السلام عليكم ورحمة الله وبركاته
وكل عام وأنتم بخير مُحبي النادي الأزرق أو (زُوار منتداه ) ..

بنطعّها بالعاميه ولو إننا مش من رجال الفُصحى كتابياً وثقافياً ..
موضوعي اليوم عن الملايين اللي هي عقود لاعبين مع إن الأصل حدهم أُولوف !
يمكن موضوعي بمنتدى آخر وأنا شطحت هنا بس يالله ماعليه وتحملوني
وإن شاء الله المسؤلين ماينقلونه, لأني (وَالف) هنا ولا أزور غير (وَليفي) ..
المهم, مابتكلم عن كيف كان منتخبنا ومن يخدمه من قلب
وعن الإنجازات اللي كنا نحققها بلاعبين يستلمون أولوف وماهي ملايين
لا وعقود ماتوصل مئات الألوف ..
بتكلم عن: (من المسؤل) اللي بيسمع لنا ؟
والله الذي لا إله إلا هو مُش حسد ولا حقد ولا غيرُه ..
إنما هو تنبيه لجل ترجع أنديتنا مثل زمان ومنتخبنا يرجع مرعب آسيا
سيدي المسئول :
من كان يعيش في فقر وبين ليله وضحاها أصبح مليونير ماذا تتوقع منه؟
أيضا ياسيدي لو كل موظف حكومي جمعت جميع رواتب سنينه من فترة تعيينه
إلى تقاعده وسلمتها له من لحظة التعاقد معه, هل تتوقع إخلاص منه؟
يمكن يخلص فيهم من يخاف الله , لكن غيره راح يأدي عمله بنظام السلحفاه
ونظام طززز فيهم حقي في جيبي ولا عليّ
والله وبالله وتالله دام إحنا نهايط بالملايين وهالعقود إننا مابنفلح لا بنادي ولا منتخب
وأرجع وأقول والله إنه ماهو حسد والله يرزق الجميع, بس لازم نلتفت لرياضتنا
الملايين بيد صغير السن اللي كان حدّه (أحلام اليقظه الورديه) تروا خربتهم ..
إرجعوا وعيدوا النظر في نظام العقود وإتفقوا يارُؤساء الأنديه أو المسؤلين
مع إني أعرف نظام :
(هذا اللاعب نبيه ومهما حددنا نظام التعاقد وإتفقنا بس لازم أزيده)
لكن شوفوا حد للزياده وشوفوا حد في كيف صرفها له شهري أو سنوي إلخ
شوفوا لنا حل دخيلكم , لا أنديتنا تشرف برا ولا منتخبنا
وحد لاعبينا موتر وساعه ونظاره وسماعه في إذنه وتكبُر كنه محرر المملكه!!!
جِد جِد شوفولنا حل فيهم ولاترفعونهم عن حدهم ..
نبي أيام صالح النعيمه وماجد عبدالله وسامي وخالد مسعد وجميل ووووووووو
إنتم خربتموهم تروا ولازم منكم الحل

نعم الملايين والعقود الضخمة أفسدت الولاء والبذل والعطاء داخل الملعب وأصبح الكل مادي وغير مبالي طالما ان حقه واجره جيبه ولن يفقده بنزول مستوى او استهتار او غير مبالاه
ولكن
العقود ارتفعت بارتفاع صناعة الرياضة وكرة القدم خاصة وأصبحت تجارة عرض وطلب
واصبح الثري هو متسيد الموقف وواجهة الفريق بالعقود والدفع السخي وهذا في كل العالم
ثانيا
سابقا كان الريال بشعره الان ومع ذلك اللاعبين موظفين وكانو أيضا لا يحلمون بمبالغ طائلة ولكنهم يحصلون على يسير أكثر من ريال اليوم
وهكذا الان تغير كل شي وأصبح
المال فقط هو من يجلب البطولات وليس مجهود لاعبين مع دحين ماديا
والدليل التنافس الملياري الإسباني والإنجليزي
اللاعبون يلعبون بمقابل وانت وحظك
ادفع ووقع واختر لاعبيك ومدربك بعناية وستجد المبالغ عند البطولة ولا شي
ولكن بدون بطولات الريال فيهم خسارة
هكذا الحقيقة المره المؤلمة

