|
أولا الف مبروك يازعماء والحمد لله دائما وابدا انا بصراحه كنت ف الملعب وبالضبط خلف مرمى النصر كنت اتابع المباراه لحظه بلحظه حتى جت الدقيقه 118. وقتها جت الركنيه وتوجه لها الشلهوب انا صراحه قمت وطلعت من المدرج بالدور الثالث وتوجهت إلى الدرج عشان انزل ومادريت إلا بصوووت الجمهور اللي هز أركان الجوهره ورجعت واشوف العسكر رجال الأمن يسجدون شكر لله وسجدت وقتها وانا راجع للمدرج وقمت احضن العسكر كذا لاشعوريا فرحان ب الهدف القاتل وحمد الله على التعادل ورجعت مقعدي واكملت المباراه. طبعا سبب طلوعي من المدرج صراحه المستوى انخفض في نهاية الشوط الإضافي الثاني وماكان فيه بوادر تسجيل هدف تعادل ولكن لامستحيل على الله وكل شيء وارد ف الكورة الحمد لله والف مبروك يازعماء والحمد لله أني برجع الشرقية وماخاب ضني 😍 |
بصراحه مباراه تحرق الأعصاب انا كنت ماسكه ولدي عمره سنه ونص يوم سجل الهلال صرخت بوجهه ياقلبي انتفض من الخوف وأمي جالس تضحك علي ماهي قادره تمسك نفسها من الضحك اللهم لك الحمد اللهم لك الحمد كما ينبغي لجلال وجهك وعظيم سلطانك |
انا كنت حاضر النهائي بالملعب قبل الهدف خويي يقول مشينا خلاص انتهت ونطلع قبل الزحمة وانا أقوله خلاص الحين يصفر الحكم بعد الكورنر إذا ضاعت نطلع وجات هدف ... انا بعدها ما اذكر شئ فصخت التي شيرت وأنقز من الفرحة وخويي طايح مغمى عليه وانا مدري عنه والناس تعطيه مويه وانا باقي أناقز هوللللليهولي هولي هولي هوووولي هولي ههههههههه بعدها ابغى أتصور معاه وهو يقول توبه اطلع معاك الملعب تخليني طايح وانت مبسوط ههههههههه المهم ان المباراة بالسيناريو الي صار قمة بالروعه والتذكرة محتفظ فيها للذكرى ويارب تدووووووم علينا الافراح |
طبعاً كنت جايب معي ولدي محمد عشان يتابع المباراة مع الشباب وبعد هدف النصر خفت يضيق صدره فأخذته للبيت , ورجعت للإستراحة وقابلني واحد من الشباب هلالي طالع من الإستراحة قلت له هاه بشر , قال مافي جديد وشكلهم بيجيبون الثاني طبعاً دخلت وكان في اثنين من الشباب نصراوية وجلست أتابع وكان باقي 6 دقائق تقريباً من الشوط الثاني الإضافي والحمد لله وفقنا ربي بهدف التعادل , وكانت فرحتي ع الصامت خفت من البلنتيات والبلنتيات تابعتها واقف :) وأول ماخلصت طلعوا النصراوية ع طول من دون حتى يقولون لي مبروك :) |
يارررررررررررررررررررررروحي يالزعماء والله من الفرحه اكتب وانا ابتسم الشكر لله عز وجل الحمممممممدلله |
يا رجل ما توقت ولا واحد بلميه كنت بوقتها بلملعب وجالس على عيوني البكا يوم شفت الركني اقول بنفسي ما حظرت ولا نهائي الا خسر الهلال ما راح احظر وبنفس الوقت اقول خلاص صفر يا حكم خل نمشي ثم جاء الهدف اول شيء نا صدقت لين شفت الجماهير تفرح وانا ع الكرسي خمني واحد ما اعرفه بوقته قطعت فنيلتي وربي جالس دقيقه مو مصدق لدجت اقول للجني صدق هدف او احلم الفنيله بخليها لذكرا 😭 |
من زمااااااااان ما جرحت حلقي بصرخة هدف ازرق قاتل تفداك حلوقنا يا زعيم |
والله انا جالس اتفرجها عند نسيبي والحقيقه يوم جاء هدف النصر ايقنت ان االبطوله راحت وانا اتابع المباراه بياس شديد وفي اخر الدقيقه استلقيت على ظهري واطالع السقف باسترخاء وفجاه اشوف نسيبي يقول هدف وهو بجنبي واطالع فيه واطالع في التلفزيون واسمع المعلق واقول لنسيبي مو هدف بكل ذهول وغير مصدق ابدا ويقولي والله هدف واقوله لا مو هدف وما استوعبت الموقف الا بعد ما صفر الحكم . |
قبل هدف الهلال بلحظات جمهور النصر يرددد روحو روحو يارب تسهل عليهم واضح التشجيع من يقدر ينزله |
