نادي الهلال السعودي - شبكة الزعيم - الموقع الرسمي

- منتدى المجلس العام (http://vb.alhilal.com/forumdisplay.php?f=1)

- - بطاقة دعوة لحضور مناسبة عزاء!! (http://vb.alhilal.com/showthread.php?t=415308)

leo messi

هلا ومسهلا ..

إقتباس:

بس ترا هذي عادات وتقاليد يعني لو يجون ناس يعزون عند اهل المتوفي
ومايحصلون ربعه عنده بيقولون امحق ربع مايوقفون معه بمحنته

هذا البلا انها عادات وتقاليد!
الاقارب والجماعه المقربين من العائله هذولا مانختلف على ضرورة تواجدهم وحضورهم خلال أيام العزاء ..

لكن شغل الكشخه وجمع أكبر عدد من الناس عشان والضيافه الفاخره هذا اللي ماله سنع..

الله يسلمك ياغالي، وتشكراات لمشاركتك:)

_____________________________

أبوراس

هلا وغلا ..

إقتباس:

ولا حرج عليهم أن يصنعوا لأنفسهم الطعام العادي لأكلهم وحاجاتهم، وهكذا إذا نزل بهم ضيف لا حرج عليهم أن يصنعوا له طعاماً يناسبه لعموم الأدلة في ذلك، ويشرع لأقاربهم وجيرانهم أن يصنعوا لهم طعاماً يرسلونه إليهم؛

رحم الله الشيخ العلامه ابن باز واسكنه فسيح جناته..

اللي يقرأ السطرين اللي راحت بدقه، يفهم أن الشيخ -رحمه الله- لا يرى المبالغة في صنع الولائم ، ولا ضرورة صنع الطعام للضيف وانما أباحه لمن أراد ذلك ..

كما قال -رحمه الله- يشرع للاقارب والجيران أن يرسلوا الطعام لأهل الميت ، ولم يقل أن يشاركوهم في هذا الطعام.

الله يسلمك يابوراس، وتشكراات على اضافتك:)

_____________________________

فرصه ضايعه

هلا ومسهلا ، الله يحييك ..

إقتباس:

في العزاء ما أتوقع أن فيه ناس غريبين بيجلسون كثير

على حسب معنى " غريبين " ..

بالنسبة لنا يجون ناس هم من الاقارب البعدين (ان صح التعبير) والاصدقاء المقربين ، وهذولا ينحرج الواحد من تواجدهم ومكوثهم بحيث لازم يكرمهم ويقدم لهم ضيافة درجه أولى! بعكس غيرهم اللي نمون عليهم ولا ترهقنا ضيافتهم..

إقتباس:

أما سالفه تخصيص وقت ماأشوف لها سنع

الوقت يخصص للغربين على قولتك مهوب للأقارب..

ولو قلنا انه من بعد العصر الى العشاء فهذا وقت كافي ، وبهالحاله نكون ما خصصنا وقت بقدر ما نظمنا الموضوع شوي وعرفنا وش حنا عليه، أما أجلس أستقبل المعزين من أول النهار الى 11 بالليل فهذا متعب ومقلق جدا بالنسبه لي..

إقتباس:

بس عادي الرسول قايل ((اصنعوا لآل جعفر طعاماً فقد أتاهم ما يشغلهم))

انا ما قصدت انه ماله داعي يتكفلون بموضوع العشاء، بالعكس هذا شي ايجابي وفيه تعاون وتخفيف على أهل المتوفى ، لكن اعتراضي كان الوقت والمكان اللي كنا فيه (طرف المقبره) ، يتناقشون وكأن همنا الاول هو من يجيب العشا !! ، في تلك اللحظات المفترض على الناس السكينه والانكسار للخالق مهوب لجلحه بطرف المقبره..

إقتباس:

ناس الحين تجيب بوفيهات مفتوحه وحركات شوي ويصير عرس

سخافه وموتة قلب ، أجل يتوفى لي قريب أو عزيز وأروح أرتب بوفيه عشان أكشخ به قدام العالم!!!

إقتباس:

لو ما الواجب كان ماطبيت عليهم

بالعكس وانا اخوك ، تقديم العزاء شي ضروري والمفروض اننا نروح بطيب خاطر ورغبة أكيده في مواساة الناس والتخفيف عليهم بدون ما نثقل عليهم ، و أهم من هذا كله الدعـــــــاء للمتوفى وأهله ، وتذكير أنفسنا بأننا سائرون لهذا الطريق ..

واياك ، وتشكراااتي لك:) بس انتبهي اذا رحتي تعزين لا تقولين ياسفابه:D

_____________________________

الوسمي

هلا ومسهلا ..

