هلا والله الكلاسيكي الموضوع كان (( رساله )) غلافها (( فكاهي )) ومضمونها ((محزن ))
تعليقي على الغلافه
بوش اتصل علي اول ما رديت عليه قال (( دق دق علي ما عندي رصيد )) عاد ما كنت فاضي له وشوي وتجيني منه (( بليز كول مي ... )) قفلت الجوال ونمت .
تعال عاد وش كان يبي مني ، ما قال لك شي عني ، انا سمعت انه بيقصد سياره ويبي احد يكفله
واذا على الخنفشاريين فخذ هذي
واحد من الشباب الله يهديه كل شوي وهو صالخ وجهي بوحده انواع الصواريخ (( صواريخ ارض - جو )) يقول لي مره ان ابوه كان مسافر لديرتهم ويوم وفات الملك خالد اتصلوا العمل على جواله يبونه يحضر لهم يلعن بليسه ذاك الوقت ما كان فيه بيجر حتى السالفه طويله بس هذي خلاصتها .
** مضمون الرساله
اخوي عادل الخطر مو من بوش وشلته الخطر من اللي بيننا هنا .
انا بقول لك سالفه حقيقيه حصلت لي
كنت طالع مع الشباب قبل مده يمكن 6 شهور
طالعين لمهرجان ريد بول اللي في العاذريه طعس الهرم وصلنا بعد صلاة العشاء ورحنا وتوضينا وصلينا يوم جينا نطلع من المسجد جونا اثنين يتشبهون بالمطاوعه قالوا عندنا تكيه حلوه تصلح لكم ومسابقات وجوائز وما ادري ايش وعندنا مشايخ وعندنا .... وعندنا المهم انا ما بغيت اروح معهم الا الشباب قالوا بنروح ونشوف وش عندهم ؟
رحنا لهم في مخيم فيه حدود الـ 20 شاب متوسط اعمارهم 17 سنه حتى ان فيه ولد صغير عمره 13 معاهم (( هذا وين اهله )) ... تكمله القصه قد تحجز لي مكان خلف الشمس بس ابشركم ما قعدت 30 دقيقه الا ونا طالع من عندهم ... وجاني خبر بعدها بمده انهم مسكتهم الشرطه. الله لا يوفقهم بعد ما غرروا بكم واحد
الثانيه:
دكتور عندنا راايح وطي مع هيفاء وهبي ومع اغنيتها بوس الواوا وكل ما صار شي قال بريطانيا وبريطانيا ، عاد صجنا بالفيديو كليب فنانه بريطانيه ويقول لنا عن طريقة تصويره والتمثيل فيه (( يقول عيني عينك )) .
اخيراً:
اخوي الكلاسيكي انت سبقتي في الفكره.
احنا مقبلين على عطله واكثر الشباب مو ماخذين ترم صيفي ولا حتى يشغلون وقتهم بشي يستفيدون منه
المفروض ان الدوله توفر لهم اي شي يشغل وقتهم ، الحين امارة الرياض تهورت وسوت ساحات رياضيه
وازعجونا فيها ... الشباب والشباب ما دروا ان الساحات الرياضيه ارضيه مطاطيه وكوره ويقولون وفرنا لهم اماكن ترفيهيه . لا واكثر اللي يجون لها عوايل تحصل سبع ميه عايله فيها
تحيه لامارة الرياض والرئاسه العامه لرعاية الشباب (( رعاية الكوره بس ))
المهم ماعليك بالطويلة الزبده اذا شفت شي اكتب كانك بتنزلة موضووع وبالاخير سو حفظ وانساه وتصير عبرت عن رايك حلو يشاركونك الاخرين بس احيانا يكون الموضوع مو يستاهل للنشر
اكيد اختي مو كل شي يستاهل الطرح هنا .. ولا فيه اشياء بحاجه ان يكون تحتها 100 خط ..
إقتباس
بوش مره وحده عسى ماقلت انك بالزعيم ماودنا حروب الواحد يالله يمدد رجليه وش لنا بالشقى عسى ماخربطت عليه تراهم بسم الله مايرحمون >>>تحس اني صدقت هالمكالمه
لا ماعليك .. قايل بالعالمي
وياحبهم للفشخره رحت للمكان الفلاني زرت الدولة الفلانيه هذا التي شيرت من المحل الفلاني
واتفق معك اختي بعض اللي يفشخرون بالسنتهم ماتحصل هالامور صدق .
يعني كلها من تاليفهم ..
من ناحية هالجيل .. اعتقد ان الشي اللي يمكن يحل مشكلتهم التوعيه .,,
والتربيه مثل ماقلتي لها دور ..
واكيد من المعروف ان اللي يحالو يكمل نفسه باكاذيب يشعر بالنقص ..
إقتباس
اهم شي القنــاعه في هالزمــن علشان نعيش ولاماراح نرتاح اذا عيونا على غيرنـا
للاسف كنز القناعه . اختفى او قل ..
