|
سؤالك للعضو (( الصبحي)) الحلقة الثانية بسم الله الرحمن الرحيم السلام عليكم ورحمة الله وبركاته نستمر اخواني ألأعضاااء الكرام في اشباع فضولنا مع أعضاااااء حبيناهم ولهم بصمتهم في منتدى الزعيم وكما هو معلوم كل ماهو مطلوب ان تبداء بسؤال العضو او ان تطلب من موقف او او او ... بمعنى كل شي تريد ان تعرفه عن العضو وسوفى ان شاءالله نستمر اذا ما راقت لكم الفكره --------------------------------------------------- وضيفناااااااء في هذه ألأمسيه الغاااااالي (( الصبحي )) فنرحب فيه ونتمنى ان يوفق في اشباع فضولنا :D :D :D ......................... سؤالي متى كانت بدايتك مع عالم ألأنترنت ؟ بالتوفيق يالغالي |
السلام عليكم ورحمة الله وبركاته اولا كل الشكر للعزيز الغالي ابو سليمان علي اتاحة الفرصه لي مع وجود كوكبه من كبار الكتاب في هالمنتدي والذي يعتبر الاخ ابو سليمان عميد الكتاب فيه . واتمني اني اكون ضيف خفيف عليكم . اما بالنسبه لسؤالك اخي ابو سليمان بدايتي قبل سنه تقريبا في اشتراكي في الانترنت اما بدايتي الحقيقيه مع النت فكانت مع هذه الشبكه الغاليه شبكة الزعيم قبل خمسة اشهر وتطورت واصبحت اكتب في ستة منتديات منها خمس منتديات تمثل نادي الهلال . تحياتي |
طيب عندي (( بعض )) الأسئلة .. ألا وهي :) 1- وش اسم أمك ..؟؟ ===> لا تفهم غلط عشان الجواز:D 2- وش اسم أم جيرانكم ..؟؟ ====> عشان جواز ولد جيرانكم :D:D:D عاد الجد .. 1- وش رايك با ابو سليمان ؟؟؟؟ (( لا تخاف خذ راحتك )):rolleyes: 2- وش أهم المواضيع اللي تشدك في المنتدى العام (( بصراحة )) 3- وش أكثر المواقع اللي تزورها ..؟؟؟ :) ... يا رجال يكفي والبارقي حسب التفاعل ====> سامع فيها :D وبالتوفيق ،،، أخوك / البــارق;) |
ياحيالله الصبحي وهذي الساعة المباركة اللي تصير فيها شخصية مشهورة وتسوي لقاءات وتمسك فيها المكرفون .... لكن ياترى ابو سليمان وداك للمكياج والالا ؟:D سؤالي الأول : منهو من أعضاء منتديات شبكة الزعيم اللي يفز قلبك لا شفته فتح ماسنجره ؟ سؤالي الثاني : وشو برنامجك ليوم العيد ؟ بالتفصيل . سؤالي الثالث : وشي أكلتك المفضلة ؟ سؤالي الرابع : ليش ماتشاركنا بمنتدى الرياضة العالمية ؟ أشوف اكثر مشاركاتك بمنتدى المجلس ؟ سؤالي الرابع : لو قالولك أن أعضاء شبكة الزعيم بيشرفونك بالبيت . وش شعورك بصراحة ؟ ووش تسوي ؟ سؤالي الخامس : ياهل ترى زعلت من ردودنا يوم نزلت صورتك ... ولا كعادتك أخذتها بروح رياضية ؟ سؤالي السادس : وشو السؤال اللي ماتتمنى أحد يسألك فيه ؟ سؤالي السابع : جاوب على السؤال اللي ماتتمنى انك تنسأل فيه ؟ سؤالي الثامن : من تتمنى يكون ضيف ابو سليمان القادم ؟ اتمنى أشوف أجابات صريحة بدون لف ولا دوران :D تحياتي لك:) |
السلام عليكم ورحمة الله وبركاته جـ 1 بصراحه اقل مايقال في ابو سليمان انه من خيرة الرجال ويشرفني اني اتعرفت عليه وبصراحه ما اقدر اعبر <======= دايم درجاته في التعبير زفت:D علي العموم لو بكتب مجلدات في ابو سليمان ماوفيته حقه . جــ 2 بصراحه تشدني مواضيع كثيره وانا اول ما ادخل المنتدي اطمر علي جميع المواضيع واخذ لفه عليها ومع انا مفتقدين مواضيع الكاريكاتيرات ونستناها بلهفه . جــ 3 انا احب ادخل علي المنتديات وبالذات منتدي شبكة الزعيم ومنتدي شبكة الهلال ومنتدي سامي الجابر واغلب وقتي في هذه المنتديات او علي الماسنجر. |
