الجمهرة

إي بالله اخطو,والخطا اللي جابهم عين الصواب
مبطي وأنا اشوف الطمع يكشف رداهم واستره


ما يملي عيون الحسود بهالزمن غير التراب
ومن لا يتوب من الخطا تحرم عليه المعذرة


اللي من اوّلها خراب .. اكيد تاليها خراب
والبِندَق اللي ما تثّور في هدفها .. تذعره


ودّك ليا من جاتك الغلطة من الناس القراب!!
الصاحب اللي ما كسبت محبّته ما تخسره


مشكلتي أنّي ما عرفت احسب لصدّتهم حساب
قلّطتهم صدري على ذكرى قصيد وحنجرة


صوتٍ يصول بمنبره,وخطاب ما مثله خطاب
والطيبة اللي زعزعت صوت الخطيب ومنبره


ما فيه دمعٍ صوّبوه احبابي بوجهي وخاب
ولا رزق حزني على غالي , ولا فجّ انْحره


كلّ الزهاب اللي معي..ذكرى من اصحاب الزهاب
واللي بقى لي من عذاب..اشرس طريقي واخطَرَه


لانّي تجنّبت الغرق..تعديت من فوق السحاب
لانّ اكثر اصحابي ورق.. ما شفت للطيب اثمره


والله ما حطّيت بين الحقد والخوّة حجاب
حتى غدوا ربعي يحدّوني على الضيق..(اشكَرَه)


البارحة ثارت عليّ رقاب.. وآوتني رقاب
البارحة يا ثقل دمّ البارحة ويا محقَرَه


أهبّ يا وجه الحسد وشلون جمّعهم.. وغاب
كيف السنين اللي عطتني .. (بعثرتهم بعثَرَة)


أثر المصايب.. ما تجيك إلا من الناس القراب
وبهالزمن حتى الخويّ اللي تثق فيه..احذَرَه


لا بارك الله في رفيقٍ.. تزعله كلمة عتاب
ولا جمّع الله الرجال اللي تفرّقهم (مَرَه)



عوّدت نفسي كلّما شدّدت في يٍمّة ركاب
ما اصدّ وجهي عن طريق ليا جبت اخبْرَه


الصاحب اللي ما يجي من صحبته غير العذاب!!
نذرٍ عليّ ان ما هجرني.. والاّ أنا اللي بهجره


من يفتح لفرقاي باب .. افكّ له عشرين باب
واذا خويّي ما يقدر خوّتي ما اقدّره


إن (روّحوا) فانا بري منهم إلى يوم الحساب
وان (جرّحوا) قولوا لهم ما حرّكوا فيّ اشْعره


شفه لهم حول السنة .. ولا خذوا منّي جواب
أحسن دوا للي يحاول يستفزّك .. تحقره


أنا جمعت اوراقهم بكتاب .. واغلقت الكتاب
يا وقت لمّ اللي تلمّه, وانثر اللي تَنثره


ما كنت احاتيهم صغيّر .. عاد احاتيهم شباب
إن ما ذخرني صاحبي لليوم الاسود ما اذخره


عقب اكتئاب البارحة ما عاد أنا حمل اكتئاب
الطيب جَرجرني, وانا ماني بناقص جَرجَرة


اللي يخاف من الظما يترك لنا طرد السراب
واللي ما هو بقدّ الظلام ووحشته .. لا يسهره


أنا.. تجّرعت العطش لين احترق وجهي وذاب
أنا.. كسرت بخاطري قبل الصداقة تكسره


أنا.. خسرت اللي غيابه غير عن كل الغياب
أنا .. غفرت لعالمٍ .. ما تستحقّ المغفرة


أنا اكثر (إنسانٍ تعلّم) من كثر اخطا واصاب
أنا آخر(لسان يتكلّم) في زمان الثرثرة


أنا (القصيد اللي فزع) من دفتره .. مليون ناب
وانا(الوحيد اللي جمع) مليون ناب بدفتره


جفني وجرّحه السهر, حيلي وهدّته الصعاب
دمعي هدر..ضحكي ندر..عمري وضيّعت اكثره


شيّبت بعقول العرب.. هيبّت روسٍ ما تهاب
جمهرت ناسٍ عمرهم ما يعرفون (الجمهرة)


ما صرت ذيب الاّ لأن اللي حواليني ذياب
ما كنت اغيب ألاّ لأن العفو عند المقدرة


ترى حلاتك, لا حملت لصاحبك كلمة عتاب
إن ما نطقت ابْها بوجهه.. ما تذمّه بظهره


في هالزمن ما يملي عيون الحسود الا التراب
والا الحظيظ.. الطلقة اللي ما تصيبه تذعره


