نادي الهلال السعودي - شبكة الزعيم - الموقع الرسمي - شـي مـا شـفـتـوهـ مـن مـبـاراة الـزعـيـم والإتـفـاق ! ! ! !

بسم الله الرجمن الرحيم

السلام عليكم ورحمة الله وبركاته

وبعد:

أبارك لجميع جماهير زعيم نصف الأرض بمناسبة الفوز على الاتفاق مساء البارحة بهدفي القناص آسر كل القلوب..s13s

كما أشكر جميع من سأل عني في الفترة الماضية التي غبت فيها عن المنتدى.. وأقول لهم: "فيكم الخير والبركة"..

أما بالنسبة لموضوعي.. فهو عبارة عن موضوع خفيف إن شاء الله ينقل لكم ما شاهدته على أرض الملعب ولم

تنقله كاميرا التلفزيون..!!! وسيكون الموضوع باللهجة العامية للابتعاد عن التكلف قليلاً...s60s

وأتمنى أن يحوز الموضوع على إعجابكم.....:)

=======================================================

** كنت عازم النية على حضور مباراة الهلال والاتفاق في الملعب مع أحد أصدقائي القدامى وخصوصاً زملاء الثانوية

لذلك اتصلت بصديق اسمه منصور... ورغم أنه ما له في الكورة إلا أنه وافق على حضور المباراة لأجل الالتقاء بي

خصوصاً أن الظروف فرقتنا لأكثر من ستة أشهر...المهم اتفقنا على أن نروح الملعب الساعة سبع وربع.!!

** جات الساعة سبع ونص وخويي منصور ما اتصل!!!:upset: اتصلت عليه واعتذر ان عنده شغلة وبيخلصها خلال خمس

دقايق وبيجيني.. الساعة وصلت سبع وخمسة وأربعين!! اتصلت عليه وقلت أني بأمشي الملعب لحالي لأنه تأخر!!

لكنه رفض وطلب مني أن أنتظر مسافة السكة بس!!!

** جاني حبيب قلبي منصور الساعة ثمانية وخمس دقايق:cry: وتحركنا على طول للملعب بسرعة جنونية حتى أنا

قطعنا الإشارة الحمراء <<<< الله يستر لا يكون أحد فيكم من المرور:D

المهم وصلنا الملعب وخذينا لفة لما وصلنا للتذاكر وأخذناها وأخذنا شالين وعلم s13s

** دخلنا داخل الملعب... وعند البوابة عند التفتيش: فتشوني ومشيت... وأناظر منصور وينه؟ إلا والعسكر ماسكينه

مدري وش لقوا عنده؟!!:confused: أنا يوم شفتهم ماسكينه جحدته وسويت نفسي ما كأني أعرفه:D

أثر العسكر الله يصلحهم متجمعين على خويي علشان العلم الهلالي؟!!!:mad: والله خوفوني حسبتهم ماسكين عليه

سلاح ولا حشيش؟!! وآخرتها علم؟!!:confused:

** دخلنا الملعب على الدقيقة 30 من الشوط الأول... ما شاء الله الحضور كان أكثر بكثير من اللي شفته في التلفزيون

قبل ما أمشي الملعب!! طبعاً ما لقينا مكان زين نشوف فيه المباراة فقلت لمنصور: "إن لم يكن مركزي بالصف الأول

أمام..... ما عاد تفرق معي لو كنت قبل الأخير" خلنا نقعد على الصبة الأولى تحت:D وفعلاً جلسنا بالصبة الأولى

وانتهى الشوط الأول وحنا ما شفنا شي:D <<<<< عشان كذا اعذروني إذا ما جبت شي عن الشوط الأول:cry:

** عندما انتهى الشوط الأول... نزل النجم سامي الجابر للملعب للاحماء...وواجه عاصفة من التصفيق الحاد من الجمهور

وردد الجمهور كثيراً اسم سامي في فترات كثيرة من المباراة...

** يوم انتهى الشوط الأول أغلب العسكر دخلوا داخل <<<< مدري وين؟ بس يمكن عندهم غرفة تغيير ملابس:D

وأنا يوم إني ذيب بغيت أغتنم الفرصة وأدخل الملعب أسلم على سام 6 بس هونت بالأخير<<<<< وربي أن جلد الشرطة

يخوف:D

** بصراحة بصراحة بصراحة: والله صوت رئيس رابطة الاتفاق عليه صوووووت جميل جداً...بصراحة أطربنا..

** للأسف صوت أسد المدرجات أبوخليل ما كان واضح أبداً... وكان واضح أن السبب من المايكروفون!!! أتمنى

يا أبوخليل تتدارك الوضع.... وترى ما يعتب عليك إلا من يحبك...

