حتى التعادل مع الاسماعيلي ماصار يرضيك.. كبير ياهلال.. ونقاط سريعه من الماتش!!
 

الهلالي ابوسارة يعود لكم من جديد . . ( هو قد غاب اصلاً ) !!!

صبحكم الله بالخير ..

بعما هدأت العاصفه البارحه .. ورجع المزاج لـ (( روقانه )) ،، جيت أتكلم معكم عن مباراة الأمس..

بموضوعيه ،،

والعنوان لهذا الموضوع .. يمكن تستغربونه مني .. ادري ,,

قبل لايجيني واحد ((مكيم)) يمشي 160 في هالمطر ومطفي النور ويقول:

كلامك غلط يا ابو سارة ..

احب اقوله هد السرعه لا تنشب بـ ( الصبه )) ونبلش بك .. وجايك بالكلام ..

قبل لايجيني واحد مندفع كأنه بياع الفول الصعيدي ((ديسلفا)).. ويقول الهلال أكبر من الاسماعيلي..

احب اقوله.. على رسلك أخا العرب.. واسمعني أكلتك امك .. اقصد ثكلتك !!

........

مثل هالأيام العام الماضي..

كنا طالعين من استاد الملك فهد .. وفرحانين بالتعادل مع الجيش السوري .. في ارضنا!!

العام الماضي .. كنا نهني انفسنا بالفوز على الوحده والطلبه العراقي والشعله بشق الأنفس!!

العام الماضي .. كنا .. لا خربناها حيل .. وتجمعنا في الملعب .. ماجاء الحضور 3آلاف !!

العام الماضي .. نحتفل بالتعادل مع ألاتهاد في ارضنا .. ونخسر من الشباب والأهلي والنص ر !!

.........

وسبحان مغير الأحوال .. (( قولوا سبحانه )) وحدوووووه ،،

اتى هالموسم .. وكأنه (( تايد )) ..

غسل الهلال كل العار اللي كان العام الماضي ...

لدرجة ان الاسماعيلي المصري.. الفريق العريق واول من حاز كأس افريقيا في مصر ..

الاسماعيلي اللي يضم دوليي مصر .. وثلاثه منهم كانوا اساسيين في مباراة كوريا اللي كسبتها مصر في بوسان ..

هذا الفريق العريق ..

راح له الشهر الماضي .. فريقنا الرديف ولعب معه الند للند .. وخسر لنقص الخبره.. بعد ارادة الله.

وجاء البارح .. وحتى الدقيقه الاخيره والهلال.. يلعب الكوره عند منطقة جزاء حارسه ..

أنقذه الحظ مرات ومرات ..

لاتقولون لي طرد وما طرد .. الهلال حاجرهم وهم كاملين .. وليس ذنب الهلال انه مدافعهم اهوج!!

...

ما اقول الا الله يرحم المتنبي .. صدق والله _مع اني متعصب للحطيئه_ لما قال:

واذا كانت النفوس كبارا ** تعبت في مرادها الأجسام

ولا تبعدون,,

ابو ساره الله لايهينه قال:

طموحي اكبر من الشوف .. طموحي ألتقي وياك ** نروح ابعيد.. بعيد ابعيد.. خلف طويق ونجربع ..

أهم شيء الهمه .. وياعيني على الهمه ..

وعلى طاري طويق.. ياعمري ياديرتي وجبال طويق . يقولون سالت .. من يخاويني بكره في الويك اند ..

الدعوه عامه .. بس ممنوع اصطحاب الأطفال والرجال.. راح نستثني الاخوات !! يا حنين!!
_______________________

امس كانت درجة الحراره على مقياس ريختر.. اللي هو مقياس سيارتي.. 4درجات .. ولا ادري ان كانه يجيب العلم..

بس الزبده ان البارح .. كانت العقارب مروقه.. وداعبتنا .. وياثقل دم البرد لامنه.. قام يستظرف..

البرد أمس كان يخترق الملابس ولا يعترف بـ الأصيل ولا الدفه ولا حتى الفروه ..

