رسالة للإدارة الهلالية بشأن اللاعب سلطان البيشي - نادي الهلال السعودي - شبكة الزعيم

الزعيمي ماجد التميمي · #1 18/03/2012, 10:58 AM

السلام عليكم ، الحقيقة ماكان ودي تناول موضوع الكابتن ولاعبنا المميز سلطان البيشي ، ولكن نظرا من تواتر الأخبار في هالمنتدى والإدارة قاعدة تتفرج ومافيه أي تصريح أو على أقل تقدير اطمئنان للجمهور الهلالي ، فأنا أقول وبكل أسف الشخص اللي أذاع خبر موعد زواج اللاعب سلطان البيشي : إذا كان من الإدارة الهلالية فهذه أم المصائب ، وإن كان القصد من إذاعة هذا الخبر لرؤية ماعند الجمهور الهلالي وردود أفعاله ، أو التعرف على ثقافة جمهوره في هالمنتدى وطريقة تعامله في مثل هالأحداث فأقول الله يرحم الحال ، ويعظم مصيبتكم في هالتعاطي في مثل هالأمور ، أما إذا كان ناشر هذا الخبر كأي واحد من الجمهور فيفترض من الإدارة التحرك أو على أقل تقدير توضيح الأمر ، أما أن يترك الأمر بالشكل هذا سبهللا !!!
فأولاً : مثل ماتفضل بعض الإخوة جدولة الإتحاد الآسيوي واضحة من البداية لها فترة طويلة .. فعلى هالأساس اللي أعرفه إن اللاعب يفترض وهذا هو الشي الطبيعي : إنه أي مستجد يحصل في حياته من ظروف اجتماعية أو أسرية فبالتأكيد هناك تواصل بينه وبين إدارة ناديه ، فبالتالي قطعا وبكل تأكيد إن اللاعب لما حدد موعد زواجه إنه ماوجد الوقت المناسب في أي صالة من صالات الزواج ، وإلا فليس من المعقول أن يتعمد اللاعب في تحديد زواجه متزامنا في قبيل أو وقت المباراة !
فعلى هذا أيضا من المؤكد إن اللاعب أخبر الإدارة بشح الصالات للتوقيت المناسب لزواجه ، وأنه مافيه خيار أمامه إلا هذا التوقيت ......... اوكي انتم معي ....
طااااايب ... الآن أنا سأفترض إن الموضوع بهذا الشكل الهزيل ... السؤااااال المهم جدا .. كالآتي : ( ماهو موقف الإدارة بتعاملها في مثل هذه الظروف ) ؟؟؟؟
أليس من الإحترافية المهنية والتي يدخل فيها ضمنا شي اسمه العلاقات الإنسانية
إنها تشوف لها حل في هالمشكلة من البداية ؟؟؟ يعني بالله عليكم : هل الإدارة الهلالية بتتورط في إنها تساهم بجزء مالي ( لو افترضنا ) بتكاليف الصالة لو افترضنا إنها صالة من نوع خمس نجوم تحسب وتسجل هذه الخطوة للإدارة وتبقى في ذاكرة اللاعب لن ينساها لأنه سيرى إدارة محترفة وتقف مع لعيبتها في السراء والضراء ، أم المسألة فقط ابتسامات وتبادل ورود ومسجات .... المهم أنها ماتقف مكتوفة الأيدي وتشوف لها حل مع اللاعب لإنهاء هالمشكلة هاذي ، أوكي أنا أتفهم الوضع إن اللاعب يجب إنه يكون مبسوط ومرتاح نفسيا لدخوله عالم أخر من العش الزوجية لكن ياجماعة يالخير هذا دور الإدارة هي من تهيئ له كل هالأجواء الصحية هاذي ، ومن حق اللاعب يرتاح لكن ياأخي راحته ماتتعارض مع مصلحة الفريق ،، إلا إذا كان اللاعب مناسب له نصراويين ومتعمدين يحطون توقيت زواجهم بالشكل هذا فهذا شي ثاني !!! فشر البلية مايضحك .. فما أدري وش عاد بقى ؟ ماعاد بقى إلا نقول كذا !!!! لأنه يهمنا بصراحة مشاركة هذا اللاعب مهمة جدا جدا في خارطة الفريق ، خصوصا بعد إصابة نامي اللي الحمدلله على كل حال بس ماادري هو سوء في الكادر الطبي بعد ولا ماأدري وش السالفة بالضبط ،عااد موضوع الكادر الطبي محتاج موضوع لوحده مستقل ، ولا أجل لاعب مثل عبدالعزيز الدوسري استكمل نصف مدة علاج الرباط الصليبي ؟؟ ايش هذا ؟؟؟
عشان ماأطلع عن الموضوع .. وارجع لموضوعي الأساسي .. يفترض مسبقا إن الإدارة تقدم موعد الزواج والآن ماعاد يمدي ، فالخيار الوحيد هو تأجيل الزواج وتتحمل كامل التكاليف وهذا ليس كثيرا على الهلال هذا أولا وثانيا : هي من وضعت نفسها في هذا الوضع المحرج وكان بإمكانها إن تتحاشى هذا الظرف ،،،،،
اللي أقدر أقوله وهو مايهمني في هالموضوع إنه ضياع النقطة الواحدة في الآسيوية تكلف الشي الكثير ولها قيمتها ، ونعرف كيف الموسم الماضي طلعنا من دوري الستة عشر بسبب هزيمتنا امام سبهان بالرياض مع العلم إننا تعادلنا في النقاط ...
الأهم الحقيقة وهو الذي يعنيني من طرح هذا الموضوع والله يعلم ماأقول : هي مصلحة الهلال في الآسيوية ،فعاد وش بقى لنا الموسم هذا ، جميع بطولات النفس الطويل ضاعت علينا ابتداء من الفريق الأول للفئات السنية كلها طارت علينا ، فداخلين على الله ثم عليك يابو فيصل شف حل مع الفوضى هالحاصلة هاذي ، بكل أمانة صرنا ماندري من نصدق ، هذا قاعد يرمي له خبر ، والثاني ينفي ، والثالث قاعد لي يختبر عباد الله في المنتدى ... !!! إيش هذا ؟
ياأخي فريق اليوفي الإيطالي هبط للدرجة الأولى ولم يتأثر ومباشرة صعد والآن ينافس ، ونادي لخويا القطري عمره التاسيسي له ثلاث سنوات ، تأسس عام 2009م ، تخيلوا من الريفي ..
وصعد مباشرة للثانية وبعدها صعد مباشرة للأولى واللي تعتبر دوري نجوم قطر وأخذ بطولة الدوري والآن مرشح قوي لأخذ بطولة الدوري القطري وبفارق نقطي 6 نقاط عن السد ، وهذه الأمور كلها ماجت من فراغ ، ياناس ياعالم هذي كلها جت من شي اسمه ( احترافية مهنية ) والإحترافية المهنية ماهي محصورة في شي واحد ، بل هي في جميع المجالات الفنية والاستثمارية والقانونية ، وحتى النفسية والعلاقات الإنسانية
اعتذر إن كان طرحي للموضوع فيه حدة ، لكن من هاللي كل شوي طالع لنا شي جديد
كل ماننتهي من مشكلة إلا ونفجع بمشكلة على ماقال تقول الله يذكر مشكلتنا الأولى بالخير .. تحياتي للجميع .