نادي الهلال السعودي - شبكة الزعيم - الموقع الرسمي - $ صيد الجمــــــــاجـــم ..ثالث مرة $

السلام عليكم ...

كيف حالكم ؟؟

سبق أن كتبت جزئين من نمونة هالموضوع وبنفس الاسم ..

وسبق ان وعدتكم أن أكتب مثل هالموضوع كل نهاية اسبوع
وخاصة حبيبنا سعادة البية المدير اعصار باشا :)

ولكن اعذروني الصيد ما يجي بالساهل يبي له صبر .

عموما نبدأ الصيد اليوم.. وارجو أن يكون صيدا دسما كدسامة شدوق الخرتيت :D:D

$ التماس طبلون $
في أحد الايام الخوالي كنت نائما في أمان الله في بيتي والمكيف يبخ علي من هالبراد
وفجأة فزيت من نومتي ولمست فنيلتي لقيت نفسي راطش (راجع كلمة راطش بالقاموس العامي :D:D)
المهم اني قمت من النوم لقيت فنيلتي رطبة قمت ابفتح اللمبة ابشوف وش السالفة لقيت اللمبة
ماتنفتح تذكرت اني ما اسمع صوت مكيف طقيت فيش المكيف برضه ماينفتح وياشين المشي بالظلما
وانت توك فاز من نومك تحس انك تمشي بين قلبان (جمع قليب ):D
طبعا انا توي صاحي من النوم المخ مابعد اشتغل .

وعلى فكرة قبل ما اكمل فيه معلومة طبية يقولك :
أن الشخص اللي توه صاحي من النوم مايبدأ مخه بالعمل بكامل خلاياهالا بعد 90دقيقة
مع الاخذ بالاعتبار كمية النوم يعني ان كانك نايم زين بسرعة يشتغل المخ وايضا الأكل والشرب
لها دور ... يعني نصيحة لاتفكر الا بعد ساعة ونص بعد ماتصحى من النوم

نرجع لموضوعنا :
بعد ماصحصح مخي شوي واشتغلت نص مكينة الجمجمة اكتشفت ان الكهرب مقطوع .
طبعا الساعة 3 بالليل .

لاحول لله وش الدبره الحين .

حر وباتسر دوام :sad::sad:

المهم دائما المشافيح اللي من أمثالي مايرتزع ويقعد بالبيت إذا كان الكهرب طافي
لازم يطلع ويشوف وش السالفة .

قررت أني أطلع بنص الليل وأشوف وش السالفة ؟؟
يوم اني طلعت لقيت كل الحارة خرمس ( يعني ظلما جدا )
ومادريت الا هذيك السيارة اللي مولعه السفتي تمشي مليون .
شغلت موتري ولحقتها .
وصلت لمكان فيه طبلون كبيررررر وحوله الله وأعلم 20 سيارة تبع طوارئ شركة الكهرباء .
يوم نزلت وقربت لمكان الطبلون شميت ريحة عطبه ( العطبه هي ريحة احتراق البلاستيك )

ويوم قربت شفت اشخاص محترمين ويتكلمون بكل لباقة ولابسين فرهول ( الفرهول هو اللباس
الازرق حق المهني وهو تحريف لكلمة cover all).

يوم سالتهم وش السالفة ؟

رد علي واحد منهم قال:
معك رئيس شركة الكهرباء بالمنطقة الوسطى ونأسف على انقطاع التيار .
لأسباب خارجة عن إرادتنا .

رد علي الثاني وقال :
معك رئيس وحدةالطوارئ رايح يرجع التيار بوقت قياسي والآن احنا طلبنا
طبلون جديد من المانيا والآن هو بالطريق الآن الطيارة مشت من المانيا وتعدت بلجيكا ومرت من
فوق رومانيا والان بالضبط وصلت فوق بنبان :D:D وراح يقذفون بالطبلون من الطائرة بالبرشوت
علشان الوقت .

جاء الثالث وقال : أنا ...
جيت انا وقاطعته قلت له أنا اللي آسف على ابلاشي لكم . والله يقويكم .

قبل ما امشي جاء موظف من الشركة وقالي وش رايك اخاويك لبيتك علشان اتأكد من سلامتك
لأني أخاف عليك تتعثر وانت تمشي بالظلما .

وهو قاعد يكلمني طحت من السرير وقمت من النوم ..:D:D
صراحة كان حلم حلو لأني اتوقع ان الحلم له تكملة .

والظاهر أن تكملته هي الحقيقة والواقع اللي يعيشه صاحب القصة اللي علمني بمعاناته مع شركة
الكهرباء ويقول انه مايمر اسبوع الا الكهرب طافي عنده وإذا حاول يستفسر ودق على الطوارئ
ماحد يرد ..وإذا راح للشركة قالوا : العداد الرئيس محمل يعني عليه ضغط .

فأخينا في الله اكتشف ان انقطاع الكهرب عنده كل شوي وخاصة في الليل
أكتشف انه خيره لانه تعود يقوم يصلي الليل ويجلس الى صلاة الفجر .
(وعسى أن تكرهوا شيء وهو خير لكم )

[HR]

$ المنتدى الفوشي $
الفوشي هو لون وردي على زهري مادري وشلون قايل الظاهر انه هذا هو .
واللون الفوشي أكثر مايعشقه الجنس الناعم لانه يعبر عن الانوثة والنعومة ..

بصراحة ليس هذا موضوعنا الاساسي انما هو مدخل لوجهة نظر خاصة جدا جدا بي .

