لقاء مع "أبو الروند " رونالدو
رونالدو : "حابب كمّل مع الريال"
مناسبة اللقاء تدشين موقعو الإلكتروني الجديد.. و كمان آخر لقاء بيعملو قبل نهائيات كأس العالم الشهر الجاي بألمانيا..
أكدلي رونالدو و خلال حديثو انو هوي سعيد بوجودو بريال مدريد و خبرني أنو اذا كانو بدهن ياه الموسم الجاي بالريال فهوي بكون مبسوط انو يبقى
مع أنو ما رح يلعب آخر مبارة مع الريال "ضد اشبيلية يوم الثلاثاء 16 مايو 2006 الساعة 10 بتوقيت دمشق" بس هوي واثق انو فريق بلادو رح يتوفق بكأس العالم..
((( كيفك يا غالي شو أخبارك..لنبلش بأول سؤال ..بتتمنى تكون أفضل هداف بنهائيات كأس العالم..؟؟
) حبيب القلب أبو الفيس أنا منيح بوجودك.. بالنسبة للسؤال الأول يعني أكيد شو عم تحكي يا زلمي أنو كون هداف شغلة ممتازة بس ماني قاتل حالي تصير هداف..
المهم و بالدرجة الأولى أنو ناخد كأس العالم..و اذا أخدتو للقب الهداف بيكون متل السمنة عالعسل هههههه "السمنة كأس العالم ,و العسل لقب الهداف.."
((( من هيك سمنان يا ضرسان ههههه , إي شو رأيك بإمكانية انو تتواجه البرازيل و إسبانيا بالربع نهائي ..؟؟
) قفشتني أبو الفيس هههههههه , بالنسبة لسؤالك في كتير منتخبات ممكن نلعب ضدها و ما في مبارة سهلة بكأس العالم ,كل المباريات صعبة..
لازم نكون مستعدين و جاهزين لكل المباريات , باعتقادي اسبانيا عندها فريق قوي و منافس هالسنة و بعرف كل اللعيبة.. بس وقت تكون القصة
متعلقة باللعب للبرازيل فنحنا مناكل الأرض مشان نجيب نتيجة و نجيب الفوز و بكرا بتشوفنا أبو الفيس ..الله يعينو اللي بدو يوقف قدامنا و الله لنخردقو "آخر جملة من عندي هههههه"
((( دخيل ربّك أبو الروند ناطر المونديال ع أحر من الجمر مشان بس تلتقو بالأرجنتينية و تعلموهم لعب الطابة... هاي إذا قطعو الدور الاول , منرجع لموضوعنا..
رح تضل تلعب بالريال بعد كأس العالم؟؟؟؟
) بالنسبة لكأس العالم لا تاكل هم.. دبارهن عليي ولا يهمك , بالنسبة للريال ..احتمال كمّل ..الأمور مو واضحة تمام ...كان عنّا سنة صعبة و في انتخابات و مشاكل ..
عندي عقد مع الريال و فسخو بيدفّع اللي بدو يفسخو 100 مليون يورو يعني مو الشغلة لعبة ..و لنشوف إذا الرئيس الجاي بدو ياني فأنا حاضر ..ما بدو ياني كامش الشنتاية "تاعيتي" و ماشي No Problem
و ألف نادي بيتمنانني..
((( معك حق أبو الروند و الله , بس إذا ضلّت الحالة ما منيحة بتفكّر تترك جدّياً يعني "بربّك ما تترك" ؟؟
) خليني كون صريح معك .. ما بعرف شو بدي قلّك ,حالياً أنا مبسوط هون و قلتها كتير مرّات , بدي ضل هون و فوز بألقاب مع هالنادي اللي بحبو ..
بس إذا هالجمهور ما قدّرني و ما دعمني ..بتعرف أنو بروح..
"ما تنسى وقت جبت الكرة الدهبية لأحسن لاعب بالعالم من كم سنة و قدمتها لجمهور الريال صارو يصرّخو راؤول راؤول بدك أكتر من هيك ..!!؟؟بس هلّق حسو على دمّون شوي .."
((( يالله شو بدنا نعمل ,اكيد انتا أكبر من هيك شغلات و بتتحمّل حبيب ""بيهز براسو موافقاً"" شلون صارت اصابتك يا غالي و شو صار معك؟؟؟
) لسوء الحظ انتهى الموسم مع الريال بسبب هالإصابة الحقيرة ..ما كانت بهالخطورة أول شي ..بس عملنا اختبار عليها بعد 3 أسابيع فطلع أنو الجرح ما شفي لسا!!
و وقفت تدريب مشان تشفى تمام.. و قررت ضل هون مشان الريال بدل ما روح صيّف و كيّف بالبرازيل ..
((( يالله مو مشكلة حبيب..تفرّجنا ع برنامج بيورجي الوحدة الرائعة و المحبة بين اعضاء المنتخب البرازيلي, شو رايك بالريال بتفتقدو لهالشي..؟؟
) خلينا نكون صريحين و ما بدنا نلف و ندور ع بعض , ع طول كان في نقاشات و حكي بغرفة الملابس "بيسمّوها المشالح عندكوم" بس الأجواء كانت منيحة ع طول .. مانها بالشكل الرائع اللي
بمنتخب البرازيلي بس منيحة الإحترام طاغي و الكل بيساعد..و شو ما حكت الصحافة كلو متل ما بتقولو عندكوم "حكي جرايد" ما في لا كقاتلات و لا خناقات و لا كلام برا الطريق..
