ماني حاط سعال

مايرد على الأسئلة الا بعد يومين أو شهرين ... ويقول توني مفرمت الجهاز ... وش هالعذر






















أقول يالحبيب رد لو بعد سنتين ... ولايهمك السؤال فيك ... يعني فيك


هو الأخ الغالي ((( هلالي الجوف )))
مشرف منتدى الرياضة العالمية ... بعد
ومشرف على اللجنة الإخبارية ... وهم بعد
لا ... رحنا فيها

أقول يالمشرفين ( على وزن محمدين ) :-

كم ساعة ترزع خشتك بالأنترنت ... ( يوميآ )
وكم ساعة تعمل رياضة جري ( من الجوف الى الرياض ) ... هذي عاد شهريآ
وكم ساعة تنام ( هذي عاد ) ......




سنويآ

وسلم لي على أهل الجوف يالحبيب ... زين

بــــــــــــــــــــــــــــــــــــــاي

عووووووووودنا مع مشاركة الفيصل الهلالي

ياهلا و الله بابو عبدالرحمن
ياهلا والله بالسمي الغالي

رأيك في الوضع الحالي للمنطقة و هل تتوقع اندلاع الحرب
ولو اقولك اني ما أهتم بالأوضاع الحالية والحروب تصدقني والا لا ؟
ماحب السياسة يالغالي ولا اشوف الاخبار ابد ابد الا الاخبار الرياضية ;) .. لأن اخبار هاليومين بصراحه وجع راس واحداث ومصايب وكوارث الله يكفينا الشر وهم وغم .. والواحد عنده مايكفيه بالديره فما بالك خارج الحدود ;)
وقتي الفاضي يروح مابين التسلية والترفيه واللعب مع عيالي

هل تتمنى تكون كوري شمالي
لاوالله ما اتمنى
اخاف ماعرف عيالي وعيالي بعدين مايعرفوني

رأيك في نكسة اليوفي امام مانشستر
اول من طرى ببالي انت
قوية بصراحة وغير متوقعة خاصة وانها في الديل البي .

ايش انطباعك عن واحد اعطيته رقم جوالك اكثر من مرة ولا اتصل عليك
يتغلى هو وووووجههه .. واقول يحق له
اكيد غالي .. ويبي يعرف غلاوته عندي

رأيك في اعضاء اللجنة الاخبارية
عشرة عمر .. وبيني وبينهم عيش وملح وتواصل رائع
والله يوفقهم ويخليهم لعيون ترجيهم .
في حوالي الخمس اعضاء مجهودهم اكثر من رائع .. وهم المكسب الحقيقي للشبكة

متى تتطور الجوف
لاحجت البقر على قرونها

تحياتي لك يا غالي
وتحياتي لك بعد

عووووووووودنا مع مشاركة فتى المدينه

يا هلا بهلالي الجوف
ياهلا والله فيك اخوي فتى المدينه

عندي كم سؤال ياليت تجاوب بصراحه ولاتنحاش منها
ابشر يالغالي .. ابشرك مربطيني بالفريزر ومهنا نحشة

برايك هل مازال الدوري الايطالي في الصدارة ؟واين تضع الدوريان الانجليزي والاسباني معه؟
بالنسبة لي متابع ومعجب للثلاث دواري ..
وماقدر احكم على ايهم بالصدارة لأني اشوفهم بنفس القوة والنجومية

لو لعب الهلال مع الريال في السوبر الاسيوي الاوروبي كم تتوقع يفوز الهلال؟
اما يفوز الهلال .. كثر منها
امنياتي وقلبي وروحي مع الهلال بذيك المباراة لو الله يوفق الهلال ويسويها ويتأهل .. لكن عقلي يقول ان الريال راح يفوز بالراحه لفارق المستوى والامكانيات .

بصراحه مارايك في السكوت الهلالي على تصرفات الجمعان ؟وهل آن الأوان لطرده من الكيان الهلالي؟
جاوبت على هالسؤال يالغالي
لكن لامانع عندي من تكرار القول ان الجمعان موهبة .. وخسارته خسارة للفريق .
واتمنى انه يرجع لعقله ويعرف وش يكون الهلال ويحترم جماهيره وجماهير الهلال .