وتشكراات لمشاركتك:)

على فكره اسمك زينs60s

_____________________________

الكلاسيكي

يا هلا والله وغلا بالطبيب الخاص ..

إقتباس:

والعاده ان النساء هم الاكثر ضرر .. مايدرون يتقبلون التعازي ولا شغل في المطبخ !!

اي والله صدقت ، اذكر الوالده ماغير رايحه جايه من المطبخ الى مجلس النساء !!

إقتباس:

تصدق اذكر في عزاء عمي الله يغفر له يتكلمون عن مباراة الهلال والنصر !!

ياخي هذولا بغض النظر عن ان قلوبهم ميته، تحس ان مافيهم مرجله:mad: المفترض الواحد يحترم نفسه ويحترم الزمان والمكان اللي هو فيه ، اذا ما نسوا وسخ الدنيا بهاللحظات متى أجل ينسونه؟!

إقتباس:

وواحد من الشباب يقول احسن مافي العزاء .. العشاء ..
قلت شكلك ناوي تسوي واحد من الشباب ضحيه علشان تاكل مفاطيح

والله مشكله، كأننا عايشين بالصومال مهوب بالسعوديه!!

إقتباس:

وكل مانشب سؤال بتسدحه .. راع ظروف المتقبل للسؤال الناشب

ياخي الاسئله الناشبه ذي مشكله ، واذا ما طيبت خاطرك وعرفت اجوبتها راح يجيك أرق وانتفاخ بالاذن الوسطى ، الله يكفينا الشر..

الله يسلمك يابعدي، وتشكرااتي لك :)

>>> أجل ما بوش شنب ، بالله ما بديت تحس انك ليبرالي :D عموماً أحسن ترى المستشارين دايم يحلقون شنباتهم موس
>>> ما يحتاج أحطه بالابيض كل العالم تبي تقرا:D

_____________________________

آآآي ول كوم باك سوون ان شاء الرحمن

( أخـــــر صيحـــــات العزااء ) :D
تخيلوا معي هالموقف ..:D

عزااااه ياقلبي من الهم عزاااااه
ومن يواسي دمعتي قال خيررره
وشلووون خيره بعد فرقااااه
لاتقولوا خيره خيبة كبيره

وهاهو صوت الأستريو يعلو في المكان المخصص لعزاء النسااء وهااهي ام احمد وبناتها تترااقص :kicking: :kicking: في وسط المجلس وتمسح دموعها حزنااعلى رحيل ابنها احمد ..

( تقدرون على الملح ) استغفر الله بس << ياصبر الارض علي :D

.................................................
انا ماحب اروح للعزاء .. اخااف اضحك عندهم ..
اعزي في التلفوون ..
لاني دايم تجيني حالات ضحك في المواقف
اللي مايصلح الواحد يضحك فيها ،،
<< قلبها ميت :D
والمشكله ان هالشيء اللي تضحك عليه
سخييف مايستاهل الضحك ..بس سبحان الله يتسلط عليك ..
اذكر مره رحت لعزاء واحد مايقرب لي يوم راحوا رحت معهم .. وياليتني مارحت له..
لان طوول الوقت كاتمه ضحكتي والمشكله ان هالشيء
اللي اضحك عليه سخيييف مررره ..
اضحك على حرمه جالسه في الزااوية وجههااا مااااصل مررره وهي تصيّح ) :D :D
ولا اذا صرت اعرفه منيب مضحكه على هالاشياء ابصير لاهية اصيّح :D

<< مو كنك طلعتي عن الموضوع :eek:
.................................................

المفروض يجي ويعزي خمس دقايق وبعدين يقضب الباب ..
لان فيه بعض الحريم اذا جو يعزون يقلبون المجلس صيااح
ويزيدون اهل الميت ضيقة صدر بكلامهم ..
هذا بدل مايجلسون يذكروّن ويهدون اهل الميت جايات يصيحن ..
صيحوا في بيتكم بعدين تعالوا عزوا :D

والحديث في هذا الموضوع يطووول .. الله يرحمنا برحمته بس :D

على طااري العزاء ..
يقول لك عجوووز رااحت تعزي نااس ماتت عندهم << ياقدمك :D

باايوووووو ،،

الصراحة انا اشوف ان جلسة الناس بالعزاء والخروج عن جو الحزن سواء كان بالمرح او اي شي كان يساعد في تقليل من الم المصيبة

عذراً على التأخير:D

_______________________________________

مطيع الهميمي

ياهلا والله وغلا ..

