.





يا محلى الموضوع في منتدى مافيه نفس(ن) ثقيله ... هذا عضو وهذا استشاري وهذا مشرف ماندور بديله << طبعاً البارق مهوب محسوب منهم :D

السلام عليكم

تخبرون الفترة اللي راحت مرت علينا ايام كان الجو فيها خيالي .. امطار وخير وبركة .. والربيع يالله من فضلك يمدحونه وشفنا بعض الصور من بعض الاعضاء لكشتاتهم .. ومن زود الربيع يقولون انك لو ترعى ما ترفع رأسك عن الارض :D << طبعاً محشومين انتم :yes: ..
كشتنا وكنا جالسين حول الضو اللي هي احلى شي في الكشتات كلها .. وتمسك معي قريحتي الشعرية واهل للربع اللي معي هالابيات .. :D << اخس وش عنده الحطيئة :D


يا زيننا في مكشاتنا الحلو الجميل .. في مكاننا هذا الغريب العجيب
يا حلوها من طلعة مع الصحب الجميل .. نبعد عن ضوضاء المدينة المريب << خل عنكم لو ما يجي من الموضوع كله الا كلمة ضوضاء :D هي كم بيت بس انا قلت لكم هالبيتين ما ودي اخرب عليكم المفاجئات اللي جايه بالطريق :D < وش عنده اكشط واربح :D



وبعد ما خلصت هالبيتين ماتسمع الا التصفيق من شلة الانس .. ياهم شالوها صفقة وكلن يقول صح الله لسانك (( وجه مايع مثل وجه نجاح المساعيد وهي تقولها )) واقوم واصفقهم بالبيالات اقول وش هالمياعه يا منب قايل << تراهم هم اللي صافقيني بس لحد يدري :D
وطبعاً صار فيه رد من كذا واحد من شلة الانس .. بس منب متطرق لها .. << بلاك تدري انه شعر صدزي مهوب سواليف مثل شعرك :D .. عقبها اتحفتهم بمعلقتي السابعة عشر .. واللي يقول مطلعها ..

لا صرت بالصمان والربيع حولك .. نصيحة تغط زين البرد اقشر ..
ولاتشرب من حليب نياقك .. تراك تبي تخسر عمرك و تطفر
لا تقول حليب نياقي وانا ابخصك .. ترى ما مثل حليب السعودية الابشر << وش دخلها مدري :D



طبعاً هي معلقه طويله بالحييييييل اكثر من 600 خيمة قصدي بيت شعر مهوب بيت شعر بعد انتم لا تلخبطون :D (( التشكيل ما ادري وشلون بس اي واحد فيكم فاهم بالتشكيل بالله يشكلها للاعضاء لأن ادري فيه ناس مايفرقون بين بيت الشعر وبيت الشعر اللي بالبر :D )) هالمعلقة بديت فيها الساعة 10 ويوم خلصت لين الفجر مابقى عليه شئ وانا اقوم اصحي الشباب عشان يصلون :D ..


كانت كشتة حلوه صراحه ما نقصنا الا أنتم بس << الحين صدز ليش كل من سافر والا من كشت وسألته عن رحلته وشلونها وعساكم انبسطتوا وكل شي يقول ما نقصنا الا أنت وتلقاهم ما علموك اصلاً انهم يبون يطلعون عشان ما تنشب لهم :D



عقب ما رجعنا للديرة وضوضائها المريب :D وجلست مع اهلي اللي تسنها ضاقت صدورهم يوم شافوني رجعت :D :( !! واقعد اسولف عليهم واعلمهم وين رحنا و وش سوينا وجبت لهم كل القصايد اللي قلتها في هالكشتة .. آخر شئ اكتشفت اني جالس اسولف على نفسي في الصالة .. اخبر ان اهلي كلهم عندي ويوم التفت ما اشوووف الا بقايا الشاهي والقهوة والتمر وكل العدة .. وفيه وريقه صغيره عندهن .. مكتوب ضروري ومهم ..