لو دخلت للانترنت وحاولت الدخول لشبكة الزعيم وفجأة وجدت أن هلالي الجوف تم وضعه في القائمه السوداء (ممنوع الدخول لشبكة الزعيم) وش تسوي ؟
صارت معي هالسالفة قبل كم يوم .. ايام الاختراق الغاشم
وحاولت ادق على الشباب ( سمو الامير وكوكتيل وابومنار والاعصار ) اشوف وش السالفة .. لكن وللأسف مالقيتهم كل ابوهم
اما لو تصير بحق وحقيقة مالي غير اني اتقبلها بكل روح رياضية

أمامك ثلاثة قرارات لطرحها على رئيس الهلال لمناقشة اوضاع الفريق ماالذي ستقوله؟؟؟
1) الاستقرار الفني والاداري .
2)الاستقرار الفني والاداري .
3) الاستقرار الفني والاداري .

امامك مبار اة للهلال وانت نعسااااااان وش تسوي تتفرج والا تنام؟
ماعمري تفرجت على مباراة للهلال وانا نعسان .. تلقاني مستعد ومتنح بالتلفزيون قبل المباراة بساعة .. واذا بدت المباراة تشوفتي تقول مجنون ..اقوم واقعد مع كل هجمة لنا او علينا .. والله لايوريك وش تكون حالتي اذا قرب الوقت عى النهاية والهلال مهزوم او متعادل والله يوريك وش تكون حالتي اذا قرب الوقت على النهاية والهلال متقدم خاصة اذا المباراة نهائية
ولمعلوميتك .. ماحب اتفرج على مباريات الهلال الا لحالي .. وحتى الأهل مايقربون مني اذا كان فيه مباراة للهلال .. بصراحة .. ارحم حالي

مع الف سلامه أخوي ابو عبدالرحمن
ياهلا اخوي فتى المدينه .. فمان الله

عووووووووودنا مع مشاركة ابو الذهب

السلام عليكم ورحمه الله وبركاته
وعليكم السلام ورحمة الله وبركاته

ورا ماترد السلام انت وخشتك
انت اللي ماتسمع .. شكل كوية جاج جت على اذنك وصمختها

سؤال رميته بشريط مسجل وفلق ولد جيرانك وطلع ابوه وصفقك
غلطان يالاخو بالنمرة
ماعمري رميت شرطان على عيال جيراني .. انا مارمي الا على بنات جيراني ;)
وحزة ما ابوهم بالدوام <<== ذكي .. مايبغى يتصفق ;)

هل كان هلالى الجوف فى يوم من الايام عزوبى ؟؟ والله السؤال البايخ
من ناحية بايخ فهو بايخ
وهل كان .. نعم كان في يوم وفي شهر وفي سنة
بس وناسة .. يازين العزوبية وايامها وانا اخوك

اين تجد نفسك من هذه الوظائف ؟
1- سواق وايت فى مصلحه المياه
2- راعى محل بنشر
3 - توصيل سريع ( اتصل نصل )
توصيل سريع ( اتصل نصل )

سميت نفسك هلالى الجوف هل هذا يعنى انك من اهل مكه
لوووووووووول
وانت سميت نفسك ابوالذهب هل هذا يعني انك ام الزنك والخارصين

عووووووووودنا مع مشاركة ابومنار

والله هذي قنبلة الموسم ... الله يخليك لعين ترجيك يابوسليمان اللي جبت لنا قلبنا النابض
اسكت لاتدري امريكا ان عندنا قنبلة ويقنبلونا كل ابونا .. تراهم على جريف
والله يخلي ابوسليمان اللي جمعني فيكم

شف يابوسليمان انت وجميع طاقم العام ... انا ماعندي اسئلة لكن عندي كلمة حق يجب ان تقال في شخص هالرجل الرااااااااااااااااااااااا >> الى مالا نهاية اااااا ئع .. فارجو ان يسمح لي ..
شف يابوسليمان انت وجميع الطاقم ترى المدير يهددكم <<== يبي يشبها بينهم ;)
واذا ماسمحتلك انت يابومنار من اسمح له
خذ راحتك ياخوي .. وانا كلي لك

بعيداً عن الشبكة اللي تمثل لهذا الرجل شي كبييير ولا اراني ابالغ إذا قلت انها بيته الثاني
ايوالله بيتي الثاني .. ويازينه من بيت .. ويازينكم من اخوان
بس شكل المكيف خربان والمويه مقطوعه .. والمطبخ مافيه الا السبانخ

