نادي الهلال السعودي - شبكة الزعيم - الموقع الرسمي - فواصل..فواصل ( الوليد بن طلال ,طارق التايب..الدراسة)

إخواني الزعماء ,,,

السلام عليكم ورحمة الله وبركاته,,, وقبل..

الفاصلة الأولى,,,,,,,,,((وهي استثنائية..!!)

شلونكم بعد الإجازة ....أكيد طبعاً كلكم مستانسين بشكل يفوق الوصف عشان الدراسة قربت...:thumbup:

آه يالدراسة....ذكرتو(ن) بأيام الوناسة ...آه ياهي لذيذة المدرسة...ولا الجرس المستلج...والله اشتقنا له

وإلى قرقعته الموسيقية التي تأخذ الأنفاس من جماله ..وعذوبته الموسيقية..:D

ولا تخيلوا معي الفصل والطلاب متجمعين فيه -متحمسين عشان ماتفوتهم ولا معلومة - :D ومدرس الرياضيات يشرح بكل حماس وسعادة...

ولا إذا رنت الفسحة تشوف الطلاب مراكض بالاسياب تقول يطردهم أسد كل هذا على شان يلحقون على المقصف..!!

آخ بس على الأيام الرومنسية الحلوة...

تصدقون أسعد أيام حياتي عندما أقضيها بين كتاب الرياضيات والانقليزي والقواعد...وبقية العائلة الكريمة:D

لا ولا ننسى الواجبات وقومة الصبح والفطور دائماً حليب وسندوتش بيض وجبن وطحينية...ثم تودي خواتك( نورة

وحصة ولطيفة ) :D لمدرسة البنات اللي قريبة للبيت..

واخوانك الصغار اللي ماتشوف عيونهم من النوم..تلقى الواحد إذا ركب بالسيارة صكها نومة خفيفة قبل مايوصل للمدرسة:laugh: وطول الطريق وهو فاقـ(ن) إثمه :p

الله الله الله على هالحياة الجميلة...!!

يا خوان تصدقون ودي كل ما نخلص دراسة يعيدونها لنا من جديد :eek:

طيب تخيلوا لو إن الواحد طول عمره يدرس كان وش تصير الحياة...روعة ..خيال.. وناسة.. سعادة..

أنا داري إن كل واحد منكم يبي يقرا كلامي يوافقني الرأي 100% ولا يمكن -وركزوا على لايمكن - لا يمكن أبداً أنه

يفكر ولو لحظة إنه يطب ببطني ويرفعـ(ن) فوق ويمسط بي الأرض ثم يلقط أقرب عقال ويمردغـ(ن) إلى ما أعض الأرض

أبداً مستحيل أحد يفكر كذا..:laugh:
.
.
.
.

الفاصلة الثانية,,,,

طارق التائب وما أدراك ما طارق التائب...!!!

الرجال تعاقدوا معه الربع (الإدارة) ولهم ألحين أكثر من شهرين وإلى الحين مالعب ..:mad:

قعدنا ثلاث أو أربع أسابيع نحتريه وهو ما جاء للرياض ...!!

ويوم جاء قعد كم اسبوع مالعب عشان توصل بطاقته - تقول اللي يبي يجيبها داقها رجليه من هنا لأنقرة -

ثم راح لمنتخب بلاده كم يوم...:mad:

والحين الرجال يعاني من إصابة يبي له كم اسبوع عشان ما يتعافى..:confused:

والله أنا خوفي يصير مثل اللاعب التونسي (فوزي الرويسي) اللي تعاقد معه الهلال عام 1413هـ ومن يوم جاء للهلال

وهوناقلـن غرفة نومه من مقر سكنه إلى غرفة العلاج بالنادي..يعني 24 ساعة وهو مصاب مرتـ(ن) بالركبة ومرتـ(ن)

بالصفاق (على طاري الصفاق تذكرت صفوق التمياط:D ) ومرتـ(ن) بشد عضلي وبالأخير اكتشف الطبيب -العبقري

- برنابوك -يرحم أبوك- إن سبب الإصابة هي بضروسه !!! يقول إنها مليانة سوس..:confused:

وأنا خوفي إن النادي مافحص الرجال زين ..:D

والله ياليتني اشتغل بالنادي والله إذا بغيت أجيب لاعب ياشيخ لأفحصه فحص عمره ما مر عليه..:D

أول شي أوديه لم محطة الفحص الدوري على طريق الدمام :D وأخليهم يشيكون عليه (ميكانيكا -كهرباء- شاص - بدي )

ويطلعون العيوب اللي فيه ثم أنقز به لم صناعية الرياض اللي على طريق الخرج وأخلي ها الأتراك والبنقالية يعدلون فيه :eek:

ثم أمر به لم حراج السيارات بالنسيم أشوف كم يسوى:D :D :D (حشا سيارة مهوب لاعب هذا:d )

عقبها أوديه للمراكز الطبية على شان يفحصونه على راحتهم وصدقوني إذا تجاوز فحصي يبي يتجاوز فحصهم 100%

يعني ياشباب خلونا صريحين ...هالحين الواحد لو بغى يشتري خاروف يبي يقعد ساعة يقلب فيه إلى ما يستحي الخاروف :d يعني مافيها شي ندقق بالرجال:d
.
.
.
.
الفاصلة الثالثة,,,

يقولون إن النادي يمر بضائقة مالية..:no:

وبصراحة ماهقيت إن الأعضاء يتركون أبوسلطان ( يكد )على النادي لحاله...والله مهيب زينه من أعضاء الشرف فشلونا:sad:

مع أبوسلطان و هو ماقصر كب على النادي إلى ما قال بس وحقق 6 بطولات وسوى أشياء كثيرة للنادي...

يعني ما أسمع إلا عبدالله بن مساعد هو اللي ماقصر ...ولا ننسى بندر بن محمد.:thumbup:

بس بقية الأعضاء مادري وينهم..:mad:

وأنا أقصد الأعضاء المقرشين...:confused:

يعني ماشاء الله عليهم ماعليهم قصور منغنغين -الله لايضرهم- والله بعضهم لو يكح طاح منه مليون ريال -فئة خمسمية-:D

والثاني لو يعطس طاح منه ربطة أمهات مئة ريال:D :D - الله لايضرهم - >>>>>>>بعد باتسر ألقاهم يلاحقونـ(ن) يحسبونـ(ن) ناحتهم:eek:

والوليد بن طلال بصراحة محتاجينه يدف النادي بكم مليون...( شحاذ وخفيف دم):D

يعني لازم يابوخالد نقولك..( تكفى تكفى....تكفى تكفى....تكفى تكفى...):laugh: :laugh:

اعتبر جمهور الهلال كله يقول لك ( تكفى )s13s s13s s13s

يعني لو حسبناها ( 1000,000هلالي × تكفى = 1000,000,000 ريال ( مليار) :eek: طبعاً هذي صعبة شوي :p

نبي بس 5 مليون تدز فيها النادي جعلنا نندز بكم مليون...:laugh: :laugh:

وسلامتكم,,

وآسف على الإطالة ...والمصالة.... لأني منسدح بالصالة:laugh: >>>>>>>>إلى هالحين وهو مستخف دمه:D
..
.
.