السلام عليكم ورحمة الله وبركاته الله يرجك وين انا فيه برنامج افراح وتهاني . جـــ1 بصراحه الغاليين ابو سليمان والاسطوره . جـ2 برنامج العيد يوم يذبحون الخروف بعد صلاة العيد ادوخ وما اصحي الا اليوم الثاني :D بصراحه بعد صلاة العيد نروح ونطامر علي الاهل والاقارب ونعايدهم وامر علي خوياي واعايدهم وبعدين الله يسلمك بعد صلاة الظهر نشوف الغداء عند مين لان عيد الاضحي والفطر عندنا زي بعض ونملي بطونا ونكر اللبن وننام الين المسى وفي الديره ماعندنا ملاهي نروحلها في المساء ندور علي جلسه عند واحد ونروح عنده وهذا هو البرنامج . جــ3 اكلتي المفضله مافي غيرها الكبسه . جــ 4 والله نلف علي منتداكم لكن كل ماسنح الوقت نضيف لكم من الردود . جـ5 لا تقبلها بروح رياضيه واهم شئ اني خرعتكم :D جـ6 كيف حالك ؟ جـ 7 الحمدلله جــ 8 كل شئ بوقته حلو <===== اجابه دبلوماسيه ( سامع فيها امس في برنامج ) سباق المشاهدين برنامج انتم نجووووووووووومه:cool: |
* فـجأه وبدون مقـدمات تم تبشـيرك بمبلغ من المـال يبـلغ ( 10 مليـون ريال )...وش راح تسـوي فيـها, بكل صـراحه؟؟ . * الكل يـحزن والكل في داخلـه عالم من الاحزان , نادر من يخـرج الحزن من داخله بكتاباته , ببكـأه , بشـكواه , أي من الانواع انت.. ؟ * للطيـبه ضـريبه فهـل انت من النـاس اللذين دفـعوا ضـريبة طيـبتهم (( هذا اذا كنت طيب وعلى نياتك مثلي )) :D :D ؟؟ . * محـطات تسـتوقف الانسـان لاتفـارق مخـيلته سواءً حـزينه او سعيـده.. ياليت تذكر محـطه من محـطات حيـاتك تسـتوقفك الذكـرى لها دائمً .. ؟ أحــس اني رهـيب وانا اكتـب اليوم مدري ليـه:D :D :D ؟؟ ملاحظين او لآ؟ تحيـاتي لك صـبحي بيــه.. . |
السلام عليكم ورحمة الله وبركاته الاخ نايف مساك الله بالخير انت والغاليين . جـ1 تم تبشيري بعشره مليون اولا راح ازبط اموري بنصف مليون واول شئ بعرس :D وبعدين مليونين بسويبها كم مشروع والباقي في البنك . جـ2 بصراحه انا من النوع اللي يخرج الحزن بكتاباته . جـ3 كثر من هالضرائب وكم من انسان اديته الطيبه وهو مايستاهلها واتق شر من احسنت اليه . جـ4 شوف هذا الموقف اللي اتذكره دائما مره من المرات كان لي صديق عزيز وهذا الكلام وانا في الثالث المتوسط المهم هذا الصديق كثير الاذي في مسجد الحاره وحبيت القنه درس قلت بعضه في يوم وهو يصلي ومره دخلت المسجد وعينك ماتشوف الا خوي ساجد واجي وازبطله عضه في وركه واعض فيه لين رفع الامام من السجود ولما رفع مع الامام طالعت في وجه بشوف تعبيراته من الالم وللاسف طلع رجال من الحاره اللي جنبنا واحط رجلي ويومين ما اصلي في مسجد الحاره :D لا واضح انك فايق اربع وعشرين قيراط تحياتي . |
ياهلا وغلا بالاخ الغالي الصبحي الف تحية حب وتقدير للاخ الصبحي وضيف عزيز جدل على قلوبنا سؤالي لك حبيبي هو : متى تحس بالراحة والاطمئنان وانت تشاهد فريق الهلال يخوض مباراة مهمة ولماذا ؟ الف شكر لك حبيبي |
