستشفيات ******** ( مشفر

) و كنت مريض و مرقد و لسوء الحظ و في نفس الوقت لحسن الحظ كان المستشفى فيه بنات يتدربون على المرضى يوم دخلوا علي و انا أنسى الدنيا و لا حسيت بالمرض قاعد أشوف وش هالزين وش هالجمال ( بس الخوف إنه من المكياج لو يروح كان تحوم كبدي

) و الريحة الي فاقعه خشمي من قوة الريحة و أذكر ان خشمي كان مسدود و حاولت بإستخدام كل الأساليب الي تفتح تسدد الأنف حبوب أدويه مويه حارة فازلين حبحر شطه

بس ما فتح إلا من قوة العطر , نعنبوا بليسهم الظاهر كل وحدة قبل لا تطلع مفضية قارورة عطر إذا طلعت من الدمام شموها أهل الخبر

,, المهم و يقعدون يشرحون لهم و يمسكون يدي و رجولي و راسي و صدري و أنا في عالم ثاني

و المشكله إني مب لابس شي تقريبا

و أنا قاعد بحاله يرثى لها وفي موقف حرج و قاعد أتعوذ من أبليس

<< طبعا هو ما قصر علي الله يلعنه كل شوي قاعد يوسوس علي أقوله توكل تبي توديني في داهيه ,, يرد علي ما عليك أنا وراك ,, أرد عليه : أقول ما فلحت نفسك علشان تخليني أفلح يا له أذلف و أقعد أتعوذ منه إلين إنحاش و لا كانت حالتي صعبه أوي اوي أوي

,, و مع ذلك كله يهون من أجل هالفتيات يحصلون أعلى علامه و يتخرجون في سنة الأمتياز

فنصبر من أجل العلم و نكون من الذين ضحوا في سبيلة .

أخوك أبو اليساندرو

والنهاية... · #3 11/06/2007, 03:23 PM

والله انا عندي مشكلة في الموقع
وهذا حجز الين تتعدل

راااااجع لك

*********************************************************
باك لاطلق موضوع قريته
والله ان فيه اشياء كثيرة تستاهل اني ارد عليها

بس انا ابي اناقش الفكرة الرئيسية للموضوع

والله انه موضوع مضحك مبكي <<< الصدق انه ما ابكاني بس وش اسوي ما تجي مع مضحك الا مبكي

لا الجد زعلني
يا خي انا سمعت من ذولي العلمانيين في برنامج على الال بي سي
يقولون ان المراقص ما طلعت ارهابيين

الله يلعن ابو فنهم ..!!
طيب ايش طلعت يعني

مهندسين .. اطباء

تدري ايش اكثر شي يرفع ضغطي
لما تسمع احيانا حريم يطالبون المساواة مع الرجل
بأنه لازم يطبخ ويكنس ووو ووو وو

والعذر في ذلك ان المراءة تشتغل مثل الرجل ولا بينهم فرق

انا ما اقول ان شغل الرجال في بيته عيب
بس ان المرأة تطالب بكذا لا
يا خي هم الحريم اللي قالوا لازم مساواة ونبي نشتغل زينا زي الرجل

احنا يالرجال متنازلين عن حقوقنا في شغل المرأة >>> انا عارف اني بخسر كثير من الناس اليوم

بس هذي وجهة نظر

بعدين المستشفى هذا بشكل خاص
ما عنده ما عند جدتي

مترزز لي بهالبنات والاهتمام ماهو بذاك الزود >>> ما قلت انه ما هو باحسن من الحكومي بس الخدمة ما هي على قد الفاتورة

تصدق ان المسئولين عن قبول الموظفين الجدد انهم بنات
وان اللي ما يعجبهم شكله
ما يتوظف

اما سواقة المرأة

والله ما ظنيت في الثلاثين سنة الجاية انهم بيسوقون

لا هنت هلالي الظهران والحمد لله على السلامة

الـمـشـاغـب · #4 11/06/2007, 03:28 PM

حجز مؤقت.. عشان ولد جامعتنا الداشر المحشش

لي عودة إن شاء الله..!!