ويدخل في العضم ويدغدغ الجسم .. (( يؤبرني مااظرفه )) !!

ومع ذلك .. كان الجمهور الهلالي الوفي كبيرجداً ..

صح انه ساكت .. بس والله اصرف من المزمار ..

والله يرحمك يا ام كلثوم لما قلتي :

ان كان مزمارك فضه .. فسكوتك ياحبي ذهب !! وانا اشهد

الا مار على طاري الجمهور..

اعنبوا شيطان هالمصاريه :

كم سباك على كم مدرس خصوصي .. مجتمعين في زاوية الملعب ويقولون :

زعيم .. اونطه .. (( البيت بيت ابونا .. القوم طردونا ))

يا والله من ثقالة الطينه!!

_________________

الى رئيس الهلال:

سمو الأمير .. الله يلعم اني صريح .. ولا أحب امدح أحد .. وخصوصاً الأمراء والمسؤؤلين ..

لاني طالب حاجه .. ولاني خوي .. ولا متزلف .. (( كلام كبير ))

لكن الحق احق ان يتبع ..

واللي مايمدحك .. كذاب اشر ..

الله يعلم بغلاتك عندنا كجماهير .. ومقدرين تضحياتك وأعادة الهيبه الهلاليه المسلوبه في السابق..

لكن عندي طلب بأسم الجمهور اللي امس طقه البرد مع السكر والضغط:

ديسلفا هذا .. تذكرة مغادرة نهائيه .. ومستعد ادفعها من جيبي .. وأوصله المطار.. واسوي له وداعيه..


يستهبل .. يكسر المدافعين .. سامي يحطه قدام الباب ويقول يالحبيب ياللبيب سجلها..

وهالهرش أحول.. ولا في راسه .. حده بصراحه الوحده ولاتفاق ويخب عليه ..

أجنبي ثالث صح.. مع كماتشو وتفاريس ... ونصير آخرحلاوه ..

هذا الانجولي ابو علك .. يستحق مكان الجمعان او الصويلح ؟؟ غبنه يالربع

__________________

أمس واحد من الجمهور قال كلمه أوجعت راسي ..

قال : الشلهوب نام قدام الافريقي.. وقدام الاسماعيلي ..

مبدع في المباريات السهله ..

من ناحيتي لاتعليق .. بس وش رايكم في كلامه ..

عسى الموضوع ارهاق .. ولا يصير كلامه صح ..

_______________

سامي ممكن تكون أبدعت البارح بعض اجزاء المباراة..

لكن ما كنت في اصراارك أمام الاتي والأهلي ..

مدري هو تفكير في مباراة اليوم التكريميه و توزيع الجهد .. لا ان شاء الله .. بس ولو ماقصرت ..

____________

نقطه مال امها دخل بالموضوع:

جريدة الجزيره.. مهما قالوا أو سـ يقولون.. تبقين الأصل والمنبر الأول.. تحيه من ابو سارة وصفقه لو سمحتوا..

________

ادري طولت عليكم .. وغثيت كبودكم ..

لكن السموووحه ..

واللي عنده اعتراض على الموضوع او نقطه ماخشت مخه ووده يناقشني ..

يمرني الحين في الاستراحه.. متواجد على هالصبحيه لين العصر ,,

جنبي واحد سبيعي شرواكم وياثقل دمي جنبه بالاضافة لحليب بالزنجبيل ويالله من فضلك ..

الموقع:

الطريق العام .. يمين البقاله اللي ماتبيع التتن (( ياقدمه تتن )).. خلف الهايلكس المنقلب .. رقمها طعش

وانا متأكد ان ماراح أحد يجي لأنكم موافقيني على الكلام أعلاه .. ياهووه يا أعلاه ..


تحياتي موماً وابداً لكم ..

الهلالي ابو سارة..

الخــ ياعمري يالخوالد ـــالدي





___________________

_ _ _ _ _ _ _ _ _ _ _ _ _ _

اقول ابو سارة سلم لي على جبال طويق بس ..

