السلام عليكم و رحمه الله ..
بتكلم ف الموضوع هذا عن اهميه الثلاثي الوسط على ارض الملعب .. و فيه رد على اللي ينتقدون سلمان الفرج بالتحديد
و بحاول اختصر قدر الامكان
________________________________________________
ثلاث نقاط راح اعرضها ف الموضوع هذا
اول نقطه .. اهميه الثلاثي
ثاني نقطه .. اهميه سلمان الفرج
ثالث نقطه .. مقارنه بسيطه بين الثلاثي و لاعب اخر بالارقام
______________________________________________________
النقطه الاولى اهميه الثلاثي ..
للمعلوميه ..
من اول ما رامون دياز قاد الفريق .. بمعنى من الموسم الماضي و الى الموسم الحالي و الى اخر يوم ل دياز
الهلال لم يخسر اي مباراه ابدا و الثلاثي "ميليسي و عطيف و سلمان الفرج" على ارض الملعب اطلاقا
يعني .. نسبه خساره الهلال تكون 0% اذا كان ميليسي و عطيف و الفرج على ارض الملعب
اللي بيقول طيب مباراه نهائي اسيا الاياب .. خسرنا
ارجع للمباراه و شوف هل الثلاثي كان موجود او لا ؟؟
نعم بدأ دياز بالثلاثي .. لكن اخر الدقايق طلع سلمان الفرج تبديل .. و نزل مختار فلاته .. و سالم الدوسري طلع بكرت احمر و جاء هدف اوراوا اللي يعتبر فيه الهلال خسر
يعني "بعد خروج سلمان الفرج" خسر الهلال
اللي بيقول .. مباراتنا قدام ألفيحاء خسرنا .. ف وقتها ميليسي ما لعب
اللي بيقول القادسيه في كاس الملك خسرنا .. ف وقتها سلمان الفرج ما لعب
اللي بيقول قدام النصر ولي العهد خسرنا .. ف وقتها عطيف ما لعب
هذا غير ان مباراه النصر اللي خسرناها غير معتبره عند العقلاء .. لان تركي الخضير الحكم هو اللي نحر الهلال و احتسب بلنتي للنصر و حرم الهلال من بلنتي بعد تدخل عمر هوساوي على ميليسي الشنيع و طلع ميليسي منها مصاب .. مباراه كانت كارثه تحكيميه
https://youtu.be/o_TeO1h27D0
الخساره قدام الاستقلال الايراني .. ما لعب سلمان الفرج
ي اخوان .. حتى على مستوى المنتخبات .. عطيف و سلمان الفرج اذا لعبوا ف المنتخب ما يخسر ابد
اذا بتقولون ان المنتخب انهزم قدام اليابان في ملعب اليابان .. ف وقتها كان خيبري يلعب و اللي ما لعب هو عطيف
و يوم انهزمنا قدام استراليا .. وقتها عطيف ما لعب
و يوم خسرنا قدام الامارات .. وقتها عطيف ما لعب
و بعد ما اجتمعوا سلمان الفرج و عطيف و لعبوا قدام اليابان .. خسر اليابان و فاز المنتخب السعودي
الخلاصه .. اهميه ميليسي و عطيف و سلمان الفرج تعدت مرحله انهم يكونون القوه للفريق
___________________××××××××××____________________
النقطه الثانيه اهميه سلمان الفرج ..
سلمان الفرج اللاعب المنظم .. بمعنى لو كانت الخطه مبنيه عليه كمفتاح لعب و مركزه في عمق الملعب ف نقدر نشوف قوه الهلال فعلا
سلمان الفرج يعرف يهدي اللعب اذا كان الخصم يضغط على مدافعين الهلال ..
