في عز الاخفاق لازال للأستثمار الأولوية شكراً ابو فيصل موسم خرافي بكل ماتعنية الكلمة - نادي الهلال السعودي - شبكة الزعيم

الذئب الهلالي999 · #1 14/03/2012, 11:43 AM

السلام عليكم

بعد تنازل الهلال عن لقب الدوري
خاصة بعد التصريح الشهير الموسم الخرافي

خرج لنا الامير عبدالرحمن ليس لموأساة الجماهير
او الترتيب من الأن ووضع خطة واضحه للجماهير الهلالية عن اهداف الادارة المواسم القادمة بما أن الامير مصر على التمديد 4 سنوات

رئيس الهلال يطرح فكرة استثمارية بإنشاء متحف في مقر النادي يتم وضع فيه الكؤوس ويتاح للجماهير التصوير معها برسوم محددة
_______________

هذا اللي جيدين فيه للأسف تجميع دراهم
اذا الرئيس ما يبي يغير سياسته ويلتفت للصفقات المحليه القويه ويقوي الفريق ويجيب لنا لاعبين اجانب زي الناس
يعطي الفرصه لغيره خلاص (( الهلال غني برجالاته )) يكفي اربع سنوات مهزله في اسيا ابرزها ثلاثة الاتحاد

يا ابن مساعد ما قصرت ولكن اعطي غيرك فرصه
اللي ما جاب اسيا في اربع سنوات ولا استفاد من اخطاءه هل من المعقول تنتظرون يجيبها لكم بعد كل هالسنوات؟!!!

وعشان تعرفون انه هالاداره اداره ملايين واستثمار وفلوس :
لما يطلب القادسيه في الشهراني 15 مليون على دفعتين ويرفض الرئيس بحجة ان اللاعب صغير وما يستاهل هالمبلغ
ويقول انه اذا عطينا الشهراني 15 مليون كم راح نعطي للعابد والفريدي !!!!!
وبعدها يروح يجيب لاعب اجنبي فاشل عمره 25 بمبلغ يزيد عن 45 مليون !!!!!!!!
وش هالتناقض؟؟؟؟؟؟؟؟؟؟؟؟؟

السر : لانه الدعوه بالنادي صايره كلها استثمار
اللاعب المحلي اذا اشتريت عقده ب 15 ولا 20 مليون راح يكون هدفك فقط تقوية الفريق فنيا بس ما راح يجيب لك ملايين
عشان كذا تشوفون انه مانجيب الا ابو ريالين من طقة الخالدي ووليد الجيزاني وكعبي !! عن قولة انه ترى سوينا صفقات محليه

لكن لما جد الجد وجات سيرة صفقه مثل صفقة حسن معاذ شفنا سامي شلون طلع بتويتر وفضح حسن معاذ قدام ادارة ناديه !!!!
هذا مو شي غريب؟!!!!! يعني سامي مثلا ما يقدر يسكت الى ما ينتهي عقد اللاعب او يدخل ال6 شهور ويتفاوضون معه؟؟
ولكن طلعته قدام الكل وفضحه للاعب امام الجميع اثبات واضح انه الاداره ما عندها نيه تقوي الفريق وتدقع ملايين بلاعب محلي

طبعاً الاداره لها محاسنها الكثيره ولكن اهم شي بالرئيس الناجح دعمه الفريق بلاعبين محليين اقوياء
وهذا للاسف اللي ما شفناه ولا راح نشوفه برئاسة الامير عبدالرحمن
والقهر يطلع يستفز الجمهور يقول ((( احد عنده نامي والزوري ويدور على اظهره !!!!! ))))

وطبعا فيه اشياء ثانيه كثيره ما تكلمت عنها في رئاسة الامير عبدالرحمن
ولعل ابرزها انه لاعبينا صاروا ملطشه للاعلام وروؤساء الانديه وهو جالس يتفرج
ياسر انحاش للامارات و رادوي قال ما ابي اجدد من اللي شافه من بلاوي
وشاف برود الاداره وعدم دفاعها عن اللاعبين ومثاليتها الزايده

بينما لو شفنا لاعب مثل حسين عبدالغني وما يفعله ومع هذا ابن امه يتكلم عليه
والسبب واضح لانه وراه ادارة نادي تقف خلفه وتدعمه ورئيسهم وراه اعلام يقف مع لاعبينه حتى لو كان غلطان
اما للاسف الامير عبدالرحمن نصف لاعبينا انحاشوا ونزلت مستوياتهم وهو يتفرج عليهم !!!