واستطيع أن اقول وبكل فخر انه قلب الشبكة النابض بحق وحقيقة .. ويجب ان تعلموا أن ما تشاهدونه من مجهود من هذا الرجل يقدم أضعافه من وراء الكواليس رجل ذا مجهود سخي وعطاء بلا حدود
واجبنا يالغالي .. وترى مجهودي مايُقارن بمجهودك يالغالي <<== اشتغلت الركب

محب للخير ومحب للناس ويقدّر الغير ويحترمهم لأنه مثال للرجل المحترم
محب لدينه ومحب لوطنه ومحب لمدرسته ومحب حتى للهندي اللي يغسل سيارته
منت شايف وش كثر الاخوان اللي يتشابهون بالاسم كلهم محب .. سبحان الله

لا يرضى بالخطأ والتهاون ويسارع بمحاولة إصلاحه قدر ما يستطيع ... بالمصارحة والملاطفة والكلام العذب ... وحتى وهو ينتقد إنتقادات لاذعة تصب في المصلحة العامة .. لا تملك إلا ان تتقبل كلامه بكل ما لديك من رحابة صدر ... لانه يجبرك على ذلك ولأنك تعرف أن ما وراء قلبه على لسانه
تراك مصختها <<== يمون
شكلي على ذولي الصفات اصلح اصير ملك والا حاكم .. بالله رشحوني لحكم العراق تراه ماهو بعيد مقراط عصى
يالله انجز وعطني الاسئلة وراي شغل

تشرفت بالتعرف إليه في حفل الشبكة العام الماضي ومن بعدها زادت اواصر المحبة والألفة بيننا بالإتصالات المتوالية
الشرف لي يالغالي .. وقلتها قبل كذا ان اروع شي بالحفل كان روعة استقبالك

بإختصار ...... هو الأقرب إلى قلبي في هذه الشبكة الرائعة ومن أهم مكتسباتي الشخصية في عالم الأنترنت منذ عرفتها حين دخولها المملكة قبل حوالي الخمس سنوات
تسلم والله يابومنار ..
شرف والله .. وعسى الله يقدرني على هالشرف .

والله ثم والله أن القلم يعجز عن وصف ما أكنّه وما اعتقد أن كل من يعرف هذا الرجل يكنّه له من محبّة وتقدير .. مهما قلت فشهادتي مجروحة
رجعنا للشهادة المجروحة ..
الظاهر بافتح مستوصف لعلاج ذولي الشهادات المجروحات الله يسلمك ويسلمهن
وشكل القلم عجز .. لكن شكل كبيوردك مايعجز

لا اقول سوى ...... ما اروعك يا أبا عبدالرحمن
الله يرجك ذكرتني بحلقة طاش ماطاش ههههههههههههآآآآىى

لن اثقل عليك فانا اعرف مشاغلك هاليومين .. ولكن لدي سؤالين
خذ راحتك عنوني ... ووقتي كله لك

من هو اول واحد تعرفت عليه في عالم الانترنت وفي شبكة الزعيم خاصة ؟
اللي تعرفت عليهم يالغالي بالانترنت كثير فوق ما تتصور سواء بالشات او بمنتدى الزعيم .. واول واحد تعرفت عليه قبل حوالي اربع سنوات واحد اسمه خالد من الرياض عن طريق مايكروسوفت شات .. وياهي معرفة .. معرفة مصلحة بالعربي لأن الرجال صار يتصل علي كل يوم ويقول انا مسوي حادث وانا علي دين وانا مسكين ومن هالكلام اللي مايخلص .. كان يستهبل علي يبغى سلف
ومير اسحب عليه السيفون وانتم بكرامه واشطفه .. يازيني وانا مسلف واحد مدري منهو .. ويازينه وهو يتسذب علي
وبعده تعرفت على ناس واجد .. وكلها طلعت معرفة خير ولله الحمد

اما اول واحد تعرفت عليه بالشبكة هو العضو ثرمداوي .. وهو العضو الوحيد اللي رحب فيني اول ماسجلت .. والموضوع موجود بمنتدى اعضاء شبكة الزعيم
اضفته بالماسنجر .. وبعدها تواصلت معه بالجوال .. ولهالحين مكالماتنا مستمرة لكن بالمناسبات

