![]() |
قصص تراثية صادقين حتى في مماتهم هذي قصتان متشبهتان @ القصة الاولى كان في القديم رجال يقال له ( توبة بن الحمير ) وكان يعشق وحدة واسمها ( ليلى الاخيلية ) وحسب عادة التحجير تزوجت ليلى من ولد عمها ، فضاق صدر توبة حتى مات من زود الغم عليه ، وفي يوم من الايام مرت ليلى مع زوجها على قبر توبة فوقفت على ذلولهاقدام القبر وقالت : السلام عليكم يا توبة فما رد فقالت :والله انك طول حياتك ما كذبت الا يوم ان قلت : ولو ان ليلى الاخيلية سلمت ***علي ودوني قبر و صفائح لسلمت تسليم البشاشة اوزقا*** اليها من صدى من جانب القبر صائح وما امدها تكمل البيت الا ومر من جنب الذلول طير فارتبشت الذلول وطاحت ليلى وفوقها الهودج فماتت عالطول . وصدق بالتالي بيتي توبة . @ القصة الثانية كان فيه حضري من الوشم يسمونه ( محمد العنقري ) وما تزوج حبيبته بسبة التحجير ، وجاءه من الهم ما جاوءه وفي يوم وهو ماشي مع خويه علي في اليوق فام يثاوب فقال علي وش بلاك فانشد العنقري : يا علي هذا الموت ما هو بثواب *** مير الله الله بالكفن والرهابة واليا حملتوني على اللوح والباب *** توقفوا بي ساعة عند بابه اغدي يطل الترف وضاح الانياب *** وقولوا توفي العنقري واسفابه وما مده يكمل ابياته الا ومات ، ويوم مات قال علي : توفي العنقري توفي العنقري ( زي ما ذكر في البيت الاخير ) ويوم مرت الجنازة من قدام بيت محبوبته طلت فطاحت على النعش ولحقت العنقري . سبحان الله صدقوا حتى وهم ميتين واللم من صدق النوايا والمشاعر والله يخلف على ذا الزمن ما تامن حتى من خوك @@@@@@@@@@@@@@@@@@@@@@@@@@@@@@@@@@ @@@@@@@@@@@@@@@@@@@@@@@@@@@@@@@@ نيلة وفراج القرقاح كان الفارس فراج بن ريفه القرقاح القحطاني مشهور في عصره بالشجاعة والشهامة ، وكان النساء يتمنن الزواج بالفرسان امثاله او على الاقل رؤيته ، فقامت احد النساء من احدى القبائل واسمها نيلة ووعدت ببكرة لمن يبشرها بقدومه ، وعندما اتى فراج لمنازل قبيلتها ، كان وجهه قريب الى السواد من جراء الحروب التي خاضها ، فلما رات فراج قالت : يا حسافتي على بكرتي ، لان شكل فراج لم يعجبها ، وبعد ان كرم فراج من المضيفين ركب الذلول وانشد قائلا : سلم على نيله بوسط الجماعة @@@ فان السلام الجرز ما فيه منقود ليتها تخاوينا على الهجن ساعة @@@ حتى تعذر وجيهنا لا غدت سود في الليل نسري مثل راعي زراعة @@@ وفي اليوم تلفحنا السمايم على القود وتشوف من مناصبي الشجاعة @@@ و تشوف منه كنه السدو ممدود وتشوف مقدام بتوع ذراعه @@@ مثل الفهد ياتي من الصيد بضمود وتشوف حفش دبرته في متاعه @@@ لا يقضي العازة ولا هو بمفقود ملاحظة : @ القصيدة تنسب لشليويح العطاوي ايضا @@@@@@@@@@@@@@@@@@@@@@@@@@@@@@@@@@@ @@@@@@@@@@@@@@@@@@@@@@@@@@@@@@ البادي اظلم من عوايد العرب انهم ما يجلسون على الكرامةالا اذا قومهم المضيف وفي يوم من الايام كان خلف بن مهدي الحربي معزوم عند بدو ومعاه ضيف ثاني . ويوم قاموا المضيفين وقلطوهم على العشاء قلطوا الضيف الثاني و نسوا يقومون خلف على الذبيحة ، فما تعشى معهم ، وعود لاهله جوعان . وقدر ربي انهم ( المضيفين) يكونون ضيفان على خلف فيوم قلطهم قلطهم على رز بلا لحم فقاموا يبغون يعايرونه فانشد : ما افرش حرير وفرشكم لي هراسي @@@ اخاف من منقود ربعي عليه اذبح لراس يدرق فيه راسي @@@ وراع الحساني ما نجازيه بسية من غير هذا قسمة ما تواسي @@@ كل العرب نسل ادم وادمية @@@@@@@@@@@@@@@@@@@@@@@@@@@@@@@ @@@@@@@@@@@@@@@@@@@@@@@@@@@@@ والسلام خير ختام |
