نادي الهلال السعودي - شبكة الزعيم - الموقع الرسمي

السلام عليكم , حبيت اشاركم بهذي القصه البسيطه اللي صارلي فيها بعض المواقف اللي ماراح انساها :

كلكم عارفين في البدايه ان الحجز كان الكتروني من موقع مكاني ، من قبل لايبدا الحجز ب 24 ساعه تقريبا وانا فاتح على الموقع وجالس انتظر ، تركت صفحة الموقع مفتوحه وكل شوي اجي احدث الصفحه اشوف ، اروح آكل ارجع بعدها اشيك على الصفحه اروح اصلي ارجع برضو اشيك وعلى هذي الحاله الى ان فتح الحجز الساعه 2 الظهر وحجزت ثلاث مقاعد لي ولاخواني اللي راح يجون معي ، ورحت ابحث في النت حجوزات طيران مابين الخطوط وناس والخليج من الرياض الى جده وكلهم كانو فل درجة الضيافه (السياحيه) رحت على المحلات حقت الحجز وبرضو مافيش قلت مالها غير السياره وسيارتي عاد يالله تمشي نفسها وبهذلتنا في الخط (طبعا هذي اول سفره لي انا واخواني لحالنا بالعاده معنا اهلي او على الاقل الوالد) والكل كان يقولي سلامات بتروح لين جده عشان كوره ، المهم بعدها قلت خلني اروح أأكد على حجز التذاكر قبل لاينلغي (التأكيد انك تسدد قيمة التذكره عن طريق الصراف) رحت الصراف وحطيت سداد وكتبت رقم الفاتوره اللي نزلت لي من موقع مكاني وهنا ابتدت مشاكلي الغريبه ، كل ما ادخل رقم الفاتوره يقولي غير صالحه والله وبدون مبالغه اعدت ادخالها اكثر من 30 مره وارجع البيت اتأكد من الموقع وهي نفسها الرقم صحيح بس مدري وش مشكلته ، بحثت في النت عن مشاكل تذاكر مكاني حصلت كثير تعليقات حصلت لهم نفس المشكله والسبب يرجع من المصدر (مكاني) وقتها كانت الساعه 1 الليل يوم الاربعاء ورحت البنك صباح الخميس وقالولي نفس الشي الفاتوره غير صحيحه وعلى هالحال الى ان تفلل الملعب وانحجزت كل تذاكر مدرجات الهلال .. جاني حزن بسبب ضياع فرصة الحضور بسبب رداءة حظ بس مازلت عازم على الحضور بأي وسيله رحت على موقع حراج لقيت سوق التذاكر السوده شغال وعليه اقبال رهيب لدرجة يشترون التذاكر على 500 الوحده حاولت القى ارخص شي حصلت واحد بالطايف يبيع الوحده ب 100 اتفقنا على 3 تذاكر لكنه طلع نصاب واخذ الفلوس وصار نظامه ياخذ الفلوس ويرسل للناس نفس التذكره يعني لو تطبعها بتصير مزوره جاني نوع من الانهيار استمريت بالبحث حتى وجدت تغريده من مجلس الجمهور الهلالي على ما اذكر الله يسامحه عن وجود 300 تذكره مجانيه راح توزع عند الملعب الساعه 4 قلت كويس ومشينا على جده ووصلنا الساعه 12 ظهر الجمعه يوم النهائي ونزلنا الفندق ، طبعا اخواني صاروا مرهقين جدا خصوصا اننا كملنا اكثر من 24 ساعه صاحين وقالو انهم راح ينامون من التعب طبعا هم ماهم متحمسين كوره يعني مجرد يتابعون مباريات للمتعه فاظطريت امشي لحالي جا واحد من اخواني معي تسليك لي مايبغى يحطمني ورحنا الملعب الساعه 3 لكن للاسف اكتشفنا ان مافيه تذاكر مجانيه وطلعت اشاعه تحطم اخوي وقال بيرجع ينام قلتله روح وانا بدبر نفسي وبرجع لو ماحصلت شي وجلست احاول مع هذولي اللي يبيعون تذاكر السوق السودا ارخص شي 300 ريال التذكره جلست ادور في المواقف واسال من اللي معه تذكره زايده الين قرب اذان المغرب وماحصلت شي وبعدها جلست في حالة يأس وقمت مره ثانيه اسأل وفجأه قالولي ناس ان معهم وحده زايده وخويهم مابيجي وقالو اذا انت هلالي خذها ببلاش فدا راسك وقتها فرحت فرحه لاتصدق واخذتها وطيران على المقعد (حققت حلمي بدخول ملعب الجوهره) جلست ارتاح بعد هالتعب والعناء وقلت الحمدلله اللي تحققت .

انتقل للجزء الاخير من القصه وهو في لحظة صافرة الحكم معلن نهاية الشوط الاضافي الاول كنت في حالة انهيار من الهزيمه وارهاق وحسيت بآلام في قلبي وحسيت بدوار وصعوبة تنفس وقلت صحتي اهم وطلعت من الملعب ( اول مره في حياتي اطلع من الملعب قبل صافرة النهايه ماكنت اطلع حتى لو الهلال خسران) لكن ظروفي الصحيه اجبرتني وانشالله انها درس لي وبتكون اخر مره اطلع قبل الصافره ، لما طلعت كل مابعدت عن الملعب اسمع صرخه للجمهور للهجمات الضايعه ومع كل صرخه يفز قلبي لين ابعدت بعيد عن الملعب بالتحديد عند السياج الخارجي اللي على الشارع الرئيسي والتفت على الملعب واشوفه بنظرة تأمل اخيره وانا كلي حسره اننا مانتوج داخل هذي التحفه بعدها مشيت وسمعت صرخه بعيده استمرت ماوقفت قلت في نفسي هذي صافرة النهايه وفرحة جمهور النصر خنقتني العبره ونزلت دمعتي وقلت في نفسي وش اللي باقي اسويه لك ياهلال عشان تهدينا الفوز وكان فيه ناس كثير يمشون طالعين من الملعب مثلي وكلهم منهارين ... فجأه سمعنا واحد جاي من بعيييد يصارخ وما التفتنا عليه ويوم قرب سمعناه يقول التعادل التعادل وقتها جاني زي الشلل ابي اتحرك من الصدمه ماقدرت تجمعت الدموع فيني وانا اشوف العالم تصارخ واللي يسجدون شكر واللي يركضون وشلت نفسي وركضت على الملعب والالم اللي في قلبي يزيد مع الركض الى ان وصلت الملعب وصعدت فوق مره ( الجهه المخصصه للمعاقين ) بسبب ازدحام الجمهور على البوابات وبعد البلنتي الاخير يوم صدها شراحيلي صرت اصارخ واقفز في مكاني من الفرحه أشر علي واحد من المعاقين جنبي يبي يحضني من الفرحه وحضنته والا الثاني المعاق اللي يساري يسحبني ويحضني ...بعدها استمرت الفرحه والرقص على التتويج وعشنا اللحظات الجميله وبعد ماطلعت من الملعب التفت على الجوهره واشوفه وصدري مليان فرحه وبهجه وقلت ياربي لك الحمد على هذي الفرحه اللي ماراح انساها.

ستبقى في ذاكرتي طويلا هذي اللحظات .
‏