فيه أحد في هذا المجلس ولا هجرتوه

زماااان والله عن أيقونة موضوع جديد

كله منك ياتويتر سحبت البساط من مجلسنا العامر

بعد ان كان الواحد يدخل المنتدى عدة مرات في اليوم الواحد اصبحنا نزوره وعلى طريقة رحم الله من زار وخفف بضع مرات بالسنة الواحدة !!

لكن هذا هو واقع الحياة كل شي تطور وبدلا من ان كنا نبحث عن المعلومة في مواقع الانترنت والمنتديات صارت المعلومة هي من تبحث عنا وتصلنا من دون عناء عن طريق مواقع التواصل الاجتماعي الجديده !

عن نفسي رغم كل هذه القفزات التقنية الهائلة الا اني اجد نفسي اعود للمجلس واشاهد من دون رد واتذكر ايامنا الخوالي خلال 13 سنة هي عمر هذا الكيان الهلالي الكبير

ليس لدي موضوع غير ان الزيارة بحد ذاتها اصبحت موضوعا يستحق النقر على ايقونة اضافة موضوع جديد

وليكون هذا الموضوع اللي بدون موضوع فرصة لتسجيل زيارات لمعرفات غطاها الغبار وأن الاوان لنفضه ولو مؤقتا

اهلن وسهلن بالقرقاص ..
عدت والعودة إحمد ..
المجلس مهما تطور العلم ومهما تعددت مواقع التواصل الاجتماعي
لااحد يحل بموقع المجلس بقلوبنا

إقتباس الرسالة الأصلية كتبت بواسطة FAISAL AL7RBY حي الله ابو جـنى بالفعل تويتر سحب الكثير من زوار المنتدى و كذالك الاعضاء و لو تلاحظ عدد الزوار لـ الشبكة انخفض الى النصف و كثير اعضاء اختفوا من الشبكة و نشطين الان في تويتر ولكن انا لا استطيع الابتعاد عن الشبكة فـ قلبي متعلق بها حد الثـمالة و كذالك تويتر . بـ اختصار تقدر تقول يد بالشبكة و يد في تـويتر

هلا وغلا بفيصل

تويتر يكفيه اصبع واحد اذا كان تلفونك تتش واذا بي بي اصبعين خل الباقي للمجلس العام

إقتباس الرسالة الأصلية كتبت بواسطة محبة الرحمن اهلن وسهلن بالقرقاص .. عدت والعودة إحمد .. المجلس مهما تطور العلم ومهما تعددت مواقع التواصل الاجتماعي لااحد يحل بموقع المجلس بقلوبنا

هلا بمحبة الرحمن

اكيد المجلس مثل دهن العود كلما قدم كلما زاد غلاه

إقتباس الرسالة الأصلية كتبت بواسطة الـصـخـرة يا مرحبا عد ما صب المطر وعداد ما برقه يسابق راعده بك يا بوسعود من بد البشر و إرحِب و حَيَّا بساحة رائده عساك ترتاح وينسَّر النظر و نشوف منك علومن واجده من فضل الله علي هذا اليوم اني ضربت خمس عصافير بحجر واحد اول باشتان / افطرت فووول الصبح بعد غيااااب طويل يمتد الى شهر ونصف ثاني هام / خلصت كم مشوار مهم صار لي فترة وانا ما ادري كيف اخلصها ثالثاً / جاني اتصال انتظره من زماااان والحمدلله على كل نعمه التي لا تحصى رابعاً / شفت سطورك بالمجلس بعد ماشفت موضوع المبدع الظاهرة خامساً / توي رافس متعب بحركة تريبل اتش ثم عطيته حركة جون سينا الزبدة اللي يحييكم جميع ولكم وحشة وهالمجلس مثل لمبات مجلس الرجال تطفى طول الشهر لكن اذا اشتغلت ماتشتغل الا بحضور ضيوف لهم حجم وقيمة.. ولايهون الجميع كان هنا ورحل

هلا وغلا بالغالي ابوصالح

والحمد لله على العودة من الرحلة الاوربية اللي نبي تقرير صغير مانبي مفصل عنها

وودنا انك تعيد سرد تجاربك في الطبخ خصوصا التجارب المحروقة مثل الطبق البحري اللي تحول الى طبق من الفحم الحجري

