ويــ الجمعان ، العنبر ، الصويلح ، الموري ، الخراشي ، المرشدي ، الهليل ، الخثعمي ـــن - نادي الهلال السعودي - شبكة الزعيم

سلمان للأزرق · #1 06/01/2005, 09:41 PM

السلام عليكم ورحمة الله وبركاته

مراحب بأخواني في شبكةالزعيم الهلالي

مدري باكيتا شكله محتار من الهجوم فقط

حاير من يحط وحاير من يثبت هجوم

وحنا نروح ندور هجوم من خارج النادي

بودي أسئل وين فيصل الجمعان

يعني لاعب فنان وتابعته مع منتخب الناشئين في دورة الخليج

ولاعب سجل هدفين ولا اروع قدام الكويت في بطولة الخليج الماضية للناشئين

يعني بودي ادارة النادي انها تعتمد على الوجوه الشابة .. لأنه هالوجوه الشابة

تحتاج الخبره مستقبلا ..

مثال منتخب عمان .. عماد الحوسني لاعب صغير السن تدرج مع ناديه العماني

وصار اساسي .. واكتسب خبره هاللاعب مع المنتخب الاول .. وشوفوا الحين عماد

هداف دورة الخليج في قطر .. طيب عندنا الموري والعنبر وفيصل الجمعان والصويلح والخراشي

خامات ممتازه .. ليه ما نستثمرها هالخامات .. اذا منتوا محتاجينهم بالدوري طبقوا نظام الأعارة

لأحد الأندية الكبيرة واستفيدوا منهم .. تراهم محتاجين خبرة .. اذا ظلوا طول الدوري في الأحتياط

ترى حسهم التهديفي راح يفقدونه .. والله العظيم ذكروني الأخوان في شبكة الزعيم بالثنائي الرائع

أحمد الصويلح وفيصل الجمعان .. فأرجوكم يا ادارة الهلال .. أظن سمو الامير بندر بن محمد والأداري

الرائع خالد الحبيش فعلوا المستحيل لأبراز هؤلاء النجوم ودعامة للفريق الأول .. انا كمشجع هلالي

مابي الحوسني ولا ابي ياسر القحطاني ولا ابي اي لاعب سعودي دولي خارج سور نادي الهلال

أحضرنا مدرب يهتم بالوجوه الشابة .. هو باكيتا .. وباكيتا دوره اعطاء الفرصة لهذه الوجوه الشابة

لأنه درب منتخبات ناشئين وشباب البرازيل .. ولم يدرب المنتخب الأول .. يعني مدرب شبابي ..

أقتراح لأدارة الهلال .. أقترح انه اللاعبين الكبار بالنادي كالشريدة وخليل والعلي والمفرج

الذين يظلون حبيسي الأحتياط استثمارهم لأندية اخرى .. ما قلنا بيعوا اللاعبين على الأقل اعيرهوهم لأندية اخرى .. واستفيدوا من فلوس الأعارة .. على الأقل .. زيادة الخير خيرين ..

مو كرها للاعبين اللي ذكرتهم

بس ابي المرشدي والهليل والخثعمي ومضواح .. اللي شريناهم للنادي وش دورهم بالنادي هل بس

جلوسهم بالأحتياط .. والله كان على باكيتا اشراكهم بالمباراة مع الطائي صراحة .. يعني على الأقل

الخثعمي نحطه بدال خالد عزيز .. لكي نريح الكبار من تعب المباريات والصغار يريحونهم شوي

والدليل الفريق الشاب قدم اداء رائع في كأس الامير فيصل بن فهد رحمه الله ..