إقتباس:

هي لن تبقى العادة الاجتماعية السئية الوحيدة التي نعاني منها

أكيد يابعدي ، وبهالمناسبة ننتظر من كبار الكتاب أمثالك طرح مواضيع تلقي الضوء على مثل هالعادات، ونتشارك في مناقشتها، لعلنا بهذا نحقق الفائده من المشاركه بالمنتدى..

إقتباس:

ولكن يبقى السؤال كيف نتخلص منها

أعتقد وببساطة أنه مجرد السواليف بمثل هالموضوع في المجالس والمنتديات وان حصل الصحف هو أحد أجدى الوسائل للفت نظر الناس بأن هناك خلل معين في بعض عاداتنا ..

العفو ياغالي:) وتشكراات لمشاركتك

_______________________________________

M e T o O o

هلا والله وغلا..

إقتباس:

صح الـ 4 أيآم غدانا وعشانا فيها مفطحات بس صدقني انّا ما تكلفنا الا بـ القهوهـ والشآهي بس

يعلم الله اني ما أقصد التكلفه الماديه أبد ، خصوصاً وانه زي ماتفضلت دايم يتكفل بهالامور أقارب المتوفى وأحياناً الجيران ،اللي أقصده هو الاثقال على الناس وارهاقهم بدنياً..

إقتباس:

صدقني ان فيهآ أكبر سلوان لنا .. وفكتنا من التفكير , وهذي تبين قوهـ الرآبطه الاجتمآعيه بين عيآل العم والاقآرب

ما فيه شك في ذلك ( اخس سلطان الرياضه:D ) ، وحنا ما نقول لا أحد يجي ولا أحد يقعد!!
لكن نكون خفيفين على الناس وما نثقل عليهم بطول الجلسه ، و مادام المقربين منهم متواجدين وواقفين معهم ما فيه دعاي تتسع الدائره لغيرهم..

تشكراات على مشاركتك:)

_______________________________________

الـمـشـاغـب

هلا وغلا باخو قلبي..

إقتباس:

وأنا أقول ما شاء الله على الهاوي طلع رجال

:upset: زمن أغبر!!

بعد 27 سنه خدمه ما بعد صرت رجل بعيونك!!:mad: بس الشكوى لله تمون يابعدي:yes:

إقتباس:

والله العزاء يخفف كثير... صح أنه متعب بهالطريقة.. لكنه يشغل أهل الميت عن التفكير في الميت..!!

أكيد وما اختلفنا على هالامر، لكن بحدود المعقول مهوب جلسه وتكيه وقهوه وشاهي وعشا من أول اليوم لآخر الليل، المفروض تقتصر هالتكيه على المقربين جداً مهوب عيال الجيران والاجناب:confused:

إقتباس:

قال: كانت حالتنا صعبة وما نذوق اللحم إلا بالأعياد والعزاوات <<< جمع عزاء كذا؟

بلاك من اللي يضرب شاورما المغرب ثم يجي يعزيك ويفتك باللحم والرز!!

بعدين ترى ماجازت لي عزوات!! أحس انه اسم الشريط القادم لعزازي 2008:D

إقتباس:

أما إذا كانوا من بعيد.. فيا شينهم

وهالبعيدين هم المقصودين بالموضوع كله ..

إقتباس:

آمين ... وجزاك الله خير يالغالي ابن الغالي.. <<< يتلزق بك ويبي يتعرف على الوالد إذا ما فيه مانع

أبعطيك جوال الوالد بس تراه دايم مقفل ما يفتحه الا ثمان الصبح ويطفيه مع أذان العشاء:D وتكفى لا ترسل له رسايل:upset: تصد انه أحياناً يستدعين واحسبه لا قي لي حرمه شخط s13s وآخرتها يقول جت رساله افتحه لي وأقرأ علي ماورد فيها:D

إقتباس:

تكتب كذا: في أمان الكريم

أقول ليتك ما عطلت:mad:

الله يعافيك يابعدي :) وتراي أحبك في الله وتكفى قل لسالم حتى أنا أحبه في الله بالحيل:D

_______________________________________

أبروح أصلي العصر وانكس أكمل ان شاء الله:yes: ان ماحبسني حابس:rolleyes:

dal3_uae

هلا وسهلا..

تشكراات ،،

___________________________________

اليزابيث هيرلي

ياهلا والله ومرحبا ..

إقتباس:

الواحد ذاك الوقت ماله خلق لأحد وأخواننا يقعبون فنجان ورا الثاني ..