بس ؟؟

ولووووو .. تامر أمر ..

كماتشو وما أدراك ماكماتشو ..

كنت اسبه من شهرين .. تصدق؟؟

لكن كأنه سمع ان فيه واحد بالمنتد ى اسمه ابوسارة مستقعد له ويسبه ..

فما كان منه الا ان صفعني بالرد القوي والمتتالي ..

صانع لعب من طراز نادر.. موهوب فلته ..

وش أبي أكثر من صانع اللعب لاصار:

يستلم ويسلم صح .. يحط المهاجم قدام الباب ويقول راح اتركك لضميرك تسجل او لا ..

كونترول روعه .. اجبار المدافعين على ارتكاب الفاولات .. بالتحضين الممتاز ..

فاولاته . . دقيقه جداً..

أوفراته .. الثابته والمتحركه أطلق من البايخ بكهام ..

كفاك ولا أزيد ؟!

بس انتبه تقول وش رايك في سلفا .

لأني راح أطب في مندوب اللي هو ولده ..

,,,,,,,

أخوي الخير.. يسلمك من الشر ياقلبي.. وين الغيبات

انا عندي تعليق في موضوع الشلهوب وانا ملاحظه في مبارات الافريقي لاني ماحضرت امس وفي الحقيقة تحس ذهنه برى الملعب وفي الدوري والمنتخب آخر حلاوة ...
بالنسبة لكماتشو وحسب معرفتي كنت ضد وجوده الحين وش رايك فيه.
عندي اعتراض بالنسبة لديسلفا واتمنى تبدي رأيك وهو جعل ديسلفا للبطولة العربية لان القائمة النهائية ارسلت وهو معهم ونجيب لاعب اجنبي عليه الكلام للمحلية وترى عيني على لاعب مميز وتو العين مهب عليه وان كنت تقدر توصله لادارة النادي وهي تقرر ارسلته لك على الخاص لان لو عرفه الي انت خابر مو تاركه وصدقني هو فريق بكبره.

قسم بالله لو حسين العلي لاعب كان 90% من فرص دي سلفا اهداف


ولا وش رايك يابو سارة :)



بس حسين العلي شكله ما يبي الهلال شف كيف يتمرن مع الفريق تقول مغصوب انه يتمرن :nono:


ولا هو قناص وهداف بس يترك عنه البزوطه ويفلح ان شاء الله s13s

ابو ساره اقول نحمد ربنا ولا بغت النتيجه تنقلب علينا بس الحمد لله ماحد جاه شي :)

وبعدين ابي رايك ابي ولا امي في خالد عزيز احسن لاعب يلحق الحكام تحس انه كافلهم :d

وش تقول في جمهورنا العزيز صاحب التلعين واكل الحب رفعوا ضغط ولد جيرنا من القهر

سلم لي على الجمهور المصري

فعلاً كنت ضد وجود كماتشو .. لكن لما رد علي بمستواه.. تراجعت والاعتراف بالحق فضيله..

اما ان سلفا يكون للعربيه والمحليه لا ..

فهالكلام اسمعه كثير .. وهو من وجهة نظري غلط ..

اللي مانفع في الدوري .. وحاط حيله على الأنصار والوحده وبطولة23 سنه ..

ماهو كفو يطقها قدام الافريقي والاسماعيلي بقية العتاوله العرب في هالبطوله ..

اللاعب اللي تقول.. ودك نجيبه ,,

فـ

اللي اعرفه وهالكلام امس... ان الادارة تتفاوض مع لاعب رائع مهاري صغير ..

أتمنى تنجح الصفقه رغم صعوبة اقناع ناديه ..

اما اللي بالي بالك .. لو درى اننا نفاوض النزهان من جديد .. راح يفاوضه .. والعقل نعمه..

تحياتي ..

________

أخوي هلالي من ذهب..

أنت قلتها .. وانا قد قلتها في آخر مقال لي:

ان العلي يلعب وهو ( مكشر ) واشوفه في التمارين يتمرن بدون نفس ..

