fficeffice" />

السلام عليكم ورحمة الله وبركاته

إخواني أعضاء هذا المنتدى الرائع

أحسن الله عزاءكم جميعاً في وفاة سلطان القلوب وملك الابتسامة

صاحب السمو الملكي الأمير سلطان بن عبد العزيز رحمه الله أسكنه فسيح جناته

كلنا صدمنا بهذا الخبر ونحمد لله الذي لا يحمد على مكروه سواه

وكلنا جاشت مشاعره الغامرة وانفجرت أحاسيسه الصادقة وسالت دموعه بموت هذا الرجل

الكثير يتمنى أن يكون شاعراً ليسطر في الأبيات الشعرية والكلمات الرثائية

أتمنى أن تعبر هذه القصيدة المتواضعة مني عن بعض مافي صدروكم

ولا أنسى أن أبارك لولي العهد صاحب السمو الملكي الأمير نايف بن عبد العزيز

خير خلف لخير سلف نبايعه على ولاية العهد ونجدد الولاء والوفاء لملكنا المحبوب

أبو متعب لكم القصيدة التي كتبت بدموع الحزن قبل الحبر وبالخد قبل الأوراق

مات أبو خالد حبيب الشعب سلطان القلوب = من يعزينا وحنا كل أبونا فاقدينه

شف شمال المملكة يبكي ويشكي للجنوب = وشرقها للغرب يسأل وشهو اللي سامعينه

ليت مابه سبت ذا الاسبوع أو إنه كذوب = زاد كرهه عندنا وإنّا من أول كارهينه

يوم يفجعنا بصبحً وجهه الضاحك شحوب = ما تصبحنا بخير إ لا تصبحنا بغبينة

والله إن موته علينا من شديدات الكروب = وفقدته للي يحبه مثل فقدة والدينه

أشهد إن الموت ما منّه مفر ولا هروب = لوّبه شخصٍ فداوي كل أبونا مفتدينه

مايفيد الدمع والنوحة ولا شق الجيوب = ذاه شيءٍ خابرينه من قديم وعارفينه

لكن بنبكي لو إن عيوننا بعده تذوب = في وفاة اللي بوفاته كل هالعالم حزينة

يبكي فراقه فقيرٍ مالقى زاد وشروب = شبّعه وأغناه وأعطاله عطياتٍ ثمينة

يبكي فراقه مريضٍ بالمسكن والحبوب = عالجه حتى تشافى من خبيث وغرغرينة

ويبكي فراقه يتيم عاريٍ ما لبس ثوب = ضمه لصدره ولبسه وبعث فيه السكينة

يبكي فراقه عديمٍ وركبه دينه ركوب = فك حاجته وعوزه وخلصه من هم دينه

ويبكي فراقه دفاع الجوْ وساحات الحروب = والجنود اللي تحت رايه وتوجيهه رهينة

هيبته لا شافه اللي ناويٍ سيّة يتوب= من يحبه ياهنيه من نشبّه ياعوينه

طيبته خلته عند الناس مقبول مْحبوب = كل من شافه دعاله يالله تطول سنينه

ضحكته شمس الأمل تشرق على كل الدروب = تنبت ورود السعادة نرجسه مع ياسمينه

مدته تغني جماعاتٍ وأقطار وشعوب = كن ربي كاتب الأرزاق في مدة يدينه

كلمته لا قالها تتعب مدورة العيوب = حكمته حارت بها عقولٍ تحسب إنْها رزينة

ويش أعدد ماغرفت من البحر ياكود كوب = سيرته تتعب حروف الشعر واللي كاتبينه

كلما مر بخيالي مشهدٍ مخزي هيوب = لو ما أصرح به وألمح به فأنتم فاهمينه

ذاك موته فرح وأعيادٍ وتحرير وطروب = وذاه موته هم وأتراحٍ وأحزانٍ دفينة

أحمد الله واشكره واثنيه علام الغيوب = ودام عزك يا وطن ويدوم منهم حاكمينه

لافقدنا واحدٍ منهم يجي غيره ينوب = راح سلطان وحضر نايف عسى ربي يعينه

ياولي العهد اخذ العهد مافينا مغصوب = بالرضى والطيب جينا كل أبونا مبايعينه

بأمر أبو متعب وأمره لا أمر ياجب وجوب = كلنا سمعٍ وطاعه له لو يأشر بعينه

يالله إنا طالبينك وأنت غفار الذنوب = تغفر لسلطان وتمده كتابه في يمينه

كل شمسٍ لأشرقت لا بد يتلاها غروب = أظلم الكون بوفاته وأنطفت طلة جبينه

لو دفن وسط التراب فمسكنه وسط القلوب = فارشينٍ بالمحاني له مكان ومسكنينه

القصيدة بالصوت

سلطان بن عبد العزيز صدى.wav

الشاعر عبد الرحمن بن سعد الدوسري