ودّك ليا من جاتك الغلطة من الناس القراب
الصاحب اللي ما كسبت محبّته ما تخسره

السفينة

ضاقت وساع الفيافي والوعد متن السفينة
للطريق اللي دعاني بعد أمان الله وأمانه


لا تناديني.. وصوني قلبك الله لا يهينه
لا يراهن في رجوعي لاجل ما يخسر رهانه


ليه ما ارحل عن غرامك بعد ما ذقت الغبينة؟
اذكري لي شي واحد يستحق أقعد عشانه


قلب ما حنّ لوصالي ما ني بحاجة حنينه
وأشهد أنه ما يعزر بالرفيع إلا هوانه

الهوى الغدار حدّ الله ما بيني وبينه
والرجل لا خير فيه إن ما حفظ قدره وصانه


واحدٍ مثلي ليا من حدته عوجا سنينه
ما شكا لأقرب بن آدم لو هو أغلى من أخوانه

يوم قلبي ما عصاك وما قدرتي تذبحينه
ليه خنتيه وانتي معه من نفس الديانة

كان ذبحي بدك أرحم لي من اللي تفعلينه
وإن طلبتك تذبحيني.. ما ذبحتيني ..لعانه

كل جرح من جروحي تذكرينه.. تنكرينه
كنّ مالك في نزيفه يد خانت بالأمانة

ينزف الخافق تواضع لين لطختي جبينه
ولا أنا ما كنت أبيها توصل لحد الإهانة

قلت من باب الميانة صاحبك وتعذبينه
لعنبوك ارخي معاي شوي ما صارت ميانة

طعت عقلك يوم قيل ان العقل بالبنت زينة
لكن الشرهة عليّ الـ.. كنت أحسب انك تكانة

من بعد ما كنتي أنتي في حشاي أغلى سجينة
اوعدك باطلق سراحك واتهمني بالإدانة

وين رايح..؟ لأي دربٍ ما يرجع للمدينة
ليه رايح..؟ لأن قلبك ما ترك قلبي و شانه

كيف ابنسى..؟ ربك اللي ملهم القلب السكينة
مثل ما عانه بقربك.. لا نوى فرقاك عانه

كان قاسي يجرح أطراف السكاكين السنينه
ما يطيح.. وبنت مثلك حبها هزت كيانه

ولا أنا خابر خفوقي ما يمد إلا الثمينة
وان بغا يغيض الثريا قعد القمرا وزانه

مزعلٍ لجلك هنوفٍ رجت عقولٍ رزينه
وان تهادت بالطريق الجرهدي تزهر جنانه

جادل حتى الجمال إن شافها كتف ايدينه
والقمر لو شاورت له ينزح وتقعد مكانه

كانت أول من تحكم في فروع الياسمينة
وان تعدتهن تثنن خيزرانة.. خيزرانة

بعتها لاجلك وصارت لأصغر أطرافك رهينة
ولا هي لفتة هدبها تغمرك ثقل ورزانة

والخفوق اللي تغذى من معزة والدينه
مشكلته إنه تعلق في زمن ما هو زمانه

كل ما زادت جراحه واكتشف غلطة ضنينه
صدقيه إن قال: ما به شخص يستاهل حنانه

يوم نادى: يافلانة ما رضيتي تسمعينه
لين صوت يا فلانة يا فلانة يا فلانة

كنت أشوفك زعفرانة تقرض الورد وتدينه
يمكن اني ما قطفتك بس أشوفك زعفرانة


كنت أهاب البعد عنك وأطلبك لا تذكرينه
كان خوف من الفراق وخطوة الفرقا جبانة

ما اقتعنت إن الخيانة للرجل تلوي يمينه
لين ما ربي بعثك وذقت من طعم الخيانة

اسمحي لي ما بقى فيني مكان تطعنينه
واقبلي من جوف قلبي كل عطفه وامتنانه

والله الله في عذابك بتركك عينك بعينه
ذلليه ولا يردك عن شقاك إلا لسانه

ولا أنا قررت أسافر وأمتطي ظهر السفينة
لان ما به شي واحد يستحق أقعد عشانه

لحظة تأمل في اثناء الامسيه

مشكوور ولاهنت
أخوي :: رهيب ::

حـامد زيـد وما أدراك ما حـامد زيـد..
شـاعر رهيييييييب ومبدع وزعيم

إقتباس * أمسية أبوظبي في 15 أكتوبر 2003 تحت رعاية سمو الشيخ فلاح بن زايد بن سلطان

الله لايهينك تنزل الأمسيه إذا هي عندك صوتيه أو فيديو اللي يريحك

::

وأسمحلي أشاركـ بواحده من روائع المبدع

::