بعضهم يشرب 300 فنجال وبين كل فنجال والثاني تمرتين وسالفه نصه تسذب:mad:

إقتباس:

أما بالنسبة لأوقات العزاء بالقصيم عندنا من بعد صلاة العصر إلى العشاء وبإعتقادي هاذي أنسب الأوقات ..

هذا هو المفروض ، واذكر عزاء عمتي -الله يغفر لها ويرحمها- بالقصيم تم بهدوء وبدون لجه وزحمه وعشيات وقهاوي..

الله يسلمك:) وتشكراات لمشاركتك

I don't think so... والله يكفينا شر الدنيا

___________________________________

الماسه الزرقاء

ياهلا والله ومسهلا ..

إقتباس:

كتبت رد وجهازي الموقر سوا ريستارت بنفسه وطاااار

ميخالف الجايات أكثر، وأهم شي انك مرئتي:yes:

الله يسلمك:) وتشكرااتي لك

___________________________________

الهنوووف

ياهلا والله ومسهلا ..

إقتباس:

جيبو قهوه جيبو شاي بشكل ماتتصورة يرجعون مجموعه من الدلال ويبون غيرها

الله يعظم أجر بعض الحريم القرمات اللي ماغير يدهرن بالمطبخ ، والله اني أدري اني اميمتي تتعب لكن الشكوى الله فيه أوادم مايستحون ..

إقتباس:

والحين فيه حركه يستاجرون كراسي للعزاء واظن فيه قهوجي

شغل كشخه حتى بالعزاء:confused:

إقتباس:

ضحك وسواليف وجمعه على غير سنع واستعراض جلابيات بالنسبة للحريم

أما استعرض جلابيات:D جازت لي ، على كذا لاصار فيه عزاء أبقول لأمي تشوفي لي مرتن مزيونه وجلابيته شي:D

الله يسلمك :) وتشكراات لمشاركتك

___________________________________

...SoMe OnE...

ياهلا والله وغلا ..

إقتباس:

وفي مثل هذه المواقف اجدها لدى البعض استعراض في عضلاتِ الكرم

ايـــــه الله ينور عليك ، بعضهم يلقاها فرصه يتفاخر بها بكثرة جماعتهم وكبر مفطحاتهم..

إقتباس:

ولكن لا يعني ان ترتسم الابتسامات والضحكات وتتابع المباريات في هذه الايام .. منشغلين عن ماهوَ اهم في الدعاء لـ الفقيد وذكر محاسنه

صدقت يابعدي ، والمشكله ان بعضهم يتحجج بانه يبي يدخل الانس والسرور لانفس أهل الميت، ويبدا يعطيك عشرين سالفه ويرفع صوته ويضحك تقل حاضر مسرحيه!!

الله يرضى عليك ويسلمك ياغالي:) وتشكراات لمشاركتك

___________________________________

متلثمة بشال الهلال

هلا وسهلا ..

إقتباس:

عزااااه ياقلبي من الهم عزاااااه
ومن يواسي دمعتي قال خيررره

:D والله ما يستبعد ، ويصيرون الشعراء يبيعون قصائد عزاء باسم المتوفى !! يعني يصير حفله:confused:

إقتباس:

لان طوول الوقت كاتمه ضحكتي والمشكله ان هالشيء
اللي اضحك عليه سخيييف مررره ..
اضحك على حرمه جالسه في الزااوية وجههااا مااااصل مررره وهي تصيّح

:confused:

هبال هو ؟!! الصراحه ان وجهك مغسول بمرق:mad:

عزاء وموت وآخره وحساب وانتي قالبتها مسخره!!

الله يهديتس بس، استغفري الله وحاولي ماتروحين لعزاء الا اذا طلع لك قلب ..

إقتباس:

صيحوا في بيتكم بعدين تعالوا عزوا

:D استغفر الله، و لو انتي ضاربتن فيوز مختس:D

إقتباس:

الله يرحمنا برحمته بس

آآمين ، وينزال عليك سكينته..

تشكراات :) وأهدا من كذا

___________________________________

إقتباس:

توت عنب

هلا وسهلا ..

إقتباس:

صحيح لكن بحدود المعقول والادب وبدون مبالغه في السواليف والاكل والشرب..

تشكراات لمشاركتك:)

إقتباس:

على كذا لاصار فيه عزاء أبقول لأمي تشوفي لي مرتن مزيونه وجلابيته شي

الناس عزاء وموت وآخره وحساب وانت قالبها خطبـــة !!

الله يهديك بس، استغفرالله وحاول ماتعرس الا اذا طلع لك قلب ..:naughty:

^^^^^^^^

:D :D صدز ياشين كيدكم

إقتباس:

الناس عزاء وموت وآخره وحساب وانت قالبها خطبـــة !!

