| [ALIGN=CENTER]بسم الله الرحمن الرحيم
والصلاة والسلام على رسول الله ..
قبل حوالي اسبوعين جا الامير سلمان لابو تميم في بيته , وقاله بأختصار يبو تميم , انت رجال لك مطلق الحريه في الاختيار , ان عفيت فهو أجراً لك وان طالبت بالقصاص فهو حقك ولا أحد يقدر يمنعك .. ويشهد الله اني ماجيت اضغط عليك , لكن تأدية واجب , وانت بالخيار .. وقاله اذا غيرت رايك خلال اسبوع كلمني .
ابو تميم ماغير رأيه , ويوم الاربعاء الماضي , أُ بلغ ابو تميم ان القصاص يوم السبت , وانا اسف اني مابلغتكم الا يوم الجمعة , بس كان فيه طلب بعدم نشر أي شي بالانترنت ..
يقول ابو تميم , ان أم فهد لها يومين تنام بسيارة قدام باب بيتي , وام تميم اليوم تكلم الوالدة وتأكد لها ان ام فهد ومعها كم حرمة قاعدات قدام البيت ( البعض يقول انها مهيب ام فهد , وانا انقل كلام ابو تميم وام تميم ).
اليوم الاخير ابو تميم طلع لشقه مفروشه , مانام بالبيت , تقول ام تميم , ماقدرنا نطلع من اللي مرابطين قدام الباب , لكن سبحان الله الظاهر انهم راحوا خمس دقايق بس , وقدرنا نطلع , وعقبها درينا انهم رجعوا عند الباب ..
حسب معلوماتي ان ام فهد بدويه ( سبيعيه )..
على كل حال جا يوم القصاص , وكان الموعد الساعه 8.. رحنا للأمارة , وطلع للمكتب الخاص ابو تميم ومعه 4 من وجهاء القاضي , وقابلوا في البداية محافظ عنيزة ( عبدالله السليم) ومعه مجموعه من وجهاء عنيزة جوا للوساطه , وبعد اخذ ورد رفض عمي التنازل ..
دخل على الامير سلمان , ومنع الامير دخول ابو القاتل , او أي احد من طرفه , وكان الموجودين عبدالرحمن بن سعود , وولده ممدوح , بالاضافه للاب نايف , لكن ماقدرو يقابلون ابو تميم .. قال الامير سلمان بأختصار , يبوم تميم انا منيب قايلك الا كلمتين , ان عفيت فهو أجراً لك وان طلبت القصاص فهو حقك ..
كذا بأختصار ..
في حوالي الساعه 9.30 نزلنا للصفاة , وكان فيه تطويق امني غير طبيعي , وطبعا الشوارع كانت مسكره وكلها دوريات , دخل جوا الساحه ابو تميم وولده تميم , وابو جهاد , ومن ذاك الوقت , كان كل شوي يجيهم واحد يطلبهم , انتظرنا طويلاً الى ان جاء الامير القاتل في حوالي الساعه 10.20 وكان واضح على عمي الاصرار على القصاص , وأكد لنا تميم انه ماراح يتنازل ..
بعدها كثرت الطلايب , وكثرو اللي يتوسطون , وجا السياف , ونزلو القاتل بوسط الساحه , وقعد على ركبته , وعمي مازال رافض , كان فيه شيخ شاب , هو اللي كان يفاوض في اللحظات الاخيرة , وطلب من عمي انه يقوم ويستخير ..
عمي بنفسه يروي الاحداث , ويقول قمت أصلي , وكان يصلي وعلى يمينه القاتل والسياف فوق راسه , طول بصلاته وكان يدعي , يقول دعيت دعاء الاستخاره , ومازلت مصر على القصاص , ولما سلمت من الصلاة , سبحان اللي يغير ولا يتغير , صارت المسأله بالنسبه لي سيان , ان قتل ولا ماقتل , كلمت ام تميم , شاورتها , وقالت انا معك باللي تقوله , شاور عمره , وشاور تميم وابو جهاد , وكلم الشيخ .. عقبها قام واتجه للقاتل , وأشر بيده انه عفى ..
صار فيه تهليل وتكبير , والناس راحت تركض بأتجاه ابو تميم , والعساكر يحاولون يضبطون الوضع ..
شالوا العصابه عن عيون القاتل , وانا من اللي تقدموا , وكانت وجه لوجه مع القاتل , كان غير مصدق ووضعه غير طبيعي ..دموعه غطت وجهه , وهو ماصدق انه انكتب له عمر ثاني ..
كان فيه غضب من البعض بهذا العفوا , كانو يبون القصاص , وتقدمو من فهد , وهزئوه , ودعو عليه , ولا كان قادر يرفع عينه بعين احد , كان منكسر تماماً..
المهم هنا ان ابو تميم , وضع شرط لهذا العفو , ان فهد يحفظ القرآن ..
