نادي الهلال السعودي - شبكة الزعيم - الموقع الرسمي

يمقن الواحد يطير و يمقن لا , فالإنسان كأن حي يعيش يمشي ولكنه لا يطير وكم واحد طار قبل بس المشكلة يمقن ما يطير ويقمن يطير , يعني لو نحسبها شوي راح نلقى أن واحد زائد واحد يساوي ثنين بينما في الضرب واحد ضرب واحد يساوي واحد غريبة مو الضرب أعلى من الجمع ...
لكن المشكلة في بعض الأمور حيث تقنيا لو واحد ضرب واحد راحوا اشتكوا عند مين يشتكون .. مدري وين يشتكون, بينما لو الثاني سرق مال الأول مو عادي, يعني هي مجرد فرضيه عشان توضح الأمور شوي , خلونا نعتبر الأول واحد كبير والثاني واحد صغير لو ضرب الكبير الصغير ... الصغير ما راح يعرف وين يشتكي لان الكبير هو ألي ضربه وعلى المقياس لو سرق المال ما هو عارف يرجع حقه بينما لو سرق الصغير ما راح يكون الموضوع عادي وبيكون في قضايا ومشاكل وغيره ...
خلوني من هـ العملية بحول لشيء ثاني واعتذر راسي كله قضايا والمثل يقول ألي على رأسه بطحه ينام ويرتاح وش له ولها ,,
لي يومين مزاجي متغير يمقن هذا سبب الظروف الجوية والنفسية والسسلوجية التي أمر فيها الوقت الراهن و ممقن هذا اثر تغير الظروف المحيطة لما بعد الأزمات العربية ولا أخفيكم أفكر كثيرا بالهجرة لعالم أخر بعيدا عن هنا ولكن أتردد لأني بعض الأشغال تربطني هنا وهذي المشكلة ما لقيت لها حل ..
احد الأشغال هي حافز لأني أنتظرها بفارغ الصبر , وأقول بيني وبين نفسي يمقن تجي و يمقن لا , وفي كلا الحالتين يمقن أخذها و يمقن لا , ويا رب ما ينزل شروط جديدة ولا قرارات تأجيل للدراسات , ومع العلم كل يوم أجلس لحالي بالساعات و اسوي حساباتي وش راح اسوي في حافز , مرة أقول بأخذ لي سيارة تقسيط فيها بس سنه وش تسوي , ومرة أقول بعرس لكن حتى المهر ما تجيبه طول هـ السنة , ومرات اسكت وأقول بكرة تجي لدرجة صرت أردد أغنية /
انتظرته وقلبي أحساسة يقول .. صوت خلي اليوم ما أظن أسمعة > طبعا للفنان الكبير خالد عبد الرحمن , لأنه مع الأسف حافز أصبح مجرد انتظار لأجل غير مسمى وكل يوم نقول بكرة وبكرة نقول بعده وعلى هذا المنوال وكأن لسان الحال يقول هذا وجهي إذا أخذت ريال >> يمكن يكون عنوان مقالي القادم ..
وش لي وحافز الحين لاحقين عليه في الأمارات يمقن صرفوا زيادة لكل مواطن دبل راتب يمقن معلوماتي صح و يمقن لا , لنفرض أنها صح شعب الإمارات يستأهل وأتمنى أكون إماراتي ولعلها من أفكاري ألي في بالي أروح أشتغل في الإمارات , أتوقع حتى عمال النظافة تتجاوز رواتبهم 3000 ريال اقصد درهم , وأعتقد أنها تصل إلى 7000 درهم بالإضافة لبدل سكن ومواصلات , فهم ما عندهم قطارات مثل المغرب ولا عمدهم مليار مثل مصر , ولا مثل لبنان ولا اليمن ولا غيره ..
أحيانا يكون لدى الفرد طموح بالوعي المجتمعي لقضايانا والمشكلة لو تكلمت عنها بعضها تتعالى بعض الأصوات وتصبح خائن وأنت ما تسوى وفيك وفيك , ثم تختفي خلف الشمس أو يمقن القمر أو يمقن ما تختفي بس تروح مدري وين , وبعد ذلك يفهم الناس في داخلهم أن ما تتحدث به الواقع ومع الأسف لا نصحوا دوما إلا بعد سكره وأغلب العالم عندنا في سكره مستمرة ...
يمقن المرور أحد قطاعاتنا المميزة و يمقن لا , يعني محضر لحادث مروري والتقدير 100 % الخطأ على الطرف الثاني وتأخذ ورقة إصلاح وتقييم للسيارة وترده عندهم وبإرادة قادر تتفاجأ أن الحادث أصبح 50% وش السبب مدري ولكنها بإرادة قادر و يمقن ما تكون أرادة قادر ولكنها حرف دوخ العالم !!
طبعا خلونا نحولها قضاء ماشي شهرين تراجع و يجي موعد تسلم الورقة للطرف الثاني وين في المرور تروح للمرور الشخص خرج بكفالة طيب حاب تسلمونه هـ الورقة , والرد خلاص القضية في المحكمة مالنا دخل , طيب أبي رقم الرجال بعطية الموعد , اخوي ما تفهم القضية مو عندنا , و يمقن تكون القضية عند الجيران أو يمقن تكون عند ولد عمه !!
في الآونة الأخيرة كثرت الحرائق في المدارس ومدري وش الأسباب يمقن درجة الحرارة العالية عندنا و يمقن من تخطيط المدارس لدينا و يمقن من حارس المدرسة الذكي والغير مؤهل , ولكن لا نختلف أنها مشيئة الله فهو القادر , يحزننا ما يحدث بهذا الوضع ولكن عسى أن تكرهوا شيء وهو خير لكم , بعد هذه الحرائق شفنا تحرك من قبل البعض والغريب نحن المجتمع الوحيد ألي ما يتحرك إلا بعد المصائب !!
بصراحة ما أبي أتكلم عن هـ الموضوع ولكن قلت يمقن لازم يكون له نصيب في هـ الخرابيط و يمقن أراحه لتأنيب الضمير ألي أعاني منه بسبب عدم الكتابة عن هـ الموضوع ...
مشكلتي أعاني من هذا المقال أو الخربطة في تكرار حرف هـ وأجده جيدا لأنني لم أكرر كثيرا حرف و , فالواو يصيب الدهشة والاستغراب بينما هـ يعني الضحك والانبساط كحال وضعنا في مقاولة أضحك للدنيا وتضحك لك , والغريب أنني ضحكت للدنيا كثيرا فلم تضحك لي بعد !!
يمقن يكون مقالي صح وحلو و يمقن يكون لا , ولكنني متأكد انه مجرد واحد فاضي ويكتب ولا يقصد بالي يكتبه شيء سوى طرح يمقن على سطح الأرض و يمقن المريخ !!
المصدر
يمقن ايه ويمقن لا - صحيفة موهبتي الإلكترونية