السلام عليكم ورحمة الله وبركاته
في البدايه اتمنى التوفيق لعميد لاعبي العالم في حياته الخاصه
ماحصل في مباراة الامس اشبه بالحلم او مزحه من اليوفي !؟
صحيح انها مباراة اعتزال ... وديه .. حبيه ... خيريه ... اي شي الا انها تكون رسميه
نتيجة 7 كبيره جدا في حق الهلال .. لكنها امتداد للي جالس يصير في النادي وهذا الكلام بشهادة مدير المركز الاعلامي بنادي الهلال الاستاذ عبدالكريم الجاسر
عبدالكريم الجاسر بيّن انه متضايق من النتيجه وفعلا النتيجه بايخه حتى لو هي مباراه خيريه مو اعتزال حتى !!
المشكله مو في دول ولا في اللي قبل دول لاقيريتس ولا كوزمن ولا باكيتا ولا ولا
المشكله في اللاعبين ... المشكله نفسيه
لو دول مو كفو ... ليه لعبنا كويس قدام الاهلي والنصر والاتحاد ؟؟
لان اللاعبين ركزوا صح في المباراه هذي وطبقوا التعليمات حرفيا
هذا اللي نقصده
دول يقول شي واللاعبين يطبقون شي اخر ..
واللي زاد الطين بله في دول بالذات مقارنه بقيريتس وكوزمن وباكيتا ....
انه شخصيته مهزوزه ... طيب بزياده .. والطيب ذا ينقلب لنا في الملعب الي استهتار من اللاعبين ... لانه مافيه مدرب وراهم يحاسبهم
الحزم والشده مو انك تحرم لاعب مستهتر من اللعب مثل ايمانا
الحزم هو التوبيخ ... لانك اذا مالعبته تضر الفريق ماتضر اللاعب !!
كالديرون كان يفوز في الدوري بـ الاربعه .. وفي المباراه اللي بعدها في الاسيويه ينهزم 2 وبلعب اقل من باهت !!
عموما الاداره كل سنه ترتكب نفس اخطاء الادارات السابقه
الاعداد النفسي سيييييء جدا في الهلال
والا الاتحاد وش يوصله لنهائي اسيا غير الروح ؟
السد وش وصله لنهائي اسيا .... والله مايوصلون نص مستوى لعيبة الهلال ... وحتى مدربهم فوساتي وربي انه خواف ومن النوع اللي يلعب 3 محاور ويجيب المرض تكتيكه .. لكن الروح كانت عاليه جدا لدرجة انها اكلت " تكتيك" جيونبوك الاجدر في البطوله " ورقيا" والا الامنيات والدعوات راحت للسد ويستاهلون
تعلموا من السد ومن الاتحاد ومن حتى النصر في مسألة الروح .. ماهو عيب نعترف بخطانا
لكن العيب انا نحط اخطائنا على الغير ... مره المدرب مره سامي مو موجود ومره ابوفيصل كان مسافر ومره ومره !!
يابوي اعدوهم اعداد نفسي وبتشوفون فريق جامد
وصلوا صوتنا لابوفيصل او اي عضو في ادارة ابوفيصل 
حنا صايرين مثل اللي يبني بيت .. اساساته جامده ... وشكله رهيب ... بس بدون تلييص ..اذا جاء وقت البيع ماحد يبيه !!
وش الفايده نجيب جهاز تدريبي قوي ولاعبين ممتازين هذا غير لاعبينا المحليين الممتازين جدا ... والاعداد النفسي زيرو ؟؟
اذكر في لقاء كان مع مدرب قديم .. كان يقول انه 40% من نجاح المدرب ... هو تعامله النفسي مع اللاعبين
لدرجة انه كارلوس البرتو باريرا مدرب البرازيل سابقا اللي جاب معهم كاس العالم ... كان يقول السر في الفوز بكاس العالم انه قبل كل مباراه لمنتخب البرازيل ... كان يشغل لهم النشيد الوطني البرازيلي ويخلي اللاعبين يسمعونه قبل يدخلون اللقاء بخمس دقايق ويخليهم مولعين نار من الغيره على بلدهم... والنتيجه انهم حصدوا كاس العالم !!
مثال اخر
اكثر اللاعبين شغباً في الوقت الحاضر .. ابراهيموفيتش
كان يقول " كنت مستعداً للقتل من اجل مورينيو " !!
قصده طبعا مو حباً في مورينيو ... قصده انه مورينيو افضل مدرب في العالم يعد الفريق نفسيا وهذي حقيقه وهذا سر نجاح مورينيو ...
طبعا كاريزما مورينيو قويه جدا والسبب بسيط بحكم انه زوجته دكتوره في علم النفس .. والكلام لك ياجاره
فمان الله
الوضع المتطور