صدقوني انا جابوا لاعب بصفقه خيالية .. والله انه يقوم يتدلع وفلوس النادي راح بلوشي
واللاعب المبدع يظل حبيس الأحتياط .. مادري النادي ليش مصمم على جلوس العلي بالهلال
بودي اعرف السبب ..؟؟

اطالب واطالب لأدارة نادي الهلال ممثلة بصاحب السمو الملكي الأمير محمد بن فيصل حفظه الله
وكل أعضاء شرف نادي الهلال ممثلة برئاستها سمو الأمير هذلول حفظه الله
اعطاء شباب الأمير بندر بن محمد الفرصة الكبيرة للفريق الأول ..
ممثلة بضخ دماء جديدة للفريق .. والأستفادة من الخبرة مستقبلا ..
كما حصل مع اللاعب سامي الجابر وفهد الغشيان ويوسف الثنيان ونواف التمياط
وأحمد الدوخي وخالد التيماوي ايام بداياتهم كانوا صغار ومثلوا الفريق الأول وهم
صغار صغار صغار .. فيجب على باكيتا والأدارة الهلالية تطبيق هذا النظام بالنادي

اذا ما تبونهم للعب اساسي .. اعيروهم للأندية الكبيرة واستفيدوا بعد الأعارة من الخبرة
وشكرا كالديرون على اختيار محمد العنبر للمنتخب الأول .. لأنه عارف انه هاللاعب يفيدني
وصغير سن ولياقته كبيرة وهداف ومخه نظيف في تعامله مع الكرة والدليل هدفه على الأتفاق
في نهائي كأس الأمير فيصل بن فهد ..

أسف على الأطالة .. بس الصحيح ينقال الله لا يهينكم

وشكرا

أخوكم .. سلمان

المتحد · #2 06/01/2005, 09:49 PM

والهلال جالس يطارد القحطاني ويبحث عن مهاجم اجنبي

الدبي · #3 06/01/2005, 10:07 PM

انا الحقيقة اشد على يدك..
لو كنت رئيس النادي كان طلعت بعض اللاعبين واعرتهم لبعض الفرق الصغيرة في الدوري الممتاز او دوري الاولى مع التحفظ على الاسلوب التدريبي للفريق
او يمكن في الخليج بشكل عام
موب شرط الاستفادة المالية ... تقدر تخفف بعض اعباء الرواتب على خزينة النادي
لكن تدري وش الحل الامثل في رأيي
وللاسف انه موب في يدنا ولا في يد الادارة الهلالية
كأس الامير فيصل ... المفروض انه يمتد على فترة طويلة موب بس خلال شهر تخرش ابو البطولة وتروح بنجومها اللي ظهروا ثم غابوا ... يا اخي كأس الامير فيصل ممكن يكون مرحلة اولى لاعداد بعض اللاعبين المصابين .. ممكن يكون المكان اللي يسترجع بعض اللاعبين حساسيته على الكرة بعد اصابة
وايضا يكون مكان للي النادي ما يقدر يستغني عنهم لكن ما اخذوا فرصتهم
يعني عشان نكون واقعيين .. الفريق 11 لاعب .. المفروض انت يصير عندك من 18 الى 22 لاعب هذولا لاعبين تستخدمهم في ما يسمى بالـ rotation يعني التدوير في علم التدريب
عندك انواع من اللاعبين
عندك لاعب مفتاح لعب
عندك لاعب مؤثر
عندك لاعب اساسي
وعندك لاعب تدوير
وفيه انواع من التدوير فيه تدوير على مستوى الخانة وفيه تدوير على مستوى الفريق
عشان المدرب يضبط التدوير هذا يحتاج الى انه يعرف لاعبين جيدا يحتاج انه يكون قادر على انه يحكم على مواهبهم
حتى اكبر المدربين ما يقدرون يضبطون هالتدوير
فكيف تطلب من مدرب انه يضبط هالتدوير من خلال مباراة واحدة كل اسبوع تقريبا في بطولة واحدة وقائمته فيها اكثر من 30 لاعب
عشان كذا اعتقد الحل الامثل هو لعب كأس الامير فيصل بن فهد رحمه الله على مدى الموسم كامل .. على فترة طويلة اساسا
حتى يتعود صغار السن على اللعب على مدار السنة وحتى تستطيع ان تطور مستواهم وتساعد المدربين الاولين على تفعيل التدوير بشكل جيد
ختاما اعتذاري لكل الزعماء على الاطالة واشكرك على طرح الموضوع

