هلاليين في غرفه سد !!

المكان : غرفه المعيشه ماادري وش هي بس الظاهر انها اللي يحطون فيها العيش والارزاق

واجلس انا .. يا ابوفاس المحتاس ومن حولي اشبالي ( على بالي اسد ) وقد ذبلت وجيههم وكان على يميني ولدي الدلخ البكر ( مهوب الجابر ولا يقرب للاحمد ) فاس وعن يساري ولده البثر القعده فسفوسي ..
وانظارنا مبحلقتون في التلفازي نشاهد شريط فيديو يعرض مباريات الهلال في مربع قرف اسيا ولسان حالنا يرثي لمستوى الهلال الضايع ( تكفون اذا لقاه احد ينبنا )
انا ماغثني في هالجلسه الا كثره اسئله فاس واستفستاراته ( عاد ليته يفهم عليه شويه دلاخه ماادري من وين جايته )

فاس :
يبه .. صحيح الجمعان وقفوه ؟!!
ابوفاس :
ايه .. لانه وانا ابوك ماربط حزام الامان والا كان ماتشوفه .. متنثر .. رجل عنده والرجل الثانيه تقول ياشباب من انا تبعه
فاس :
ربعي يقولون انه عابط وماطاع يطلع ؟!
ابوفاس :
وش قالوا بعد ؟!!
فاس :
وقفوه هو والقاتو شهر !!
ابوفاس :
ايه .. الصراحة حركة حلوه من ربعنا .. عشان النخبه !!
في هاللحظه .. المشهد يتحول الى شاشة التلفزيون وهي تعرض مباراة الهلال والاتحاد في ملعب ازادي وهوا ومطر ..
في هذه اللحظه يقمز ذيبان اللي على يساري ويطمر للمطبخ ويرجع معه بمنشفه وغضارة طمله !! ويدخل المنشفه في الفيديو !!
قلت :
وش عندك يافسفوسي ؟؟
فسفوسي :
انثف البلعب ..!! ( انشف الملعب )
المشكله انه محسوب علي ولد
المشهد يرجع لي ولفاس مرة ثانيه ..
فاس :
والله فشلونا قدام الله وخلقه ويستاهلون التوقيف !!
ابوفاس :
تبي الصدق .. ماعندك ريس لسانه يلوط اذانه كان مايوصلنا شي و يعطونه شهاده شكر فوق البيعه !!

فاس :
وشلون ؟؟
ابوفاس :
واضحة زين عين الشمس ..!!!
تذكر يوم مباراة الهلال مع النصر في الدوري وفاز الهلال كالعاده 2/1 وانطلق عليه الحونش الحارثي والكنج وزمرتهم يبون يدبونه الين يغني حمار بطنه ..
فاس :
ودبغوه ؟؟؟
ابوفاس :
ماامداهم .. والرجال سريع عجزوا يلحقونه وشلون تبيهم يلحقونه وهو اذا جا يركض عرقوبه يطق في *****
فاس :
والنتيجة ؟؟
ابوفاس :
قلنا لك فوز الهلال !!
فاس :
توي ادري انك انت اللي جاذبني
اقصد وش سووا لهم ؟؟
ابوفاس :
ابد .. توقيف مباراتين لاثنين منهم وشهادة شكر لقائدهم ورمزهم ..
فاس :
بس هذولي في مباراة محليه ؟!
وربعنا فشلونا قدام الاجناب ؟؟!
ابوفاس : اوووه هذي يبي لها قعده
لا تعتقد اني ادافع عن الجمعان والكاتو .. بل انا من اكثر المطالبين بايقاع اقصى العقوبه عليهم لانهم في الحقيقه كسر ولايسرونك !!
لكن طريقه توقيفهم مهزله مابعدها مهزله !!!
فاس :
وقفتهم رعاية الشباب وماقصرت وتقول انه قرار تربوي .
ابوفاس :
اولاً خل التربيه لاهلها .. لان ذولي مالهم فيها .. والا كان اولها ماتشوف هالقصات اشكال والوان في منتخب الناشئين والشباب .. هذولي يبي لهم مجلد لحاله ولاناب فاضين الله يصلحك ..
لكن .. هل يستحق الاثنان التوقيف ؟؟
نجي للكاتو .. ضرب الايراني بكوعه واستحق ( بناء على قرار الحكم الكرت الثاني وطرد على هذا الاساس .. كرت اصفر ثاني ) مع ان الحركة تستاهل الكرت الاحمر مباشره ..
واخذ الكاتو عقابه بالطرد من ارض الملعب ..
فهل قام اللاعب بالاشتباك او رفض الخروج من الملعب او قام بعمل مشين ؟؟؟؟
فاس :
لا .. كل اللي شفته عقب الكوع ان يتنحش من اللي لاحقه ..
ابوفاس :
نجي للجمعان .. عدم استجابته للتغيير حركة نرفضها وبعد ان خرج بدون اذن الحكم كان يفترض من الحكم ان يستدعيه ويوجه له كرت اصفر لخروجه بدون اذن من الملعب واذا كان عنده اصفر من قبل يصكه بالاحمر ..
لماذا يتم ايقافهم من قبل الاتحاد لمدة شهر ايضاً ؟؟
فاس :
يعني من رايك ان الجهة التي يمكن ان تعاقب على هالسلوك هي ادارة الهلال فقط لاغير !؟!..
ابوفاس :
نعم .. هذا الصحيح وادارة الهلال كانت سوف تتخذ الاجراء الرادع اللازم وممكن يكون اكثر من المده اللي جت في قرار الرعاية ..
تدخل علينا في هاللحظة بنتي الفسيفساء وتقطع حكينا بسؤال خطافي سريع : يبه .. يبه اليوم السبت والا الاحد
رد فاس بسرعه : الاثنين ..
قالت الفسيفساء : يوووووووه ... وشلون اجتمعوا بعض ؟؟
وقفلت راجعه هالقفل

