27/05/2011, 01:36 PM
|
 | زعيــم فعــال | | تاريخ التسجيل: 22/04/2010 المكان: الرياض
مشاركات: 212
| |
|
ابو سعد وحرقهم لشماغه...ووش صار له... طيب وش دخل الهلال..!
اهلا يازعماء ويافضلاء (اظاهر داخل على مشايخه) بادئ ذي بدء صلو على حبيب الله محمد.... المهم الجو العام في المنتدى متكهرب والله يستر لايلتمس علينا احد لان الشباب الله يعطيهم العافية شابكين 220 وشغالين اللي ينقد منا واللي يحاول يهدي منا والثالث كل شغله الشاغل انه يزيد مشاركاته...تلقى الموضوع حامي والشباب داخلين جو يجيك اخينا مصطفى يرد<<<<<<< ابغى افهم وش هالرد يمكن له معنى بحكم الكبر ماافهمه..اللي فهمته ابو الشباب والله مايدري وش الطبخة الناس تحاول تكمد والثاني يلكم وذا داخل بمشط حتى يحسسهم انه موجود.....
ايييه...وش سالفة ابو سعد... هذا واحد من الشيبان يسولفلي منذ مبطي... يقول والكلام على لسان الراوي( مسوي محمد الشرهان) المهم طبعا الاولين كان اللي مايصلي صلاة الفجر يحرقون شماغه..قمه في اصول التعذيب..طبعا الشماغ كان يعنيلهم الشرف او الفقر..(قمة في المفهوم) الشرف يعني شرف اكيد واضحه والفقر انه مسيكين ماعنده قيمة الشماغ يشتري بداله..النتيجه الفضيحه وماادراك ماالفضيحة ولا عاد الاولين ماشاء الله تبارك الله مافيهم الطنازة ابد ولا اللقافه هذي مب في قاموسهم الاجتماعي.. ابو سعد رجال مسيكين في حاله، في يوم من الايام ماصلى الفجر في المسجد وقامت الحملة العظمى في تاريخ الحارة واحرقو شماغ ابا سعد..
المهم اليوم الاول ابو سعد يقول والله ماعلي منهم بروح وبجي واللي يصير يصير ومع مرور الايام والطنازة تلاحقه وين ماراح جاه احباط يحياتي عشان شماغ..ايه عشان الثنتين الصلاة والشماغ مب بعضنا الحين الله يخلف لاهو في فالح في صلاه ولايعرف وشو الثوب هذا ودك تحرق شوشته وبنطلونه واظاهر بعد ماعنده مشكلة..والله جاينا جيل عبط بط يعني عبيط وهو الي الوحيد الي فاهم الدنيا...نواصل مع كثرة الانتقاد والطنازة ماذا حل بابو سعد؟ صار الرجال يحسب لطلعته الف حساب ويقولبها يمين ويسار ها اطلع ولا لا..الرجال تأثر والسالفة طويلة بس في النهاية ابو سعد مات الله يغفر له ويرحمه ويغفر لموتى المسلمين..
الحين ابو سعد تاثر من سالفة شماغ وبعضكم مهب كلكم شغال جلد في الادارة واللاعبين ولا يجي من البعض اللي يقول غيرو الفريق كله وحطو هذا ودخلو هذا...وييين يبو اظاهر نلعب سوني...صحيح فيه اخطاء وفي قصور من بعض اللاعبين ولكن في نفس الوقت فيه انجاز عظيم وسيذكره التاريخ زي ما غثنا التاريخ بانجاز الاتفاق..يا جماعة ترا خذنا بطولة الدوري ولاانهزمنا ولا مباراة وخذنا ولي العهد اربع مرات ورا بعض..لايجي واحد ويقول طيب مستواهم فشلنا هم كل سنة في اسيا كذا...خلاص قلناها واكيد الاداره مب عاجبها الوضع وقالت راح يكون في تصحيح..خلاص انتقدنا بما فيه الكفاية..الحين وقت اللمة لانصير عاطفيين ارشوكم.. عندنا كأس الملك وترانا ماقد خذناه والى اصابكم الكبرياء والغرور ماتبغون محلي...يعني نقفل طول الموسم وناخذ اجازة واذا جات الاسيوية نفتح هذا اللي تبونه...
طيب وش علاقة ابو سعد المسيكين في الهلال...علاقته ياحبايبي ان احيانا النقد اللي يوصل للتجريح سواء للاعبين او الادارة يحطم..ممكن ليش لا الحين الادارة تقول الحين جبنالهم هالبطولات وبارقام صعب اي نادي يكررها الا اذا حجت البقرة على قرونها وشوله اجل نتعب وندفع من جيوبنا واخينا في الله مرتكز على النت حتى مايحضر المباريات وشغال تنتيف يبرز عضلاته اظاهر ماعنده اخوان اصغر منه... ياجماعة الخير محد ضد النقد و كلنا نبي الهلال يصير احسن فريق بس لانصير مثل بعض جماهير الاندية اللي شغلها تنتف كل شئ ادارة ولاعبين وحكام واتحاد ووو...الحمد لله على النعمة والله لايبلانا وتر ريال مدريد اخر خبريبه في كأس اوروبا 2002 هدف زيدان الشهير..ضره شئ..لايلعبون عليكم الاعلام والجماهير الثانية ويحاولون يحطمونكم امنيتهم ترا ياخذون الاحتياط اللي عندكم وياخذون نص بطولة...
وفي النهايه اذا صار اسلوبنا كذا فراح نضغط الادارة ونضغط اللعيبة في اسيا وراح تصير مستعصيه صدق..انتقدو بس مب حلا ولاتجرحون انا مب قاهرني اللي يقول غير الفريق كله ودي اعرف وش يفكر فيه وشلون هالفكرة العظيمة وصلت له...وصدقوني حبه تعديل نفسية ومع مهاجم اجنبي والدفاع يشوفون له حل واسيا بتجي لسيدها منطاعة....
تقبلو كلامي بصدر رحب وعلى البطولات نلتقي... |
الوضع العادي