أهلا بالكاتب المخضرم قرقاص


هم اللحين فالمريخ بس بعد أسبوعين إن شاء الله أنا برجع للمريخ وبنزلهم للآرض وبدعي إن إللي ما يدخل المجلس يخترب عليه تويتر
وإن شاء الله بتشوفهم كلهم دخلوا وزاروا المجلس

الله يجمعكم فالقريب العاجل إن شاء الله ~

شكرا لك ع الطرح الرائع أخوي ~

وعليكم السلام ورحمة الله وبركاتة
وأسعد الله جميع أوقاتكم بكل خير
والله حي الغالي أبوسعود
لا شك ان مواقع التواصل سحبت البساط من جميع المنتديات والبحث عن المعلومات وبالاخص تويتر
ولكن وعندي يقين بذلك راح ترجع الناس للمنتدى لسبب واحد لان الحرية المفتوحه وفهمها عند الكثير جعل التويتر مكان غير مرغوب فيه
وانا عندك كامثال تركته وأن شاءالله للأبد
سياسة مغثة وتعصب أعمى

وبالنسبة للمجلس العام والزمن الجميل له ذكريات لا تنسى ومن المستحيل أن أتركه
يكفيه أنه جمعني بك وبالأخ ماجد مقبل والاخ الحاتمي وجها لوجه وصداقه اخويه
وكذلك بالأخ الصخرة وهذا الرجل لن تفي كلمات الشكر والتقدير في حقه ونفس الكلام مع الاخ هكتار
وأحبه اتواصل معهم هاتفاً مثل مشرفنا السابق ابوسليمان وهلالي الجوف
وكذلك الاخوان تواصلنا معهم في الواتس ابوريمان وسام (سامي)
الفيلسوف والمشاغب وفاينل وفيصل الهلالي وعاشق الزعيم من اليمن واخر العنقود ومروان ويسلم وعبدالعزيز وسام٦ وابوياسر والمشاكس
وكذلك نعتز ونقدر أخواتنا اللي نكن لهن كل التقدير والاحترام ومازال التواصل معهن تويترياً ام كان سابقاً فورماً منتدى تخرج به بهذا الكم الهائل من العلاقات الاخوية لا يمقن بأي حال أن تنساه وتنكر ما فعله بك من جميل

قال الفرزدق ذات يوم في خلوته بالصحراء والقمر باد في الأفق مع نسائم جنوبية :

خليك هنا خليك .. بلاش تسافر !

بتئول يومين وتغيب سنة .. بلاش تسافر !

هذا الفرزدق متأثرا بالاحداث المصرية


تحية طيبة يا ابو جنى .. وفي ذات السياق نهدي التحية للاحبة ابو صالح وابو شادن .. وجميع الاحبة بالمجلس


شخصيا يا ابو جنى لقد افتقدتك وموضوعاتك الطبية التي اسقطت شعري واسناني وأرنفة أنفي ! .. الله يهديك ووصفاتك التي تقصف بنا نحو الأرض بدل ان ترتقي بناء نحو الفضاء .. وبالرغم من ذلك لا زال الأمل يعترينا ونحن ننشد في الآفاق : هل من مزيد ؟!

حيابك يا غالي .. فانت صاحب الدار ونحن ضيوفك

يعطيكم العافية ،،،

ابوسعود لاتستعجل رزقك مع الوصفات لأني ناوي اطبقها عملياً خلال ساعات وانت اول واحد راح يتذوق

وعلى طاري الرحلة الاوروبية

مقابل الهوتيل اللي سكنت فيه كان مطعم بيتزا واصحابه اثنين اخوان مصريين وهم اللي يشتغلون فيه ومعهم واحد ايطالي موظفينه معهم (طلينه) على وزن (سعودة)

وثق تماماً أنني استنفذت جميع خبراتي في ذلك المطعم المسكين ونشبت للمصاريا نشبة شوكة سمك شعور بحلق بزر

طيحت الميانة من اول يوم وصرت ادخل اصلح البيتزا حقتي بنفسي وانثر عليها من هالمشروم والامور الطيبة والمصري المسكين يطالعني بحسرة ولا حول له ولا قوة

وكل شوي ( معليش ياباشا انت استريّح واحنا حنعمل لك اللي انت عاوزوه ) وانا اقول له انزح وراك وش عرفك بالبيتزا خلك بالطعمية