من الذي عندما ترى موضوع له في منتدى الجمهور ومنتدى المجلس العام لا تتردد في الدخول اليه ؟
كل الاعضاء عندي سوى .. وصار اكثر مايجذبني عنوان الموضوع

هل لك ان تطلع الأعضاء على يوزر دحموني في هذه الشبكة ؟
يوزره عبدالرحمن بن فيصل
بس لهالحين مابدى مشوار الابداع

شاااااكر ومقدر لك ولجميع مشرفي المجلس العاااام والله يوفقك وييسر كل أمورك
العفو اخوي ابوعبدالرحمن
وشاكر لك هالكلمات الرائعة بشخصي المتواضع .. وعسى الله لايحرمني منك
والله يوفقك ويخليك لمنار ودحموني

عووووووووودنا مع مشاركة خربوووووط

هلا وغلا بهلالي الجوف ,,,
هلا فيك والله يا اطخم الشبكة

السلاااام عليكم ورحمة الله وبركاااته ,,,
عليكم السلام ورحمة الله وبركاته

هلااااالي الجووووف هل أنت نثرااااوي ؟؟؟
انا اصير نثراوي ؟؟؟؟
ياشيخ اصير قوطي ببسي بشارع عشرين اللي بافتح ياسمسم كانك تذكره .. ويلعب بي نعمان كورة بالصبح وبالليل وبكل وقت ولا اصير نثراوي

هل صحيح أن مايشاااع في المنتدى أن هلالي الجوف متهم بمقتل الوردي( رحمه الله ) <<< يبغى يورطه؟؟؟
اشاعات يالغالي اشاعات .. ولا تصدقهم <<== خاف يروح فيها
أقول .. ترى السالفة فيها نص مليون .. وش رايك احطها براسك ونتقاسم النص مليون ففتي ففتي .. والوعد يوم القيامة

الدقيقة 90 وهلالي الجوف رأس حربة نادي الهلاااال أمام النصر والنتيجة 0/1 للنصر يسحب- هلالي الجوف - بالشريفي ويلحقه بالدااود ويتقدم منفرد بالخوجلي ويسحبه بطريقة انما ايه ,,وعندما يهم بالتسديد يعلن الحكم نهاية المباارااة ؟؟؟ ماهو شعورك بهذه اللحظه ؟؟؟ ومن هو الحكم اللي تتوقعه دااار المبااارااة ؟؟؟
وهو راح يبقى فيني عقل يفكر بذيك اللحظة
الله واعلم يشيلوني من الملعب للنفسية .. هذا بعد ان بقى فيني روح وماشالوني للقبر
اما الحكم .. من غير العقيلي حسبي الله عليه .

وفي الختااام تقبل تحيااااتي أخوي هلالي الجوف
ياهلا والله اخوي خربوووط

عووووووووودنا مع مشاركة صمت العيون

مساء الورد للاخ الغالي هلاليووووووو الجوف
مساء النور والسرور اخوي صمتووووووه

اقول يا كثر اللي سؤالك كل ذولاء يكرهونك <<<<<<<ما شاء الله عليهم الله يزيدهم;)
عقبالك
الله يزيدهم كمان وعود وطبلة .. بس بدون اسئلة

والله انا كنت باراجع اسئلة الاعضاء لكن مريت مرور سريع قلت والله لو اقعد من اليوم لبكره ما خلصت الزبده اذا مكرر اسمح لي ما عندي وقت اقراء الاسئله
كلك ذوق يالغالي
وحتى لو مكرر ابشر بالاجابة
بس اعجبتني جملة مرور سريع وانتبه لايدرون عنك المرور .. ترى شعارهم لا للسرعه حتى وقت الحوادث الله يكفينا الشر وقطع الاشارات .. تلقاهم يمشون على بيض

وانا باصير رحووم وباصكك بكم سعال حلوين طيبين بتحبهم
يلزمك دوا قحه .. يمدحون ابوحصان ;)

بما ان الاسئله واجده وانت ما انت ملحق عليهم خابرك ولد الوليد ...اذا بغيت اساعد ما عندي مانع لكن حرك مخابيتك
ايوالله ماني لا ملحق ولا مطبخ .. بس ماني ولد الوليد
ترى الوليد اصغر مني يالشين .. وهو بحايل وانا بالجوف
وماتقصر يالغالي بالمساعدة .. وماعليك بحط فار بمخابيني علشان تتحرك زين