اتجه ابو تميم ومعه مجموعة لمكتب الامير سلمان , دخلو على الامير , وكان يبكي .. اول مادخل عمي ضمه وحب راسه , وقال اقسم بالله اني فرحان لك بالاجر اكثر من فرحتي بولد أخوي , موقف اقل مايقال عنه انه يبكي , ولا أعتقد ان أحد حضر ذاك الموقف ولا دمعت عينه .. الامير سلمان كان كل شوي يقوم ويضم عمي ويقول والله اني حابك ياشيخ ..
يقول الامير سلمان انه فاتح الدرايش , ولما سمع التهليل والتكبير درى انه تنازل , ولا قدر يمسك نفسه ..
دخل الامير عبدالرحمن بن سعود ونايف بن سعود وممدوح بن عبدالرحمن , كان منظرهم مره مؤثر , يبكون بشكل غير طبيعي , وحبو كل الموجودين ..
طلع عمي واتجه للمحكمه عشان يصادق على التنازل , وكتب شرطه ان فهد يحفظ القرآن كاملاً ..
· ابو تميم يقول انه يحس ولله الحمد براحة نفسيه كبيرة , ويقول ولله الحمد حمل سنتين راحت , والحين اقدر استريح من ذاك التعب الطويل ..
· ام تميم هذه المرأة اللي نتعلم منها الكثير بالصبر , والاحتساب , بجد ما اقول الا ماشاء الله عليها , ماقد شفت حرمة بصبرها وقوتها ..
· الامير سلمان , قلت انه رجل والرجال قليلُ , ويشهد الله انه كبير بكل مافيه , ولاهيب شهادتي انا , شهادة كل من واكب هذي القضية ..
· المهم وصار , وهو ان ولد بن سعود جا للصفاة وقعد على ركبته قدام السياف , ولا كان بينه وبين القصاص الا ثواني , رحمة من الله ..
· العساكر الموجودين يقولون ماقد صار قصاص بمثل ذا التأخير , بالعاده كل المسألة نص ساعه , ماودنا نتكلم عن ذا التطويل , لكن نقول الحمد لله على كل حال , ونتج عنه عفو , عسى الله يكتبه بموازين حسنات ابو تميم وام تميم..
· اكثر موقف مؤثر بالساحة , هي شهقة حرمة سمعها كل من كان بالصفاة , واتجه مجموعه من الرجال لم الصوت , الكل يعتقد انها ام فهد ..
· ام فهد هي الوحيدة اللي تعاطف معها ابو تميم وام تميم من أسرة القاتل ..
· أبو تميم كان رافض من الاساس أي مزايدات على هذي القضية , وكان مبدأه واضح , ولا انسى انه رفض يدلي بأي تصريح لصحيفة القدس بعد مقتل منذر الله يرحمه ..
· الامير سلمان يؤكد انه بينزل بيان بتفاصيل الحادث بالصحف ..
· * انا كنت من الرافضين للعفو , وكنت اتمنى القصاص , وكنت من المعترضين على العفو , لكن والله كنت ابيها تكون رادع لكل من تسول له نفسه العبث بالناس .. على كل حال ان شاء الله انها خيرة , وحتى اللي كانو يطالبون بالقصاص وحضروا الواقعه غيرو رأيهم وتعاطفوا مع قرار ابو تميم , وقالوا ان شاء الله انها رحمة لمنذر , واجر لابو تميم وام تميم ..
· نسأل الله العظيم رب العرش الكريم , ان يرحم منذر ويتغمده بواسع رحمته , ويهدي فهد , وينفع الله به الاسلام والمسلمين ..
· اتوقع لو كلنا نجتمع في محاولة لتخيل فرحة ام فهد , محنب قادرين نوصف وضعها , ووالله اني اليوم ماقدرت انام من كثر ما اتخيل فرحتها لما درت ان ابو تميم تنازل..
** بقي ان اقول كلمة في ابو تميم..
هذا الرجل تعلمت ومازلت اتعلم منه الكثير , بالفعل مدرسه في الاخلاق , والتدين , والصبر , والطيبه , والعفو عند المقدرة من شيم الرجال .. مهوب تحيز لعمي والله , لكنه رجل نادر في هذا الزمان , واللي يعرفه عن قرب بيوافقني الرأي ويمكن يزيد علي ..
** انتهت اشهر قضيه قصاص في المملكه , انتهت نهاية مشرفه , نهاية تنبىء عن بداية أكثر أشراقاً للقضاء السعودي ..
اللهم لك الحمد والشكر على منك وكرمك , اللهم لك الحمد ان اخترت لابو تميم الصالح من أمره .. اللهم لك الحمد حتى ترضى , ولك الحمد إذا رضيت .
*** شكر خاص للجميع على متابعتهم للقضيه على مدار سنتين , كلامكم كان دائما له الاثر بثبات ابو تميم , لان كلامكم كله كنت انقله له , وكان يسعد بالتأييد اللي يجيه..
جـــــــــــــــزاكـــــــــــــــــــــــــم الـــلـــه ألف خير [/ALIGN] |
[/ALIGN]
الوضع العادي