انا رديت على مشاركة الهنوف يوم قالت: "ضحك وسواليف وجمعه على غير سنع واستعراض جلابيات بالنسبة للحريم"

وكنت أقصد ان هذا صار زواج مهوب عزاء عشان كذا قلت أبخلي أمي تخطب لي، أو انتي ماتدرين ان الامهات يتشوفون لعيالهم بالزواجات:D

مهوب تروحين للعزا عشان تضحكين على وجيه اللي يصيحن:mad:

إقتباس:

استغفرالله وحاول ماتعرس الا اذا طلع لك قلب ..

:D

عموماً ، استغفر الله العظيم بكل حين:)

وابشرتس مناااب معرس لين يطلع لي مليون ولا القلب ماعنا وعنه:yes:

الله عليك انت كاتبي المفضل :)

من جد العزاء عندنا غلط ف غلط :mad:
اهل الميت يتعبون واللي جايين مكيفين يشربون شاي ويسولفون وبعضهم يمصخها وتسمع ضحكته من وين :rolleyes:

ثانكس :yes:

العنـا

هلا والله وغلا ..

الحمد لله على السلامه:) >>> أتحداك يالعنا تكتب رد ولا أحد يقول لك هالجمله:D غيابك واااجد المفروض يرفع بك تقرير;)

إقتباس:

اهل الميت يتعبون واللي جايين مكيفين يشربون شاي ويسولفون وبعضهم يمصخها وتسمع ضحكته من وين

الشكوى الله ، والمشكله لو تقول مافيه داعي لكثرة الجمعات و القهاوي والعشيات يزعلون الشيـّاب!!

لعل الناس ترتقي تشوي ولاحقين على التقهوي والسواليف واللجه..

تسلم يابعدي:) وتشكراات على المشاركه ، وأهم شي لاتقطع;)

هلاااا والله وغلاااا

وي وي الهاوي ينزل موضوع ولا ارد عليه :rolleyes: ! يـ أخي بتصير كارثة إذا مارديت ع موضوعك !! --->> واثقه :cool:

إقتباس:

صبحكم / مساكم الله بالخير ..

مدري انا من اي ناس :D المصبحين وإلا اللي بيمسون ماصحيت إلا ع الساعه 10 الليل :D صنفني عاد من اي فئه :p .

إقتباس:

الذي انتقل إلى رحمة الله اثر عين أصابته بينما كان يسير في شارع المحبين

لووووووووووو:D ووووووووووووول جد جد بطاااقة الدعوه هذي خطيييييييييره :yes:
صدقت والله يـ الهاوي كثير يحطون سبب الوفاة "عين " إذا مات بسبب جلطة قالوا عين ، بسبب حادث عين ماصلت ع النبي ! كل شي ينسبونه لـ " العين " ماانكر أن العين قد تكون أحد الاسباب لكن موب هي السبب :yes: هذا كله قضاء الله وقدر s13s .

إقتباس:

خصوصاً وانه المدير

آآآآه منك يعني مو لله رايح :rolleyes: !!

إقتباس:

قال: وقت العزاء عندهم من بعد صلاة العصر إلى أذان العشاء

والله هذولاء الناس المنظمين :D ، اجل يخلون الاوقات مفتوحه لـ كل من هب ودب !! بعدين الواحد يكون عنده ذوق ومايروح لـ الناس إلا المغرب واذا عنده وقت راح العصر ، لان هـ الوقتين هم المناسبين لـ العزاء ، لأن لو رحت ع الساعه 10 يمكن تحصلهم يتعشون وتسبب لهم إحراج :yes: ، فـ الافضل ناس علاقتك معهم رسميه رح لهم العصر أو المغرب :yes: .
بعدين من واقع وحده مجربه العزاء :eek: ، نكره اللي يجينا الساعه 11 :D من جد طفشانين ومالنا خلق لأحد نستقبله .. غير كذا اكره اللي يجونا الصباح اصلاً ماقد قابلت احد جاينا الصباح :D يقومونا ننزل نسلم ولا في أمل ---> اكيد ماناموا إلا بعد الفجر :dead: !!

إقتباس:

(والحقيقه انه جاء بكرا وانشغلت ومارحت )

أحسسسن ربك عالم بنيتك :eek: :p :D ..

إقتباس:

أتذكر يوم انتهينا من دفنها واتجهنا للخروج من المقبره مشياً على الاقدام ، كان هناك عراك بين اثنين من أقاربي وكل واحد منهم يقول لأ ما يصير أنا اللي ابجيب العشاء الليله !! ( أعلم انه كرم وجود لكنه في غير وقته ومناسبته)..

