الهلال و عشقه ؟! - نادي الهلال السعودي - شبكة الزعيم

أبوعبدالله الجنفاوي · #1 01/06/2011, 02:47 AM

/
الأمير عبدالله بن سعد رحمه الله وأموات المسلمين يشجعنا .
صالح النعيمه وراء الدله

ريفو أبيض وأسود .
شجعت الهلال قبل حتى أعرف ألوانه ؟

ريفالينو .

هذا اللاعب لي قصه عجيبه معه .
ومنها كان عشقي للهلال الكيان النادي الملكي الزعيم فخر الأمة .
كنت طفل ، في الرابعه من عمري .
في قرية كانت نائية ...... في جنوب حائل . هي قريتنا ( غمرة )
لخالي مجلس دائم ،، لايخلو من الرجال وكان من ضمنهم مدرس بعد كذا بسنتين درسني هو المربي الفاضل
عبدالرحمن صالح التميمي ( على ما أذكر ) الله يذكره بالخير من أهالي قرية ( المستجده ) بحائل .
معه جريدة الجزيره وهو داخل على مجلسنا ناداني وقال تعال شف الصور وكنت بجانبه وانا أسوي كذا >>

وكانت الصفحة الرياضيه وبدون ألوان . وبها صور كثيره منهم لاعبين للإتحاد ( الفريق المخطط

) وفريق عليه رسمة ( أرض فضا ) من خلال لاعب مكدش كدش مكدش ......

وبجانبهم صاحب الصورة أعلاه ( فيما بعد عرفته أنه ريفالينو ) كابتن البرازيل ونجم الهلال .. المهم قال وش تشجع . من هذولا ،، ( غطيتلوه بصبعي هذا ) وكنت أشر على أبو شنب ريفو

والله العظيم .. فسبحان الله الفطره السليمه تقود صاحبها من غير أحم ولا دستور .( زي ماقلت عشقت هذا الكيان قبل حتى لا أعرف ألوانه )

فوجدتني أغوص بموج هذا النادي وأحبه وأعرف ان رفلينو هو المدفعيه وأعرف حتى من جابه للهلال

وكبرت وفي عمر الــ 12 سنه . سكنا الرياض وشوي شوي الا انا ( صالح النعيمة

) نعم صالح النعيمه

الأمبراطور بكل شي الى درجة أني أريوس زيه ههههههههه عند ما أشوت فاول لا وأرفع يدي وأشر على الهجوم حتى لو مافيه أحد منتبهلي .... أحضر انا ومسفر القحطاني من المدرسه الى ملعب الملز

ونتكي عند مدخل لاعبين الهلال . ويجي واحد ويصورنا للنادي وحنا أنواع الفهاوه وكل واحد ماسك بيرق .. يمر علينا الرمز الهلالي الأمير عبدالله بن سعد رحمه الله وهو يضحك ويشجعنا وحنا نطير بالعجه .
بعد كذا كنت أصغر مدافع بمنتخب مدرستي وكنت مطقم هلالي والكنادر الشراع البيض الي فيها ثلاث خطوط أزرقين والي بالنص أحمر أشيله

وكان بمدرستنا مدير طائرة الهلال الأستاذ صالح الشنيفي جاني وقال تسجل بالهلال بغيت أنصفر من الوناسه قلتله لا قال ليش ماتشجع الهلال قلت ولا احبه قال ورقم خمسه والطقم الهلالي شوي قلت تكفى يرحم والديك سجلني بس خل الوالده توافق ( مالها غيري الله يحفظها والوالد متوفي ماشفته ) قام وقال باكر بجيبلك ورقة تسجيل بالنادي ويوم جاء باكر الا انا اول واحد عند باب المدرسه قابلني وعطاني مدليه زي حقت الفلوس الي فيها صور رفلينو وصالح ونجيب واليوسف والغانم و القحطاني وأضن العبودي والمهنا . المهم قال ذي توديها لأهلك وان وافقو بلغني وان ماوافقوا بلغني وأروح معك قالت الوالده وشي هذي قلت تسجيل بالهلال قالت وانا مالي غيرك وأشوف اذا طاح احد وهو مايقربلي أنغثيت والله ماتسجل .. فضعت وضيعني صالح النعيمه .. وأنتهى حلمي والا انا من جيل سامي وصفوق وابواثنين وعلى فكره كلهم يعرفوني بس خلوني ساكت .. آه يازمن .
كبرت وكبر الهلال معي . تزوجت و وجاء خالي الله يحفظه من حايل .. وكان عندي صوره كبيره لأبو أشواق أبوفهد الأمبراطور صالح النعيمه وهو واطي على الكره وحاط يده في خصره بفنيله زرقاء وحدر الصوره ختم أستوديو الهدا

وكنت حاطها ورا ،، أكبر دله عندي بالمجلس فماكان من خالي الا وقال منهو الي ورا الدله قلتله هذا صالح النعيمه هههههه ضحك وقال الظاهر يبيلك كوي

.
لأنه آخر أهتماماته الكوره ولكنه يميل الى الهلال وبالفطره ....
هنا بإختصار قصتي وسبب عشقي للهلال ... وطينتها بعد كذا بالعزيز الكابتن الفيلسوف الكبير يوسف الثنيان وبالصديق الكابتن الكبير سامي الجابر وأبناء العم صفوق ونواف والعزيز فصل ابوثنين ورفاقهم ..
حتى عبده صبياني يوم يبني فلته بأرض جاره ههههههههههه أعرف سالفته وهو مايدري اني أدري . ألين صارت عظم وبعد كذا قام الجار وقال تراك باني في أرضي هههههههه .
بالنهاية أتوجه للكل هنا وأقول أكتبوا كيف عشقتو الهلال ...
عندي ولد ولله الحمد جاني له الآن سبع شهور ونص

فايز الى الآن ببطولتين وطقيتله طقم من المتجر ..
وكان مبسوط فيه وكأنه يدري اني ما اردت له الا الخير .
وتصبحون على خير .
وفق الله الهلال بكل حال ومجال . دمتم بخير .
أخيرًا آخر مره .. لاتقسون بالنقد على الكاسر ورفاقه فالهلال قبل ان نعشقه هم يدركون تمامًا حبنا لهم والعتب من المحبه .
ذا آند << وده يتفلسف بس مايعرف أنقليزي .