في البدايه احب ابارك لفريقي ارتيش وبيروزي على التأهل "المستحق" عن غرب القاره.
_________________

سبق وان حذرت في مقال سابق عنوانه "الفوز على بيروزي لا يكفي للتأهل", من اننا يالسعوديين لا نعرف ان نلعب للتعادل, ولا اذكر مره واحده لعبنا للتعادل وتعادلنا, وهذا ما حصل مع نادي الإتحاد, الذي كان اقرب الفرق للتأهل, وكان يقابل من اسموه بالفريق الضعيف "يوم تعادل معه الهلال", وحصل ما كان متوقعا وانهزم العميد...

هزيمة العميد كان لها تأثير قوي على تأهل الهلال, لأن االهلال صار لازم يفوز بفارق ثلاثة اهداف امام بيروزي, صاحب الأرض والجمهور, بينما فوز بيروزي بأي نتيجه تؤهله مع ارتيش المتأهل الرسمي...

طبعا كان قدام الهلال حل من اثنين, الأول انه يلعب للتعادل, ويعطي الإتحاد فرصة التأهل, والثاني انه يلعب للفوز بفارق ثلاثة اهداف, وعلى كل, هذا ما كان خيار ادارة الهلال راح تختاره, المتوقع انهم كانوا يبون يشوفون وش تصير عليه المباراة..

وسجل الثنيان هدف مبكر, وفتح الأمل للهلال بالتأهل.. وسجلوا التعادل... وتلخبط الهلال..

وهذي الأشياء تصير في كرة القدم, عندما ينهار اعضاء الفريق, وينهار اداء الفريق, وعادة تصير هذي الأشياء جماعيا.. يعني لا تغيرات تنفع, ولا توجيهات تفيد.. ويصير الجميع (من اللاعبين) منقاد خلف هذا الإنهيار, حتى ولو كان هناك لاعب او لاعبين متحكمين بأعصابهم...

المهم, الفريق الإيراني استغل هذا الإنهيار تمام الإستغلال, وسجل هدفين, بعد طردين للاعبين هلاليين "الشريده, والكاتو"...

طبعا الحكم طبق القانون بحذافيره, وسقطاته قليله ولا تؤثر, ولكن علشان اسمه "اوكادا" بعض الهلاليين ما راح يخلي ساحته "اي الحكم" من الإجرام في حق الهلال..

اتمنى ان تطبق ادارة الهلال قوانين الإحتراف على الشريده والكاتو, من الخصم وغيره.. لأن ما فعلوه وخصوصا الكاتو شي يعتبر عار على الكرة السعوديه..

الجمعان رفض التبديل.... هاذي الحادثه حدثت من قبل مع سامي الجابر في مباراة الإتفاق... وهذا يعطينا مؤشر على مدى احترام اللاعبين للمدرب, وقدراته التدريبيه..

المدرب... كل الدلائل تقول انه راح يروح, بدءا بتصريح النعيمه بالجرايد, والنعيمه ما يصرح عبث, وتصريح سامي, وسامي ما يصرح عبث, بينما قائد الهلال التزم الصمت..

قائد الهلال...(يوسف الثنيان)... ما ادري وش اقول في هذا اللاعب... اتخيله يرفع الهلال بلحاله, موب علشان الجماهير والصحافه, بس علشانه يبي يرفع الهلال..وانا ما اقصد الهلال النادي..

طبعا الحين الجميع قاعدين يدورون اسباب لهزيمة الهلال, الي يبي يقول الحكم, والي يبي يقول المصيبيح, والي يبي يقول اللاعبين.. بس قليل الي يبون يقولون ان الهلال مثله مثل غيره, ينهزم ويفوز, بس عيب الجماهير عامة وجماهير الهلال خاصة, انها ما ترضى الهزيمه, ولازم يكون في اسباب خارجه عن الإراده علشان ينهزم فريق مثل الهلال...

والجواب لا... الهلال ينهزم يا عالم, ونهزم لنفس الأسباب الي علشانها تنهزم الفرق, واذا كان الهلال علمنا طعم الإنتصار, لازم يذيقنا مرارة الهزيمه, ولا لو الهلال يفوز على طول, كان ما صار للفوز طعم..

ولعل هاذي الهزيمه تلقي بظلالها على النادي, كما القت جميع هزائم الهلال من قبل, واااااااااااه لو بطولة كاس العالم للأنديه تبدا بكره, كان يا سلام, بس الي اخافه ان الهلال راح ينافس بقوه على كاس ولي العهد, وكاس خادم الحرمين, والنخبه العربيه, ويمكن يحقق منها ما يحقق, وننسى مباراة اليوم, ونرجع كأنك يا ابو زيد ما غزيت في كاس العالم للأندية...

ميزة الهلال يا عالم انه ذاتي الشفاء, يعني مهما حاولتوا انكم تصلحون من شأنه ما راح تقدرون, ولكن في يوم وليله وحنا نتوقع ان الهلال راح, يرجع من جديد, وبنفس الأسامي, او بغيرها...

وشكرا للجميع