لو صار لكم هالموقف اللي صار لي اليوم وش بتسوون ؟ - نادي الهلال السعودي - شبكة الزعيم

هـلالـي مـن حـيـنـي · #1 27/12/2006, 06:00 PM

السلام عليكم ورحمة الله

هلا ومية غلا بالزعماااء

حبايب قلبي والله

كل عام وانتم بخير وصحه وسلامه

وتقطعون خرفانكم بالعافيه ان شاء الله

ترى عندي سواطير حااده للبيع :p

المووهيم

اليوم صارت لي سالفه غريبه ماتخطر على بال احد

بغيت انهبل منها

وكاد أن يصيبني الجنون <== لا يطيح حلقك بس

اليوم يوم قمت من النووم <=== احلف

كالعاده فتحت الدريشه ( الطاقه ، النافذه ) عشان يتجدد هواء الغرفه

المهم اني طلعت ونزلت عند أميمتي اتقهوى معها

ورجعت بعد العصر لغرفتي ناوي ادخل للشبكة ( الله لا يخلينا منها )

يوم دخلت غرفتي

تخيلوا وش لقيت ؟؟؟

شي يروع

شي ما يخطر على البال

شي يخوووف من جد

تخيلوا يازعماء يوم دخلت غرفتي لقيت فيها ( خـلـيـة نـحـل )

لقيت النحل مليان بغرفتي داخلين مع الدريشه وجالسين يكونون لهم خليه

وبسرعه وباقل من ساعه كونوا لهم خليه والظاهر انهم نادوا الملكه حقتهم تفتتح الخليه

انا الله لا يوريكم وقفت اناظر تحت الدريشه مو مصدق اللي قاعد يصير بغرفتي

ياربي وش اسوي ؟؟ ماذا افعل ؟؟ اين اذهب ؟؟

تمنيت من جد اني مصور لكم الخليه بس والله جتني ام الركب ولا امداني

المووهيم اول شي سويته قمت اقول لهم ( اشش اشش ) على بالي خرفان بينحاشون ههههههههههههه

شفت الدعوه ما نفعت قلت ياولد مالك الا حلوة الحليب ( أمي )

وانا اللي انادي أمي

وتجي وتشوف وتجلس تضحك علي

قلت ياايمه غرفتي راحت وطي وش اسوي ؟؟ اتصل بالاسعاف ولا الدفاع المدني

ماشاءلله على اميمتي صار عندها الحل وراحت جابت ( معمول ) دخون يعني وحطته تحت الخليه

وبدوا ينحاشون من الدخاان وكل ما خلص المعمول حطينا وكل ما خلص حطينا صارت غرفتي حريقه

المووهيم وبعد جهد جهيد طلعوا من غرفتي

وقبلت رأس أمي الله يخليها لي ووعدتها اجيب لها دهن عود وسجاده

وحرمت افتح دريشتي بعد هاليوووووم

يازعماء

لو صار لكم هالموقف ماذا أنتم فاعلوووون

<== انتهى كلامه يرحمه الله

وتقبلوا تحيات أخوكم المظلوم دائما / هلالي من حيني ( من حيني يعني من زمان لغير اهل الرياض )

اجمل تحيه