هذا رد يمكن ما يعجب الكثير لكن لو قريته زين راح تعرف انه واقع

اتمنى من كل قلبي رئيس جديد قادم للهلال
نبي رئيس يملك صفات محمد بن فيصل اللي يدوس للهلال على طرف يشلعه من مكانه ويطيره

1ابو ابراهيم · #2 14/03/2012, 11:50 AM

شكرا لك
بصراحة الزعيم في فترة تغيير المدرب و جلب مدرب الاولمبي قدم مستويات مميزة
و بعد حظور المدرب الجديد قل المستوى فما معنى ذلك
للاسف الادارة اخطات كثيرا واتمنى تدارك هذه الاخطاء في قادم الايام
و نشكر الادارة على ما بذلته و هي اجتهدت لكن

عبدالعزيز abdulaziz · #3 14/03/2012, 11:50 AM

انت الحين هدمت 6 بطولات في الإدارة وإذا ضاع الدوري وش يقول برشلونه اجل عندنا في الكورة السعودية غيرنا ما حقق بطولات 15 و20 سنه احمدوا ربكم انه كل سنه نحقق بطولتين او اكثر .

مشكلني حبك يانواف · #4 14/03/2012, 12:01 PM

اخي الكريم
الامير في فتره رئاسته حقق ست بطولات فهو رئيس ناجح فليس لك الحق في النقد عن النجاحات

آسيا استعد لها ابن مساعد وكانت في ايدينا لولا الحظ الذي اخرجنا مع الداهيه جيريتس والاستعداد لها نره اخرى يتطلب الكثير وليس العيب في الفشل من المحاوله العيب في عدم المحاوله خوفا من الفشل
مشكله جمهور الهلال يبون كل اللاعبين المميزين في الانديه الاخرى يتواجدون في ناديهم وهذا امر غير معقول
فقدنا الدوري لعدم الاستثرار الفني وقد سبقنا برشلونه العظيم وفقد دوري اسبانيا وحققنا ولي العهد وامامنا آسيا والملك

