السلام عليكم .
على طول سيده.

انتم كلكم تعرفون غثا المطالب في الحياة.
انا ابا امسك غثا خاص بالبنات.
اي واحد عنده بنت او اخت وسجلت في الابتدائي بيلاحظ شي غريب اللي هو المطالب الغريبة من الابلات يعني الدفتر لابد يكون ابو اربعين ولايزيد ولا ورقة ولابد يكون لونه وردي , والقلم يكون فوشي وغيره من المطالب الغريبة اللي يقعد يدورها الشخص اسبوعين وكل ما شرا شي وودته البنية للمدرسة قالت الابلة مايصلح رجعه وغيره لين يوافق رغبة السيدة الابله.هذا غير الابه لازم لها لون خاص. والشريطه ماننساها.

المهم تكبر البنت وتدخل المتوسط وتلاحقها المطالب حقت التفصيل وخرابيطه اللي تطلع الفحال في راس الواحد.
والثانوي نقول هانت قلت المطالب. لكن اذا وصلت وقت الاختبارات بدا هم جديد نفسي لأن سبحان الله الابلات يتفنن في الاسئلة .حتى شكل ورقة الاسئلة تسد النفس تقول صك محكمة ومن زين الطبع خط الابلة تقول جرة نمل. وتضطر انك تنقلها اذا وصلت ثالث لأهلية علشان المجموع ودخلة الجامعة.الهم لاحقك لاحقك.


المهم نجحت البنت وسجلت في الجامعة.. اكثر واحد فرحان في هالحالة الرجال لان لسان حاله يقول افتكيت.

المهم يمر شهر وهو مرتاح .

بعدين تجي البنت تقول ان الابله "اسف قصدي الدكتورة طالبة منا كتاب واسمه كذا."طبعا انا اتكلم عن نفسي لان ماعندنا سواق يمكن معقدين في نظر البعض والا قعاطه"
يروح الرجال ويمر المكتبة ويسأل اول ماينطق كلمتين من اسم الكتاب يرد راعي المكتبة مافيه.
والمكتبة الثانية والثالثة وهلم جرااا. ونفس الجواب وفي كل مكتبة تلقى البنيات مسيكينات نفس حالتك.
وبعد ثلاث ايام تحصل الكتاب في اطرف مكتبة بالرياض واذا وصلت لقيت طوابير العالم هناك سرا على مكتبة مساحتها 3في 2.
المهم تحصل اردا طبعة للكتاب ومن ارخص انواع الورق والحبر مهوب واضح.

مدري من المسؤؤل.
هل الدكتورات يتفقن مع اهل المطابع والكتب والا فيه شي ثاني.
انا هوجست بهالوهوجاس.


تحسون اني ملوع لذلك اعذروني من الاطالة ومن ركاكةالاسلوب.

هذا مو غثا بنات على قولتك .. الا غثا معلمات ..
وحرام عليك ترى ما لنا ذنب في أي شيء ..<br><font size=1 color="#000080" face="tahoma">[عدلت بواسطة انزاكي اليوفي التاريخ:22-03-2001 الساعة: 03:11 AM]</font>

هلابك انزاكي.


ايه اكيد هذا غثا المعلمات.

بس العنوان كذا. لأني ما اجيب الشي علشان المعلمة اجيبه علشان اختي.

غثاهم كلهم !!!
 

اهلين ...اعتقد غثا المدرسات اكبر .....:) وهو يتشركون احياناً :)


تحياتي واشواقي :)

الشرهه على اللي معطيهم الفرصة ولا وين تعليمات الرئاسة العامة لتعليم البنات

السلام عليكم و رحمة الله وبركاته

غثا البنات إلى الممات
يعني الحين اختك ذا اللي انت تعبان عليها
بكرة بتجحدكم وتعرس
والله يعينكم على المطامر في الأسواق
وغثا عيالها اذا امرحوا عندكم

بس تظل البنت نص المجتمع

<-------واحد ذروووق

لالالا .. ترى كذا أنا ما أرضى ..

عليش اختي(انزاكي اليوفي) لكن الصراحة تزعل (امزح..امزح)الله يعينك اخوي ابو محمد

لا لا تفهمون غلط صح فيه غثا من المعلمات , وفيه غثا اذا تعينت في قلايع ودران ولازم يروح معها محرم.
ووقت العرس بعد.
وانا لابد اخدمها واوديها وافتخر بهذا لاني مانيب تاركها تروح مع السواق. ولو تطلب اختي لبن العصفورة جبته لها هي بس تامر.

والبنت او المرأة عموماًعندي وعند العامة هي نصف المجتمع لا لا لا بل هي كل المجتمع لأنها هي الاساس في تربية النصف لأخر.
وهي الام والاخت والزوجة والبنت.
يعني بالعربي وش حنا بلا المرأة.

وش رايك انزاكي. بس تراني جااد بكلامي هذا.

والله يابو محمد جاز لي كلامك الاخير ..
الله مير يخليك لاختك ..
مهوب بعض الشباب والرجاجيل الله يهديهم .. لاقالت الاخت او الزوجه جب لي .. ودني .. قال وش انا جايب السواق علشانه ؟؟؟ ..
والمشكله في الفتره الاخيره .. صار السواق للحرمه وللرجال ..
اذا هو ماله خلق يجيب شي .. وصى هالسواق .. واذا صارت البنيه مواعدته تبي تروح لقته رايح .. وتوهقت بعمرها .. :(:(