الأولي والتالي

جاء نهار مارحمتني جيته وقدومه
شفت فيه الناس واجد واقفين قبالي

كنت أحسب أنها حقيقه والعرب ملمومه
وقمت افضفض عن همومي وأشتكي غربالي

ويوم زال الحزن عني وانجلى بغيومه
وأثرني ماغير أسولف بالخلا بلحالي

من عذابي قمت أعزي قصةٍ مرحومه
ولعت بإيدين خلي وأنطفت بإهمالي

قصةٍ لدت عيون صويحبي من نومه
يوم شلت الموت بإيدي وأبتلوا عذالي

ما رضيت أكسر غلاي وماقدرت ارومه
وعاذلي ماصد عني وماقوى منزالي

أبتليته لين جتني خنجرٍ مسمومه
وأبتلاني لين جاب الأولي والتالي

والله انه ماعذلني لين شق هدومه
ولين خانتني عزومي وانكسر تمثالي

وإلا أنا ما كنت أبين لأمطرت ديمومه
بالمدامع من فراق المخلصين أمثالي

كنت أوقف وأتذكر نفحة اليشمومه
وأذكر أني كنت غالي في عيون الغالي

واحدٍ كانت نسايم سيرته بسمومه
وكان كل ماشاف ظلمي بالهوى يلجالي

ذاك والله كلما أرسل في حشاي سهومه
أنتهى ليل السكينه وأبتدا زلزالي

والله أني كل ما اسمع سيرته وعلومه
قمت أشوف الموت الأحمر واقفٍ بظلالي

وأشهد أني كلما اسهى وأفتكر برسومه
ماوعيت إلا وأنا أرمي غترتي وعقالي

ليت ربي يحتميه ويحرسه ويدومه
يومه أقرب من عروقي للجسد بوصالي

وليتني لما عرفته ما عرفت خصومه
وما وقعت بظلم ناسٍ ماوراهم والي

العذول اللي حرمني حاجةٍ مقسومه
ليه يحرمني قهوتي والدلال دلالي

وليه يسأل في غرامي وإن بغيت أسومه
دام صار الجيب جيبي والريال ريالي

والله أن العشق شيٍ يستحق القومه
وأشهد أن عيون خلي تستحق أفعالي

يكفي انه لانظر لي نظرةٍ محشومه
يرتجف كفي ويوقع من يدي فنجالي

وإن لمحت بطرف عينه دمعةٍ مكتومه
جيت كلي من عذابي عالي متعالي

وإن تبوسم لي بعينه والشفاة مضمومه
والله مدري وش اللي بعدها يجرالي

ليت يومي قبل يومه أو معاه بيومه
وليت حاله غير حالي دام هذا حالي

إن غفيت الليل جتني بالمنام حلومه
وإن صحيت الصبح ناسي سيرته يطرالي

والله اليبطي وعيني تسهره وتقومه
والله اليبطي عذولي مايفك حبالي

دامني لازلت أحبه وأعشقه بهمومه
بذكره مع كل خطوه حللت ترحالي

وبذكره مع كل ليله مظلمه مشؤمه
نزلتني في حشاه ورفعت منزالي

وبذكره مع كل دمعه نوخت بهمومه
وحسستني بأن قدري في غرامه عالي

وبذكره كلما نسيته وإن ذكرت سلومه
قمت أشوف الناس واجد واقفين قبالي

وإن حسبت أنها حقيقه والعرب ملمومه
ماتحكمت بسكوتي لين طال جدالي

ويوم زال الحزن عني وأنجلى بغيومه
وأثرني لازلت أسولف بالخلا بلحالي

::

ولي عودة بإذن الكريم

ليه تطعني

ليه تطعني وأنا ميت بليا
ماكفاك اللي حصل لي قبل ساعة

كن بين همومي وبينك حميا
جيتكم واحد وجيتوني جماعه

أنت منا والمصايب من هنيا
كلكم ضدي ترى ماهي شجاعه

ماابشع من جروح طعنات الكفيا
غير سكينٍ تصيب بهالبشاعه

لا تتوب ولا تذوب ولا تريا
جرحها جرح وفضاعتها فضاعه

ترتوي من فيض دمي واتفيا
وصار قلبي مثل اخوها بالرضاعه

وأنت ليلٍ لو ضويته ما يضيا
ضعت فيه وشفت نفسي في ضياعه

أتهيا وين ما أشوفه تهيا
وأرسي بمرساه وشراعي شراعه

من عرفته والمحيا بالمحيا
وما يروح إلا ذراعي في ذراعه

إن رضيت أرضيه وإن عييت عيا
وإن طلبني قلت له سمعٍ وطاعه

ماعشقت من النجوم إلا الثريا
وماملكت من الكنوز إلا القناعه

وأنت وجيوش الموادع والجفيا
كيف أوقف ضدكم وانتم جماعه

لو بجيكم بالشجاعه والحميا
البلى إن الكثره تغلب الشجاعه

مع الأمير فيصل بن خالد





مع أسرة برنامج جواهر






الصورة تعبر