الكلام على.. الجمعان أو الصويلح .. والله يشفي الخراشي .. احدهم يسد مكان سلفا وهومغمض..

تحياتي

ابي ابوي ابي امي.. ابي زوجي امبيه ..

قد سمعت هالكلمات .. بس كان الصوت انعم من صوتك بكثير يافيرون ههههههههههههههههه..

الحمدلله على كل حال..

أما خالد عزيز .. فـ ذكرتني .

اخ اخ خسارة ..

كان في بالي اصكه بنقطه ضمن نقاط الموضوع .. بس غاب عن بالي.. امه داعيه له (( اخس يالقوي))

تدري وش أكثر شيء يذبح الجمهور..

أنه يشوف لاعب حواري .. طاقها اساسي في ناديه ..

لا ومن زين الحظ .. أساسي في المنتخب..

ودي هالمنتخب يسوي معسكر مغلق لمدة خمسة شهور.. ويضمون عزيز بس .. وراح اشجعهم!!


امس الحكم اللبناني:

راح يمين لحقه عزيز ..

راح يسار .. درعم وراه عزيز ..

حالف على الحكم يلمس الكورة ..

بعدين والله من زين الكنترول.. تلقاه واقف.. فجأة الكورة نطت قدام او طلعت آوت ..

من لعبها.. من طقها.. الله أعلم ..

كل شي فيه ينتفض لا صارت الكوره معه ... وتنط بعيد غصب عنه ..

أمس اقول للربع شوفوا الفرق بين الغنام وعزيز ..

واحد رومنسي مع الكورة .. والثاني ؟؟!!!

اقول يالحبيب.. ما كأني استاثمت بالولد .. استغفر الله .. بس وش اسوي قهر يلعب بالهلال..

تحياتي الله يسامحك

لكن ديسلفا موجود في القائمة النهائية لبطولة ابطال العرب (وجهة نظرك نلعب بلاعبين اجنبين فقط او نخلي ديسلفا وبالخصوص الدوليين يمكن مايلعبون او لاعبين النادي فيهم الخير ويكفون )
وبالنسبة للاعب الي في بالي راح ارسلك اسمه وجنسيته وناديه في العنوان ومافي داعي تفتح الموضوع
يعني لو تعثرت المفاوضات يكون بديل.
وماتحس ان ديسلفا مستهتر في الكروت وعلى اقل شئ ياخذ كرت واتوقع واتمنى اكون مخطئ انه بيوقف محليا .
بغيت رايك في موضوع خارجي ووحدة بوحدة يالجزيرة.....(الي بالي بالك قرر يستقر في الرياض )

هههههههههههههههههههههههههههههههههههههههههههههههه
ههههههههههههههههههههههههههههههههههههههههههههههههههههه
ههههههههههههههههههههههههههههههههههههههههههههههههههههههههههه


أبوســــــارة وياعمري طووووووووووووووويق :D :D

أمس واحد من الجمهور قال كلمه أوجعت راسي ..

قال : الشلهوب نام قدام الافريقي.. وقدام الاسماعيلي ..

مبدع في المباريات السهله ..

من ناحيتي لاتعليق .. بس وش رايكم في كلامه ..

عسى الموضوع ارهاق .. ولا يصير كلامه صح ..
8
8
8
8
8
:confused: :confused: :confused:




أبوساااارة على طاري الجو الزين ذا

وش راااااااااايك اني اقترح عليك <<< ياشين الفلسفة :D


المهم ناخذ دز سلفة جولة سياحية على الجسر <<< ناوي يدزه مع الجسر :laugh: :laugh:
أو نطلعه البر انا ابي اعــرف شي واحد بس
هو وش سالفته بالضبط؟؟؟؟؟
نبي نجلس معه جلسة مصاااااااارحة يمكن تصير (مصارعة)
حتى انا الجسم ماش من جسم وابي فزعتك لاصار شي


ويعطيك العافية ابوسارة :razz:

الاخ ابو ساره

ابيك توصل الرساله ذي للشلهوب ياخي جسمه ضعيف ومايمشي مع الفرق الي تمتلك لاعيبه اجسامها قويه شرررررررر عليه يروح يسجل في نادي رياضي يقوي عضلاته :D :D ....