قلت خل نشووف وش هاللي ضروري ومهم .. وفتحت الورقة والا مكتوب صدى لا ترقى لغرفتك الا وانت ضاف الدنيا اللي بالصالة وتوديهن للمطبخ ولا تنسى تطلع كيسة الزبالة (( تكرمون )) واخوك عنده دوام باتسر لا تنام لين ما تصحيه انت فاضي ما عندك شئ .. امك العزيزة والغالية << غضب عنك فاهم .. (( ترى كتبت لكم اللي في الورقة نصاً من ضمنها غصب عنك فاهم :D ))


قلت ما دام الحكومة والشعب بينامون خلاص خل اجلس اقلب بالتلفزيون .. لين ما يجي الوقت عشان اصحي اخوي .. وجلست اقلب بهالقنوات الا تطيح عيني على دعاية لبرنامج شاعر المليون .. عاد انا اصلاً سمعت كلمة شاعر وخقيت بما اني شاعر فشئ اكيد اني احب برامج الشعر والشعراء .. :D ..


واشوف البرنامج وعرفت سالفته وانا اللي تدخل براسي .. يا صدى وراك ما تشارك .. انت شاعر كبير وكلن شاهد لك بهالشئ .. واكيد ان شاركت تبي ترفع رأس اهلك وتبي تفوز بالمليون ان شاء الله .. واجلس طول هاك الوقت بس اكتب من هالقصايد .. انا عندي قصايد واجد بس حبيت اجيب شئ جديد عشان ما ينشب لي راشد بمنتدى الزعيم ويقول اني قلت قصيدة سامعها من قبل خمس سنين :Dههههههههههههههههههه ..


جاء وقت التقديم للبرنامج ورحت قدمت لهم اوراقي وكل شي << جاي بملف علاقي اخضر ومعه شهادة المتوسطة وشهادة حسن السيرة والسلوك يحسبها من الشروط :D .. عطوني موعد عشان يسمعون شعري الخطير .. :D .. طبعا يوم التقديم والموعد وكل شئ ما علمت اهلي قلت بخليها لهم سبرايز :D ..



جاء الموعد واروح والا اشوف حمد السعيد وتركي المريخي .. واقوله هاه يا حمد ان شاء الله ان فالي المليون قال ان شاء الله وقلت اني خير من يمثلهم قال ايه بالحيل بشويش عشان ما اسمعه بس ما يدري اني اعرف اقرأ الشفاه :D ههههههههههههههههه ..
المهم عطيتهم من هالقصايد اللي يحبها قلبكم .. طبعاً عشان مااحرق عليكم البرنامج ما ودي اذكر القصايد لانهم طالبين مننا هالشئ قالوا لين ما ينتهي البرنامج كل واحد يحتفظ بالقصايد اللي ذكرها لنا .. ولا يجيب طاريها عند احد .. كان موعد السفر عقب ثلاثة اسابيع ..



قبل اسبوع من موعد البرنامج رحت وجمعت اهلي كلهم واقولهم عندي لكم سبرايز اليوم :D << ياشينك مهيب راكبه عليك :D .. قلت لازم كلكم تجتمعون وتجتمع الاسرة الكريمة في الصالة .. واوقف في النص واسأل اهلي قلت وش تتوقعون بقولكم اليوم .. اول شئ الوالد قال هاه بشر عساك وافقت بس تطلع تدرس بالخارج ترى امورك جاهزه بس نحتريك توافق .. الوالد الله يحفظه من يوم فتحوا الابتعاث وهو صاجني كل شوي وراك ما تروح تدرس كمل دراسك وجب لك شهادة تنفعك احسن من جلستك كذا بالبيت لا شغل ولا سنع .. وانا دايم ارد عليه واقوله يايبه ان طلعت ودرست من يبي يضف الصالة من عقبي ومن يبي يطلع الزبالة (( تكرمون )) كل يوم ومن يبي يغسل الحوش ومن يبي يجب لكم مقاضي البيت :D .. << جالس بالبيت بوظيفة شغاله ههههههههههههههههههههههههههههههههههه ..