يعتمد هذا السعال على الاحوال الجويه في حال ضرب العراق وفوز النثر بكاس انكلتر
ينص السعال على((شفت الاسئله والاعضاء اللي سئلوا لكن من العضو اللي ودك تجحده ولا تجاوب عليه ))
ماش .. اشوف حالة السعال زايده عندك هاليومين وخلتك تنصص وتربع ..وتوصل انجلترا والعراق حتة وحده
اما العضو اللي ابي اجحده واتمنى اجحده وشكلي بجحده فهو جاي بالطريق .. والله يعيني عليه وعلى اسئلته .. الا اذا وافق يسدد فاتورة النت عني هالشهر
او سوى شي انا موصيه عليه ;)

هل صحييح ان احداث 11ستمبر هي التي منعتك من دخول المجلس العام ...يعني افهمها ليش مقاطع منتدى المجلس العام
مهنا مقاطع يالغالي
وانا متابع من بعيد لبعيد .. والردود تجي حسب الفضوة .. والمواضيع مافي جديد بصراحه والمنتدى فيه الخير بوجودكم

لو شفت شيك مصدق بثلاثين مليووون دولار باسمك طبعا ....وكان بين ايديك بن لادن ....وش تسوي تاخذ الثلاثين وتعطيهم ابن لادن وتدعم خزينة الهلال ...او تقول الثلاثين وسخ دنيا وبن لادن قاهرهم تخليه عندك
بصراحه لو يصير مثل هالموقف وهو من سابع المستحيلات بقول وصخ دنيا .. والله الغني .

نسيت اقول وش اخبارك؟؟؟
الحمدلله بالف خير .. متنح بهالمطبخ واكل من هالسبانخ

السلام عليكم ورحمة الله وبركاته

هلا والله غلااااااااااااااااا

هلا والله بالغالى هلالي الجوف .............


كل عام وأنت بألف خير وعافيه وجعلها سنة السعد لك ........

كيفك ياااااااارب بألف خير وعافيه ............

يالغالى عند كم سؤال لك .......




السؤال الأول .........

لو قالوا لك الهلاليه وللأبـــد وش يجي على بالك بسرعه؟؟؟؟؟؟





السؤال الثانى .......

أخبارك مع التعبير تمام......


((القصيم ___بريدة ))...............

أمسك القلم وعبر عن مابداخل القوس بما لايقل عن خمس سطور .....


هذا الى براسي الحين ومتى ماطن براسي شي راح أسألك .....

ولك أغلى وأرق تحية من أحلى هلاليـــــــــــه

[c]

السلام عليكم ..

الحقيقة انا جدا اسف للتاخر في الحضور هنا .. بس وش اسوي .. مشغول لين اذني ..

حتى توني جاي انا وعمرو موسى من عند كوفي عنان عشان نحدد موعد لصدام وبوش من اجل تقريب وجهات النظر بينهم .. ونخليهم يحولون وجهة الحرب على اسرائيل ..

[/c]

<--- مشغول اقول لك

المهم ..


عندي كم من سؤال بس اقل من القلب الازرق بشوي

اقرا الاسئلة التالية بهدووووووء وابدا بالاجابة على السؤال الاسهل


---------------------------------------------------------

السؤال الاول .. (8 درجات )

اجب على الاسئلة التالية :
فقرة (أ) :
الشق الاول
- ماذا ستفعل اذا قامت الحرب ؟ وين بتروح انت وعيالك الله يخليهم ؟ ترى الجوف وانا اخوك تخوف
الشق الثاني
- لو قررت انك تقعد بالجوف .. وش بتسوي لو سمعت صفارات الانذار .. هل بتطلع للسطح كالعادة عشان تشوف الصاروخ ؟ والا بتتوزا في القبو ( ان كان عندك قبو ) والا بتكبر الوسادة وتطنش ؟

فقرة (ب):
- هل تحب تلعب كورة قدم ووين تحب تلعب في اي مركز ؟ وما اسم الشخص اللي دخل فيك كوبري يوم من الايام ولين الحين تذكره ؟

فقرة (جـ):
- ما الذي تعتقد انه ينقص شبكة الزعيم وتحديدا اللجنة الاخبارية ؟

فقرة (د):
- كم مبلغ اعلى فاتورة جوال جتك ؟ وما موقف زوجتك منها ؟ وهل تعتقد ان لو تشتري لدحموني لعبة بقيمة هالفاتورة اصرف ؟


