أخوي ..
عزوز لاعب هلالي .. والجمهور يتمنى يكون أي لاعب في الهلال سوبر ستار و نجم شبّاك على قولتك ..
مافيه جمهور ينتقد لمجرد الإنتقاد .. يمكن فيه فئة مندسّة أو حاقدة قليلة جداً .. لكن الجمهور بشكل عام يحب لفريقه الأفضل ..
أرجع لعزوز كسر البزبوز
:
مشكلة هاللاعب إن زجاجي .. على كثر ما أرهق الخزينة الهلالية إلا إن مشاركاته قليلة ..
ومستواه دايم بعد الإصابة سيء جداً .. يرجع حبة حبة و بشكل تدريجي ثم إذا وصل مستوى يمشي الحال انعطب الرجّال ..
وهكذا دواليك
:
فصاير يخاف من الاحتكاكات .. مستعجل و تمريراته خطأ .. سرعته انخفضت ..
وش فرقه عن لاعبي الأولمبي؟ .. أضمن لك لو لعب واحد من الأولمبي بنفس مركزه راح يقدم أفضل ..
أنا كمشجّع ماعندي استعداد أصبر على أي لاعب يمحوق داخل الملعب حتى لو هو يوسف الثنيان ..
أنا كل اللي أبيه لاعب يقدّم داخل الملعب بدون اعذار .. ضغوط .. راجع من إصابة .. نفسيتي تعبانة .. بابا موت ماما موت .. وغيرها
أنا كل اللي أبيه لاعب يقدّم مستوى .. سواءاً كبديل أو كأساسي ..
أما تفرض لي لاعب يلعب 70 دقيقة أساسي .. ويمطرس بالكورة .. و تبين أصبر عليه لربما يرجع لمستواه !
أنا بالنسبة لي و رب المصحف أتمنى عزوز يكون مستواه ممتاز .. ودي ياخذ جائزة أفضل لاعب بالعالم
:
لكن مهب على حساب إني أصبر على العك الكروي اللي يقدمه ..
اللاعب يقدر يرجع لمستواه بالتمرينات و اللعب عشر دقايق آخر كل مباراة .. مايلزم أصبر عليه
بالأخير .. خلني أحدثك عن دورة حياة اللاعب السعودي
:
كل لاعب مر على فريق من الفرق الكبار تكون بداياته قوية .. يحسسك إنه ميسي قادم .. أي لاعب ..
بعد سنتين فزة الددسن توضح للمتابعين .. ويتراجع مستوى اللاعب ..
المصيبة و اللعنة لامن الجمهور استمر بتشجيع اللاعب اللي متراجع مستواه سنوات طويلة وهم يتذكرون أول سنتين فقط ..
بكذا ماراح يستفيد النادي .. واللاعب بيستمر على عكه الكروي حتى يصك عمره الثلاثينات وثم ينتبه الجمهور إن السنين طارت
يعني لا تحكم على لاعب من بداياته لأن كل اللاعبين السعوديين على هالشاكلة ..
وأقدر أعدد لك أسماء كثيرة برزت بالهلال و النصر و الإتحاد و الأهلي .. ولعبت أساسي والجماهير تقول عطوه فرصة عطوه فرصة
لين يتنسّق اللاعب .. أو يعتزل .. ويمكن تلقى بعض الجماهير للحين تقول اصبروا عليه حتى وهو معتزل
:
عزوز يحتاج الدكة والدكة تحتاجه .. إذا استمر على وضعه يستمر على الدكة.. لاعب ينفع بديل .. بس حالياً الأساسي أكبر من مستواه