بس اترك عنك.. أثر البيتزا سهلة ومايبي لها شي راس مالها خبزة تميس عليها جبن

حتى اني اتفقت معهم نبتكر بيتزا جديدة مخصوص للسياح السعودين تكون بدل الموزاريلا ندهنها جبن كاسات وبدل المشروم والببروني نحط كبدة

ولا احلى منها.. بيتزا كبدة بالجبن والمطنوخ اللي يبي حاشي يدفع الفرق الله لا يهينه

وتقل جازت له الفكره وتحمس يقول إمتى حنشتغل عالكبدة ؟؟ وانا اقول له اصبر شوي جايك عيد الضحية والذبايح غالية يمقن ترخص بعد العيد

الزبدة اني ضمنت بزنس قامد أوي والفلوس حتنزل عليا زي الرز

إقتباس الرسالة الأصلية كتبت بواسطة هلالي من ارض اليمن قال الفرزدق ذات يوم في خلوته بالصحراء والقمر باد في الأفق مع نسائم جنوبية : خليك هنا خليك .. بلاش تسافر ! بتئول يومين وتغيب سنة .. بلاش تسافر ! هذا الفرزدق متأثرا بالاحداث المصرية

يا رجال الفرزدق حقك مضروب وما لحق على الرومنسيات الصخراوية الحالمة

مسائك عسل يا طارق

إقتباس الرسالة الأصلية كتبت بواسطة هلالي من ارض اليمن تحية طيبة يا ابو جنى .. وفي ذات السياق نهدي التحية للاحبة ابو صالح وابو شادن .. وجميع الاحبة بالمجلس ،،،

كل عام وأنت ومن تحب أخي الغالي والعزيز طارق بخير
وأسعد الله جميع أوقاتك بكل خير
والله يحفظك ويسعدك يالغالي

يالله انك تحييهم وتخليهم

عاش من شافكم وعاشت ايامكم

قرصان ماش ياخي شكلك شيبت وضاعت علومك

والشيب غطى على سواد شعرك

والصخرة بعد وين ايامك وين الفول ؟

يذكر انك مميز حيث انك تاكل فول جرة وهذا قليل اشوفه فاللي حولي ههههههههـ

القلابة هو السيد

ابو شادن .. يالله حيه وخله

هالتويتر شر منزل خخخخخخخخـ مع انه عندي مشكلة في التأقلم على كل شي جديد
لكن يبدولي اني مشيت معه ! وهو مشى معي ..

لكن ياخي يبقى للمجلس رونقه ويبقى هو الأول والأخير وهو تاج الراس ..

خلن اشبهها لك بمثال ..

شايب اعرس على عجوزه .. طاف بالمره الجديدة ويحس انه امتلك الدنيا ..
بس تبقى عجوزه بقلبه هي الأول والتالي وهي الركن الرئيسي ..

وقال الأخطل ردا على فرزدق طارق

خليك بمطرحك هون وشوله تسافر
خليك انا مشتاء إلك وشوله تسافر
خليك انا بستناك وشوله تسافر

وصح لسانه

نحن هنا يا صديقي ..

مانسينا المجلس يوماً

وله نحمل الاشواق دوماً

حتى إن هرمنا ..

فسنبقى نذكر المجلس

نحن منه هو منا

يا صديقي ..

ها هنا ..

كان سطرنا الاول

عشقنا الاول

وهنا كان لقانا ..

كيف ننسى

مجلساً كان هوانا ..

كيف ننسى

من عرفناهم هنا

وصحبناهم هنا

كيف ننسى ..


أخوة .. كانو اهلُ لنا ..





سلامي للجميع دائماً ,

حي الله قرقاص

أحد شيبان المجلس

الناس بعد الثورة الالكترونية
عطوا المنتديات ركبة

ماباقي من جيل الطيبيبن اللي يدخل المنتديات
غيرك انت والإخوان الكرام اللي هنا

فيه مجموعة كبيرة من الإخوان أصحاب الاقلام الرنانة
إفتقدناهم صراحة بعد أن كان المجلس ساخنآ في نقاشاتهم

بقي القليل لكن فيهم الخير والبركة ان شاء الله

وجاءت أقلام مميزة جديدة تستحق الثناء