-------------------------------------------------

السؤال الثاني: ( 7 درجات )

اجب عن الاتي بنعم او لا ( لا تتفلسف واجد وتقول ما ادري ) :

(أ) هل عمرك اكثر من 30 ؟
(ب) في محفظتك الحين اكثر من 200 ريال ؟
(جـ) وزنك اكثر من 80؟
(د)هل قد طقيت عبدالرحمن مرة وصاح ؟
(هـ) هل تفكر تتزوج الثانية ؟
(و) لو نويت اتزوج انا .. تزوجني ؟
(ز) هل عندك مشاريع تجارية الان ؟


-------------------------------------------------

السؤال الثالث : ( 10 درجات )

صل الكلمات من العمود الاول بما يناسبها من العمود الثاني ( يمنع استخدام الكلمة مرتين )
(ا)------------------------------------------------(ب)
بندر بن ثامر ------------------------------------ عسل
شبكة الزعيم ------------------------------------ تعب
اللجنة الاخبارية -------------------------------- قلق
الموهوب -------------------------------------- هم وغم
الهلال ----------------------------------------- عمري كله
دحموني --------------------------------------- تاج الراس
الفلوس --------------------------------------- يعععععع
الدخان ---------------------------------------- قاهرني
كنتاكي ---------------------------------------- شيء مهم جدا
الماسينجر ------------------------------------- رجل والرجال قليل


-----------------------------------------------------------------------------

السؤال الرابع : ( 6 درجات )

اكمل الفراغات التالية بالعبارات المناسبة

(ا) سوف اتخلي عن شبكة الزعيم اذا .......................................................
(ب) ممكن ان يتاهل الهلال في تصفيات العين اذا ............................................
(جـ) الشخص الذي تبوح له بكل شيء هو ...................................................
(د) العضو اللي ممكن انك تعتمد عليه وتتطمن اذا وصيته بشيء في الشبكة هو .....................
(هـ) اقوى موضوعين تحس انه هز شبكة الزعيم في نفسك هما ................... و........................
(و) لو لم اكن هلالي الجوف اتمنى ان اكون .........................................



------------------------------------------------

السؤال الخامس : ( 3 درجات )

علل لما يأتي :
(أ) تدهور الهلال هذا الموسم.
(ب) حبك لشبكة الزعيم
(ج) حبك لي انا ( واثق مرة )


----------------------------------------------------------

السؤال السادس : ( درجة واحدة )

ماذا ينقص مسابقة من سيربح المليون في شبكة الزعيم وماذا تقترح لتطوريها اكثروهل تؤيد استمرارها ؟


اتمنى لك التوفيق في حل الاسئلة



الدرجة النهائية = ......./35

يا هلا والله بهلالي الجوف القلب النابض لهذه الشبكة ..

عندي كم سؤالي وودي الله لا يهينك تجاوب عليهم <--- بالله أجل ليش فاتحين هالموضوع ؟؟

# اللجنة الإخبارية رأينا عملها الجبار والكبير في بطولة كأس العالم ورأينا التقارير والأخبار أولاً بأول وجعلت الكل يفخر بإنضامه لهذه الشبكة .. لكن بعد تلك البطولة لم نعد نشاهدها كما كانت !! فما الأسباب ؟؟ وشاهدنا بصراحه تقصير (( رأي شخصي )) في تغطيتها للجمهور الهلالي وإعتمادها الكلي للكرة العالمية ؟؟ ما الأسباب ؟؟

# ظاهرة مزعجة من وجهة نظرك تود إزالتها من هذه الشبكة ؟؟؟

# هلالي الجوف كان في وقت ما مشرف على المجلس العام وكان يتواجد بكثرة لغياب المشرفين .. هل سنرى هلالي الجوف كما كان أم لابد من غياب المشرفين لنراه ؟؟؟

# ظاهره في المجلس العام تزعجك .. ماهي ؟؟

# لو قلعوا البارق (( اليوم قبل بكره )) وحطوك بداله وش أول قرار تبي تاخذه ؟؟؟

تقبل خالص تحياتي ,.,

عوووووووودنا مع مشاركة أيــــــمــــــن

اول شي حي الله ابو عبدالرحمن .. نورت المطبخ العام
ياهلا فيك اخوي ايمن .. والمنتدى منور بزباينه وطباخينه .