--------------------------------------\\

باااااااااااك

إقتباس


	لااحد يسألني وين الناس ومهو بشغلكم وعلى كيفي أطس وعلى كيفي أجي.. بالعربي مابي اشوف ردود من طقة الحمدلله على السلامه

قليل خاتمة

خلاص مهوب الحمد لله على السلامة

وش جابك أصلاً حارتنا؟ يالله فارق

إقتباس


	ولا وين الغيبات ولا قلب ولا بوسه ولا علاقه رومنسيه ..

متفائل جداً يا براد بت

إقتباس


	أقسم بالله غثتني هالشابه تقول كأنها ابوي وماسكه بيدي وبتوديني للمدرسه .. المشكله انها تروح للقسم الفلاني وتسلمني بيد وحده ثانيه واذا جيت طالع من هالقسم القاها تنتظرني.. ثمن تاخذني للقسم اللي بعده.. الله وكيلكم صرت في يدهم مثل الكوره يلعبون فيني ون تو .. والغريب ان غالبية الطاقم من الشابات السعوديات!!

ماسكة يدك؟

أشم ريحة خرفان هنا

طيب ليه ما وخرت يدك يالبريء؟ ولا خايف منها تهاوشك إذا سحبت يدك؟

إقتباس


	وبينما هي مستمره في التقليب قالت: افسخ ملابسك!!

كيف كيف كيف؟

ما أتوقع قالت كذا

يا أخي تأكد زين لا تظلمها... يمكنها قالت: لو سمحت افسخ ملابسك..!!

مو معقولة تقول لك افسخ بدون ما تقول لو سمحت

إقتباس


	قمت نزلت الشماغ ورجعت جلست على الكرسي!

وشماغك الحين هو ملابسك؟

أكيد فهمت يالخروف بس تبي تتأكد أنت ;)

إقتباس


	ناظرتني باستغراب وقالت: لو سمحت افسخ ملابسك واطلع على السرير!!

الله أكبر.. ظهر الحق.. قالت : لو سمحت

قلت لك أحسن الظن :p

إقتباس


	بلعتها وقلت هي اعرف وخلينا نشوف اخرتها.. قمت فسخت الثوب وعلقته واتجهت للسرير لكي انبطح.. التفتت علي بعصبيه ونفخت فيني: ياخي انت ماتعرف تفسخ زي العالم؟!!

يخرب بيت أبوها

والعالم كيف يفسخون الله يقطع سنين الألمانيين على سنين هتلر اللي خلفهم

إقتباس


	ارتسمت على ملامحها ضحكه مكتومه بغيظ وقالت: اسفه بس لو سمحت ممكن تشيل الفانيله وتروح السرير وعندك الغطاء وخلني اشوف شغلي (كنها تكلم بزر )

..

أشوف شغلي؟!!!؟

يا سآآآآتر :p

يا أخي موضوعك ذا.. الظاهر بأتصل على الهيئة يجون يشيلونك أنت وإياه

إقتباس


	الشاهد انها غسلت يدها وبدأت تدهن من هالكريمات على صدر خويكم الطاهر.. وانا اناظرها شوي وأغمض شوي.. او أغمض شوي وأناظرها شوي.. ومافيها شي لو عكستها ترى كلها واحد لااحد يدقق (<< طيب ياخي احد قالك شي يومك تسوي هالزحمه:p ).. بالمناسبه كانت ترتدي لباسا فاخرا.. هو عباره عن بزة (الا سؤال محيرني من زمان.. الحين البزه هي التنوره؟:p ) وتيشرت واسع من الاعلى ولابسه هالبالطو ومغطيه شعرها بطرحه فقط..

ما فيها كلام.. الهيئة وصالون الهيئة بيتفاهم معك

والله مشهد فيلم مصري ذا - والعياذ بالله-

جيل فاسد للأسف.. كنت متخذك قدوة لي يالهيس

ما دريت أنك خروف مثل هامور

إقتباس


	ففكرت بأن أطلب منها ان تقول " زوجتك نفسي ياهلالي الظهران" (<< اي بنت قرت هالجمله تعتبر زوجتني نفسها .. ومنيب مطلق الا بــ50 الف ريال;) )..