الهنوف لو سكتنا عن الخنفشاري راح يتمادى في كذبه ..
اما لو وقفنا ضده راح يتغير .
إقتباس
اقول من و...و....>>>> اللقافه ومادراك ماللقافه
خلي عنك اللقافه
لك لف شكر ختي الهنوف على المرور الجميل ..
والمشاركه الرائعه
المكان: ظرف مكان منصوب وعلامة نصبه الفتحة الظاهرة على آخره
مشاركات: 7,956
عادل أنت ما رحت لبوش .. و أنا عارف إنك كذاب .. لأني كنت عنده من كم يوم ولا جاب طاري أنك مسير عليه :p
بس هو يسلم عليك سلام كبير و يقول و ينك يالقاطع
بس لو تبي الحقيقه موضوع الكذب و الفقش صارت عادة متفشيه لدى بعض الناس
و الغالب تكون عندما يكون الشخص لديه عقدة نقص فيبداء في خلق الأكاذيب و كأن الي قدامه بيصدقونه و هو ما يدري إنه متى ما مشى راحوا يضحكون عليه
و طبعا أغلبهم يكون أما كاذب من الأساس يعني هو مختلق القصه و الحوار و السيناريو
و أتذكر واحد كان معنى في الجامعة من قبل ثلاث سنوات ما عمره قال كلمه صدق و المشكله الكذب واضح و عيني عينك لدرجه أنك تقول هو و الكذب وجهين لعمله واحدة و هذا ما شاء الله في كل حي عندهم قصر , و ما بقت سيارة في العالم إلا و عنده و ما بقى دوله ما طبها يمكن حتى الحين صادق و مهوب مشكله نصدقه بالقوة لكن المشكله إن كذبه واضح يفهمها الصغير قبل الكبير يعني مرة قال لنا أنه راح أمريكا سنه كامله و درس فيها الثانوي .. بعدها بفتره قصيرة قال إنه راحي لصين ثلاث أشهر و مع ذلك مهيب مشكله بصدقه بالقوه لكن المشكله إنه ما يعرف يتكلم أنجليزي
بس أحلى شيء لما توهقه و يبداء يعطيك التصاريف و الأعذار و أنت تضحك ,, و قد مره رحنى المطعم الي جنب الجامعة و قلت لواحد هااااااا وش أخبار فلان قال لي : يا أخي لا تجيب طاريه قسم بالله ما أدانيه كل ما قعد معنى لازم يكذب لدرجه أني كل ما شفته جالس ما أقعد جنبه ( هذا قد مره عطاه أياه في وجه و قال له : تراك أبلشتنا )
أو شخص صادق لكنه يبالغ يعني كلمه واحدة صدق و يعطيك معها 99 كذبة و يقعد يبهر و يتبل
كمثال واحد يروح لحديقه الحيوان و يشوف الأسد و يجيك يقول لكم : طبيت عند قفص الأسد و تصارعت معه علشان أتسلى
و طبعا ألاحظ هذا الشيء لدى الأطفال بكثرة يعني دائما ما أسمع من أطفال أخواني مثل هالأمور و أتقبلها بإعتبارهم أطفال و توهم ما أستوعبوا و هذا شيء طبيعي و مقبول لكن المشكله لو الواحد شيب و هو على هالوتيرة
و الحقيقه أنهم يكذبون لكن المشكله الي قدامهم مهوب مصدقهم على قوله المثل " كيف عرفت إنها كذبه قالو من كبرها " يعني من كبرها ما تنبلع و الأدهي إنهم يحطون أنفسهم في موقف بايخ و سخيف لأنه غالبا بيكون سخريه من قبل زملائه أن ما كان في وجهه بيكون من ظهره ,, و حتى لو قالوا أي كلام صحيح بعدين ما أحد بيصدقهم
و يمكن يكون الشخص تعود على الكذب أو المبالغه من يوم هو صغير و كبر عليها و لازمته و هنا الأفه يعني ما يقول لك شيء صحيح و يظل يكذب
على فكرة الواوات تسلفتها من الهنوووف
ياحبي لك يالهنوووف
طلعت من الناس المذكورين آنفاً
لابجد هذولا الأشخاص أحنا سبب من أسباب إنتشارهم
وطبعاً التربية وضعف الشخصية تلعب دور
أتكلم عن التربية ليس بالظرورة أن يكون الوالدين غير جيدين
بالعكس ممكن يكون متدين وأخلاقة عالية لكن ماعرفوا يلبون جميع أحتياجات
أبنائهم العاطفية والنفسية وإهتمامهم المتزايد بالمادية
لوقلت لشخص أبنك أنحرف وش أول كلمة يقولها
ماقصرت عليه بشي
لابس أحسن لبس آكل أحسن أكل
كلها مادية
لكن متى آخر مرة قلت لولدك أحبك
بتكون مندثرة مع أيام الطفووووووووله
حب المظاهر .. مشكله منتشره حالياً في المجتمع وبكثرهـ .. وليست ( حكر ) ع الشباب بس يعني يا ما تلقى عوائل يتفاخرون بأشياء فووق طاقاتهم ..