ثانيا اقرا الاقتباس نقطه نقطه واذا خلصت انزل تحت ;) طبعا على غير العاده مافيه جملة : للضيف الحق في عدم الاجابه على اي سؤال
المصائب لا تأتي فرادى
ماكفاهم عملتهم فيني .. بعد شايلين الشرط
هذا من حسن حظي

يعني غصب عن فرخين خشمك تجاوب ;)
فرخين والا خروفين
حاظرين يامستر ايمنيين ;)

بسم الله على بركة الله نبدأ
سبحان الذي سخر لنا هذا وماكنا له مقرنين .. وانا الى ربنا منقلبون

لو يتقابل ليفربول ومانشيستر في ارض محايده ولتكن ( النقره ) .. من ترشح لتحكيمها من الأعضاء ؟ ومن تتوقع يفوز ؟
ارشح لتحكيمها خوينا ذاك المنقطع ... وبخلي سام الملاعب وكاسترومان لقاطين كور

انا ناوي اترك روما ( غسلت يدي منهم عقب ماشفت هدف فالنسيا هم وحارسهم هالغبي ) .. المهم وش تنصحني بأي فريق .. ( غير اللي انت خابرهم طبعا )
مدامك ماتبي اللي انا خابر اجل مالك الا فريق النقرة .. ويخب عليك

اذا قالك واحد ( فديتك انا ) .. وش ترد عليه ؟
ومن قال ;)

وش سر حبك للفلافل والشاورما ؟
مجبور
ماعندنا هرنديز ومكدونلديز <<== يقصد هارديز ومكدونالدز فيها همبورغر بالمانونيز والكشتب زيكم .. ومالنا الا هالفلافل والشاورما
لكن تصدق كشخه .. تراني بصفة عامة احب الأكلات السريعة

نجي للأسأله الصدقيه
واللي راحن وش موقعهن من الاعراب يالشين

ما رأيك في كل من ( اقصد من الناحيه الفنيه ومدى القدره على افادة الفريق حاليا ) واتمنى الاجابة بكل صراحه :-
يـوسـف الثنيان
مع احترامي له ولعشاقه واعجابي الشديد فيه كأمهر لاعب سعودي وعربي وأسيوي الا اني اشوف انه انتهى خلاص .. يعني بح وماعنده جديد .. وتمنيت لو انه اعتزل قبل سنتين .

سـامي الجابر
ذيب لو يخلي هالدلع ;) مفيد فنياً بأي موقع بالملعب .
والله يفكه شر الاصابات .

كلاوديو لوبيز <=== امزح لاتصدق
حدد .. تبغى كلاوديو لوبيز الافريقي الاسمر .. والا كلاوديو لوبيز لاتسيو ;)

عبدالله الجمعان
موهوب .. وعيبه الغباء ونشافة الراس ... والتسطيح
مهم جدا للفريق من الناحية الفنية اذا كان رايق .

أحمد الدوخي
بعد رجعته من الاصابة ماهو الدوخي اللي نعرف .. وان شاء الله يرجع لمستواه اللي خابرينه مع وجود لاعب خطير قدامه .. اقصد اندريه كانشلسكس .

أحمد الجري :sad:
انسانا ازمة الظهير الايسر .. الله يوفقه ويحميه من الاصابات .

قبل لا اطلع ودي اذكرك بـ(الخمس الآف ) .. كيف ناوي تدفع شيك والا كاش ؟ والا ترافيل شيك <=== يسمع بالترافيل شيك ... والا اقولك ترا حسابي بالراجحي ;) ... يله تراني مزنوق عجل علي
انا حسابي بالتلفريك يامزنوق بيك .. قابلني بتلفريك السودة .. وابشر بالدفع من فوق قمة السودة .. قصدي بالدفع الكاش

تحياتي
تحياتي لك انت يالغالي

عوووووووودنا مع مشاركة مدمي الشباك سام6

سـلام
عليكم السلام

مراحب اخوي هلالي الجووف
هلا والله بمدمي الشباك

كيفك؟ ان شالله بخير
نحمدووووووووووووووووووووووووه

هاه نبدأ بالاسئلة ولا إيش؟؟!!
والا ايش ;)