مجرد رأي لاتغضبون منه بس بصراحه انا حاااااااااااس ان الدوري بيطير وبطوله العرب رايح تطير والسبب ماعندك لاعيبه صح الدفاع ضعيف قدام الاعب الماهرررررررر يضيعون والمحور داااااج بوجود عزيز والاظهره يعني متحمسين بس ماهم في قد المستوى الي نطمحله...



باختصاااااااااااااار الحين جماهير الزعيم تتغنى وطربانه في الدوري والله ياخوفي يبكون في النهايه ويعرفون حال فرقيهم صح........



نختلف بس نتفق على حب الهلال

:D أبو ســــــــــأرة ....... يازينك لاصرت رايــــــــــــــــــــــق . :D ......

أمس قريت موضوعك بالشبـــــــكة وقلت بنفسي الحمد لله ان داسيلفا موب حولك والا كان ترتكب جريمه بحقه :razz: ...

يعني غاية في العصبية .. ورفع ضغطك زود الاخ أبو ثلاث مشاركت زاغالو الغفلة :D ....

عموما يابوســــــــــارة انا مازلت عند رأيي ان سامي الجابر بالامس هو نفسه سامي الجابر ضد الاهلي والاتحاد ... لكن لم يوفقه الله بالتسجيــــــل s60s ...

عموما هالمصــــــــارية لهم يوم بإذن الله s13s .....

s13s تحيــــــــاتي لك ياغلاهـــــــــــم وهد أعصابـــــــــــــــك وروق يابو ســـــــــــــــــــــارة s13s ...

اقول يا ابو ساره الله يصلحك ان شاء الله هذا الي اقدر اقوله .

بلا فريق عريق بلا نيله الفوز كان بأيدينا وديسلفا السبب
ومحمد الشلهوب ضايع في الملعب مايدري وش يسوي
هذي الصراحه

؟؟ مافهمت .؟؟

ليت توضح الله لايهينك.. هي ضحكه ولا انتقاد ..

انتظر ردك ..

_______________

اخوي ابوشمس:

الله يرجك .. حتى هناك متابعني هههههههههه ..

لي الشرف والله ..

عموماً.. سامي نتعشم منه الأكثر .. لأننا ندري ان عنده اكثر مما قدم في مباراة البارح..

وسلمني على مقالاتك وروقانك .. واللي عطاك بالكريك .. يعطينا بالملعقه ..

عندك سعة حلم رهيبه .. أغبط - لا احسدك - عليها ..

تحياتي يالغالي

هلا اخوي ابوسارة بس ودي اسألك سؤال مب المفروض من المدرب انه يلعب الموري من اول المباراة بدال ديسلفا الدلخ لان الموري مقدم مستوى حلو مررره وماتعتقد ان غياب الغنام اثر على الهلال من الناحية الدفاعية ؟ ومشكور

قسم إني لا شفت مواضيعك أصلح البراد وأقابلها ..

مبدع ماشالله عليك ..

وصدق من قال إنك فاكهة المنتدى ..

سلااام مربــــــع لاحلى أبو سارة ...

ابـو سـارة وش رايك أمـس في الجمهـور ...؟؟

ماتحـس أن بعض الأشخـاص زودوهـا في السب والشتـم ....؟؟؟ :sad:

واللـي يقهرك يســب بصــوت عالـي ... :sad:

وياكثـر ماصارت أمس ...

الله يعطيك الف عافيه...
وهاردلك ياشباب...
وان شاء الله يعوضها ...
في المباراة الجاية.....
والله يوفق الزعيم....

هلا الغالي ابو سارة وسع صدرك








ابوسارة ان مع ( تغيب الشمس بحلم يومي ) سامي هو سامي ولكن الحظ ماحالفة


ابو سارة الغالي تعال لاتسوي فاهم شف وربي جب عندي ديسلفا ( الصعيدي ) وقيمة التذكرة علي وتوصيلة للمطار علي

ولو يبيني اوصلة لبلادة وصلتة وحبيت راسة بس يظف وجة واحب على راس امة وابوة واقولهم خلوة عندكم يقشر بصل ويمشي لة راتب .....