الحمد لله على الفوز وتحقيق البطولة ... كتمت فرحتي خاصة أنني كنت في مجلس كله نصراويين رغم أنهم طاروا من الفرح بعد هدفهم ولكنني فرحت على طريقتي بهدوء دون المساس بشعورهم وبعد الفوز لم أشاهد التتويج معهم لحالتهم الصعبة ... |
انا كنت واثق ان البطولة هلاليه من قبل المباراة وشفتها في كوفي مع احد الاصدقاء المتعصبين جدا للهلال ولأول مره نجتمع انا وياه لمشاهدة مباراة للهلال المهم الرجال اعصابة ماكنت متحملة وكل شوي يقول لي بطلع بروح البيت مره ماستحمل وانا اصر عليه اقول له اجلس لين جابوا الهدف وقال بروح قلت والله ان تجلس الهلال بيفوز بالبطولة جا هدف التعادل كمية صراخ ومطامر ماقد شفته بحياتي من اغلبية اللي كانوا بالمقهى يوم ضيع شايع شراحيلي صديقي قام لا شعوريا ومسك الجدار وصرخ صرخه ووقف بالنص وصرخ صرخة ثانية هستيريه واغمى عليه انا نسيت اني اطامر والتهيت بخويي اللي اغمى عليه مباراة للعمر مباراة للتاريخ ودرس لكل هلالي ثق في فريقك فهلالك الأن ليس هلال ريجي السباك اللي سبب لبعض الهلاليين الشك في فريقهم الف الف الف مبروك للزعماء والزعيمات عودة الزعيم والقادم أحلى بإذن الله |
اما انا غير عنكم الصراحه ماشفتها مب قادر اشوف المباراه من شده الأعصاب خايف يجيني شي بسم الله علي خخخ قلت خل اضيع وقتي وودي المره لأهلها ومشيت من عنيزه للرس ع بدايه المباراه ويوم نزلنا البزران عند خوالهم قلت لها خل انروح للسوق نتمشى وانا ع اعصابي واخذنا لنا ساعه وبعدين نزلتها عند اهلها وبعدين مشيت لعنيزه وقلت للمره اذا فاز الهلال اتصلي ع جوالي اما اذا انهزم لا تتصلين المهم مشيت واتابع المباراه وانا راجع لعنيزه عن طريق المتابعين في التويتر واشوف السهلاوي جايب الهدف وحاس علي الجو بالطريق قلت خلاص راحت المباراه وما امداني اوصل عنيزه الا اشوف المغردين قول قول ومب مصدق انا الا يوم فتحت الرادو و عطول سكرت الرادو وسكررت النت قلت ما ابي اشوف ضربات الترجيح ويوم دخلت وسط عنيزه مع زحمه الأشارات الا جوالي يرن واثاري ام محمد تتصل علي وارد عليها وتقولي مبروووووك وبصوت هيستري وفرحه عامره واقولها متأكده تقولي والله العظيم اخذنا الكأس ومير لا شعوريا ضربت البوري من الفرحه والأشاره حمراء بغت تمشي الناس وتقطع الأشاره والناس تناظر يحسبوني مهبول ههههههههههههههه وامشي طيران للأستراحه قلت ابلحق ع التتويج بشوفه وفرحه اللاعبين ومنها نطقق ع النصراويين اللي معنا بالأستراحه ويوم وصلت الا انواع الرقص والمصارخ با الأستراحه ونعالو شوفو عاد اهبالي وانا استهبل ع النصراويه ما لحقت الا ع اثنين منهم والباقيين شردو هههههههههه حتى الأثنين ما طولو مشو يوم جيت وضحكت عليهم خخخ الصراحه ليله لاتنسى وسهاري الين الصبح من الفرحه الله يديمها علينا يارب ولا يغيرها واسف ع الأطاله خخخخ قلت قصه حياتي |
الحمدلله على الفوز يا رب الحمدلله على الفوز يا رب اللهم لك الحمد والشكرر بالتووفيق للهلال يا رب |
سجدت لله شكراً وحمدا له . |
طبعاً كنت بعرس ولد عمي .. سلكت نصف الشوط الأول ب النت .. والشوط الثاني تابعته عند المكتب .. وبعدها رحت اتعشى قالوا لي النصر جاب هدف وكذا قلت ما يحتاج أكمل المباراة أجل .. عرفت الي حاولوا يستفزونك عطيتهم وضعية كورة ما تنفعك يوم القيامة وكذا .. المهم طقطقوا علي قالوا التعادل جاء قبل ما يجي .. فجأة جيتهم لقيت الهلال معادل وهدف جميل الحمد لله .. تابعت البلنتيات وما خيبووا الظن بهم وجابوها الرقالة !! |
| الوقت المعتمد في المنتدى بتوقيت جرينتش +3.
الوقت الان » 01:33 PM. |
Powered by: vBulletin Version 3.8.7
Copyright ©2000 - 2025, Jelsoft Enterprises Ltd