إقتباس الرسالة الأصلية كتبت بواسطة فزاع 2005 ادفع ووقع واختر لاعبيك ومدربك بعناية وستجد المبالغ عند البطولة ولا شي ولكن بدون بطولات الريال فيهم خسارة هكذا الحقيقة المره المؤلمة

أول مره أتكلم بموضوع في جلسه أو موقع إلكتروني
وألقى إقناع من شخص رد عليّ بسرعه ..
كلامك مقنع لي يافزاع , لكن مع تطور السنين الحاصل ..
مافيه حل يخلينا مثل الأنديه اللي ذكرتها ولاعبينا يكونون مثلهم؟

.

إقتباس الرسالة الأصلية كتبت بواسطة زمن نواف الإحتراف للأسف لعبة مدروسة للقضاء على الكرة السعودية بالكامل .

مريسل وسطحه وغيرهم من قريت أساميهم كرهت الرياضه ..
لكن مسألة إن فيه لعبه مدروسه تبي تقضي على رياضتنا هالشي أستبعده
هبّه في زمن البلوي مع إن الفلوس من آل الشيخ وقتها
يعطيه الفلوس وهو يتفرعن قدامنا , هذي بداية هالعقود
أما سالفة قضاء على رياضتنا ما أظن !

اس المصايب والي ينفخ في روس اللاعبين ويحسسهم انهم لاعبين من كوكب اخر هو وكيل الاعمال هذا الي ينظر للاعب على انه الدجاجه التي تبيض له ذهباً يمارس جميع انواع الابتزاز التي يمكن ان تتخليها ضد النادي والادارة واللاعب طوع امره حتى اذا ما استلم اللاعب مقدم العقد الضخم الكبير واخذ نصيبه وكيل الاعمال انتهى اللاعب وانتهى طموحه وصار يسحب رجوله ولا ينفع فيه لا خصم راتب ولا غيره ولا حتى يبي يلعب للمنتخب ولا يفكر حتى لو عرض للاعارة ينتقل .. يرفض ليه يتعب نفسه الا اذا ضغطت عليه الادارة ووعدوه بنص راتبه ولا عنده اي مشكله لو يجلس احتياط الي نهايه عقده دام الرصيد ملايين في البنك انتهينا بلا شعار بلا هم شعاري الفلوس ومن بعدي الطوفان .. للاسف تفكير منحرف وليس محترف اخذنا من الاحتراف اسؤ ما فيه وتركنا من الهواية اجمل ما فيها

إقتباس الرسالة الأصلية كتبت بواسطة مارد الهلال الازرق اخذنا من الاحتراف اسؤ ما فيه وتركنا من الهواية اجمل ما فيها

وصلوها للاعبين الجمله أعلاه ..
بس جِد ماحد درى أو بيدري عنّا

الاعبين يبي لهم قرار بعد الساعه ثنعش يخليهم يروحون يدورون حافز

الحل ان هالملايين تقسمها على شكل رواتب واشتراط انه في حال تدني للمستوى الخصم من العقد وتشوف كيف يبذلون الجهد لتقديم المستوى

لكن لازم يكون هالقرار من قبل الاتحاد لانه اذا انت سويت كذا مافي لاعب بيوافق على كذا وبيروح يدور غيرك يعطيه حقه كامل

والله مافي لاعب يستحق فوق المليونين الا كم لاعب والبقيه حرام وربي فيهم ليتهم يفهمون شي اسمه اخلاص بالعمل اللي انت تأخذ عليه اجر

رادوي الغير مسلم لعب باخلاص وتفاني وربي يستاهل كل هله اخذها واخرتها يوم عزم ع الرحيل وقع للهلال عشان الهلال يستفيد من انتقاله