و سلمان الفرج عنده دقه التمريرات القصيره و الطويله .. و يوم اقول الطويله ف انا بالضبط اقصد التمريرات خلف خطوط الخصم .. ف هاذي تحتاج لاعب سريع يستقبل الكوره من سلمان الفرج
و لو لاحظنا تمريرات سلمان الفرج الطويله راح نلاحظها دائما للاظهره .. و السبب هي سرعه محمد البريك و ياسر الشهراني
لكن للاسف ما عندنا مهاجم سريع .. و على سبيل المثال ارجعوا ل هدف فهد المولد على الامارات .. شوفوا وقفه سلمان الفرج على الكوره و تحرك فهد المولد خلف خط دفاع الامارات و تمريره سلمان الفرج الطويله و الناجحه لان فيه لاعب سريع يستقبل الكوره
ف حاليا سلمان الفرج لاعب بطل .. لكن مافي لاعب مؤثر يتحرك للمساحات الا الاظهره
و حاليا اشبه اي مدرب هلالي يتعامل مع سلمان الفرج .. ب الرجل اللي عنده مسدس بس ما عنده رصاص .. يقدر يهدد الاعداء بالمسدس بس ما يقدر يقتل الاعداء
سلمان الفرج وجوده على ارض الملعب يشكل تهديد ل مدرب الخصم باللعب خلف خطوطه و يضطر يتراجع ..
و عشان محد يقول انت ترمي كلام بس
ارجعوا ل مباراه الهلال قدام الباطن الاخيره اللي فزنا فيها 5-1
لاحظوا بعد ما سجل الباطن هدف و كسبوا الثقه و جات الدقيقه 70 و فتحوا الملعب .. و فتح المساحات خلفه
و اول كوره ل سلمان الفرج مرر تمريره طويله خلف خطوط الباطن و استقبلها المهاجم و سقط بعد تدخل حارس الباطن و كسبنا ركله جزاء .. و سجلنا التعادل و الثاني ثم الثالث
و الباطن فتح الملعب اكثر للتعويض .. و بعد (تمريره طويله) سجلنا الرابع و الخامس بفضل الله ثم سلمان الفرج
هذا غير ان اكثر خساير الهلال كان غايب سلمان الفرج عن المباراه .. بس صغار العقول يعاندون و يكابرون
مباراتنا الموسم الماضي الدور الاول .. خسرنا قدام الاتفاق و وقتها غايب سلمان الفرج
و في الدور الاول في ملعبنا .. لعبنا ضد الاتحاد و خسرنا 2-0 و وقتها ما لعب سلمان الفرج
و يوم جات مباراه الاياب .. في جده حضر سلمان الفرج و فزنا 3-1 و المباراه في ملعب الاتحاد
لكن صغار العقول يكابرون ..
______________________×××××××××××_____________________
النقطه الثالثه مقارنه الثلاثي بلاعب اخر ..
خيبري و عطيف .. اكثر المبارايات اللي يلعبها خيبري يخسر الفريق
على العكس تماما مع عطيف اذا كان موجود ما نخسر .. حتى مع المنتخب السعودي اذا لعب عطيف .. او عطيف و سلمان الفرج ما نخسر المباراه ابد
اما عن سلمان الفرج و ميليسي و كنو ..
ف بالارقام .. الافضل ميليسي ثم سلمان الفرج ثم كنو
مع ان اكثر الاهداف كانت التمريره ما قبل صناعه الهدف ل سلمان الفرج
حتى هدفنا قدام الريان الاخيره .. عبدالله الزوري سجل و اللي صنع الهدف بن شرقي .. لكن اللي صنع الفرصه هو سلمان الفرج و ارجعوا للهدف و شوفوا
سلمان الفرج
التسجيل .. 5 اهداف
الصناعه .. 6 اهداف
ميليسي
التسجيل .. 6 اهداف
الصناعه .. 8 اهداف
كنو ..
التسجيل .. 0
الصناعه .. هدف واحد
_______________________________________________________
ادري ان الموضوع هذا ما راح يعجب فئه قليله .. بس اللاعبين الابطال يبقون ابطال و يستحقون الدعم و التشجيع
لكن مع ذلك نحتاج تعديل بسيط للفريق زي احضار مدرب كبير .. و مهاجم ينهي الفرص
فقط