لا ينقصنا الآن سوا الاستقرار الفني فقط

وابن مساعد ماقصر بخمس بطولات وغيرنا لافازو بمباراه اغمى عليهم

ALzae9eem · #5 14/03/2012, 01:04 PM

مع احترامي لرأيك

لكن الاستثمار من اهم مقومات النجاح في النادي

لمتى سيبقى اعضاء الشرف داعمين للفريق

خصوصا مع دخول الخصخصه

الادارة اعادة بناء المعسكر بشكل جيد جدا و متميز

اعادة زراعة الارضية و تغير كبير في ملعب النادي

و الان المتحف اللي راح يقدم دعم كبير للميزانية

و الفريق من بعد رحيل جيرتس لم يحصل استقرار فني

الا في بطولة ولي العهد هذي العام

مع ذالك حقق بطولات يحلمون الاندية اللسعودية يحققونها في 4 سنوات

جاء كالدرون و فشل ثم دول و فشل و الحين نعطي الفرصة للمدرب التشيكي

و لابد على الادراة تغير الكوري في نهاية الموسم

و ولي اعطائه فرصة لنهاية الموسم مع انه لم يقدم ما يشفع له

و اعطاء العربي اللي لم يجدد استقرار جيد مع الفريق

من منتخب بلاده الا الهلال هذا الموسم

انا اشكر الامير عبدالحمن بن مساعد و ادارته على ما قدمه

لكن لابد من تجديد الدماء في الادارة مع رئيس الادراة

و اخيرا احب اشكره على معدل اعمار اللاعبين في الفريق الان

شكلين مــابحكي · #6 14/03/2012, 01:35 PM

حلوا التغير

وابن مساعد ماقصر مجهود يشكر عليه

لكن الاسيويه .. ماله حظ فيها

علشان كذا اتمنى هالسنة الاخيره لـ ابن مساعد اذا فشل بتحقيق الاسيويه

واضم صوتي لك .. في فيصل بن محمد

الرجال كفو .. لقيادة الزعيم

مبين انه عنده شيء يقدمه

شكرررا صاحب الموضوع

سعوديه والهلال ناديه · #7 14/03/2012, 01:51 PM

جماهير غريبه وعاطفيه
ياخي النجاح لاتحكم عليه من خلال عدم تحقيق الاسيويه
الاسيويه بطوله زيها زي غيرها واذا الله رادها بناخذها
لو بالناشئين
المهم انه يكون عندنا فريق له ملعب ومعسكر ومتحف ويكون استثماري وبنفس الوقت قوي
ولايحتاج الاحد ليعطف عليه او يتبرع له بكم مليون فهذا هو الاحتراف والخصخصه الحقيقيه
ولاتنسى انه الحين بتجي الخصخصه ولابد تعود نفسك ممكن تشوف الهلال ملك للبلوي
الخصخصه تقول كذا يعني لابد تحمد الله وترضى باللي موجود
وبالامير عبدالرحمن على الاقل قلبه على النادي
والدليل مرفقات النادي صارت تشرف مو مثل السابقين فقط يحقق بطولات وانجاز شخصي
والدليل كم رئيس هلالي ترك الهلال وهو ناحج والسبب عشان يحتفظ بانجازه

HiLaLy 4 EvA · #8 14/03/2012, 01:56 PM

ابوفيصل حقق ست بطولات مع الهلال
بعدين اربع سنوات ماحققق اسيا !!
ليه الهلال صار مايحقق اسيويه الا لما صار الامير عبدالرحمن رئيس ؟
اما بخصوص تعاقدات محليه
خلونا نقول ابوفيصل جاب
الشهراني ويحيى الشهري
بتقولون الاداره تدمر مواهب مثل سالم وسلطان !!
ماقول غير الله يعين ابوفيصل رجال يعمل ويجتهد ويحقق بطولات !!ويلاقي رده فعل مثل كذى

عنود الزين · #9 14/03/2012, 02:38 PM

قمت الناقض الحين الامير عبد الرحمن يحتاج تغيير جيبلي رئيس مر على الهلال يصرف من جييبه يخي ما تلقى بعدين من أولويات ان النادي يصير اسستثماري لاننا بندخل على الخصخصه اجل نصير مثل غيرنا نشحذ من اعضاء الشرف هذا واحد ثانيا الهلال مو محتاج تعاقدات الاعبين الي عندنا افضل من غييرهم بمليوووووووون مره واجانبنا صحيح لك علييهم لكن تقارنهم باجانب غيرنا الي منتهين موسم موسمين وخلاص تروح علييهم

دلفينه زرقاء · #10 14/03/2012, 02:43 PM

هممم شكراً على الموضوع الرائع..تقبلوا تحياتي

مدالله الرويلي · #11 14/03/2012, 02:45 PM

الامير عبدالرحمن قدم الكثير والكثير لزعيم
ولا يوجد رئيس راح يقدم مثلة
نحن مع الامير عبدالرحمن

الزعيم روح شعلان · #12 14/03/2012, 02:53 PM

الحين لا فكر بالاستثمار صار ماهم مصلحة النادي تفكير غريب صراحه ترى على فكره

مالنا شهر من حققنا بطوله وهي بطولة ولي العهد والا هذي بنظرك ماهي بطوله بعدين

اسيا لو هي شغلك الشغال الي حققوها وش صار ترتيبهم الحين مشكلة الجماهير

الي تبي بس تقهر الفرق الثانيه ترى حققنا الاسويه ترى بنروح العالميه

وينسى مصلحة فريقه في السنين الجايه لبد يكون في عمل

والا انت تبي بطوله وتجلس عشرين سنه يجيك سكر وضغط ؟ بعدين تذكر تصريح سامي

قال حنا نبني فريق يعني الفريق يحتاج عمل واذا في تغير بنغير الوضع مو لدرجة التشائم

الي تتكلم عنها وبعدين هذا ثاني موضوع لك عن عبد الرحمن بن مساعد بيومين

وين مواضيعك يوم حقق كاس ولي العهد ؟؟؟ والا بنظرك ماهي بطوله

مشكلني حبك يانواف · #13 14/03/2012, 12:14 PM

من وجهة نظري اذا كان هنالك نقد للرئيس فهو في عدم الاستقرار الفني اما العناصر الموجوده فهي اقوى عناصر الدوري السعودي سناً وفناً ومهاره وثقه