بسم الله الرحمن الرحيم

فليعذرني الجميع الموضوع راح يكون بالعاميه علشان توصل فكرته للجميع ..

بدايةً يعلم الله أني ما زعلت على خروج الهلال من بطولة كأس الملك ، قد ما فرحت بعودة الروح الهلاليه ، بعد مستوى البارح صار واضح أن الكائن اللي يسمونه ( كالديرون ) كان لاعب بنفسية اللاعبين لعب مو طبيعي بالذات بالمبارتين الاخيره مع الاتحاد ، واللي الكل يعرف أن مصل هالمباريات يحضر لها نفسياً بشكل كبير والدليل طريقة تعامل أبو عبد الله وفيصل أبوثنين مع اللاعبين وتحضيرهم نفسياً لهالمباراه أللي سيطر على جزء كبير منها لاعبين الهلال .

ما أدري إذا يوافقني الجمهور أن سامي أثبت أنه قادر على قيادة الفريق كمدرب مع الإستعانه بفيصل أبوثنين كمدير للكره أو كمساعد مدرب ، أللي أقصده هو الإستعانه بقدامى الهلال من الكفاءات أللي قادره تأثر على اللاعبين نفسياً ، ففريق مثل الهلال لا يحتاج إلى معجزه تدريبيه والدليل أن الهلال أكمل بقية مباريات الدوري بعد رحيل غيرتس مع مدرب أقل من عادي ، وهذا دليل ثاني على أن الهلال محتاج لشخص ( محبوب ) من اللاعبين ، وأعتقد أن سامي الجابر أنسب شخص .

حاجه مهمه حاب أتكلم عنها بخصوص تدعيم الفريق باللاعبين الأجانب ، صار واضح الآن للإداره أن الفريق يعاني من ( عقم هجومي ) تسبب في ضياع أكثر من مباراه علشان كذا ومن وجهة نظري أتمنى إدارة الهلال التركيز على 3 مراكز ( الهجوم - صانع اللعب - الظهير الأيمن )
بالنسبه للمهاجم يجب أن يكون سفاح بكل ما تحمله هذه الكلمه من معنى يجب أن يكون ماكينة أهداف متحركه يستغل أرباع أرباع الفرص لا يكل ولا يمل من الأهداف ، أما بالنسبه لصانع اللعب فيجب أن يكون من أمثال لاعب العين السابق ولاعب بالميراس الحالي فالديفيا يجب أن يكون لاعب مهاري من طراز رفيع يعرف مكان المهاجم من غير ما يشوفه ، بالنسبه للظهير يفضل أنه يكون سريع ويملك لياقه عاليه بالإضافه للأوفرات اللي من نوع بالملي ميتر يا حبيبي بالملي متر .

شيء ثاني حاب أتكلم عنه وهو موضوع الحكام الأجانب للموسم القادم ، ممكن يجي شخص ويقول بدري ، لكن أتمنى ما نستعجل بالحكم ونشوف ممكن الكلام أللي بقوله يقنعكم ، طبعاً كلنا نعرف أن جدول الدوري راح ينزل قبل فتره من بداية الموسم بعد نزول الجدول أتمنى من إدارة الهلال عمل إجتماع مع الجهاز الفني لتحديد المباريات أللي يحتاج فيها الفريق على حكام أجانب ، الغرض من هالشي هو الحصول على حكام فئه A وهالنوع من الحكام لازم تطلبه من بدري مثل حكم نهائي كأس ولي العهد الماضي وهذا أللي صرح فيه فيصل العبد الهادي قبل فتره بخصوص هالموضوع ، أو مثلا تراسل إدارة الهلال لجنة المسابقات للدعوه لعمل ورشة عمل ومن خلالها يتم تحديد المباريات أللي تحتاج لحكام أجانب لجلب أفضل الحكام .

بالنهايه أحب أشكر كل من يمثل الهلال إداره و لاعبين وجهاز فني وحتى الجمهور أللي ساند اللاعبين طوال هذا الموسم القياسي أللي أختتمه زعيم آسيا بحصوله على بطولة الدوري بدون أي هزيمه وحصوله على كأس ولي العهد للمره الرابعه على التوالي .



أكتفي لين هنا ، يشرفني أقراء آرائكم وإنتقاداتكم
تحياتي للجميع

سوالف هلالي