يااااااااااه ذكرتني بـ ذيك الايام :yes: ندري ان الرجال تطاقوا من بيجيب العشاء من الإزعاج ، أتذكر خوالي حطوا نظام :D ماحد يجيب العشاء من القرايب يعني اللي يصير جدي عمه وإلا خاله مايجيب ، يفتكون شوي من الطقاق ، غدا وعشاء طول هـ 4 ايام ماغير ذبايح وانا أنحرم :cry: مانيب أكل الا ساندويش بجبن غدا :D ، والعشا الله يعافي الطلبات أخر الليل :dead: ..

إقتباس:

ولأن والدي هو أكبر الأبناء فقد كان العزاء في بيتنا ، ويعلم الله كم تكبدنا العناء بسبب عاداتنا السيئة ، ويعلم الله كم زمزمية قهوة وشاهي صلحتها الوالده و اخواتي ويعلم الله كم ذبيحه انطرحت بالمقلط ..

وأناااااااا اشهدد ان امك تعبت تدري ليه :rolleyes: !
مجربه هـ الغثاء :yes: صحيح مانيب اصلح شاهي ولا قهوة :D بس تعبت بـ تطليع كراتين المويه وإلا تدخيلها بـ الفريزر من جد كل شوي لازم يتصلون ع ويقولون جيبوا مويه :mad: ، والا هين القهوة والشاهي مفتكين منها القهوجي عندهم ومرتاحين بس التعب وين لاراحوا يصلون :yes: لازم ندخل ننظف الحوسه ع السريع s13s ،،،

إقتباس:

تخيلوا من بعد صلاة العصر إلى الساعة 11.30 بالليل وحنا قهوه وتمر وعشاء وذبايح رايحه وذبايح جايه وشي للرجال وشي للحريم ولمدة أربعة أيام!!! لا و آخر يوم خربناها وجبنا مع الذبايح حمص وفطاير

لوووووووووووو:D ووووووووووول من الطفش خربتوها :yes:

إقتباس:

وكنت متضايق جدا من هالناس اللي ما يستحون على وجيههم، يجونك كل يوم يتقهون و يسولفون ويلجلجون ويضربون باللحلم والرز بحجة أنهم يقدمون واجب العزاء!!

لأ الحمدلله ماعندنا حريم يجون اكثر من مره :D .

إقتباس:

والحمد لله انه فيه عدد من الناس المحترمين اللي يدركون أن وضع أهل المتوفى لا يحتمل الإثقال عليهم وبالتالي تلقاهم يدخلون البيت ويقدمون واجب العزاء ولا يجلسون أكثر من ربع ساعة..

كثاااار اللي كذا ، بس تدري ايااام العزاء وناسه :eek: مع انها محزنه فـ البداية لكن مادري ليش تصير وناسه خخخخخخ
لازم نخربها انا وبنات خالي وحريم خوالي ونعلق !:D اتذكر حريم خوالي الكبار يعصبون منا يقولون لاعاد تجون روحوا اجتمعوا برا ... يحسون انهم متفشلين من ضحكنا يقولون ماكانكم بعزاء !!

الله لايعيد ذيك الايام :D :D

إقتباس:

يقول لي واحد من الشباب إنهم جالسين يلعبون ورقه ويتتنون بعزاء عمه!! بحجة انه كان كبير ومريض!!

شلون يتتنون!!
والله شف اتذكر فـ ايام عزاء يـ الله جد جد غثيييييثه وثقيله :yes: ! مافيه ضحك مافيه وناسه لكن فيه ايام عزاء عندنا عادي نضحك ونستانس :D
يمكن لاكان الموت فجاءة ! هينا المشكله :yes: ، تشوف العزاء يكون جاد وثقيل ومحد متحمل الثاني !! طول 4 الايام ماغير دموع !
اما اذا كان الميت تعبان وطالت فترة تعبه ومرضه ، او الميت صغير توه ماوصل لـ سن التمييز بس الحزن يكون بـ اليوم الدفن وثاني يوم اما اليومين البقيه كان النفس ارتاحت وهدت ونصير نضحك :D .

إقتباس:

وياليتنا نتعظ بالموت وندعو للميت ونتذكر الآخره ونستشعر الموقف بدلا من القهاوي والشواهي والاكل والسواليف بالعقار والاسهم..

:eek: يسولفون بـ الاسهم !! جد جد الله يكون بعونكم :yes: .

إقتباس:

يرحم موتانا ويغفر لهم ، و يحفظ لنا والدينا وإخواننا وأخواتنا ومن يعز علينا ويطيل بأعمارهم على طاعته..