( قلة ) من شباب اليوم للأسف أصبح تفكيرهم ( سطحي ) .. وكل همه ( سياره ) آخر موديل وجوآل آخر نوع .. صحيح ( المؤمن القوي خير من المؤمن الضعيف ) واللي عندهـ سيارهـ فخمه أحسن من غيرهـ .. بس لا تصير كل همنا .. فيه ( أمّه ) تنتظر من يحمل ( همها ) و يشفي ( غليلها ) ..
لن نعلق أخطاءنا كالعآده على شمآعة ( المؤامره ) .. بس بالتأكيد ( العالم الغربي ) المتربص بـ نا وشبابنا .. له دور ( مهما صغر ) في ذلك .. باغراق الاعلام العربي بالمواد الفاسده و ( الأفكار ) المنحلة .. وغيرها من الوسائل اللتي لا تخفى على من تفكر ..
هلا هلا بالكلاسيكي
بوش مرة وحدة طيب اتوسط لناعنده -------> للحين انا مصدق....................... بس طلعت من هيّن
بس والله انت صااادق كلن همه صار سيارة جديدة وكالة وتلقاه اخرتها ظهره بينكسر من الأقساط وبنزين ماعنده فلوسه يعبي 91 لين ماتخرب
خخخخخخخخخخخخخخخخخخخخخخخ------> ماتحسون انني مجرب
لا ولا الجوال يشتري اخر موديل واخرتها مفصول واستقبل
واذا رصيد مافيه شي يتصل عليك رنة ويقفل
خخخخخخخخخخخخخ والله حالة
الناس صارت سطحية مظاهر بس والله تمشي حالك كذا وماتتفشل مع الناس
حياك الله ياالكلاسيكي ,, اشتقنا لمواضيعك من زماان عنها ,,
وكالعادة مواضيع في الصميم تناقش اوضاع شبابنا وهمومه ,,
من ناحية تلك الفئة التي تتظاهر بما ليس لديها ,, فهؤلاء اصنفهم مرضى , لا يقدرون ذواتهم ولا يحترمونها وينظرون لها نظرة دونية ويشعرون بالنقص , ويحتاجون لعلاج نفسي فهم يعتقدون بأن قيمة الشخص من قيمة مايملكه ,,
لا يجب علينا ان نسخر مما يتفوهون به , بل يجب أن نصحيهم ونوعيهم أو على الأقل أن ندعو الله أن يشفيهم مما ابتلاهم حتى لا نكون عرضة لما أصيبوا به ,
لا غرابه .. فـ هذه الفئه تتميز بـ حب الذات في شخصيتها ,, وحتى تواكب عجلةَ العصر عليها ان تُثبت خطوتها حتى لو كانت ( حافية القدمين ) فـ الاهم ان نكون معه هؤلاء دونما رؤية الضرر والجانب الاخر .. فـ الافلاس ماهم عليه .. والغنى غنى النفس .. بـ الامس رأيت احدهم كان في ايام الجامعه يركب سيارة فارهه .. ومظهره يوحي بـ ان البنكـَ ضاقت به الارض من مبالغه المودعه ...!! ولكنه اليوم اصبح اكثر من عادي .. فـ سلمت عليه سلام المشتاق والحديث يجر الاخر وبات يبادرني بـ السبب بـ قوله ( ابشركـ عقلنا وتزوجنا ) ايقنت ان لديه قناعه انه فيما مضى لم يكن شخصا اعتياديا ... فـ العوامل النفسيه وفلسفة المجتمع والرؤيه الطبقيه من اهم الاسباب وراء نشوز هذه الصفه لدى البعض ,, اجدها اطلالة رائعه تمثلت في بروز معرفكـَ النقي في هذا التوقيت الذي اشتقنا لـ رؤية نقاء يطفو على سطحِ الجمال ,, فـ لكـَ تحيتي الصادقه على هكذا اسطر .. ودائما متألق وكل الدعوات ان تكون بـ اتم الصحه والعافيه ,, لكـَ امنياتي ودعواتي بـ دوام التوفيق ,,
..!!
يلعن بليسه ذاك الوقت ما كان فيه بيجر حتى 
,, و قد مره رحنى المطعم الي جنب الجامعة و قلت لواحد هااااااا وش أخبار فلان قال لي : يا أخي لا تجيب طاريه قسم بالله ما أدانيه كل ما قعد معنى لازم يكذب لدرجه أني كل ما شفته جالس ما أقعد جنبه ( هذا قد مره عطاه أياه في وجه و قال له : تراك أبلشتنا 
الوضع العادي
