بعض النصايح لك ولسيارتك ...
 

[ALIGN=CENTER]السلام عليكم ورحمة الله وبركاته
هاكم بعض االفوايد والنصايح واللي تم الحصول عليها من شخص مجرب في مجال المحافظه على السياره مع انه رفض في البدايه بحجة انه في ظل هالارهاب المروري المستشري والمنتشري
( لايروح بالكم بعيد المقصود بالارهاب هي سواقة ربيعنا هنيا اللي مافيهم الراكد سبحان االله العاقل والفاهم فيهم يجرفه الطوفان ... والقاونون المروري والاخلاقي وال..... الخ يسدح ويذبح ولا حولك احد ) لابكاء ينفع ولا شي يفيد .
المهم نرجع لكلام الخبير الغير موجه للاخوان المدمنين على حفيزات السيارات لمتابعة اخر الموديلات :

1)
قبل ما تركب السيارة در عليها وشيك .

2 )
اول ما تدق سويتش لا تدوس بنزين ( معظم السيارات فيها تماتيك )

3)
في السياره ام القير العادي امش بنمرة واحد عدة امتار ويوم توصل سرعة 50 كم لازم تكون موصلها للخامس .

4)
في الشوارع وخصوصا المزدحمه وسع صدرك وطول بالك خصوصا اذا ماكان وراك شى(((( يعني تبي توصل البيت وتطلب شاهي ))) و قبل ماتوصل الالشاره بوقت .. ارفع يدك اسف رجلك عن البنزين و ياليت لو انك تحطها بالفاضي وتخليهاا تدرعم على كيفها علشان اذا وصلت الاشارة وهي خضراء ازين لعزم السيار انتش وامش لان البنزين والفرامل بينهم تناسب طردي ( يعني كل ما خففت دعس بنزين كلما قل استخدامك للفرامل) وبعين مهوب لازم كل الناس ياقفون اول الناس في االاشارات والثاني هات يا بوري (((طاط طاط طاط ... الخ )

5)عند الاشاره فض السيارة واسحب جلنط او طف السيار ( وتقدير الحالة راجع لك )

6)شيك على هواء الكفرات كل اسبوعبن تقريبا (( خصوصا في وقت طباخ كل شي ))
وخل الضغط فيهن 40 (مساكين ) وتر موضوع الكفرات مهم جدا يعني على الاقل وبالميت ما يزيد عمر الكفرات ( موب الكفر ) عن سنتين الى سنة ونصف .

7 )
طفاية الحوطه اسف الحريق مهمه جدا جدا .

8)
انفض ونضف السياره من الكرااكيب والقراشيع الي مال امها داعي .
9)
صك الدرايش خصوصا اللي وارى وانت تسوق.

وبعدين ... وبعدبن عسى ما طولت الناصايح ,,,عليكم خبركم النصيحة الطويلة مملة
اشكر لكم صبركم على قرأة الموضوع مع الامنيات لكم ولسياراتكم بالعمر المديد
والــــحافـــظ اللـــــــــــــــــه .



****************************

تم اخذ وعد من الخبير باعطانا المزيد من الفوايد قريبا ان شالله ( ايه هين )[/ALIGN]

اقول يابو حنفي شكلك شايب..

لان نصايحك هذي حقت شيبان..

وبعدين عندي بعض الملاحظات على نصايحك..

يعني نشيك عليها 21 مرة باليوم !!

خل التشييك مره وحده اذا بغيت تغير الزيت والا تصلح السيارة..


وييييييييييين تبي تخرب البواجي على خلق الله..

احس ان عندك ورشة وتبي تتكسب من ورانا :D

يخي المفروض ماتعشق الخامس الين تتعدى سرعة 80 كحد ادنى
والسيارات الـ 6 سلندر حد ادنى 100


ويفضل انك تجيب معك دافور وعدة قهوة وشاهي وقدوع وتفل بساطك وتنزل تتقهوى بعد :D


ابو حنفي احس ان معك ددسن 92 غمارتين ومغبر وكفرات خط ;)

:D:D

هلا ومرحبا بفتى القصيم
اولا مشكور على االملاحظات ولكن ابي اعيدك لبداية لرد
(هاكم بعض االفوايد والنصايح واللي تم الحصول عليها من شخص مجرب)

وعلى فكره الخبير لازال موجود وشلت ردك وسدحته قدامه وتفضل واجاب وقال :
الملاحظه الاولى معك حق والمقصود فيها قبل ما تركب السياره للمره الاولى يعني وانت رايح للدوام ( مثلا ) شيك يكمن تلقى كفر مبنشر اوقطو الا منه شافك دخل للمروحه ويمديك تصرفه .
وصراحة التشييك 21 مره من المفروض الزام سوواويق الليموزينات فيها الله يكفينا شرهم.
بالنسبه للملاحظه رقم 3
يقول الخبير اللي هو المرجع في الموضوع :
(في السياره ام القير العادي امش بنمرة واحد عدة امتار ويوم توصل سرعة 50 كم لازم تكون موصلها للخامس) .
ان هذي نصيحة النادي الالماني اللي هدفهم اطالة عمر السياره وتوفير الوقود والتقليل من
الا نبعاثات الصادره من الشكمان حيث ان كمية الوقود الى تلهمها السياره مرتبطه يسرعة دواران المحرك وعلشان كذا السرعه التاليه الاعلى يجب الانتقال اليها في اقري فرصه ممكنه,
ويوصي النادي الالماني بان تكون عدد دورات المحرك (2000 ) دوره في الدقيقه بين النمره والنمره .

اما بالنسبه للمداخله على الفقره ( 5)

اقول احمد ربك شكلك ما تعرف الرياض وزحماتها .

ومره اخرى مشكور وترى الموضوع فيه اشياء بين السطور هي اللي تستاهل البحث والتمحيص.

تحياتي.

مشكوووووووور اخوي على النصايح