ابوفاس :
انا اللي مقلقني انه على اي اساس بنى اتحاده الموقر قراره ؟؟
ابي سبب واحد مقنع .. مالقيت ؟!
فاس :
ماادري .. لكن يبدو انه حرص على سمعة الكرة السعودية ؟!!
ابوفاس :
طيب عندك ..الكابتن الخلوق ماجد عبدالله في مباراتنا مع الامارات وعندما اقول خلوق فانا اعني ذلك واخذ الكرت الاحمر واثر على المنتخب ماذا حصل له .. هل قالوا طلعنا وان تسبب في اخراجنا من التصفيات بسبب تصرفه الارعن ؟!!؟
قالوا ... مسيكين


ابوفاس :
اترك ذي عنك .. عندي لك حادثتين ماتقارن باللي صار للاعبي الهلال ؟!
فاس :
عطنا اللي عندك ؟!
ابوفاس :
ياجماعه لنا عيون ونشوف ولنا عقل يميز .. في مشاركة النصر في كاس العالم وقدام عيون كل دول العالم شفنا المهازل ؟!
فاس :
مهازل ؟؟؟ فيه ناس عييو يطلعون زي الجمعان ؟!
ابوفاس :
الكنج سوي لنا بهلله ورد كوره قدام الفريق البرازيلي والظاهر انه ماصدق انه رادها غيروني ومااابي اغير منيب طالع والا ترا باسطح الكورة وقام يتسدح في المضمار واخرتها قعد مع احتياط الفريق البرازيلي
فاس :
بس هذا يقولون جته صرعه او ماادري رجه !!
ابوفاس :
وانت صدقت هالكلام .. كل اللي يسوونه هم .. له مخرج وبسم الله عليه وعسى ماشر ولايضرهم انهم ينعتون ربعهم باي شيء بس اهم شيء مايوقف
فاس :
بس هذي ؟!
ابوفاس :
انت ماشفت وش سوا الهريفي ؟!
فاس :
انصرع هو الاخر
ابوفاس :
ههههههههه .. لا الله يرج عدوك واللي في بالي هذا طلعه المدرب وزعل وقام وسوا حركه مااقدر اقولها بس شينة مرة ومن قوايه الوجه قالها بالانقليزي عشان كل الناس تدري وش قال للمدرب !!!!!!!!!!!!!!!!!!!!!!!
فاس :
اكيد ان اتحادنا وقفوه على طول ( مايبي لها كلام اتحادنا تربوي ) ومالعب المباراة الثانية معهم في البرازيل ابد
ويمكن انهم جابوه على اول طياره !!
ابوفاس :
ههههههههههههههههههههههههه
خلني اضحك ثانيه
ههههههههههههههههههههههه
والله انك مزعت بطني على سذاجتك يادلخ
لا وقفوه لا على طول ولا على عرض
فاس :
تراي ان ضحكت علي ثانيه ابمشي واخليك ؟
ابوفاس :
لا .. تكفى لا تروح والله انك توسع الصدر وهو ضايق
فاس :
اجل .. وقفوه يوم جو في الرياض
ابوفاس :
ترا هذي ابتسامات مهيب ضحك عشان ماتروح وتخلينا
ابد طال عمرك ..
فاس :
طيب وين هالكلام اللي يقولونه في الجرايد
.. حفاظاً على سمعة الكرة السعوديه اللي يتشدقون به في الجرايد ووو ..... وين راحت ..
ابوفاس :
طار بها الهواء يالحبيب
فهذي عبارات تستخدم لاغراض معينه وينتفي استعمالها اذا كان فيها ضرر على حبايبهم
لكن تبي الصدق مايقدرون يقربون لذوليك تدري ليه ؟؟
فاس :
اكيد عندهم واحد محنك وسياسي يعرف يدبر الامور ..
ابوفاس :
من ناحيه محنك فهو محنك اما سياسي .. ماادري عنهم اذا كانت طواله اللسان سياسيه اقول لك ايه والامور تدبر فعلا اذا تدخلوا فيها ؟!
المسأله ومافيها ان عندهم واحد على حق اوعلى باطل ناشب في حلوق الناس والناس تعمل بالمبدأ القائل الفكه من ......... غنيمه
وانت الله يخلف علينا وعليك ماعندنا ريس يبرد الكبد !!
فاس :
وشلون !! ريسنا والف نعم فيه !!
ابوفاس :
ايه انا معك بس لوكان لسانه يلوط اذانه مااحد تجرأ عليك !!
كان ماشفت ***** وطقته يصرحون في هالجرايد على الطالعة والنازله !!
فاس :
توي اعرف كل شوي تقول عنا جدار قصير .. جدار قصير
يعني يقدر اي واحد يطمرنا بسهوله
ابوفاس : عليك نور الشريف





