أهلين وسهلين ببيتي الثاني الزعيم السعودي اللي دايم مبيض الوييه
أبارك لسمو الامير الشيخ عبدالرحمن بن مساعد والادارة والجماهير الهلالية الملكية بتعاقدهم مع المحترف السنغالي قادر مانغان ، واتوقع راح يسوي اضافة للفريق
بس بصراحة اخاااف يصير على اللاعب اليديد مانغن مثل ماصار مع رادوي ومع ايمانا من حرب اعلامية ( اعتذر واسف وايد للاخوة السعوديين ) على هالوصف بس للاسف هذا اللي قاعد اتشوفه ، وكنت بصراحة متردد انزل الموضوع خاطر كرمان مشاعركم ، لكن بالصدفة قبل شوي دخلت بعض المواقع وتويتات بعض الصحفيين اللي شادين حيلهم بالتحريض على اللاعب

عشان جذي من حبي وعشقي الثاني للهلال ومتابعتي للمشاكل اللي دايم يعيشها كل سنة وهي سنتهم ـ اكتب هالرسالة هالتحذيرية ـ والله امانة اقولها لكم من غير مجاملة انها من اسباب ميولي للهلال يمكن المشاكل والظلم الواضح على الهلال ـ عندنا كقطريين نتشوفه بعيونا وااضح ـ وانا دايم اقولها ولازلت اقولها ( لو عندنا فريق بقطر مثل الهلال اتوقع راح نسوي له تمثال بمدخل الدوحة
وترى على فكرة حتى اللي يميللون للنصر والاتحااد عندنا بقطر يعرفون هاي الشي
هالفريق وهالادارة اللي ينشد بها الظهر وجهودها حرام والله جذي تضيع باسباب مالها ذنب فيها .. طلبتكم ياادارة النادي انكم تديرون بالكم وتاخذون حذركم من هاي الشي
اتمنى لو تنبهون اللاعب عدل وتحطون بباله ان غلطته راح تصير عشر غلطات
والله الهلال وجمهوره فارض احترامه على الجميع ، واحبكم من كل قلبي ويارب يحقق الهلال الاسيويه السابعه مثل ماحققها للمره الثانيه تؤمه وروحه الزعيم السداوي العام الماضي وقلبي واياكم
حاجة بنفسي من زمان ودي اقولها للمشرفين عل الموقع ياريت لو يكون بين منتدى الهلال والسد تؤمة وتواصل وتعاون بينهم ويشرفنا والله الشي هاذا ومشكورين ويعطيكم العافية