** قبل بداية الشوط الثاني وعند دخول لاعبي الفريقين... عانق تفاريس حارس الاتفاق ظافر البيشي عناق حار..

وذلك يدل على وفاء لصديقه تفاريس ظافر عندما أعير للهلال في فترة ماضية... <<< أنا أشهد أنه ولد حمايل:D

** الظاهر والله أعلم أن أرضية الملعب راشينها قبل المباراة بـ (فيري) :D ...... الدعيع تزحلق... ثم الحكم خليل جلال...

ثم ظافر البيشي ثم عبدالرحمن القحطاني..!!!!

** الحكم العالمي خليل جلال ذهب لطبيب العلاج الطبيعي لربط يده بسبب تزحلقه على أرضية الملعب (الصابوني) :laugh:

** كان الجمهور متضايق جداً من قرارات الحكم خليل جلال... وأيضاً من اللاعب سلطان البرقان....!!

** في الدقيقة 28 من الشوط الثاني خرجت الكرة من المدافع الهلالي واصطدمت برأس المصور التلفزيوني:D

** كان رئيس رابطة الاتفاق يغني وجمهور الهلال يرد عليه... فكل ما قال بتحبوا مين؟ رد الجمهور: هيييلالs60s

** جماهير الاتفاق كانوا لا يتعدون 100 مشجع...!!

** بصراحة ولا تزعلون مني: جماهير الهلال بالشرقية أفضل بكثير من جماهير الهلال بالرياض من ناحية التشجيع

المثالي والحماس..!!

** انتهت المباراة ولاقى نجوم المباراة: التايب والقحطاني تشجيعاً كبيرا من الجمهور....

** عند خروج الحكم خليل جلال لوقي بتصفيق كبير من جمهور الهلال رغم أخطائه... كما رد عليهم بالتصفيق أيضاً...s60s

** الأمير محمد بن فيصل دائماً يحضر لمباريات الهلال بـ "بانوراما: لوحتها : " م م م 1 1 1 " <<< اللي يعرف الأمير

بالله يسأله لي إن كانت بيبيع؟:D

** خرجت الجماهير من الملعب... وتأخرت أنا شوي... قلت يمكن يصير شي الحين خلني أشوفه عشان أكتبه في

الموضوع:p خويي منصور طلع وهو يكلم جوال... وأنا قعدت أنتظر شي يحصل وللأسف ما حصل شي:cry:

وبالأخير رجعت أبي ألحق بخويي منصور... لكني للأسف ما حصلته.!!! جيت أبدق عليه ولا من القرادة جوالي مقفل

من البطارية:eek: والمشكلة الكبرى أني ما أدري وين مكان السيارة!!!!:cry: لا وبعد والله العظيم حتى ما أدري

وش نوع السيارة أو لونها!!!:cry: :cry: <<<< السبب أننا نزلنا من السيارة بسرعة عشان نلحق المباراة!!!

خرجت من البوابة وأنا أهيم على وجهي وما دريت وش أسوي؟ بغيت أبكي بس خفت يظنوني مندس نصراوي أبكي

لفوز الهلال ويضربوني:D

توكلت على الله وجلست أمشي أمشي أمشي... وتذكرت أننا وقفنا السيارة بطرف المواقف!!:rolleyes:

قعدت أمشي أمشي أمشي... وبالأخير حصلت خويي واقف فوق السيارة ويأشر لي....!!

لا تسألوني عن فرحتي ذيك الساعة... يمكن كانت أكبر فرحة فوز الهلال <<<<<< خربها:D

أنا آسف اللي جبت لكم قصتي المحزنة:p بس وش أسوي.. لازم أكبّر الموضوع شوي:D

مشكورين حبايبي على اعطائي جزءاً من وقتكم الثمين... واعذروني ان ما عجبكم الموضوع لأني والله كاتبه

بسرعة وما رتبته ولا راجعته..... حبيت أنها تكون دردشة بيني وبينكم!!!

واستروا ما واجهتوا.....!

مع السلامة