[عدلت بواسطة ادارة الموقع التاريخ:16-03-2001 الساعة: 12:32 AM]

ابداااااااااااااااع أخوي ابوفاس
حوار شيق والى المزيد من هذه الحوارات الرائعة

رووووووووووووووووووووعه يابوفاس ,,,

الله يخليلك ولدك فاس ,,,

حوار ساخر يعكس الحال المايل لأتحاد الكره (!!!! التربوي !!!!) ,,,

الله يعطيك العافيه ,,,

تحياتي لك ,,,

روعة أخوي
والله استمتعت بالقراءة
و كلامك ما عليه غبار ولا عجاج

الكاتو أخذ حقه بالملعب وانطرد ، ليش اذا التوقيف
واذا كان توقف ، ليش ما يتوقف غيره من اللي يسيئون لسمعة الكرة السعودية.
و اذا كان هذا طبعهم
ليش ما وقفوا نادي النصر يوم انهزم 5/0 ، لانه أساء لسمعة الكرة السعودية بعد.

يــــــــــــــــــــــا ســـــــــــــــــاحـــــــــر القلوب يا بوفاس

* تــــــــــــسلم أخـــــــــوي أ بـــــو فـــــــاس على الوصف الحلو والرائع.
*الـــــــــى ابو فاس ... معذور لو صرت بك طماع

رائع .. رائع ..
أنا قريت نصه .. وراجع له .. تراه محجوووووووز .. بس سلملي على فسفوسي ..
وأما فاس .. فما أقول إلا هذا الشبل من ذاك الأسد ..
أخدر لي شاهي وأكمل .. يله ..

هههههههههههههههههههااااااااي ابو فاس الله يرجك إلين خلف.قصدي إلين تطيش.

وسلملي على فثفوثي اللي يبي ينثف الملعب.

وعاشت التربية.

شكرا على هذا الإبداع يا ابو فاس..

وانا اكثر ما اعجبني هذي
"الكنج سوي لنا بهلله ورد كوره قدام الفريق البرازيلي والظاهر انه ماصدق انه رادها غيروني ومااابي اغير منيب طالع والا ترا باسطح الكورة وقام يتسدح في المضمار واخرتها قعد مع احتياط الفريق البرازيلي "

شكرا لك

والله حلوووووووووووووووووة مرررررررررررررررررررررة ....

أسلوب ممتاز أخوي ابو فاس .
وحوار راااائع ( والله يخليلك فاس وفسفوسي والفسيفساء ان شاء الله ) .

* وين هالإبداعات من زمان يا أخي

. أثرك منتب بسيط يابوفاس .

. والله يخليلك عيالك

قل لولدك فثفوثي انهم رفضوا حمل راية الوطن راية التوحيد ومحد قالهم شي
يمكن ما فيها اي اساءه للوطن

اعزائي واحبائي .. الهلاليين
نواف
ابراهيم النجيدي
سجين
الكف الازرق
انزاكي اليوفي
ابومحمد
Yaser
عماد
الفارس
هلالي مقلع
عاشق الثمامه

اشكر .. لكم جميعاً تقبلكم لمشاركتي المتواضعه واشكركم على مداخلتكم اللطيفه والتي في الحقيقه اثلجت صدري وتشجعني على ان اكرر المشاركه مرة اخرى في هذا المنتدى الرااااااااائع ..
وكان بودي ان ارد رد مستقل لكل واحد منكم .. لكن الوقت لم يسعفني
كما لاانسى ان اشكر كل من قام بقراءة وتصفح هذا الموضوع



وتقبلوا خالص تحيات
ابوفاس اللي يحب كل الناس

-----------
حوار السناتره اقرأه على هذا الرابط
http://www.eqla3.net/Majallah6/korner3.htm
ولايفوتك لقائنا مع الكاتب الكبير صالح السليمان ( حوار صريح وجريء ومقلع )
http://www.eqla3.net/Majallah6/korner2.htm

أخوي الغالي ومشرف الاقلاع الكبير (أبوفاس) ,,,

الله يعطيك الف عافيه على هذا الحوار الحلو , والله يوسع صدرك زي ماوسعت صدورنا ,,,

وعسى الله يخلي لك عيالك (فاس وفسفوسي والفيسفاء) وخاصه (فسفوسي) بيكون له مستقبل ,,,

بس لاتحرمنا من حواراتك انت وعيالك , ودايم انقل لنا حوارتكم نبي نشوف عائله (ابوفاس) الكريمه وشلون تعقب على الامور الرياضيه ,,,

وتقبل خالص تحياتي لك ,,,

رائع كروعة الهلال إذا لعب زين و فاز الله يعطيك العافية يارب