|
ونعم الخدمة أنتم قدموا لهم الشكر من هنا ....! بسم الله الرحمن الرحيم . ندخل في الموضوع بدون أي مقدمات لأن الأمر لايحتمل ... لو تجي الف شاحنة من قدامي وأنا نايم أنسى ياولد أقوم ومايصحيني إلا اذا شبع الراس نوم وماعلي من غيري المهم يوم من الأيام قبل أربع شهور تقريبا صار لي الموقف هذا . تعرفون الواحد إذا صار متعود يفرش أسنانه بالسنة مره . خخخخخخخخ المهم شب علي ضرسي وقمت من النوم وأنا ماغير أي آه أي آه طبعا قبل الضرس هذا كنت مسوي أربعه من ضروسي شيل عصب وحشو الواحد منهم 400 ريال . يعني 1600 ريال تقريبا . معصي بعد مافيه خصم . المهم قلت والله ماروح مستوصف أهلي أصبر لين الصبح وروح الحكومي الله يعز الحكومة قولو آمين . رحت المستوصف الحكومي دخلت عليهم قلت سلام ياجماعة عندي الآم في الأسنان وين عيادة الأسنان . قالو : للأسف ماعندنا عيادة . قلت : والحل . قالو : نبي نكتب لك تحويل لمستوصف ثاني تروح عندهم . قلت ياالله وش ورنا بسم الله مشينا المستوصف الثاني ومعي التحويل دخلت عليهم وسلمت وقلت لهم هذا تحويل من مستوصف ... لكم أنتم . قالوا لي وش عندك . قلت : أسنان . قالو : مع الأسف ماعندنا نبي نعطيك تحويل لمستوصف أسنان في الروضة . قلت ماشي ياعم . وصلنا للروضة ودخلنا المستوصف كان فاضي مررره انبسطت وقلت غريبة مستوصف أسنان وفاضي . المهم دخلت عليهم . وعطيتهم التحويلات . رحبوا فيني وقالو نبي بطاقة الأحوال لو سمحت . قلت : هاذي بطاقة الأحوال . قالوا : نبي صورة منها رح صورها . قلت : تامرون أمر . وأنقز مثل الجربوع لأني ماقدر أنقز مثل الفهد ضرسي يعورني . وأصورها لهم وأجيبها . قالو : لي استرح . واجلس عندهم قالو : عطنا البطاقة الأصل . قلت ياجماعة توني معطيكم البطاقة الأصل وقلتوا جيب صورة . قالو : ماعليش مجرد تأكيد . قلت طيب مافيش مشاكل وأعطيهم الأصل . قالو : أدخل العيادة رقم ثلاثة , وأنا اللي أدخلها يوم ضرسي جته أم الركب من الخوف وبدأ يتنافض . قال تكفى يابو فهد أبعد الدكتور عني . قلت له أمعصي وشوله يوم إنك تقومن من النوم . إنطق عشان مرة ثاني ماتزعج خلق الله . " طلع جني مهوب ضرس " وجلسني الدكتور وبطحني على ذاك الكرسي وقال لي افتح فمك . وافتح فمي وينجن الدكتور وش الحفريات هاذي . قلت له عادي تصير بأحسن العائلات . قال : أي واحد فيهم قلت شفه هذاك اللي منبطح ورى قبل الأخير تكفى إمسكه لاينحاش . وهو يجي الدكتور ويعطيه ذيك الفلكه اللي ذكرتني بإستاذي الفاضل الفلسطيني اللي درسني في الإبتدائي . قال لي : في ألم . وأنا أسذب عليه قلت إيه . وهو يضرب اللي جنبه : قال لي في ألم قلت إيه . قال : المجرم الضرس يحتاج الى سجن تأديبي . قلت : وشلون قال لازم نشيل العصب ونسوي له حشوه . قلت : معي علم من زمان على بالك جبت شي جديد أنت وجبهتك . قال : مع الأسف ماعندنا الإمكانيات هاذي العيادة توها جديدة . قلت : طيب اللحين مسوين لي قلق وإزعاج كان قلتوا لي من زمان نعطيك تحويل وريحتونا قال لي الروتين . وينقز لي : ضرسي قال . اسمع عوضني بدل إرهاب قلت له : انثبر . المهم عطوني تحويل لمستشفى اليمامة . وراك وراك أيها الضرس العنيد . يوم وصلت هناك وياخذون أوراقي ويعطوني موعد . ههههههه ياحبيلهم تتوقعون متى الموعد .... ؟ بعد شهر وعشر أيام ....................!!!!!!!!!!!!!! وخذ تعجبات من هنا لين بانكوك . قلت ياجماعة أنا ماأقدر أنام في الليل ضرسي يعورني شوفو لي حل تكفووون ياربع وش الموعد هذا . قالوا : أدخل على الدكتور وقول له : دخلت على الدكتور طبعا مصري . قلت له السالفه . تتوقعون وش قالي :. لايمكن أقدم موعدك ولو ساعة وحدة وإنت مفتكرني عيادة أبوي هي فيه ناس قبلك . قلت ياحبيلك وجيب لك صحن فلافل . اللحين ماعندك أحد وفعلا ماكان عنده أحد . وهو يرفع علي ذاك المنشار " حق أسنان طبعا " قال اللحين يبي يجيني مراجع . ولاتحاول أطلع برى . وأنا أطلع برى أجر أذيال الهزيمة وقلت لاحول ولاقوة إلا بالله أجل المساكين اللي ماعندهم سيولة مادية وشلون عائيشين لاحول ولاقوة إلا بالله . قلت ياولد : والله مايعزك غير جيبك واروح مستوصف أهلي وفي نفس الوقت يزبطونه لي ويزبرقونه . قالو : لي تبي نحط الخلفية بيضاء وإلا رصاصي طال عمرك . قلت . انثبروا الاحترام موب منكم من دراهمي والله وأدفع لهم 450 ريال . المهم نسيت سالفة الضرس وبعد شهر ينقز لي واحد من أسناني اللي في وجه المدفع . " كله من الدخان الله يفكنا منه " قلت والله لاصبر عشر أيام عشان أروح للمراجعة حقت مستشفى اليمامة وأنا اصبر لين جاء الموعد . يوم وصلت عندهم وافتح خشتي قال : لي أي واحد فيهم قلت هذا الأشقراني اللي قدام . قال مع الأسف التحويل مكتوب فيه ضرس وليس سن . قلت اللي كاتب التحويل ماعنده سالفة أنا ابخص منه ... ويالله يالله أقنعتهم . . قال الدكتور أمشيها لك المرة هاذي بس . والله ياهو حليل وولد حلال . المهم ويشوفه . ويفحصه .. ويمعن النظر فيه . قال خلاص سويت كشف عليه خذ الموعد هذا علشان نسوي لك حشوة . طبعا الموعد بعد ثلاثة أسابيع . واكتشفت إنه مايعزك غير جيبك . لنفرض رب عائلة مكونة من خمس أطفال . ولاحد يجيني يقول مافيه أمل يصير لهم تسوس لا يصير لهم . وكان راتبه خمس الآف ريال . وراح الراتب . طبعا ربعه أقساط زي العادة يعني واقفه عليه هو . وبقى معه ثلاثة الآف ريال . وطبعا راح منها مصاريف المعيشة . فواتير الكهرب والموية والجوال . وجته ليله ظلمة مافيها نور وقاموا ثلاثة من أولاده يبكون من أسنانهم وش لون يبي يعالجهم .....؟ وآسف على الإطالة . الكناري الأزرق لاتعلق لأعلقك بالمروحة . خخخخ |
يؤيؤيؤ المستوصفات الحكومية امزح معهم باي شي الا ضرسك :D انواع التسيب والمواعيد الطويلة المدى :p والحمد لله على سلامت ضروسك هلالي شقاوي :D دمت بخير وعافية ,,, |
إقتباس:
أجل لك تجربة يادوب وليه ماقلتي تعرف أنا وقتي من ذهب |
والله صحيح الأسنان هاذي مشكلة جدا كبيرة تخيل مستشفى الشميسي عطاني موعد بعد ثلاث شهور من جد والله شي لازم تهتم فيه وزارة الصحة وبعدين حتى الحشو وغيره أسعاره غالية جدا |
<<<<<مزبط سنونه و ضروسه قبل ما يسافر في احسن عيادات والله اذا تبي ترتاح ادفع و انت ما تشوف الدرب بس اسئل عن العيادات المزبوطه و اللي لها سمعتها مو توقف عند اي مستوصف و يلله سلامـ |
مالك الى (المدار )نصيحه المدار ممتاز واجد مره رحت ابي احط تقويم <ترى اسناني حلوه بس بحط زينه هههه ويم دخلت عندالدكتور قال عندك سن مسوس لازم تحشينه<لازم يطلع بلاوي المهم رحت اسوي اسناني عند الدكتوره سوتلي اياها باحسن الطرق مايوجع ولاشي دقيقتين وذلف والله المدار كويس ولو سمحت لاتدخن عشان مايفتحونلك فتحه في حلقك عشان تتنفس منها بطل احسلك |
ريح عمرك مستوصف اهلي على طول |
إقتباس:
إقتباس:
إقتباس:
