نادي الهلال السعودي - شبكة الزعيم - الموقع الرسمي - فلنكن واقعيين 000 كفاكم غروراً يا هلاليين !! مقال رهيب رهيب لا يفوتكم

[ALIGN=JUSTIFY]أحبائي أعضاء المنتدى الغالي
في جريدة الوسط الرياضي لشهر رجب 1424هـ والتي تم فيها منع نشر مقال لكاتب هلالي كما أشرت لذلك في مشاركة سابقة لي هذا الصباح قرأت فيها مقالاً رائعاً ورائعاً جداً لكاتبته التي لقبت نفسها بـ ( رهف الهلال ) المقال طويل جداً جداً ولكن أجمل ما جاء فيه الجزء الذي أنقله لكم حرفياً كما جاء في مقال الكاتبة فقط نسقته وجهزته ليظهر لكم بمظهر جميل يختلف عما جاء به في الجريدة والمقال كما تلاحظون كتبته الكاتبة باللهجة العامية وجاء بعنوان :ـ[/ALIGN]

[ALIGN=CENTER]فلنكن واقعيين 000000 كفاكم غروراً يا هلاليين !![/ALIGN]

في كل مرة اقرا وياكم مقالات يكتبها هذولي المهابيل اللي كل همهم يتهجمون على الهلال ويحاولون يقللون من مكانته بين فرق الاندية العربية والاسيوية كلها وهي اللي تزعمها بكل اقتدار ويحاولون يشككون في كل بطولاته اللي حققها طول عمره ويتهجمون على نجومه وابطاله ورجاله اللي خرجتهم مدرسة الزعيم الكروية واللي لعبوا للزعيم ويوصفوهم بأقبح الاوصاف

ما في بطولة يحققها الهلال الا ويقولون انه ما يستاهلها
ما في مباراة يفوزبها الزعيم الا ويقولون حرام حتى ولو هي مباراة ودية
ما في لاعب ونجم يطلع من الهلال الا ويقولون عنه ما هوب راعيها ولا يعرف يطقها خير شر

أقول لكم في كل مرة نقرا هالمهابيل هذولي وش تكتب قلوبهم المليانه حقد وغل وحسد يزيد حبنا وعشقنا لفريقنا الله يخليه لنا ولا يحرمنا من طلة نجومه ورجاله اللي ما قصروا أبداً كل عمرهم وهم همهم الوحيد أنهم يسعدون جماهير ناديهم ويخلوهم دائم مبسوطين ومستانسين ويرفعون اسم فريقنا فوق حتى وصوله إلى زعامة الأندية الاسيوية كلها ماهوب بالحكي والكلام والكلام الفاضي الا بالجد واللعب والعرق واذا قلنا لهم يعني لهذولي المهابيل ترى فريقنا هلالنا زعيمكم غصب عنكم لانه فريق بطل ما يبي من احد يساعده هو اللي يساعد نفسه بنفسه وهو اللي يلعب ويجد ويجتهد علشان ياخذ نصيبه ويقطف ثمره جهده واجتهاده قالوا انتم يالهلاليين ما تعرفون شيء ولا تفهمون كورة وفي الاخير يتهمونا بالغرور ويقولون انتم مغرورين بشكل كبير بفريقكم وكأن ما في احد قدكم أنتم مغرورين يا هلاليين بفريقكم بدرجة كبيرة وكأن فريقكم ما ينهزم أبداً تحسبون ما حد يفوز بالبطولات غيركم على بالكم ما في نجوم غير نجوم فريقكم

مغرورين 00 مغرورين 00 مغرورين يا هلاليين

لكن اللي انا ودي اسأله هل فعلاً حنا يالهلاليين مغرورين بفريقنا ؟؟؟000 واذا كنا فعلاً مغرورين مثل ما يقولوا النصراويين المهابيل هل من حقنا ننغر بهلالنا ولا ما هوب من حقنا ؟؟؟

تبون الصراحة اي نعم حنا مغرورين بهلالنا ومغرمين فيه بعد ومولعين فيه ونفرح له ونفرح معاه ونحبه ونشجعه ونعشقه لين نموت

لكن بصراحة اكثرمن حقنا نصير مغرورين في هلالنا هذا اللي يبيض وجيهنا دايم وفي كل مناسبة وفي كل مكان وفي كل زمان عسى الله يخليه

من حقنا ننغر بهلالنا ونفتخر بعد بحبه وعشقه وتشجيعه
من حقنا ننغر بهلالنا لانه زعيم وما هوب زعيم بالكلام بس زعيم قول وفعل زعيم كيسان وبطولات زعيم ذهب ورجال زعيم وزعيمكم بعد وزعيم كل الأندية هالبلد
من حقنا ننغر بهلالنا لانه الزعيم لانه الموج الازرق اللي كل منافس فيه يغرق
من حقنا ننغر بهلالنا زعيم الملايين عاشق المنصات صديق البطولات المغرم بالذهب أشكال والوان هلالنا زعيم اسيا والعرب بطل القرن السعودي زعيم القرن الاسيوي رضو في الاتحاد الاسيوي وإلا ما رضوا حتى رشحوه هو الزعيم غصب على فلمبان وطقته
من حقنا ننغر بهلالنا صاحب 42 بطولة وتبي تزود بمشيئة الله سبحانه وتعالى وقدرته وتوفيقه رضوا الحاقدين والمقهورين والا ما رضوا تبي تزود غصب عليهم ان شاء الله
من حقنا ننغر بهلالنا هلال العز هلال التاريخ هلال الأمجاد هلال الذهب هلال البطولات
من حقنا ننغر بهلالنا لأننا معه نتذوق طعم وحلاة الفوز والانتصار بالبطولة والذهب اللي غيرنا مساكين محرومين منها من سنين
من حقنا ننغر بهلالنا بطل الدروع بطل الأبطال بطل الخليج عميد أندية العرب زعيم اندية اسيا كلها
من حقنا ننغر بهلالنا بطل الدروع بطل الابطال وسيدهم وزعيمهم
من حقنا ننغر بهلالنا اللي فاز إلى الحين بـ 42 بطولة بس وهو اللي ما تأسس الا عقب ناديكم بسنتين وأكثر
من حقنا ننغر بهلالنا اللي غيره تأسس قبله بعشر وعشرين سنه وثلاثين سنه وما بعد حققوا نص اللي حققه هلالنا الغالي

وأخيراً بالله عليكم وبرحمة أمكم وابوكم وشلون ما تبونا ننغر بهلالنا وهو اللي مجننكم ومغربلكم ومهبلكم ومولع في قلوبكم ومطير النوم من عيونكم وحارمكم تتهنون في اكلكم وشربكم وجلستكم وقومتكم تقومون تقعدون تفكرون بالهلال وشلون فاز وخذ البطولة من قدام عيونكم حتى في منامكم تفزون عليه وما تصدقون بس متى ينهزم ويخسر مباراة او بطولة علشان تناقزون وتطامرون من فرحتكم وعيدكم اللي انتم فيه

حنا مغرورين بهلالنا والحمد لله على الغرور والحمد لله قبل كل شي اللي هدانا من البداية وخلانا نعرف نختار الفريق اللي نحبه ونشجعه وننبسط معه ونظل طول عمرنا فرحانين ومستانسين وفخورين فيه اما انتم خليكم في قهركم وحوستكم وحسدكم لين تموتون حنا هلاليين هلاليين هلاليين