أنا بصراحة كنت نصراوي (ثاني إبتدائي) ثم شبابي (ثاني إبتدائي) ثم هلالي (رابع إبتدائي) أيام الطفولة << بينطق هههههه

بحكم أن أخوي اللي أصغر مني بسنة شجع الهلال قبلي وكان الوضع منافسة وشوية عناد

المهم، لعب الهلال والنصر على نهائي ما أتذكره ووقتها كنت أنا وسوداني كان يشتغل عندنا نشجع النصر والوالد وأخوي يشجعون الهلال، وفاز الهلال وخنقتني العبرة ما أدري طقيت الصيحة وقتها هههههههههههه وبعدها كرهت النصر وشجعت الشباب لمدة سنتين تقريباً أيام المهلل وفؤاد أنور لكن بصراحة ما كان في فريق مثل الزعيم يملى العين

بعدها بسنتين رفعت الراية البيضاء لأخوي وشجعت الزعيم وأنا الآن على مشارف الثلاثينات وحب الزعيم يكبر معي

حبي للزعيم بالفطره

وكنت لاعب بمدرسة الهلال

أيام سعد مبارك التخيفي العشيوي البرقان عيال المدوح ناصر العييد

كنت جالسه عادي ماتابع شي وكان اهلي يتابعو مباراة الهلال والاتحاد الاتحاد كان متقدم بهدفين واخر الدقايق تعادل الهلال مدري فاز بثلاثه ومن يومها وانا اشجع الهلال

هههه انا أمي وخوالي نصراويين ومتعصبين طبعاً وقتها ما اعرف غير الهلال والنصر << كنت صغيرة طبعاً
قمت سألت أبوي قلت له وش تشجع الهلال ولا النصر ؟؟ قال الهلال قلت ليه قال عشان فيه سامي الجابر ..
عاد انا قلت بس أكيد هاللاعب مكسر الدنيا ،، ومن بعدها شجعت الهلال وعشقت ألوانه $:

كنا انا واحد اصدقائي من محبين لنادي الاتفاق الكلام هذا عام 1392ه تقريبا ماني فاكر التاريخ كنا راجعين من المدرسه وكنا في ذلك الوقت من مشجعي نادي الاتفاق المهم خسر الاتفاق في ذلك
الوقت فقلت لصديقي ايش رايك نغير ونشجع الهلال فوافق على الفور ومن يومها الى وقتنا ذا وانا هلالي وصديقي مدري صار لي اكثر من 10سنوات ماشفته بس متاكد انه مازال هلالي
الهلال بالنسبه لنا الدم الذي يجري بعروقنا

في البداية يعطيك العافية ع فكرة الموضوع

بالنسبة لي عشقي للهلال متوارث من الوالد الله يحفظه ويطول في عمره فهو هلالي متعصب

والعائلة جميعها هلالية

وبصراحة يزيدني فخراً انتمائي لهذا الكيان الراقي والعريق

انا عشان ابوي هلالي كنت ماعرف بالهلال الا اسمه وبعض اللاعبين وانا صغير
وخوالي كلهم نصراووين ودايم ازعااااج كنت اشوف المباريات على استحياء ولا تشدني كثير
بس بكاس العالم 2006 تابعت الشوط الثاني تقريباً وكنت متحمس ويوم دخل سمسم قال ابوي سمسم جا وجاي معه القول ودخل وجاب القول كانت الفرحه كبيره واثاره مابعدها اثاره وفي دقايق كل شي يتحول ويجي التعديل من تونس حسيت كيف الحماس وقت المباريات وصرت اتابع بشغف ووش احلى من بدايات الهوى كان اولها ساااامي

قصتي اطول واغرب ..

الوالد طبعا يشجع الهلال .. وانا ابنه الاكبر .. ادري انه يشجع بس مايهمني .. بالعكس كنت اكره الكوررة لانها طفش على واحد عمره 6 سنوات وقتها ..

دخلت المدرسة واغلب المدرسة هلالية .. شفت النصراوية .. واسمع نقاشاتهم واحس فيه حماااااااااااااااس هواش وكذا .. قلت بشوف وش هالكورة هذي .. وتابعت مباريات للهلال بس .. وشفته مع النصر .. قلت في نفسي : من الغبي اللي يشجع النصر ..

جبت الهلال وحب الكورة لاهلي .. فكلهم صاروا هلاليين ..

تابعت الهلال من ذاك الوقت بشكل متقطع جدًا بل ضعيف .. لكن اسمع اخباره بالمدرسة .. وافرح اذا فاز ..

بعدها لما وصلت للثانوي صرت اتابع بجنون .. كل مبارياته .. وكذلك لما كنت بالجامعة .. وبعد ماتخرجت حتى وصلت لامريكا .. الوقت هنا مختلف تماما عن السعودية فمااقدر اتابع مباريات الهلال ..

كل اللي اسويه اني ادخل هنا في هذا المنتدى يوميًا .. واتابع الملخصات ..

الى الان ماادري عن مستوى الهلال في الوداد بس اعرف النتيجة ..

متابعتي فقط ملخصات واهداف .. هذا كل مااستطيع فعله ..

اللي خلاني اشجع الهلال خالي اذا جا يلعب بلاي ستيشن كورة يجلس يغني
هلالي هلالي حبيبي الغالي هلالي هلالي وعجبتني وجلست اغني معه ههههههههههههههههههه
كان عمري بوقتها 6 سنين يمكن

واللي خلاني اشوف مباريات الهلال كنت احوس بالمنتديات وشوي قلت خلني ادخل قسم الرياضة ويوم دخلته الا اشوف هلاليين واتحاديين يتهاوشون قبل مباراتنا الاسيويه معهم الله لايعيدها
ودخلت فزعه مع الهلاليين
وبعدها شفت مباراة الهلال والاتحاد دور ال16 باسيا وانهزمنا طبعا
وبعدها صرت احب اشوف مباريات الهلال

وطبعا ابوي نصراوي واذا خسر النصر يعصب ويفصل التلفزيون ههههههههههههههه
وانا اروح اشوف المباراه باي غرفه الا معه

كنت انا وصاحبي عام 1993 نلعب كوره في الحاره .. قالي شرايك كل واحد فينا يشجع فريق .. ونلعب كل يوم مثل التلفزوين

قلتله اوك .. انا النصر وانت الهلال ... قال مو مشكله ...


المهم دخلت البيت وتابعت مباراه للهلال ذاك اليوم ولا اراديا حبيت ذاك الشعار .. وجيت لصاحبي اليوم الثاني قلتله انت اخذ النصر وانا الهلال


والى اليوم هذا وانا وهو في هواش عن الهلال والنصر .. انا متعصب هلالي وهو متعصب نصراوي .. وبدايتها تعزيمه في حاره


وأحيان يقول ياليتني مابادلت معك وظليت انا الهلالي وانت النصراوي عشان يشيب شعرك مثل ماشاب شعري ههههههه


وسلامتكم

اخوي والكل يعرف ان الصغير دووم يقلد اخوه الكبير بكل شي وكنت اشوفه دووم يتابع مبارايات الهلال وتابع معه ومدري وش السالفه لاني كنت ورع لين حبيت الهلال وغير كذا الهلال هو اكثر فريق يظهر لنا مواهب زمان

السبب ؟؟؟؟؟؟


الثنيآآآآآآآآآآآآآن




.