مشكلة اختيار الاسم :

بالبداية كان اسمي عبيط ..!! .. والمقصود ملكع .. بس اكتشفت بعد المشاركة ان معنى عبيط يختلف عند العالم هنا .. كانوا يقولون لي مثلا " والله من العباطة اللي براسك" في موقف كله دلاخة .. مافيه اي لكاعة .. سألت الشباب وتأكدت منهم ان معنى عبيط عندهم يعني دلخ .. ماهو ملكع .. وهذا ماهو القصد ..
استشرت في تغيير الاسم ووقع الاختيار على اسم المشاكس .. ولو اني كنت احس انه احتكاك في المشاغب .. لكن كان سلطان يبي يغير اسمه ذاك الوقت لـ سلتانوفيتش ..

مغامرات الشباب :

احيانا وبعد ما ازدادت العلاقة مع الشباب ما كان المجلس ولا مواضيعه كافيه للتواصل كان فيه اجتماعات في اماكن كثير .. جلسات القروبات في الماسنجر ما تونس .. تطلع الردود بسرعة وكل اثنين يسولفون مع بعض .. ففترة اجتمعنا في "القيمزر" وتحديات البلياردو ومرة فقعنا كلنا لمنتدى التيماوي .. وقلبناه شات الود الين انفقعت مرارة "عشقي تيماوي" ولمح اننا طفشناه في موضوع عن الاستراحة .. وهذا الموقع هو بداية علاقة ماجد مقبل بالاشراف .. وكان فيه اجتماعات كثيرة في مقاهي (بالرياض خاصة) وطلعتين استراحات .. ولها تقارير بالمجلس ..
اتذكر مرة ابو ريمان عزم الشباب بالاستراحة وارسل علي عبدالوهاب يوصل لي خبر وانا بجدة .. كلمني عبدالوهاب ورديت لابو ريمان واعتذرت منه وهو مصر لدرجة ان يقول ابحجز لك تجي وترجع الجمعة .. الله يغنيه ابو ريمان ذاك اليوم والى اليوم ..

يوم من الايام رحت الرياض .. وكان واحد من الاسباب هو شوفة الشباب .. اتفقت ونسقت مع المدعو المشاغب انه يجمع الشباب واجيهم في اجتماعهم .. اللي ما يتسمى انشغل .. وسحب علي .. لا اعطاني خبر ولا اعطى احد من الشباب خبر ..
طلعت ذيك الليلة ودقيت عليه ستين مليون مرة ما رد .. دقيت على عبدالوهاب وجاني .. وتشرفت ذيك الليلة بشوفته وشوفة ابو ريمان والهاوي .. كانت جلسة ممتعة ما تنسي .. خصوصا اني ما شفت سلطان فيها ..


اجتماع النت لوج كان لفترة .. والاسك مي من تالي ..

شهادة لله .. اني دخلت المجلس وتركته ما شفت للبارق مشاركة ..
وسهل الله يذكره بالخير كنت اذا شفت اسمه راد بموضوع تروح عيني لا شعوريا لاقصى طرف الشاشة اليمين .. تدور القفل ..
الكلاسيكي اشغلت اهله الين غير لي اليوزر ..
وبعدها بفترة صار قاضينا مشرف ..
واخر عهدنا بالمجلس خرب ماجد وصار مشرف ..

مجهوداتهم مشكورة للامانة .. بس حقيقة ان الاشراف يسرق العضو من المشاركة ..
معذروين لأن الواحد قراءته للموضوع برغبته تشجعه يشارك .. لكن لما يقرأ كل موضوع وكل رد ..
طبيعي مع الوقت تخف حماسته للمشاركة في المواضيع ..

