من بعد ما اعتزل حارس القرن ونجم النجوم الحارس الاول في قارة اسيا الاخطبوط محمد الدعيع والمرمى الهلالي يعاني ويستقبل اهداف سهله مع ان العتيبي كان له جهد طيب في اكثر المباريات وكان نوعا ما يقوم بالواجب ولكن الفرق بين الدعيع والعتيبي كبير جدا .

المرمى الازرق تعود على عمالقه من ايام خالد الدايل وبعده عبدالله ومحمد الدعيع لان الهلال يختلف عن كل الفرق،، الهلال نادي نجوم الحارس يايكون بنفس مستوى البقيه والا ماراح ينجح .

حارس الهلال الحالي عبدالله السديري مع كامل احترامنا له ماهو الحارس اللي ممكن يحمي مرمى فريق بحجم الهلال اخطاء كثيره ومتردد في الخروج للكور العرضيه وتحس من ملامح وجهه الخوف والشد العصبي وهذي الصفه ماتصلح نهائيا في الحارس يعني عكس العملاق الدعيع اللي كان يميزه الهدوء والذكاء وردة الفعل السريعه وما انسى حارس الاتحاد السابق مبروك زايد كان قريب من صفات الدعيع.
يعني بصراحه الطاقم الهلالي في حراسة المرمى مع حبنا واحترامنا لهم السديري والسبيعي والشمري مستوياتهم ماتؤهلهم للوقوف في الباب الازرق والله العظيم الهلال محتاج افضل واحسن محتاج من يزرع الطمئنينه لبقية افراد الفريق ولنا كجمهور ممكن الثلاثي ينفعون كحراس احتياطيين لكن اساسيين وللهلال تحديدا هذي صعبه.

الهلال محتاج لحارس يقفل الباب ويخوف المهاجمين للفريق الخصم واعتقد ان الحارس اللي يمكن يقوم بهذي المهمه مافي غيره ثنيان التعاون لان الحارس هذا من خلال كلام المحللين اللي مسوين احصائيات لافضل حارس سعودي اكدوا ان فهد افضل حارس تصدى لاهداف وصد ركلات ترجيح مع ان فريقه ماهو ذاك الفريق ومن غير احصائيات الحكام الثنيان نجم يشهد بهذا كل المدربين والنقاد والجماهير ..
صراحه استغرب انسحاب الهلال من مفاوضته واستكثار عشره ملايين عليه مع انا عارفين ان مركز الحراسه اهم مركز وحساس بل هو نصف الفريق .
اتمنى التعاقد معه لان المباريات التجريبيه اثبتت ان استقبال الهلال للاهداف مازال مستمر من الموسم الماضي بسبب ضعف الحارس .
لازم تتحرك الاداره والمدرب لاحظار الثنيان تحديا مهما كان المبلغ لانه الحارس الوحيد اللي ممكن يرجع لنا شيء من محمد الدعيع ويريحنا ويريح زملاءه في الملعب.
كما اتمنى من ادراة الهلال استشارة الحارس العملاق محمد الدعيع في مستوى الحراسه الهلاليه مع اني شخصيا سمعت رأيه امس بعد مباراتنا مع الشباب ولكن علشان يقتنعون من ناس متخصصين لان ارائنا كجمهور يعتقد انها لا قيمة لها .
الوقت يسمح لتعديل غلطة عدم التعاقد مع حارس متمكن يعني باقي شهر على بداية الموسم ممكن نجيب هذا الحارس ويصير الفريق متكامل ...وفق الله الهلال فوق كل ارض وتحت كل سماء.