وجهة نظري بموضوع حساس جدا جدا حتى انه يجيب لك الحساسية من كثر ماهو حساس :D:D

صلب الموضوع اللي راح اتكلم عنه يخص البنات .
على فكرة انا اتكلم بصفة عامة ولا أقصد أحد بعينه او منتدى بعينه .
ممكن أابداالموضوع بطرح هذا التساؤل وهو :

ما رأيك بالتواجد البناتي في المنتديات ؟؟

رأيي ان البنات هن أمهات بالمستقبل مافيه كلام .
و تواجدهن في منتديات النت لايقلل من كرامتهن ولا يقلل من شانهن أبدا

ولكن نوع التواجد في المنتديات وشلون راح يكون ؟

كيف هواسلوبهن في كتابة المواضيع ؟؟

العلاقة بينهن وبين باقي الاعضاء؟؟
طبعا علاقة الردود بالمواضيع المطروحة بالمنتدى
أما اللي مانشوفه..لله يشوفه سبحانه .

البنت إذا كانت تكتب وترد وتضحك وتمزح في ردودها ومواضيعها فأشوف انه مافيها شيء
من حقها تنبسط بس المشكلة من هم اللي تضحك وتمزح معهم ؟؟

قد يكون بعضهم مايخاف الله ويسحبها على وجهها وتكون بينهم علاقة مشبوهه .
وقد يكون واحد يخاف الله ويعتبرها زي اخته الصغيرة ..
بس اخته الصغيرة بالبيت مهوب بالممنتدى .

تواجد البنت في المنتديات يخلق مواضيع ذات طابع بناتي بحت .
مثل مواضيع عن الطبخ والموضة والمكياج ..طبعا المنتدىمليان شباب
مالهم دخل في هالمواضيع وأجزم أن أكثرهم مجرد مايشوف عنوان الموضوع عن شيء يخص
البنات ما يدخل .

البنات لهم اهتمامتهم وهمومهم الخاصة بالضبط مثل الشباب
فأتوقع ان بعض البنات ودهن يكتبن مواضيع خاصة جدا جدا تخص البنات مثل الحمل والولادة
والدورة الشهرية وطبعا هذا من حقهن بس لايكون في منتدى فيه شباب .

فأرى ايضا ان تواجد البنت في منتديات مليئة بالشباب هو خروج عن المألوف شوي .
تبون تقولون ليش ؟؟
أنا اقولكم ليش ...

النت مليئة بمنتديات خاصة بالبنات ولا يسجل فيها الا بيوزر بنت فتخيل أن ياتي شاب ويقول
ابغى اسجل عندكم !!! علشان اكتب مواضيع عن السيارات والتطعيس !!

وش رايكم مهوب خروج عن المألوف ؟؟
إذن طبيعي العكس صحيح

فأعتقد ان البنات يتحاشين التسجيل بالمنتديات الخاصة بهن لانهن لايجدن الاهتمام الكافي
بعكس المنتديات الاخرى فيجدن الاهتمام الكبير والكبير جدا ..

فلو تكتب أي بنت موضوع عادي لوصلت الردود بالعشرات .

فهذه نقطة مهمة كلن يبحث عنها سواء البنات أو الشباب فما بالك بالبنت
اللي تركيبتها ا لفسيولوجية تحثها على ذلك .
(واللي تكسبوه العبوه ) .

ونحن معشر الشباب ما نصدق نشوف بنت كاتبه موضوع على طول رد يمشي مليون لو أي كلام
مجرد تسجيل حضور لانه طبيعتنا تخلينا نميل للجنس الناعم لا اراديا ً.

فأعتقد لو ان معشر البنات حاولن التحول لمنتدياتهن الخاصة لكان أفضل لهن .
لانهن سيجدن الحرية التامة من حيث طرح المواضيع والمناقشة بينهن فهن ادرى ببعض
مثل ما نحن الشباب ادرى ببعض .
أما إذا كانت بنت تناقش شاب فهذي قد تخلق اشكالية لان الاهتمامات بينهم تختلف
فالبنت مثلا تهتم بتسريحة شعر او فستان وكيف تجعله متناسق الالوان .
نحن الشباب نعتبر هذا الشيء سخيف جدا مع انه مهم جدا بالنسبة للبنات .

والعكس صحيح فالبنت ترى الاهتمامات الشبابية انها سخيفة مع انها مهمة بالنسبة لنا .
لذا خلاصة الكلام ان البنات سيتعبن بمحاولة نقاش الشباب باهتمامتهن .

حتى لو وجدنا تقبل من بعض الشباب فتعتبر هذي مجاملة منهم لا اقل ولا اكثر .
ولا يفهم الشباب اني اطعن في ضمائرهم ولكن هذي طبيعة الشباب .

وانا هنا لا المح الى شيء او ان يفهم بعضكم اني متضايق من وجود البنات بيننا .

ولكن هذي وجهة نظري وانا متأكد ان سأجد معارضة شديدة من كلاالجنسين .

ولكن تبقى وجهة نظر .. قابلة للقبول او للرفض .

منول يوم حنا بزارين كان البنات يردون على اي ولد يحاول اقتحامهن وهن يلعبن فيقولون :
((الولد مع البنات بطته شوكة ومات )) .

طيب حنا يامعشر الشباب وش نقول اذا كان بيننا بنات ..أنا ابقول :
( البنت مع العيال طاح حظها ومال )):D:D

تحياتي
ابو خالد :)