شكراً يا يامحمد العنقري :D :D :D :D :D :D :D :D :D |
قصص جميلة00 شكراًلك الى مزيد من التقدم |
تسلم يالغالي الهلالي محمد وماقصرت لاتحرمنا من تراثنا وأبدعاتك فيه أخوك المحب |
======= قصص مانمل منها:) ... . تصدق اني عجزت ادور مثلهن في النت ياريت اذا كان فيه موقع تدزه لي هوني الله لايهينك :) .. ----------------------------- |
تسلم يامحمد ,,, مثل هذي القصص الواحد مايمل منها .... ويدورها بإستمرار :) ,,, أما " الحضري العنقري " فهذا قصته قصه :D ,,, إصبر شوي وتبي تشوف الرد ;) ,,, تحياتي لك ,,, |
الله يسلمك وذكرتني بالشايب لاجلست عنده وسواليفه اللي ما يمل الواحد منها مره ثانيه شكراً |
موسوس العفو يالغالي عبدالله تسلم ابو سليمان الله يعافيك وابشر بسعدك نايف حياك الله والله هذي المواضيع مني شخصيا بس في ساحة الاقلاع منتدى للتراث تلاقي الي تبيه هناك ابراهيم النجيدي الله يسلمك وبانتظار ردك الحاير جعلك سالم والله يحفظ لكم الشايب تحياتي لكم |
بصراحة هالمواضيع أنا أقيمها ( ***** نجوم ) ( 5 نجوم ) ... يعطيك العافية ياغالي ... ولك تحياتي ... أخوك / سفر المرزوقي . |
تسلم اخوي علي جهودك الرائعه وعلي الموضوع المتميز |
قصص رائعه من رائع..... ياليت لو تخليها سلسله من فتره لفتره تتحفنا بمثل هالسوالف... مشكور يالغالي ... |
السلام عليكم ورحمة الله وبركاته الاخ العزيز الهلالي محمد : انا وراك وراك في التعقيب ابغثك غثاء .... انا ماركزت سوى علي القصه الثانيه واحببت ان اخبرك انك مخطىء فيها وانامتاكد من ذلك وكان اسم العنقري ليس محمد كما ذكرت وانما بداح وهو شاعر معروف وشهير .... اما القصص الباقيه فمالي خبر بها ياغالي ...... واتمنى ان تعودا لمرجعك في ذلك ليخبرك عن تفاصيل اكثر عن بداح ... اما انت يالنجيدي يبي لك جلسه علي ردودك اللي زي وجهك طخماء .....:(:( تحياتي لك ياغالي :):) |
الغالي / سفر المرزوقي الله يعافيك وهذا من طيبك الغالي / الصبحي الله يسلمك وتميزه باطلاعكم عليه الغالي/ ابو ذكرى العفو و مشكور على المجاملة وابشر بسعدك الغالي /سلمان وانا اقول الموضوع منور ولايهونون البقية بس اذا ما خاب ظني بداح لها سالفة ثانية على العموم الانسان بطبعه خطاء والقصص ماخوذة من سوالف بعض الشيبان فيمكن نسيت على العموم شرفت الموضوع تحياتي لكم جميعا |
الأخ الغالي الهلالي محمد : جزاك الله خير على القصص ومابها من عبر ... وأتمنى انك تواصل لنا مثل هذه القصص وتكثر جلوسك مع الشياب علشان تستفيد منهم :) وتحياتي لك ياهلالي :) اخوك ابو فيصل |
اخوي موسوس صدق انك اسم على مسمى انا ماني بعنقري الغالي / ابو فيصل الله يسلمك وابشر بسعدك - ان شاء الله - |
الوقت المعتمد في المنتدى بتوقيت جرينتش +3.
الوقت الان » 12:13 PM. |
Powered by: vBulletin Version 3.8.7
Copyright ©2000 - 2025, Jelsoft Enterprises Ltd