الله يرج شيطانك

طيب الأشناب اللي يقرون هالجملة وش يكون مصيرهم؟

إقتباس


	انتهت من الفحص وبدأت تشيل الاسلاك.. فكسرت جدار الصمت بسؤال وجيه: من اللي بيمسح هالدهان الحين؟ قالت: من يعني اكيد انا.. قلت: الله يعطيك العافيه.. على هالخدمه مابقى الا تضبطيلي رويس معسل ( والله اني قايل هالجمله بعفويه وتوقعت بقس.. قرصه.. عظه.. صرخه.. اي شي).. قالت: وايش تبي تفاحتين ولا عنب؟ انا تنحت شوي على هالرد غير المتوقع.. ثمن قلتلها: ماشاء الله عندك خبره .. قالت: ليه انتم شايفين انفسكم؟ وش ينقصنا عنكم.. جيزنا جيزكم!!

يا سلاااااااااام .. يا سلااااااااااام.. إيه شبكها وأمزح معها وبعدين تعال أنصح

وش فيها لو أنك مسحت الكريمات أنت؟

تصدق؟

بأراسلك بالخاص عشان آخذ معك كورسات

( أمزح .. أمزح .. أمزح..) << بالثلاثة عشان ما تتعبى الرسايل الخاصة بالنصايح

إقتباس


	يا الربع والله اني منصدم من اللي شفته بعيني!! هل يعقل الى هالدرجه وصل حالنا المايل بالمراكز الصحيه؟!

واللي يرحم أمك لا يكثر

قاعد تشبك وتبربس مع بنت الناس ومو بعيد تكون رقمتها..! وتجينا الحين تقول منصدم ما منصدم

على مين تلعبها؟ على مين يا ابن الناس؟ عيوني تعذبها ... ولا ترحم الإحساس.. عاشواااا

إقتباس


	وندخل الملاهي والهاوي يلتفت ويناظر فيهم.. لاتحسبونه خق او يكحل لا ابشركم مستحقرهم (يعيشون الشباب الثقل )..

يا عيني يالثقل يالهاوي

لا عاد الهاوي ألف من تتمناه.. بس مشكلته شايف نفسه وما يعطيهن وجه

إقتباس


	[مخرج] اللهم من اراد الأسلام والمسلمين بسوء فرد كيده في نحره ...

اللهم آمين..!!

إقتباس


	تقبلوا تحياتي وأشواقي وقبلاتي.. أخوكم أبو سباستيان .. وداعاً جزيلاً

تحياتك وأشواقك مقبولة..

أما القبلات وفرها لزوجة المستقبل.. لأننا مستغنين عنها.. من زين الخشة قاعد توزع قبلاتك؟

الله يسعدك يا هلالي الظهران مثل ما أسعدتنا بموضوعك الممتع.. واعذرنا على الذبات والكلام القوي..

لأن ما عندي يمه ارحميني.. الكلام اللي أقوله أقوله ما عندي في أطلق شنب

قصدي.. أني أصفي حسابي معك.. لأن ردودك دايم مثل وجهك على مواضيعي

تقبل تحياتي وسلاماتي

هامور البورصه · #5 11/06/2007, 03:37 PM

هلالي الظهران والله يانك مرجووج

اقسم بالله ضحكة ضحك يوم تقول وش الي افصخ

انا من بكره بروح اسوي تحليل يا شباب من يخااويني

ولا في المستشفى السعوودي الالمااني

هلالي الظهران رديت عليك بسرعه لاني بروح اصلي الله يعطيك الف عاافيه

معني ماكملت الموضوع كله

وتشكرااتي لك

أول العنقود · #6 11/06/2007, 03:42 PM

هلا بعودتك يا هلالي الظهران

و بالنسبة لموضوع بني علمان اللي هم (( الفاهمون للدين بمذهب الغرب)) لا بد من أننا نجمعهم و نناظر معهم لكي يا إما نعيدهم للطريق الصحيح أو نعيدهم للطريق الصحيح ما في إلا الحل هذا <<< نناظر معناها نحاور لا يجي أحد و يقول وش نناظر

و دمتم سالمين

الكناري الأزرق · #7 11/06/2007, 04:02 PM

و عليكم السلام و رحمة الله و بركاته

ههههههههه ..

منتب صاحي ..

إقتباس


	على طاري العواصف والأعاصير.. جاتني رسالة sms تقول: نذل يهدي أهالي سلطنة عمان أغنية جاكم الاعصار ماشين يعيقه ..