هلالي ثنيان · #4 06/01/2005, 10:13 PM

والله كلامك صحيح 100% يعني المدرب لو بيخلي الهجوم للمروي والعنبر
ويستمر عليهم صدقوني الهجوم بيبدع

تمياط الهلال · #5 07/01/2005, 12:51 AM

كــــــــــــــــلا مكـــــــــــــــ اخوي سليـــــــــــمانــــــــــ

عــــــــــــين العـــــــــــــــــــــــقل

متورط · #6 07/01/2005, 01:19 AM

سلمان

عندك تفكير مستقبلي ومتفاءل ورؤية فنية حلوه

أوافقك على الكلام

سمار · #7 07/01/2005, 02:53 AM

وين اللي ينفذ و لا حنا ودنا بكذا من سنين....

هلالي حبيب · #8 07/01/2005, 03:58 AM

بتكلم لك عن الهجوم فقــــط ...
والله شوف الصويلح ، العنبـــر هــم الأفضــل في الفترة الأخيــــــرة وهم اللي يستاهلون البقاء في الأول .

الكلام هذا مايقلل من موهبــــة الموري و فيصل الجمعان كلهم في خير وبركة لـــــــكن لســى يبغى لهم موســم مع الفريـــــق الشبــاب عشان مانخســرهـم ويثبتــون اكثــر ...

الهلال حاليــا يعني المفروض يلعــب في الهجوم مزيــج مابيـــن لاعب خبير مع شاب مثـــلا :
الصويلح ، سامي أو الجمعان ، العنبــــر ...

سلمان للأزرق · #9 07/01/2005, 04:20 PM

شكرا على ردودكم اللى احطها وسام على صدري
ودليل على كلامي اللي قلته
سافيولا ليش برشلونه اعاروه لموناكو الفرنسي
وموريانتس ليش اعاروه ايضا لموناكو الفرنسي

شافوا اللاعبين هذولا مالهم مركز للفريق
قالوا نعيرهم احسن علشان لا يقل مستواهم
ولا يضلون حبيسي الاحتياط .. وبالمرة نستفيد
ماليا من قيمة الأعارة

يا جماعة الخير .. يعني احسن نحط عبدالله الجمعان
اللي بس قدام المرمي يشوت فوووق بس
ولا نحط محمد العنبر اللي قدام المرمي يعرف كيف يتصرف
مع الكرة بكل عقلانية
يعني بودي اعرف من ادارة المنتخب السعودي
ضم عبدالله الجمعان ليه ..
مع انه عبدالله الجمعان لم يشارك هذا الموسم
مع الهلال سوى مباراه او مبارتين على الأقل
برأيي فهد المبارك لازم يضم بدال عبدالله الجمعان
فهد يذكرني بخالد التيماوي حسه بالجهة اليمنى جميلة
ويعرف كيف يمرر الكرة بشكل جيد جدا
لازم مع محمد العنبر اللاعب فهد المبارك مو عبدالله الجمعان
بعيدا عن العاطفة لانه مصلحة الوطن فوق مصلحة النادي واللاعب
اللي بالنادي ..

