مساكم الله بالخيرات يالربع وشلونكم عساكم طيبين انشالله
مابه الا سلامتكم انا مسيرٍ عليكم اليوم ابتقهوى معكم واتوكل على الله والمسايير واجد انشالله
المهم ودي اسولف عليكم اليوم عن بعض اعضاء المنتدى ايام منول في العصر مدري الظهر ماقبل العباسي
كان به عضو اسمه WAW WAW وعضو ثاني اسمه JAJ هذوالا الله يسلمكم اصلهم من انقلترا يعني جنسيتهم الاصلية سيرلانكيين من بريطانيا ومنول اسمها مهوب بريطانيا ترى . اسمها قديما وريطانيا بس غيروا اسمها بعد ظهور اكبر ورطة بالعالم خنتريكا المهم مالنا بالسياسة والطبخ والشوي
الاعضاء هذولا اول ماجو للمنتدى من وريطانيا سابقا كانوا جايين على اساس انهم مهندسين يبي يصلحون المنتدى ويهندزونه وفعلا جبناهم هاك الحين على كفالة ابوسليمان ويوم جو وصلحوا المنتدى وزبطوا الديكورات على احدث طراز وخلصوا جازت لهم الشغلة عندنا قالوا لابو سليمان حنا مايبغى سفر وريتانيا احنا نفر نبغى اجلس هنا على توووووول انتم نفر كويس فيه كبسة فيه قهوة فيه علو تيبة ابو سليمان تعرفون رحيم وقلبه رهيف عطاهم الجنسية وتوهقنا بهم حنا هنا بالمنتدى بس مدري عاد هم به الى هالحين ولا سفرهم ابوسليمان ولا طلبتهم بريطانيا عقب الاحداث الاخيرة .
المهم في يوم من الايام جو يتفلفسون على البارق وحبي تيماوي قبل لايصيرون مشرفين وقبل يترقون ويشوفون انفسهم علينا المهم جاء wawa waw للبارق قال له بالانقليزي طبعا ممكن توديني اتمشى بديرتكم واشوف المعالم الحضارية عندكم هنا بالسعودية واخوك البارق ماصدق خبر قدم معروض على المشرف هاك الحين بمعروض يطلب فيه قرض ثلاثة اريل وسيكل وسيلة مواصلات على شان يمشي الاخوان الانقليزيين ولا بعد طلب زيادة احتساب اليومين حقة التمشية انتداب المهم عطوه الطلبات وراح اخينا بالله البارق وركب waw اس 2 معه وهوووووى على الثمامة يوريه التطعيس على باله موديه هالحين ديزيلاند
وانبسطوا هناك بس البارق جاب العيد احر التمشية لقوه شباب هناك قالو له ممكن تعطينا خويك الانقليزي نطعس به شوي وعطاهم اياه والله ويقومون الشباب على waw اس2 ويحطونه بحوض الجيب الشاص معهم وهات ياتطعيس لين تفككت صواميله يوم خلصوا منه قام waw وشك هاك الشكوى للقنصلية حقتهم ان البارق كان ينوي اختطافه والمساومة عليه وراح فيها البارق سين وجيم ......الخ .
اما jaj الداج هذا له سوالف الله لايوريكم اول ماجاء للسعودية تهاوش مع كفيله ابوسليمان على الراتب وبعض الطلبات كان يقول لابو سليمان انا لي شروط لازم تحققونها لي ولا رجعوني ومن ضمن شروطه كان يبي نقهويه الصبح خمر الله لايبلنا اثره كان داشر منول . قام ابو سليمان وهك عليه خلط له شوي مرندا مع مرقة لحم وحط معهن شوي فكس عشان الريحة تمشي عليه والله لايوريكم ادمن jaj على الفكس بنكهة اللحم والميرندا وارسل برقية لبريطانيا يقول لهم انه اكتشف مشروبات روحية جديدة ومفعولها سريع وانه يبي براءة الاختراع عشان يعطيهم الوصفة يوم شاف ابو سليمان كذا خام يخور ويخربط وهو يغير مهنته من مهندس ديكورات الى مرضع بهايم وينقله من المنتدى ويحطه مع الغنم هناك والى اليوم ماندري عنه بس يقولون انه صار من كبار تجار الماشية بفضل الله ثم بفضل ابوسليمان ؟ والى لقاء جديد مع فضايح اخرى لناس آخرين وسلامتكم .
حبحور مقطع البحور مغري البنات الحور حامي الضبان بالجحور من عانده مقهور