آآآآميييين يااارب العالمين s13s ،،

ثانكس الهاوي ع هـ الموضوع :cool: والله لايجيب لنا عزاء :yes: .

@ نسيت أضيف شي :D
تدري وش أكثر شي اكره فـ أيام العزاء ! سواليف الحريم عن الاحلام !!
تجيك تقول والله اني حالمه كذا وكذا والثانيه تقول حلمها ويبدون تفاسير وهات اتصالات وشي من جد اكررررره هـ السوالف يمكن لاني مسكينه ماقد حلمت :dead: ..

الفيروسه الزرقاء

هلا والله وغلا بالهاوي

والله موضوع اكثر من راائع

وصرااحه اييدك بكل كلمه تقولها اقسم بالله يوم وفاة جدي ان فيه شيااب من السااعه ست الصبح يجوون

والله ان الدله شووي وتطيح من يدي من التعب بس شنسوي هذي عاداات والله يعينا عليها

صرااحه انا من اكثر المعجبين بمواضيعك يالهااوي وبكتابااتك والله يعطيك الف عاافيه

ومننحرمش منك s13s

الرفيق الخاص الهاوي ..

هذه نتيجة كل فعل مخالف لهدي النبي صلى الله عليه و سلم ..
أشكرك و أشكرك ..

أولى للموضوع ، و أخرى لوقوفك في وجه تيارات التغير ..

الفيروسه الزرقاء

ياهلا والله ومسهلا ، أسفرت وأنورت من بعد غيبه..

إقتباس:

مدري انا من اي ناس المصبحين وإلا اللي بيمسون ماصحيت إلا ع الساعه 10 الليل صنفني عاد من اي فئه

ان ماخب ظني فاأنتِ من اللي يبي يتسحرون على خير:yes:

إقتباس:

كل شي ينسبونه لـ " العين "

صادزه من تالي الناس يحطونه بالعين!! اتوقع يبي يطيبون خواطرهم والا هم عارفين ان لكل شي سبب باذن الله ..

إقتباس:

فـ الافضل ناس علاقتك معهم رسميه رح لهم العصر أو المغرب

بالضبط ، ونخلي باقي الاوقات تكون لهم مع المقربين منهم عشان يرتاحون من التكلف و الرسميات طول اليوم..

إقتباس:

غير كذا اكره اللي يجونا الصباح اصلاً ماقد قابلت احد جاينا الصباح يقومونا ننزل نسلم ولا في أمل

:D والله من قل ماقمتي وسلمتي..

من تالي قليل جدا اللي يجون الصبح بحكم ان عاداتنا تغيرت والناس صارت تسهر حتى بعض الشياب والعجز صاروا ما ينامون الا بالوحده وطالع، والا اشوف ان الصبح زينs60s

إقتباس:

أحسسسن ربك عالم بنيتك

:D استغفر الله

لا لا ، يعلم الله اني أمزح والا ماهمني مدير والا غيره، زين الواحد يحرص على التواصل مع الناس بكل الظروف..

إقتباس:

أتذكر خوالي حطوا نظام ماحد يجيب العشاء من القرايب يعني اللي يصير جدي عمه وإلا خاله مايجيب

آآبو القانون اللي ما أدري وش يبي!! طلع ورث ذا مهوب عشا:D

إقتباس:

غدا وعشاء طول هـ 4 ايام ماغير ذبايح وانا أنحرم مانيب أكل الا ساندويش بجبن غدا

:confused: انتي بتس بلا !!! رز و ذبايح و وتسبه وتاكلين سندويش جبن:eek: صدز اللي اختشوا ماتوا:D

إقتباس:

بس تعبت بـ تطليع كراتين المويه وإلا تدخيلها بـ الفريزر من جد كل شوي لازم يتصلون ع ويقولون جيبوا مويه

:D :D والله يا أهلك مصرفينك بشغله دمااار عارفين ان ماعندك أحد:D أقل شي اطبخي نعناع بارد ..

إقتباس:

لازم ندخل ننظف الحوسه ع السريع

أجل صايرين زي حقين التنس الارضي:D

إقتباس:

لازم نخربها انا وبنات خالي وحريم خوالي ونعلق !

:mad: استهبال بعزا !! ما سمعنا بهذا في آباءنا الاولين:mad:

إقتباس:

والله شف اتذكر فـ ايام عزاء يـ الله جد جد غثيييييثه وثقيله ! مافيه ضحك مافيه وناسه لكن فيه ايام عزاء عندنا عادي نضحك ونستانس يمكن لاكان الموت فجاءة ! هينا المشكله

بغض النظر عن من هو المتوفى أو الحاله اللي توفى عليها ، المفروض أيام العزاء يغلب على الناس فيها السكينه ويستشعرون هالموقف ويتذكرن ان هذا مصيرهم وبالتالي تلين قلوبهم ويرجون نعيم الآخره ويتوبون لرب العالمين..