بالنسبة لكلام الأخ الدبي .. جميل جدا .. واشد على يدك بأقتراحك هذا الأخ الدبي
بس بودي يعني من ادارة النادي تطبيق نظام المكان للأفضل
يعني اللاعب الذي يبدع في مباراة يضم في مباراة اخرى
يعني اشوف محمد العنبر اللي يقدم مستويات جميلة مع الهلال
ثاني مباراة احطه احتياط وأدخل عبدالله الجمعان
اللي بس يشوت فوق بالسماء ... والله وكل كورة
ننتظر من عبدالله الجمعان يشوتها يجيب قول ولا لا
عبدالله الجمعان لازم يجمع بين الأثنين بين التهديف
وبين اعتماده على الركلات الحرة بالتهديف
عبدالله قليل يجيب اهداف بهذه الركلات الحرة
يجب على عبدالله الجمعان التركيز على التسديدات بالكرة بشكل
اكبر وافضل .. لا بس شوت وبس .. زي طريقة بو يعقوب زمان
في الضربات الحرة .. ركز وشوت
وبودي والله ننسى شغلة جلب اللاعبين الدوليين المشهورين
في المملكة ونركز على لاعبينا الصغار اللي ابدعونا بفنهم
تذكرون الخراشي كيف يبدع
وتذكرون العنبر كيف يخلص
وتذكرون الصويلح اللي ينقذنا في مناسبات حاسمة
اما الموري تذكرون كيف يبدع ويذكرني بأيتو برشلونه
اما المرشدي والهليل مشروع دفاع هلالي ناجح جدا
ومضواح الجميل جدا جدا هو والجري مشروع ظهير ايسر ناجح
وانشالله نشوف ياسر الياس هو والدوخي مشروع ظهير ايمن ناجح
وفهد المبارك ( سرور ) نسانا مشكلة جهة الوسط الأيمن والدليل تمريرته
للاعب محمد العنبر في الهدف الثاني والفوز الهلالي على الأتفاق في
بطولة سمو الأمير فيصل بن فهد رحمه الله
وسلطان البرقان والله ما شفت ثنائي رائع مثل البرقان والغنام
وعبدالله المطرف جميل يذكرني لا ابالغ كثيرا بالثنيان بس محتاج خبرة
والشلهوب اللي انشالله يسد مكان اللي فقدناه على قلوبنا سعد الدوسري رحمه الله
وانشالله مع عودة نجمنا المحبوب الهلالي نواف التمياط وصانع لعبنا
سيقدمون هلالا ساطعا يسدون لاعبينا اللي سبقوهم الثنيان والغشيان والتيماوي
وبو ثنين والموينع والرشيد والنعيمه ..

واسف على الاطالة وكل التوفيق لهلالنا في بطولة الدوري والبطولة العربية
وبطولة كأس ولي العهد ..

والسلام عليكم ورحمة الله وبركاته

اخوكم - سلمان

الهلالي- ابوسارة · #10 07/01/2005, 04:41 PM

مع الوقت تجيهم الفرصه ان شاء الله ..

أهم شيء الفريق ماشي صح ..

مو مهم من اللي يلعب من الاحتياط من المستبعد .. تحياتي ياغالي

المستحيــل الأزرق · #11 07/01/2005, 04:52 PM

إما يلعبون و إما أن يعاروا .. اتفق معك 100 %

سلمان للأزرق · #12 07/01/2005, 05:05 PM

ومتى تجيهم الفرصه يا بو ساره

اذا قلنا راح تجيهم الفرصة حساسية الكرة يفقدونها

ومن ثم قالوا حطوا اللاعب على قائمة الانتقال

وهذه حالتنا

هلالي(موت) · #13 07/01/2005, 06:34 PM

سليمان يا زينك ويا زين كلامك

من جد صادق

والله انك تسمع · #14 07/01/2005, 11:39 PM

كــــــــــــــــلا مكـــــــــــــــ اخوي سليـــــــــــمانــــــــــ

عــــــــــــين العـــــــــــــــــــــــقل

أبو ميار · #15 08/01/2005, 02:56 AM

إقتباس

الرسالة الأصلية كتبت بواسطة هلالي حبيب


	بتكلم لك عن الهجوم فقــــط ... والله شوف الصويلح ، العنبـــر هــم الأفضــل في الفترة الأخيــــــرة وهم اللي يستاهلون البقاء في الأول . الكلام هذا مايقلل من موهبــــة الموري و فيصل الجمعان كلهم في خير وبركة لـــــــكن لســى يبغى لهم موســم مع الفريـــــق الشبــاب عشان مانخســرهـم ويثبتــون اكثــر ... الهلال حاليــا يعني المفروض يلعــب في الهجوم مزيــج مابيـــن لاعب خبير مع شاب مثـــلا : الصويلح ، سامي أو الجمعان ، العنبــــر ...

تســــــــــــــــلم