ولكن التعادل مع المصارية عادي لانهم وربي فريق كبير ( وربي فريق كبير )






ابوسارة اسالك باللة علة الهلال مهي في خالد عزيز بكل صراحة ( وربي عجزن اقتنع فية )




ابوسارة الغالي سارة وش رايك في المدرب امس ماتحسون تشكيلة فيها غلط يناس اخلي الشلهوب يلعب وسط ايمن وكماتشوا وسط ايسر ..... بس هم ممكن لة وجة نظر بس يظل كبير







ابو سارة وين الاستراحة الله يسامحك ماتعرف توصف ولا خايف نجي ونقولك اذبح لنا ذبيحة لاتخاف ترانى مو غثيثين وترى عني انا عشاء او غدى خبز وجبن ... وصلى اللة وبارك ( خفيف دم ولا لا )








سلاااااااااااااام يالغااااااااااالي

:d

تؤبرني شو ظريف يابو سارة

رائع أبو ساره بس ديسلفا لم يكن يومه أمس والمباريات السايقه كان خطر وهداف وأن شاءالله يبدع في الأيام القادمه0
تحياتي يالزيز يارايق

والله انك فاكهة المنتدى يابو ساره s60s



ما ودكم نسميه (( يالبرتقاله )) :D



بس اقول حسين العلي خلوه تراه مشغول هالايام :razz: :D :laugh:



واما انت يا بو ساره اكة سبيت بس لو تترك عنك زرف فكرة التوقيع تصير اربعميه ;)


ولا اقول فدوه يا رجال :)

<<<<<<<<<<<<<<<<<< يقاله شاوره احد :confused:

الله يعطيك العافية


وديسلفا حده كاس الامير فيصل


واذا رحت ورى جبل طويق تجربع قلي قبلها بساعتين ونصف على ما اجيك .

غرشوب..

ألاحظ عندك خفة دم .. تعال (( ربعنا )) ولا ماتقدر!! (( ياعمري يالمؤدب وراه دوام )) هههههههههههه ..

بعدين ملاحظ عليك .. تطري سارة كثير .. احم احم .. روقنا ( امزح يالغالي )) ..

أما سلفا فأنا حلفت بالطلاق من حريمي الأربع - مع اني عازب - ان التذكرة مني ..


والله يرحم اللي قال..

قم للمعلم وفه التبجيلا .. فأن هم ذهبت أخلاقهم ذهبوا..

قل صح لسانك .. انت وجبهتك ..ههههههههههههه

............

هلالي خيالي ..

ههههههههههههههااااي من جد ..

الحين ما ركزت في الموضوع اللي على سالفة الجرابيع !!

مانت سهل ..

ينخاف منك

تحياتي للجميع ..

ابو سارة لاتخلينا نزعل ولاتتهرب من الاجابة عن اسئلتي

ههههههههههههههههههههههههههههه

الله يرجك يا ابو ساره


والله انك منسم


والشلهوب اتوقع اجهاد


اتمني ديسلفا على المطار على طول s60s

ديسلفا هذا .. تذكرة مغادرة نهائيه .. ومستعد ادفعها من جيبي .. وأوصله المطار.. واسوي له وداعيه..


s60s s60s s60s s60s s60s

و أنا متأكده إن كل جمهور الهلال مستعد يوصله معك للمطار

:confused:

يابعدهم كلهم يا الهلالي- ابوسارة

صراحة كلمات الاعجاب فيك قليلة جدا وما توفيك حقك

حبيبي انا ابي رايك وبكل صراحة في جمهور الهلال

مقارنة بالجمهور الاسماعيلي من ناحية الحماس والتشجيع

وكذلك مقارنة بجمهور الهلال سابقا

وانتظر من الرد على احر من الجمر

مع التحية لك والاحترام