على طاري اعصار عمان ..

انا اتوقع ان السبب بالاعصار شغالتنا !

لانها قال ابروح اندونيسيا و ارجع لكم ..

يوم راحت جاء اعصار تسونامي بوجهها

و مير ترجع لنا .. و قالت ابروح اندونيسيا ثاني مره ..

قلنا روحي .. يوم راحت هناك نقولها تعالي .. قالت طس انت وياهـ ..

منب راجعه .. ابروح لاختي بعمان .. و يوم راحت يستقبلها الاعصار ثاني يوم خخخخخ

ياهي حزتنتي .. منحوسه قوه
بس تستاهل .. ليش تهج ,,
<=== بلا و الله من طلباتك اللي ما تنتهي

إقتباس


	أقسم بالله غثتني هالشابه تقول كأنها ابوي وماسكه بيدي وبتوديني للمدرسه

هنيالك يا شيخ .. وش اللي مزعلك

إقتباس


	المهم دخلت وسلمت وجلست على الكرسي.. ردت السلام وسكتت شوي وهي تقلب بالاوراق.. وبينما هي مستمره في التقليب قالت: افسخ ملابسك!!

ههههههههههههه ..

انا قلت عمر الحين خربها لكن ربي سترها

<== وش يدريك ممكن مغير بالروايه

قفله /

الله يقطع ابليسك تهيضت البنك السعودي الالماني على قولك ما بيني و بينه غير جدعه حصآ

برب ابروح احلل

التسناري

abdulmajeed_1 · #8 11/06/2007, 04:17 PM

.
.
STOP

.
.

ابو لخمــــــــه .. خذ هالأغنيـــــه مزمز عليها شوي لين أرجع لك ..
بس إنتبه تراها تثير الشكشكه لكل الشنطـــــــات هههههههههههههههههههههه

ابو نورة : الوووووووووو مساء الخير برنامج مايطلبه الفاااقدون .؟

رنا القاسم : هلا حياتي .. قلبي .. عمري ابو نورة إيه وصلت .. كيفك ياروحي .!؟

ابو نورة : أقول تلايطي بس وعطينا أحلى أغنية لشمس بعنوان ( طأطأه ) وأهديها لعمك ابو لخمه
رنا القاسم : بعد عمري يبو نورة طيب انا ماتهديلي

أبو نورة : بتحطين الأغنية ولا أطأطأ جبهتس الحين .. !؟
رنا القاسم : إلا بحطها بس حياتي أرجووك هات رقمك !؟

ابو نورة : انقلعي بسس :p .. !!

_________________________________________

طــــأطــــــأه

_________________________________________

وبالررراحه ع الشنطات ياولد

تشششششآإوووووو > برررب

الهلالي دائماً · #9 11/06/2007, 04:33 PM

[COLOR="DarkSlateGray"]
هلا وغلا صديقي

ماشاء الله منور المنتدى هلالي الظهران ..

حقيقة موضوع جميل وقضية واقعية بنكهة الدجة وخلطة عموري باشا

_____________________________

الله ينور عليك صديقي ابو ظهران تصدق انك نورتني من حيت لاتعلم !!

أنا منذو مبطي ودي اسوي تخطيط لقلبي وانزله مساهمات للحبايب ..

>>> فاهم التخطيط خطأ ;)
ودام ان خدمات البنك الألماني راقية إلى ها الدرجة فلعلي اروح يمهم
واهم شي أنهم يمسحون الكريمات بعد التخطيط خخخخخ

عاد الزين اني عندي تامين يعني بخليهم يكشفون علي من راس الى أخمص قدمي وببلاش ;)

وبصراحة مثل ما ان البنات فيهم داجات ومكربنات الشباب نفس الشي تلقى بعضهم عنده مصايب الدنيا السبع ..
وعلى قولتك بني علمان وهم من الرجال ومن النساء اناس دنست ادمغتهم فما عادوا يفكرون الا بالفساد ونشره أصلحهم الله او قشعهم

اما سلفة سواقة المرأة للسيارة فما فيها شيء وما اعتقد انها مشكلة بحد ذاتها
لكن بالتأكيد سيترتب عليها مفاسد كثيرة ..
وانا اشوف انها كويسة خاصة اذا بتحل مشكلة البطالة

وترى خيالي شطح معك ان اليوم في هجولة في الفروسية
بقيادة الكابتنة هيلة عوض والمعززة عمشة مرزوق ..