وأكيد يكون بدون مبالغه بالصياح والنياحه والكآبه..

إقتباس:

الحزن يكون بـ اليوم الدفن وثاني يوم اما اليومين البقيه كان النفس ارتاحت وهدت ونصير نضحك

نشكر الله سبحانه على هالنعمه، الواحد مع الايام ينسى مثل هالايام الصعبه..

واتوقع حال كثير من الناس مثل ماقلتي:yes: يتأثرون باليوم الاول وترتاح نفسيتهم بباقي الايام..

إقتباس:

تدري وش أكثر شي اكره فـ أيام العزاء ! سواليف الحريم عن الاحلام !!
تجيك تقول والله اني حالمه كذا وكذا والثانيه تقول حلمها ويبدون تفاسير وهات اتصالات وشي من جد اكررررره هـ السوالف يمكن لاني مسكينه ماقد حلمت

سبحان الله :D :D تدرين ليش ضحكت

أكبر خواتي قبل فتره راحت تعزي ناس ، عاد تقول ماشاء كل الحريم محلمات وحاسات بوفاة فلانه:D

عندي أميمتي الله يحفظها لو تطلعين عليها رشاش ما خافت ، لكن لو تقولين لها شفت حلم كذا وكذا تخاف يابعدي ، ومن خبرتها وهي تقول لا أحد يجيب طاري حلوم:mad:

العفو يافيروسه:) وتشكراات واااجد على تواصلك..

________________________________

هامور البورصه

هلا والله وغلا..

إقتباس:

يوم وفاة جدي ان فيه شيااب من السااعه ست الصبح يجوون

:eek: أما ست !! والله مشكله ، وبلاك انهم شيّاب ما تقدر ولا تلمح لهم:rolleyes:

الله يسلمك يابعدي ويسرني ويشرفني اعجابك ومتابعتك لشخاميطي:)

تشكرااات ياغالي:)

________________________________

abu_riman

هلا والله وغلا بابوريمان ..

إقتباس:

هذه نتيجة كل فعل مخالف لهدي النبي صلى الله عليه و سلم ..

اختصرتها وصدقت ، التمسك بمبادئ وتوجيهات ديننا الحنيف يكفينا عناء البحث عن علاجٍ لكل مشكله..

العفو للأولى ياغالي..:)

و العفو للثانيه، وأنت أهم من يقف بصفنا ، وان كنت أرى أن الحق مكفول للجميع الا أن الاتزان مطلوب:yes:

أكاد أجزم بأني أحد من يفهم تماماً الغموض المميز في ردودك ، ربما لأني رفيقك الخاص;) >>>> لا يكثر بس:D

سررت بأني ممن تخصهم:) وتشكرااتي لك

_____________________________

نحياتي للجميع:)

موضوعك لابد من النقاش فيه
لي عوده
حجز

تسجيل حضور وان كان متأخر في متصفح الاخ ابو نظارات ورديه وقبله بريئه اطبعها على خده الايسر:D

اخبارك يابو الشباب واخبار خويك:D لايقين على بعض سبحان من جمع:D

الزبده ان عندي دلو بارأي فيه في موضوعك الموشح بالسواد والعياذ بالله:D ..

اولا: ياخي السالفه مو مقتصره على اهل نجد او ان الحجاز عكسهم.. اعرف مناطق بالحجاز ذبايح لاسبوع من بعد العصر الى 12 بالليل!!

ثانيا: انت تعترض على هالشي .. طيب ياخي افرض انت مثلا مت(بعد عمر طويل:D ) ويوم سووا لك عزا بدون مايعزمون الناس وبدون محد يجيك بالله عليك ساعتها مو بتحز في خاطرك:D << الله يخلف ع هالتفكير:cry:

ثالثا: صدقا صدقا سالفة ان الخلق يتجمعون ويغيرون الهدف من زيارة اهل المتوفى عاده سيئه جدا فالافضل ان تكون الزياره لخمس او عشر دقايق يأدون الواجب ويبلعون فنجالين قهوه ويقضبون الباب ولا مانع تصير ذبيحه لاهل البيت والقريبن جدا من المتوفى خصوصا للقادمين من خارج مدينة المتوفى:yes: ..

والله ولي التوفيق ..

ابو سباستيان خوي ابو ابراهيم:D