~~ المقدمة ~~


الرياض – الساعة 5 فجراً – غرفة النوم ..!!

الجو ملبد بالغيوم .. والغرفة يلفها الصمت الا من قطرات المطر
التي تتساقط على المكيف كأنها عقارب الساعة في صوتها ودقة انتظامها ....

>>> إلا يا الربع على طارى المكيف تراه مبهذلني اذا طفيته أحتريت وإذا شغلته مرضت وبردت.. فشوف لي حل الله يجزاكم خير ...

وآه يا المكيف منك آه.. ذكرتني أيام الدراسة وفصل (ثاني ثانوي دال) بالتحديد :p
طبعا لي في ذلك الفصل حكايات ومواقف أتعجب اذا ذكرتها من شقاوتي وتنسيمي الى درجة اللا معقول ..

اقدام عمرو في سماحة حاتم ** في حلم أحنف في ( شقاوة ماجد )

بالفعل كنت في ذاك الفصل أردى مني في فصل البارق اللي مسويه صدى الامس
وكنت مثل ما يقول صديقي الهاوي في توقيعه (( جاي على جنب ))
>>> طبعا بدون عيون عسلية ...;)

باختصار ذلك الفصل جمع تشكيلة من العرابجة لم يرى التاريخ مثلهم
وقد توليت كبرهم حتى عافني خاطر المدرسين وملت مني الادارة
وكنت من الطرد قاب قوسين او ادنى نعم هذه هي حقيقتي فلا تتعجبوا
فما خفي كان أعظم ...

~~ قصتي مع المكيف ~~


في الفصل كنت أجلس في آخر كرسي وكان خلفي مكيف أسبيلت
وفوقي مكيف جدار ومن هنا كنت اتحكم في حرارة الفصل وبرودته
بشقاوتي وبالمكيفات التي املك مفاتيحها ..
وسأروي لكم اليوم بعض استخداماتي لهذان المكيفان فتعالوا معي ..

~~ المكيف وشجرة الريحان ~~

يوجد في الثانوية التي ادرس بها شجر ريحان كثيف وكان عندنا مدرس مصاب بالحساسية فكنا نقطع هذا الريحان ونحطه في مروحة المكيف فتنتشر ريحته في الفصل بشكل مزعج وكان الاستاذ اول ما يدخل يدق اللطمة ويقول صكوا المكيفااات وبكذا يصير الجو حااار عاد حنا نبدا اللعب باعصاب الاستاذ ويبدا كل الطلاب يهفون بالكتب والاستاذ يطرطع ويقول لا اشوف احد ماسك كتاب ونبدا نهف بشمغنا والاستاذ يصرخ لا احد يمسك شماغه بعد ذلك يبدا الطلاب يقولون بصوت لا يعرف مصدره !! حر حر حر والصوت مرة يجي من قدام ومرة من ورا والاستاذ دايخ ما يقدر يصيد راعي الصوت الى ان تنتهي الحصة بسلاااام ...

~~ المكيف اللي ما فيه زيت ~~

كنت اذا ودي ازعج مدرس اجيب ورقة او مناديل وحطها في مروحة المكيف
عاد تطلع انواع الاصوات المزعجة وإذا سألني الاستاذ وش فيه المكيف أقول
(( ما فيه زيت يا استاذ !! )) طبعا الطلاب انواع الضحك والاستاذ ما يدري وش السالفة ويقول خلهم يجيبون له زيت عاد جملة ما فيه زيت اشتهرت بين الطلاب وصارو يقولونها في كل شي لين انفضحنا..!! :p

~~ المكيف الثلاجة ~~

كان المكيف عندي وكنت استخدمه ثلاجة أفك الشبك وحط فيه انواع العصيرات والببسي والكاكاو لاننا كل اربعاء نجيب حلويات واحطها هناك الى الفسحة ..
في أحد الايام حطيت عصرين ربيع داخل المكيف وقربتهم اكثر من اللازم من المروحة عشان ابيهم يبردون بسرعة وفي نص الحصة طاح العصير داخل المروحة وبدا المكيف يطلع صوت كنه انفجار ويهتز بقوة وما بقى الا شعرة ويطيح على راسي أنا طقتني الروعة وما عرفت اتصرف لاني تحته وجاء الاستاذ بسرعة وطفاه
ويوم شافني مرتاع بدا يهديني ويقول الحمد لله ربك ستر ..
والطلاب يضحكون لانهم دارين ان هذا كله من ورا راسي ...

~~ المكيف والعصا ~~

أحد الاساتذة عقد معي اتفاق أنه ما يطقني ابد بشرط اكون انا المسؤول عن عصاه وتكون عندي دايم احافظ عليها واجيبها معي المدرسة كل يوم !!
بالطبع وافقت مباشرة لان هذا المدرس ضربه اقشر بس اني اخذ العصا معي البيت ما في امل لاني الكتب احطه في الدرج على طووول ... >>> قمة الدجة
عاد في هذه اللحظة تذكرت المكيف وصرت أغبي العصا داخله واذا رجعت طلعته
وكان كل يوم يرسل واحد يجيب العصا واذا خلص رجعها لي الى ان جاء يوم وما رجعت لي رحت للأستاذ اسأله فقال لقد كسرت على يد احدهم كان الله في عونه ..


~~ المكيف والعصفور ~~

كان فوق المكيف فتحة صغيرة لقيت فيها عصفور صغير .. طبعا اخذت العصفور
وسديت الفتحة وقفلنا الدرايش اول ما جاء الاستاذ وقفل الباب اطلقت العصفور
اللي بدا يطير في الفصل وحنا أنواع الصراخ والمناقز والاستاذ يصارخ طلعوه
افتحوا الدرايش افتحوا الباب لين طلع العصفور وحنا متقطعين من الضحك ..