((( بتاريخك الكروي ..وين شفت أحلى جمهور..و مين كانو أحب جمهور لقلبك..؟؟؟
) مشجعين "كروسيرو" بتعرف وقت كنت العب بالفريق كان الجمهور ما يهدا و كان يدعمنا ع طول بالفوز و بالخسارة ,جماهير مدريد و برشلونة و الإنترناسيونالي ما ممكن تقارنهون ببعض
كلهون حلوين و كل جمهور إلو أجواءو ..بس جماهير كروسيرو الأحب لقلبي..
((( حسب رأيك شو التعزيزات اللي لازم تصير بريال مدريد..؟؟
) لازم يكون في كتير تحسينات و أنا بودي اني ساعد, ما فيني احكي معك باللقاء هلأ .."بنحكي بيني و بينك " أحسن ما نعمل اشاعات و يخلق مشاكل ..كل شي بوقتو حلو ..
في شغلات لازم نركز عليها الموسم الجاي و انشاللهيكون عنّا فريق منافس السنة الجاي بعد 3 سنين بدون لقب! منعرف أنو الجمهور معصّب مننا , سودنا وجهنا و وجه اللي بحبونا ..
أنا صريح معك أبو السيم ..انشالله تصير التغييرات و التحسينات و انشالله تتغير الظروف الموسم الجاي ..
((( صراحة أبو الروند.. بدك يفوزو جماعة برشلونة بكأس الأبطال..؟؟
) بدي لأصحابي بالبرسا أنو ياخدو الكاس لأنو فخر كتير كبير أنو ياخدوه , بس بدك الصراحة .."بردّ: طبعاً " ما عندي تفضيل حدا عالتاني .. الأحسن ياخد الكاس و بقلّو مبروك..!
((( فيسنتي دل بوسكي .. شو رأيك فيك و هل كان أحسن مدرب إلك ؟؟
) الصراحة هوي زلمي قبضاي و مدرب كبير , الزلمي بيشتغل برا الملعب و جواتو بيضل معنا و بيوجّهنا ع طول كل الوقت و بيحضّرنا نفسياً .. و بإمكنو يوجه فريق و يديرو بشكل ممتاز ..
لعبت موسم كامل تحت ادارتو لهالزلمي..بس المشكلة الشغلة مو بإيدي إني رجّعو ولا كنت رجّعتو ..
((( شو رأيك بـِ "لوبيز كارو" من ناحيتي .. ما بطيقو ..شو بتقول انت؟؟
) اشتغل و شغلو منيح "ماشي الحال فيك تقول.." زتّوه بأعرق فريق بالعالم ..و كان النادي فيه مشاكل كتير .. شغلو كتير كان منيح مع اللاعبين و كان صبور كتير معهون ..
عمل شغل كبير اذا اخدت بالإعتبار أديش هوي صعب تدير هالفريق الكبير..
((( متل ما بتعرف ..اختارو زين الدين زيدان أحسن خامس لاعب بتاريخ كرة القدم .. و في عالم بيقارنوكم مع بعض ..شو بتقول..؟؟
) أنا بقول المقارنة بين اللعيبة شي سخيف و بايخ و مالو طعمة ..ما فيك يا أخي تقارن لاعب بالتاني لأنو كل لاعب و إلو مركز و كل واحد بيتميّز عن التاني بشغلات ..
اللعب مع زيدان كان فخر كبير إلي .. هوي شخص رائع ... و عملنا سوى و اشتغلنا شغلات مهمة متل ما صرنا سفراء بالأمم المتحدة .. شي مؤسف أنو اعتزل ..
كل واحد بيقرر إيمتى بدو يعتزل و هوي اختار هالوقت .. رح نتذكّرو ع طول و للأبد..
((( أي منتخب ممكن يطالع البرازيل من كأس العالم برأيك..؟؟
) متل ما بتعرف .. و بيعرفو الكل و الحكي مو من عندي .. البرازيل الأوفر حظّاً "مو هيك يا شباب و لا أنا غلطان ..؟؟ اسألي الشباب عندك".. بس هالشي ممكن يكون إلو آثار سلبية علينا
و بيحملنا مسؤولية أكبر.. كل المنتخبات عم تقول أنو البرازيل هيي الأوفر حظاً..بس أكيد هادا ما بيزعجنا و نحننا جاهزين لكل شي و هادا الشي اللي بيخلّي البرازيل أفضل فريق بالعالم..
الكل رح يقاتل بكأس العالم مشان هالكأس الغالي.. بس الشي الأكيد رح تكون في مفاجأت بدور الـ16 أو بالربع نهائي , و بالنهاية الفريق الأقوى بياخد اللقب مو هيك يا حبيب..
((( أكيد أكيد ..شو رأيك بقرار المدرب لوبيز كارو ..وقت خلّاك بالإحتياط أكتر من مرة ..؟؟
) خلّيها ع ربّك خيّو .. اتصاوبت شي سبع تمن مرّات هالموسم و جبت 14 غول ..بتفهّم انو يخليني بالإحتياط ما فيك تلعّب لاعب 90 دقيقة ع طول .. بدها رياحة القصة كمان ..
كلنا انحطينا بالإحتياط إي حتّى بيليه و مارادونا انحطو بالإحتياط .. و أقل منها يعني ..؟؟!!
((( شو أحسن عنوان رئيسي بتحب أنو ينحط بموقعك الجديد ؟؟
) البرازيل تفوز بكأس العالم 2006 و رونالدو يفوز بالحذاء الذهبي.
((( انشالله خيّو و مانها بعيدة أبداً.. بالتوفيق أبو الروند ..
) هلا أبو الفيس ..مشكور..
لقاء مع رونالدو مترجم للسوري ..انشالله يكون عجبكم ..
تحياتي ..
لينك اللقاء الحقيقي ...
http://www.realmadrid.com/articulo/rma31148.htm
--------------------------------------------------------------------------------
عطونا رأيكم
الوضع المتطور