ولعلها مع اول نطلة دخلت في اول اسطبل خيول على اليمين

بس خل عنك ياهو في بنات يسوقون ازين من بعض الرجال

وعلى طاري انتصار خوجة وفوزية معاذ ياهم البنات لعبهم اقشر

من جد مرتن لعبت مع اخواتي وانواع التكسير واحدة تنبرش كنها منتشري

والثانية تركض بسرعة مليون وهي مطفية الانوار ;) والثالثة بدال ماتشوت الكورة تشوت رجلك :p صراحة احس انهم فاهمين الكورة غلط ههههه ياناس الكورة فن وذوق واخلاق وتسامح وحب ..

اخوي الحبيب عمر مشكور موضوعك المتنح بس الله يهديك

مانزلته الا في ايام الاختبارات تبي تشغل طلابنا عن العلم وطلبه

وختاما الحمد لله على سلامتك
بس وين كنت رايح او من وين كنت جاي >>> ياشين الملاقيف .. ;)

دمت في حفظ الله ورعايته ,,,

البارق · #10 11/06/2007, 04:49 PM

هلا والله بهلالي الظهران اللي يكتب وهو مرتفع ..

<--- أقصد مرتفع بالجو يعني راكب طيارة ..

الله من واحد وواحد قال ودي أشيك على قلبي وأسوي له تخطيط ..

نجي للموضوع .. بصراحة ما أدري وشلون أرد هل من البنات وعمل الصحة وما تعانيه البنت من مهازل من الجميع سواء المراجعين أو المسئولين ..!!! والله المستعان ..!!!

أو لفكر البنت - الله يصلحها - واللي مضيعها أبو مصعب واخوياه ..!!!

أو من البنات ومساواتهم بالشباب في كل شيء ..!!!

ألا على طاري هالنقطة ورى ما يساوونهم بالبطالة ويقعدون ببيوتهم ..

وإلا من الهاوي وأنت تسحبه مع شنطته..

صدق ..فيه ناس طايرين بالعجة .. وممكن يحسبون هاللي يصير من سب للدين أو الحرية المزعومة يسحبونها موضة ولازم نواكبها ..!!!

الله يخلف على أهلهم اللي ذا تفكيرهم ..هذا اللي أقدر أقوله ..

في النهاية .. من جد فرحت يوم شفت يوزرك يالداشر ..

تحياتي لك ،،،

abdulmajeed_1 · #11 11/06/2007, 04:57 PM

^
^
^
^

ايه من جد قسم بالله إن ايميلك أنفظ عنه الغبار بقائمة المتصلين .. شوي وأتهور ذاك اليوم وأعطيه بوز يحبه قلبك

أضفتك أيام نكي الأول على أيام الثانوي .. والحين باخلص الجامعه ولاعمري شفت خشتك اون لاين

..

يارجال لو أحلف إنه متسلفن هالايميل ومهب لك

مطيع · #12 11/06/2007, 05:06 PM

أما انا فلن تكون لي عودة

أكتفي ببعض الاتفاق مع رد المشاغب

+

اعجاب بكاتب الموضوع اقصد اسلوب الطرح الذي انتهجه كاتب الموضوع كالعادة يثبت في كل مرة بأنة رقم واحد في مثل هذه النوع من الطرح على الأقل هنا

تغريد · #13 11/06/2007, 07:31 PM

هذا انت

لاهلا ولا مرحبا

ابغا افهم انت اش جابك

>>>تنفيذا لرغباتك :p

إقتباس


	نذل يهدي أهالي سلطنة عمان أغنية جاكم الاعصار ماشين يعيقه

استغفر الله

الله لايبلانا بس ويعينهم

ياطول موضوعك مشاء الله

واذا بنقتبس ونعلق والله مابنخلص

مواضيعك تضحكني من قلب

الي يرجع جايب العيد من اي اختبار يقرا مواضيع الظهراني

يعطيك العافيه ابو سباستيان

ولا تجي ثاني

الا اش سالفة التعديل

F I N A L · #14 11/06/2007, 08:25 PM

إقتباس


	السلام عليكم أجمعين ولاعدوان الا على الظالمين.. وبعد:

وعليكم السلام ورحمة الله وبركاته

إقتباس


	فقد وردني من بعض الأوباش بان هناك من سأل عني.. فأقول والله الهادي الى سواء السبيل: مساكم الله بالخير جميع.. يا اخوان متى تتركون عنكم اللقافة والتثريب؟! لااحد يسألني وين الناس ومهو بشغلكم وعلى كيفي أطس وعلى كيفي أجي.. بالعربي مابي اشوف ردود من طقة الحمدلله على السلامه ولا وين الغيبات ولا قلب ولا بوسه ولا علاقه رومنسيه ..

الحمد لله على السلامه وين الناس

إقتباس


	(<< اي بنت قرت هالجمله تعتبر زوجتني نفسها .. ومنيب مطلق الا بــ50 الف ريال )..

هذا ايش يسمونه نصب أو تجاره

إقتباس


	وكثييير من النقصان

ايش اللّي نقصته علينا

اكتفي بالرد على هذا

لاني لو أرد على موضوعك كامل راح أطلع كل شي بقلب على العلمانيين الله ياخذهم

(( اللهم من أراد اخراج نساء المسلمين من بيوتهن ونزع حجابهن

اللهم إن لم تكتب له هدايه

اللهم فأخرس لسانه وشل أركانه

اللهم ألبسه أنواع الألم

اللهم اجعله عبره لغيره ))
اللهم آمين اللهم آمين

تقبل مروووووري

Mr.DL5 · #15 11/06/2007, 08:49 PM

حجز ..

_____________

رجعنا ..

إقتباس


	لااحد يسألني وين الناس ومهو بشغلكم وعلى كيفي أطس وعلى كيفي أجي.. بالعربي مابي اشوف ردود من طقة الحمدلله على السلامه ولا وين الغيبات ولا قلب ولا بوسه ولا علاقه رومنسيه ..

بقلعتك ..

موب الحمد لله على سلامتك ..

إقتباس


	جاتني رسالة sms تقول: نذل يهدي أهالي سلطنة عمان أغنية جاكم الاعصار ماشين يعيقه ..

خخخخخخخخخخخخخخخخخخخخخخخخخخخخخخخخخخخخخخخخخخ

تصدق هــ الرسالة جايتني انا بعد :p ..

إقتباس


	قالت: افسخ ملابسك!!

خخخخخخخخخخخخخخخخخخخخخخخخخخخخخخخخخخخخخخخخخخ

ودي اشوف خشتك يوم قالت لك افسخ خلاقينك

خلاقينك : عفشك الي انت لابسه

..

إقتباس


	وش اللي ماتفسخ زي العالم؟ شايفتن التفسيخ طلعت بر!! بعدين وش افسخ اكثر من كذا؟!

هههههههههههههههههههههههههههههههههههههههههههههههههههههــ

علينا يا هلالي الظهران ..

إقتباس


	فكسرت جدار الصمت بسؤال وجيه: من اللي بيمسح هالدهان الحين؟

تبي توهمنا ان الي كان شاغل بالك هــ الدهان ...؟؟

خخخخخخخخخخخخخخخخخخخخخخخخخخخخخخخخخخخخخخخ

إقتباس


	قالت: ليه انتم شايفين انفسكم؟ وش ينقصنا عنكم.. جيزنا جيزكم!!

احس انك قمت وبوست راسها من الخوف

خخخخخخخخخخخخخخخخخخخخخخخخخخخخ

إقتباس


	اللهم من اراد الأسلام والمسلمين بسوء فرد كيده في نحره ...

امين ..

إقتباس


	تقبلوا تحياتي وأشواقي وقبلاتي.. أخوكم أبو سباستيان .. وداعاً جزيلاً

طيب انا منيب متقبل قبلاتك واشواقك

____________________

وتسلم يا هلالي الظهران على هــ الطرح الرائع ...

ولا تزعل علينا .. ترا ما نعرفك بس قطيناها ميناه على طول

وتقبل تحياتي وقبلاتي ..