يعطيك العافية

المال ليس سبب السبب الوحيد في عقلية الاعب السعودي بالامارات ياخذون دبل مايخذه الاعب السعودي ومع ذالك يقاتل من اجل شعار المنتخب وافضل لاعبين بالعالم يتقاضون دبل ماياخذه الاعب السعودي وونجم بكل مباراهـ اتمنى يتم تطبيق لائحه من لجنة الاحتراف يخصم من كل لاعب اذا لم يقدم مستوى باكثر من مباراه

إقتباس الرسالة الأصلية كتبت بواسطة MgnOnk773 المال ليس سبب السبب الوحيد في عقلية الاعب السعودي بالامارات ياخذون دبل مايخذه الاعب السعودي ومع ذالك يقاتل من اجل شعار المنتخب وافضل لاعبين بالعالم يتقاضون دبل ماياخذه الاعب السعودي وونجم بكل مباراهـ اتمنى يتم تطبيق لائحه من لجنة الاحتراف يخصم من كل لاعب اذا لم يقدم مستوى باكثر من مباراه

بالإمارات كل شي متوفر لهم بس ناقصهم (الشُهرة عربياً) ..
وبالسعودية كل شي محق لهم (وماناقصهم إلا يشدوا حيلهم شويات) .

الله أكبر الله أكبر الله أكبر
لا اله الا الله
الله أكبر الله أكبر ولله الحمد
كل عام وانتم بالف صحة وعافية

المشكلة في :
- شخص ورث مليارات ويريد الشهره، لذا يوقع عقود دون درايه !
- رئيس لم يمارس كرة القدم، لذا يجد هرولة لاعب عادي شيء مذهل بالنسبة له ! رغم أن العقد خوارفي !
-مطالبات بعض الجمهاهير الغير واعيه بلاعبا ما وبأي مبلغ !
- شروط الاحتراف وضعت النادي في موقف ضعيف!
- عقلية اللاعب المحلي ( عقد غالي،، اللعب في المباريات المهمه،، معسكرات خارجيه في أرقى الدول، شهره) !

س/ هل ما يقدمه اللاعب السعودي يوازي قيمة العقد ؟

س/ هل يوجد لاعب سعودي محترف خارج المملكه في اندية على قدر من المستوى ؟

- هل فعلا قيمة العقود حقيقيه (غير مشبوهه ) ؟

يعطيك العافيه

إقتباس الرسالة الأصلية كتبت بواسطة جلمود الهلال المشكلة في : - شخص ورث مليارات ويريد الشهره، لذا يوقع عقود دون درايه ! - رئيس لم يمارس كرة القدم، لذا يجد هرولة لاعب عادي شيء مذهل بالنسبة له ! رغم أن العقد خوارفي ! -مطالبات بعض الجمهاهير الغير واعيه بلاعبا ما وبأي مبلغ ! - شروط الاحتراف وضعت النادي في موقف ضعيف! - عقلية اللاعب المحلي ( عقد غالي،، اللعب في المباريات المهمه،، معسكرات خارجيه في أرقى الدول، شهره) ! س/ هل ما يقدمه اللاعب السعودي يوازي قيمة العقد ؟ س/ هل يوجد لاعب سعودي محترف خارج المملكه في اندية على قدر من المستوى ؟ - هل فعلا قيمة العقود حقيقيه (غير مشبوهه ) ؟ يعطيك العافيه

ج1: لا وألف لا

ج2: يمكن, بس نكبهم المال ورفعناهم ولقوا اللي يتمنوه
ولقوا حلمهم ب بلدهم ..

ج- : حقيقيه العقود, بس يبيلها شوية تركيز في العقد وكيّفيّة صرفه له

وسلامتك , إنت ومن يقرأ .

تعديل متأخر وتكملة لإجابة السؤال الثاني..
يقهرني, وإن صحّ التعبير أتحسف لما أشوف لاعبين من مصر والمغرب وغيرها
يلعبون في دوريّات خارجيّه, ولاعبينا شمنقَ حبَش !!

بدون زعل ..
الموضوع تافه .. والردود أتفه ..

: : : : :