السلام عليكم ورحمة الله وبركاته حياك الله اخوي الاسير بصراحه جميع المبارايات المهمه للهلال ما ارتاح فيه الا اذا كان متقدم بفرق اقل شئ هدفين وسبب الراحه تعرف الفريق متقدم مع ان الفريق في الاوقات هذي حتي وهو متقدم مايطمن تحياتي لك اخوي . |
بكل الحب نستقبلك حبيب الكل >> وسؤالي هو كم بيض النعام ??? وهقتك ? سؤالي ياخي العزيز :انت عضو في خمس منتديات هلالية الا ترائ بانها لو اجتمعت هذه المنتديات في منتدى واحد وتحت مسمى واحد لكانت كلمتها اقوى ? اما ان في توسعها انتشار وفرض لسمعة ومكانت الهلال ? |
السلام عليكم ورحمة الله وبركاته هلا بك اخوي حبي تيماوي المنتديات الهلاليه لو اجتمعت لكان لها نقاط سلبيه ونقاط ايجابيه وكذلك لو كان كل منتدي لوحده . فبالنسبه لي ارى انها تكون متفرقه افضل مع ان هذه المنتديات يجمعها حب الهلال ولعدد الجمهور الهلالي الكبير واللي يبرهن ذلك ان اكثر المنتديات الرياضيه هي الهلاليه وان كل منتدي هلالي يوجد به مالا يقل عن 2000 عضو الله يزيدهم. لذلك افضل ان يكون كل منتدي لوحده ولكن ياليت يكون هناك مبدأ تعاون بين ادارات هذه المنتديات وذلك في الاخبار الهلاليه وغيرها لكن افضل . تحياتي لك يالغالي . |
السلام عليكم..مساك الله بالخير,وعلى طول وبدون مقدمات وش معنى اسمك (الصبحي) *موقف حصل لك جعلك تستعيد شريط حياتك!!!!!!!!!!!!!؟ *اجب على مايلي: اغلى واحد عندك؟ هل حصل لك موقف نذالة؟اذكره؟ هل بكيت مرات؟لماذا؟ شخص لا يفارق مخيلتك؟ المستوى التعليمي؟؟؟طفران والا لأ؟:) رأيك في اوضاع الامة الاشلامية حاليا؟ لو قيل لك انك تبي تطلع للقمر من تاخذ معاك؟ اكثر انسان يرفع ضغطك من المنتدى؟؟؟؟؟؟؟؟ متى ترى ان الصمت حكمة؟؟؟ وشكرا |
السلام عليكم ورحمة الله وبركاته هلا والله بالاخ الهلالي AMJ بالنسبه للاسم فهو اسم قبيلتي قبيلة صبح وهي ترجع لقبيلة حرب . موقف جعلني استعيد ذكرياتي هو عند تسجيلي في الجامعه دارت بي الدنيا لاتذكر ايام الطفوله التي مضت . اغلي واحد هما الوالدين لاني اعتبرهما شخص واحد . الحمدلله لم يحصل لي هذا الموقف واتمني انه مايمر بي . بكيت مرات من ضرب الوالد :D الله يحييه شخص لايفارق مخيلتي انسان عزيز علي نفسي وهو من اغلي اصحابي . المستوي التعليمي الحمدلله وصلنا الجامعه وتخصصنا لغه انجليزيه والحمدلله مابقي شئ علي التخرج . بصراحه الامه الاسلاميه تعاني من الداخل ومن الخارج وهو وضع مزري للامه الاسلاميه .وارجوا من العلي القدير ان يرحم ضعفنا وان يدعم الامه الاسلاميه ويدمر جميع اعدائها . بطلع القمر بأخذ الحبيبه اذا صار لنا نصيب واتزوجنا .:cool: واحد رافع ضغطي اعتقد ان اسمه الهلالي AMJ <===:D لا بصراحه الحمدلله كل الشباب فيهم الخير والبركه في هالمنتدي . في اوقات كثيره يكون الصمت حكمه خاصة اذا قابلت جاهل . |
السلام عليكم اختيار موفق للأخ الصبحي ،،،،، عندي بعض من أسئلة .... 1- هل حسيت بالظلم في أحد الأيام وماذا كان تأثيره عليك ؟ 2- لو أصبحت في وزير ...فأي وزارة تختارو ما أول قرار راح تتخذه ( أحد أسئلة سهل 888:D ) 3- ما رأي الصبحي بالمنتديات ((((( الآن ))))؟ تقبل أرق تحية نجم الصبح |
| الوقت المعتمد في المنتدى بتوقيت جرينتش +3.
الوقت الان » 01:32 PM. |
Powered by: vBulletin Version 3.8.7
Copyright ©2000 - 2025, Jelsoft Enterprises Ltd