هلا والله بالزعماء كلهم ..

الله حيهم ..

من امس وانا شايف المواضيع .. طااخ طيخ .. قصف عشوائي ..

والمشكله ان المواضيع اللي تنتقد.. أكثر من عدد جمهور أمس!!

المهم ماعلينا ..

بالملعب الخاوي على عروشه ..

كنت جالس فوق واشوف المباراه ..

المهم جاني اتصال ضروري بين الشوطين .. وطلعت من الاستاد .. رايح للربوة ..

شفت شيء يرفع الضغط ..

تدروون وش هو؟؟

لا قولوا ..

قولوا انتم .. لأني خايف أطب فيهم!!

اوكي اقول أنا ..

وانا في الطريق اشوف المقاهي ملياانه .. تعرفون كيف مليانه .. فل عن بكرة ابيها..

أمس ماكان فيه الامباراة الهلال .. وحتى الدوري الاوروربي أمس مافيه ..

يعني اللي ( تارسين المقاهي ) وهي قريبه نوعاً ما من الاستاد ..

مستكثرين يدفعون فلوس التذكرة .. ومتكين في المقهى بنفس القيمه تقريباً !!

والله صدق اللي قال .. ان جمهور الهلال.. نمبر ون ((رقم واحد )) في المقاهي .. بالعالم..

وبعد كل هذا ..

نجي نشتم فلان .. ونسب علان ..

أوكي أنا ما اصادر رأي احد .. أو امنعه من انه ينتقد ..

لكن قبل تتكلم عن خطأ لاعب.. أو مدرب .. أو اداري ..

شف خطأك انت .. وشف دورك .. اللي هو الحضور والمسانده ..أديته أو لا.. ثم تعال شرشح غيرك ..

قبل مايخش بعيني واحد ويقول.. ليش احظر والمستوى زفت وماني عارف ايش ..

اقول له ولمن يتبع رأيه ..

راح يستمر زفت .. وعك .. دام ان الكورة صوتها واضح بالملعب .. وله صدى .. من فراغ الملعب!!

اللي يقول مافيه لاعبين يحمسونك للحضور..

هذا الله يسلمه .. يروح برنابيو .. او نيو كامب .. عشان يشوف اللعيبه ويستمتع ..

أما اللي يحب الهلال ..

فمفروض يجي للهلال.. حتى لو كانت التشكيله مو قد كذا ..

................

** الشوط الاول اللي اقدر احكم عليه ..

شفت الآتي..

عبدالعزيز الخثران هو رقم واحد في الظهير الأيسر ..

مع احترامي للجري ومضواح ..

فمكانهم وسط أيسر .. لأن الواجب الدفاعي عندهم ضعيف برتبة ( شارع ) ..

** ياسر الياس .. أدى واجبه الدفاعي على أكمل وجه ..

مع أن البنزرتي .. مثبت الكويكبي في جهته .. وهو أمهر لاعب وحداوي ..

وشفنا لما انتقل الكويكبي عند مضواح .. سبب أكثر من كورة خطره ..

** مبارك .. بعض اللمسات تقول .. هذا فنان .. وبعض اللمسات تضيق الصدر.. بس أجتهد ..

** سلفا .. باختصار .. مطلوب حياً أو ميتاً !!

** أبوعبدالعزيز .. الدهن في العتاقي .. ماقصرت يا دعيعنا ..

** باكيتا.. لاحظت عليه من تالي .. يتأخر في التغييرات ..

بس هالمرة . ما غير بتاتاً ..

مدري هو اقتناع باللاعبين الموجودين قناعه كامله.؟

أو عدم اقتناعه بالبدلاء وجاهزيتهم ..

رغم هذا .. مازلت أصر انه مكسب للازرق .. و (( روقونا )) .. بلاش طلب تغيير .. ثم عجلاني ثاني!!

** الشوط الثاني .. ما أقدر أقيمه ..

تدرون ليش ..

لأني ماتواجدت بالملعب .. مع اني شفته بالفيديو ..

لأني ما دعمت الازرق الشوط الثاني بالحضور نتيجة ظرف طاريء.. فلذلك ليس من حقي انتقد..

(( وش هالأخلاق يا ابو سارة .. أحرجتهم )) ..

اقول لا تصدقون ..

الشوط الثاني ..

** الغامدي .. لما بدى يظهر .. ونشوف عمر .. خذ الأحمر .. ( لاتعليق )

** سلفا .. يمارس هوايته في رفع الأثقال .. اقصد رفع الضغط ..

** الجمعان على الدكه وجنبه الموري .. وهم أفضل من الانجولي بمراحل ..

** الصويلح .. حاول.. لكن ألاحظ على سلفا مايتعاون معه ..

مدري سلفا .. شايف نفسه عالمي .. والصويلح اقل منه ..! اعقل يا تريزقيه ..

** كماتشو .. لمساته الحلوة .. كلها لسلفا ... مع أن الصويلح ياخذ أماكن أفضل من الانجولي..

بس الفاول.. محكوور ..

** ختاماً ..

الوضع برجعة سامي..و الدوخي .. والغنام .. والشلهوب .. والخثران .. وجاهزية الجمعان ..

سيكون مختلف .. مختلف جداَ (( اقولها رغم اني انسان مو بطبعي متفائل.. لكن هالمرة غير )) ..

وقبل رجعة النجوم الزرق ..

المهم رجعة الجمهور للمدرج..

الوداد المغربي .. بداية التصحيح ..

وياجمهور المقاهي لاحقين على المعسل ..

أحضروا في الاستاد وأملأوا المدرج .. وافرحوا بالفوز .. ثم مخمخوا على الدائري!!

تحيه لمن حضر وشجع .. ولا عزاء للمتخاذلين ((أقصد جمهور المقاهي ))..

تحياتي .. الهلالي ابو سارة الخالدي ( ياطول اسمه ) ..

وختاماَ هذا مانشيت خاص بأبو سارة ..

(( الازرق لعب مع الوحده .. وهو يعاني من الوحده ))