وشكرا على مرروكم |
الله يشفي ضرسك .. بطّل شكلاته وحلويات وتكون بسلامه .. وقبلها بطل الدخان والله مافيه الا الضرر بالحياة والضرر <<بالجيب .. ومثل ماقلت الله يعز جيبك .. ولا الامور متدهوره في المستشفيات والمواعيد .. بالعربي معك واسطه من بكره يصير موعدك .. مامعكشي واسطه ان الله مع الصابرين .. والضرس كويس .. والله كانت فيه شابه مسكينه نظرها مهدد بالعمى اذا ما تداركت الامر .. ولما راحت لاحدى مستشفيات العيون المتخصصه الحكوميه أعطوها موعد بعد ثلاث شهور وهي باشد الحاجه لسرعة العمليه .. يعني العين بتروح والموعد بعده ماجاء .. الشكوى لله .. دمت بخير |
إقتباس:
إقتباس:
|
عادي متعودين على الفئات هذي مره رحت لم المركز الصحي اللي عند بيتنا وشفت الهوايل ضرسي فيه تسوس من الجنب عند اللثه ويوم اروح ويجيني الدكتور مشمراً عن ساعديه:essen: لابس نظارات تلمع:cool1: <مصدق روحي افلام كرتون ويقول افتح اثمك وافتحه ويقول اكبر لين سار كنه اثم تمساح:jawdrop: ويجيب الابره الاولى وانا ارتجف :shutup: ويفظيها على ضرسي:doctor: وبعد خمس دقايق يقولي تحس بضرسك واقوله ايه ويجيبلك الابره الثانيه ونفس القصه ويجيب الثالثه ونفس القصه أخر شيء قال ماأقدر اسويلك شي البنج سار بعضلة الفك :furious: واقعد يومين ماأقدر أكل ولا اتكلم *خلاصة الكلام اللي ما بغىيخلص انه ماعندك أحد لاعلاج زين ولا احترام ولاتقدير إلا إن كنت بتدفع من فلوسك |
إقتباس:
وليه عادي متعودين المفروض نرفع شكاوي لين توصل وزير الصحة أو ولاة الأمر ابو متعب مايقصر مانشوف المشكلة ونسكت عنها ترى هذا الشي هو اللي مضيعنا نشوف الأخطاء ونسكت عليها مره موظف في أحد القطاعات ياخذ الملفات ويقول راجعني بكرة وقفت بحلقه وقلت ليه أراجعك بكره . قال ماتشوف عندي المعاملات وش كثرها والا تبيني اخلص معاملتك واترك الناس وش حضرتك وقام ينفخ علي . أنا عارف شغله زين وعارف ان الاوراق يخلصها بثلاث دقائق بس . رحت وشتكيت لمديره في القسم وقال لي . احنا مظغوطيين وبدأ يصرفني . طلعت وقلت والله ماخليه ورحت ودخلت على المدير العام وقلت له ياخوي شوف أنا والله ماراح اسكت ومستعد أعلمك بوظيفة الشخص الفلاني اللي يتابع المعاملات أنا معاملتي تخلص في ثلاث دقائق ليه يخرني ويقول تعال بكرة يوم شافني المدير العام فاهم قال يعني وش تبي تسوي . قلت أبدخل على الوزير واكلمه واذا مادخلوني ابو متعب فاتح أبوابه وربي مايردني الا ابو متعب . وشافني الرجال جاد وجاب معاملتي والموظف وقال له يالله خلصها اللحين وجلس يتكلم على الموظف شوي قدامي يسكتني . يعني مانسكت على الشي لازم نوصل للمسئولين يعني خمسين مليون تصرف على الصحة وين تروووح أبي أعرف هذا اذا كانت فعلا خمسين مليون واتوقع دولتنا تصرف على الصحة أكثر . وللمعلومية سألت صاحب مستوصف أسنان قلت له كم تكلف الحشوه عليكم قال نجيبها بسعر ثلاثة ريال . ولكن أنا اعذرهم المستوصفات الأهلية لأن عند رواتب دكاتره واجهزه طبية وغيره لكن الحكومي ليه ليه كذا ...؟ |
ما دامك تبين ما اعلق خلاص اوكي ريجتن و ريحت نفسك ابسوي اضراب عن الطعام قصدي عن الكلام .. |
إقتباس:
|
^ ^ ^ بـدال ما اصير كناري أبصير كتكوت :D ! |
| الوقت المعتمد في المنتدى بتوقيت جرينتش +3.
الوقت الان » 02:08 PM. |
Powered by: vBulletin Version 3.8.7
Copyright ©2000 - 2024, Jelsoft Enterprises Ltd