ابوي دايم يقول ما عليك حنا نتدبر امرنا بس انت رح ادرس وربك يبي يسهل الامور .. ماش الوالد واهلي كلهم جلستي بالبيت مضايقتهم ومنكده عليهم ههههههههههههههههههههههههههههههههههههههه .. قلت له دراسة بالخارج مستحيل .. انا ابن الوطن البار ومستحيل اتخلى عن هالوطن واعيش بتراب غير ترابه << ذابحتني الوطنية :D ..
قلت له مهوب سالفة الدراسة غيرها .. ويضيق صدر الوالد قال بعصبيه حاده .. انجز قل وش تبي تراك غثتينا مجمعنا تسنك تبي توزع علينا حلاو والا عيديه :D .. ولو الوالد اذا عصب يعرف يذب :D هههههههههههههههههههههههههههه ..



قلت لهم انا ابشركم بشارك في برنامج شاعر المليون وتأهلت وان شاء الله الاسبوع الجاي بسافر لـ ابو ظبي عشان البرنامج وتبون تشوفوني بالتلفزيون وتسمعون قصايدي .. كلهم طاروا من الفرحة يقولون يس يس يس وقام ابوي يسوي حركة ببيبتو اذا سجل هدف :D .. وتقوم الوالدة وتقعد تنكس وترقص :D .. واخوي جاي يركض من المطبخ ويتزحلق على بطنه بالصالة :D .. وخواتي يمشن ورى بعض ويقولن انا القطار السريع طوط طوط امشي ولا استريح طوط وطوط :D وصدى يبي يسافر طوط طوط :D .. والشغالة هي الوحيدة اللي ضاق صدرها تقول الحين من يبي يضف الصالة ويطلع الزبالة :D ..



ورحت لـ ابو ظبي وجاء دوري بالحلقة .. وادخل والا اشوف الجمهور والمسرح وكانت روضة هي اللي قدمتني ويوم شفتها وانا اغمز لها :D المهم جلست على الكرسي وبعد ما سلمت على الجمهور واللجنة القيت القصيدة .والجمهور انهبل جلس اكثر من ثلاث ثواني وهو يصفق :D << مهوب طماع بس ثلاث ثواني :D .. اول شي يوم جاء دور الدكتور غسان وهو يحاول يعذرب بالقصيدة واحجره وقلت له ترى عبدالرحمن الاهدل مهوب اطيب مني :D .. وهو يطير عقله وشو الاهدل هذا ؟؟!! قلت له عقبين تبي تعرف السالفة :D .. ويجي دور حمد السعيد ويقول مافيك حيله وفالك المليون والتوفيق وانت خير من يمثلهم :D هالمره قالها بصوت عالي لاني قلت له تراني اعرف اقرأ الشفاه :D ويجي دور سلطان العميمي واقوله يالرادار مالقطت شئ قال وش الرادار قلت اسأل المطوع اللي يبي يجي وتعرف السالفة :D ونفس الشئ لـ المسعودي والمريخي .. وقلت لهم مهوب ذنبي اني اشوف البرنامج قبل لا يعرض :D ..



المهم انهم بالنهاية كرشوني من البرنامج لاني خربته عليهم علمت من يبي يتأهل وكل شاعر وش يبي يلقي من قصيدة ومن هالكلام وتضيق صدورهم :D .. طبعاً يوم رجعت للبيت الا القى الصالة انواع الحوسة والزبالة مجمعينها اهلي بالحوش عشان اول ما ارجع اطلعها :D .. وما امداني جلست يوم الا ابوي من باتسر وهو جارني للمطار ومسفرني لـ اليابان .. يقول رح كمل دراستك :D ولا تجي قبل لا تأخذ الدكتوراة :D .. ولو الوالد اثره اقشر اليابان مره وحده :D ..







نصيحة اذا ابوك قالك رح كمل دراستك طع شوره والا ترى الزبالة تحتريك :D






.

يا زيننا في مكشاتنا الحلو الجميل .. في مكاننا هذا الغريب العجيب

وفيه وريقه صغيره عندهن .. مكتوب ضروري ومهم

وما امداني جلست يوم الا ابوي من باتسر وهو جارني للمطار ومسفرني لـ اليابان .. يقول رح كمل دراستك ولا تجي قبل لا تأخذ الدكتوراة

هلا والله بـ صدى الأمس s13s

[ فالك المليون .. انت خير من يمثل البلد ]