ومن ينسى فريق السلاحف بمدربه السلحفاة الكبيرة المشاغب ..
اظن المشاغب تكلم عن هالموضوع .. كلمني ليو ميسي وقال للفلة نبيك معي انا والمشاغب فريق نشارك في مسابقة المجلس .. قلت قدام والفضل لله ثم لليو في تجميع الفريق هذاك .. كان اسطورة .. لعبت فينا الصحافة وضغطت علينا ووانسحب المشاغب لآسباب معلنة واللي هي رحمة بالفرق المشاركة ورغبة في رفع مستوى المنافسة .. انتهت بعض مباريات المسابقة ذيك بنتائج كارثية .. فيه فرق لعبت ضدنا ما جابت ولا نقطة .. وكل ما لجمهورنا وشعبيتنا تزداد ..

قبل ما تبدأ المسابقة بأيام اعلنوا عن رعاية راشد ولد السامر للمسابقة والجوائز 30000 الف المركز الاول .. 15000 المركز الثاني ..

تقابلنا في النهائي مع مشرفين العالمية .. والفرق بين الاجابتين كانت بالثواني في السؤال الفاصل الثاني ..
السؤال الاول مرت ربع ساعة ما احد جاوب عليه .. والسؤال الثاني جاوبنا كلنا في نفس الساعة 2:40 صباحا في ليلة من ليالي رمضان المبارك .. لنخسر المركز الاول ونقنع بالخمسة الاف ونلغي رحلة العيد الى لبنان ..

خمسة الاف حلوة .. قضت لها حاجة .. وعلى ما قال جدي الله يغفر له
the journey is the reward

وليحفر فريق السلاحف اسمه بأحرف من حجر على سطح من الذهب ..
المهم انها اول واخر مسابقة عليها جوائز .. مدري وش جاه ولد السامر شكله ندم ..

فيه شغلات كانت تصير بالمجلس بين فترة وفترة ..

- <<< الفيس هذا .. الفيس الواثق .. كان له قصص ما ينساها اللي عاشرها ..

- نقطة الشيبان (.) اللي تجي غالبا بعد "اخوكم" .. كانت سوالف ..

- "مانشستر" اللي نظف سيارته ولا ركبناها انا والمشاغب ومستحيل سلطان ينسى هالسالفة ..

- مباريات المجلس والعالمية والمصخرة اللي كانت تصير .. انا ما لعبت كنت رئيس المركز الاعلامي ..

-ابو ريمان يكتب موضوع .. يجي ابو راس يغلس .. يجي العنا اللي يقرب لأبو ريمان يسولف بسوالفهم بالاستراحة ..يهدده ابو ريمان بإن يتفاهم معه بعدين .. وهكذا ..

- المشاغب راح العالمية وقال ان انزاجي قرد .. وقفوه يوم او يومين ..

- فيه توبيك مشهور بالماسنجر كل الشباب حطوه في فترة من الفترات .. تحس انه كان في شح في التوبيكات ..
كان بدايته الظاهر "تعلم تحترم ....... " ..

- موضوع "ماجد مقبل في ذمة الله" .. لا يمكن انساه .. والخرشة اللي صارت فيه .. اثارينا نحبك يا ماجد ..

- فيه عضو ما شفته الا مرة وحده .. كتب خاطرة اقل من عشرين كلمة ونزلها موضوع .. كلنا تمسخرنا ذاك اليوم ..
صكنا سهل بإنذارات رفع موضوع قديم ..

- سويت موضوع مرة عن النذالة .. وارسلته لأربعة اعضاء ينسقونه .. وتمنذلت في ثلاثة منهم .. واخذت تنسيق واحد بس ..

ناس ما قابلناهم
فيه ناس بالمجلس مواضيعهم والسواليف اللي شاركوا فيها ما راحت من بالي .. مع اني ما قابلتهم .. عندكم مثلا الهلالي - ابو سارة .. الرجل هذا له رواية بالمميزة ابكت احمد جميل براسه .. وغيره واجد من الشباب اللي كنت اقضي ساعات كثير في ملفاتهم الشخصية بدون ملل ..