[align=center]بسم الله الرحمن الرحيم


عمتم مساءا جميعا فردا فردا.. وانشالله الجميع بصحه وعافيه..



(انتريه)

حادثه او بالاصح موقف بايخ صار معي بنهاية الاسبوع الماضي وتعيجزت اكتبه من وقته بس قررت اني اكتبه الحين..
ــــــــــــــــــــــــــــــــــــــــــــــــــــــــــــــــــــــــــــــــــ


يوم الاربعاء الساعه الحاديه عشر صباحا بعد نهاية المحاضرات والا جوالي يدق ..

هلا عبدالرحمن..مرحبا..امر خير انشالله ..

عبدالرحمن: والله باطلع الرياض تخاوي ..

صمت لبرهه(اللي هو انا).. وانا اقول في نفسي يا ولد غير جو وانحاش من هالرطوبه وزور اهلك والشباب مره..

انا: قدام( الريوس مفصول ) بس متى؟؟

عبدالرحمن: ساعه وجهز اغراضك وبمرك نصلي الظهر ونحرك..

انا: انشالله ..ابشر ساعه واكون جاهز..



المهم مالكم بالطويله بدخل بالسالفه..


يوم الخميس في العصريه بعد ما ريحت عقب الغدا..

جاتني اختي تقول بيجوني خوياتي بعد المغرب :sad: ..

قلت لها خير وش دخلني انا ..

قالت لا بس ابي اجلسهم بالملحق..

قلت هالحين غرف البيت كلها وتبون الملحق ..

قالت امي عندها ضيوف ومانبي نزعجهم(نزل الادب فجاه ) بعدين نبي ناخذ راحتنا ..

قلت طيب روحوا مقلط او مجلس الرجال ولا الصاله ولاتدرين اطلعوا الدور اللي فوق وسوا اللي تبون..

قالت ما نبي الا الملحق..

قلت بكيفكم..عاد هي ما صدقت اني قلت طيب الا وقالت في شي بعد..

قلت خير وش بعد (بدت تقفل الاخلاق )..

قالت خذ الفيديو وصلحه مدري وش فيه..

قلت يالله كلها ويك اند ومابي اخربها(<<قلبه طيب ;) )..


المهم دخلت الملحق وهو محيوس وحالته حاله .. الكنب مهو بمكانه .. قواطي وعلب فاضيه..بقايا فصفص..جرايد منطله .. كم ثوب وشماغ ..ورق بلوت .. والتلفزيون شغال على الجزيره الرياضيه من البارح ..

شي طبيعي الشباب كانوا سهرانين عندي ويطالعون مبارة تشيلسي والميلان..


قلت اروح اصلح الفيديو واعود ارتب الملحق قبل المغرب..

المهم رحت محل الالكترونيات وبعد المشوار اكتشفت ان الفيديو مو بخربان بس البزارين مدخلين فيه بطاريه وسي دي بلايستيشن ..ضحك علي ابو هنود شوي ورجعت قبل المغرب تقريبا بنص ساعه..




دخلت الملحق وشايل الفيديو بيدي وادخل وانا اغني..

رحت يم الطبيبي اللي ... وماسك خط بالاغنيه

حطيت الفيديو على الطاوله وداخل ابي ارتب الملحق بس لاحظت ان الملحق مرتب شوي ومابقى الا كم شي منطل..

شوي الا ثنين يتهامسون بشوي..

انا وقفت شوي لحظة سكووووووووت..

اتحسس الصوت من وين..حسبت الصوت من برا..

المهم رحت يم التلفزيون ابي اضبط توصيلات الفيديو..

شوي الا الصوت زاد

والتفت ابي اناظر مصدر الصوت ..الا ثنتين من خويات اختي مندسين ورا الكنبه ويضحكون..

انا بصراحه ما استوعبت بسرعه وكانت ردة فعلي غبيه شوي..

جالست اناظر فيهم..من زمان عن هالمناظر(لا تلوموني عزوبي :p ) ..

المهم مامداني التفت وانصى الباب ..

الا قوطي ببسي يشطف اذني..

التفت عليهم مره ثانيه بس هالمره

لقيت علبة المويه محضره بجبهتي..

وقتها ضاعت علومي وادور النحشه..

المهم ابي احط رجلي وانا باخذ اللفه وازلق على السيراميك

وزززززززززززززززززززززززززززز

ما ردني الا الجدار الثاني..

قمت اسحب انفسي ودخلت البيت وانا اصارخ واضحك وحالتي شينه..

طلعت امي على صراخي..

وتقول وش فيك..

وانا اعيييييييييييييييييييييييااااااااااااط..

عمر (انا ;) ) تكلم وش فيك

وانا اعيييييييييييييييييييييييااااااااااط..

شوي الا اختي داخله.. وانقز عليها..

كم بقس على كم كف وانواع الدبج..

واطلع غرفتي وماني بعارف اضحك على اللي صار ولا اداوي الكدمات اللي بيدي عقب الطيحه..


وادق على عبدالرحمن اقوله نبي نمشي ..

يقول منت بصاحي .. بكره انشالله.. بس وش صاير..

قلت لا ولاشي مليت ..والله لو يدري هو والشباب لانفضح بالاستراحه..



وماصدقت الوصول للشرقيه بالسلامه .. حتى ابعد عن مسرح الجريمه وارتاح..


اعذروني على الاطاله..وتقبلوا تحياتي جميعا..[/align]