س1/ماهو اول شي كنت تتمنى انك تصير لما تكبر ؟؟ يعني بالاصح حلم الطفولة
كنت اتمنى اصير ضابط ..
ضابط شرطة ضابط طيران ضابط بالحرس مايهم .. اهم شي اصير ضابط .. ان شاء الله ضابط ايقاع

س1/ اين ترىى نفسك في بوتقة العالم الحاصلة على شهادة ايزو2220 في ظل النظام الجمهوري في مملكة ايران ؟؟ وهل تؤيد فصل العراق عن الدول المجاورة بحيث نزعها عن الخريطة ووضعها كجزيرة في المحيط العربي؟؟ وكيف ستعمل البطارية اذا لم يكن بها اســيد ؟؟
<><يازينك وانت ساكت
يازينك وانت ساكت
لكن نزع العراق شي .. لو بيدي نزعتها عن خريطة العالم كله مو بس انزعها عن الدول المجاورة ;)

تحـيــاتــي لك اخوي هلالي الجوف
ياهلا والله ومرحبتين اخوي

وان شالله ما ثقلت من الاسئلة والعــذر والــســموحــة
لا عادي عنوني ماثقلت ولا شي .. ومافي داعي للاعتذار

عوووووووودنا مع مشاركة الصوت الهلالي

هلا وغلا بقلب شبكة الزعيم .. الذيب (( هلالي الجوف ))
هلا والله بشعلة اللجنة الاخبارية هلا بالغالي ثامر .

ما ودي أسألك مثل أسئلة الوليد عشان لا يضيق صدرك
وش دراك ان اسئلة الوليد تضيق الصدر ;) مايكفي نحشه بالتلفون بعد نحشه بالمنتدى

س1/ كم مره دخلت على (( شبكة الزعيم )) من يوم تسجيلك فيها ؟؟
أتحداك تجاوب يا ولد الجوف
يازينك انت وهالسؤال
لكن بجاوبك اذا علمتني انت كم مرة دخلت
ومادام بها تحدي ماني مجاوب .. هاه وش براسك ( واحد مطلع لسانه )

س2/ ماذا يعني لك (( الصوت الهلالي )) ؟؟ هذي من الوليد
مدامها من الوليد فالصوت الهلالي هو نغمة هلالية حلوة نسمعها كل صباح ;)
والصوت الهلال العضو بالمنتدى هو اخ وصديق عزيز تشرفت بالتعرف عليه قبل اكثر من سنة .

س3/ ماهي أجمل بطولة حققها الهلال من وجهة نظر هلالي الجوف ؟؟
بطولة اسيا 92 .
حتى اذكر اني سافرت من الجوف للرياض لحظور حفل التكريم اللي أقيم بالنادي يوم الاثنين ورجعت يوم الثلاثاء

ما ودي أكثر أسئلة بس كنت لازم أشارك في موضوعك يالغالي
تسلم والله يالغالي .. وعقبالي ما اشارك بموضوعك ;)

خاصة وهي أول مشاركة لي في منتدى المجلس العام منذ الـ3 أشهر الأخيرة
ومن زينه ... مابه الا السبانخ وريحة الكشنة

وأتمنى من المشرفين على منتدى المجلس العام الإعلان عن مثل هذه الإستضافات في منتدى الجمهور لأني متأكد بأن الكثر لا يعرف عن هذه الإستضافة المميزة منكم لـ( ابوعبدالرحمن )
اقول لايكثر هذا وحنا بدون اعلان وشلون لو يسوون اعلان

وللجميع تحياتي ;)
ياهلا والله فيك باسم جميع اعضاء المطبخ العام وهالسنة

هلا والله ابوعبدالرحمن ..

هذي اول مره اشارك في المنتدى العام ويسعدني انها تكون في هذا الموضوع ..
الصراحة عندي كم سؤال واتمنى اني ما اثقل عليك .

## كم ساعة تدخل فيها النت ؟

## هل تجيد اي برنامج في الكمبيوتر (الفوتوشوب ، الفلاش ....... الخ) ؟

## ما رأيك بخدمة الانترنت في المملكة ؟ وهل هناك اقتراحات لتطويرها ؟

## ما رأيك بشركة الاتصالات السعودية ؟ وهل تؤيد السماح بانشاء شركات اتصالات اخرى غيرها ؟

## ماذا تفعل لوكنت بغرفة فيها بن لادن و جورج بوش ؟


وشكرا