نادي الهلال السعودي - شبكة الزعيم - الموقع الرسمي - زيارتي لملعب الإمارات .. وحضور مباراة أرسنال , برشلونة

أولا ألف شكر والله يعطيكم العافية اللي شاف الموضوع واعجبه

وان شاء الله يكون التقرير حاز على رضاكم

بالنسبة لأغلب التساؤولات كانت عن الأسعار والتكلفة واللغة سواء هنا او بالرسايل الخاصة

إقتباس:

الرسالة الأصلية كتبت بواسطة نـواف الهلالي (مشاركة 17676728)

بس سؤال إذا ما فيه إشكال .. كم يوم جلست بالضبط .. وكم صرفت بالريال من الفيزا والتذاكر لين رجعت كشخص واحد ..!

إقتباس:

الرسالة الأصلية كتبت بواسطة ! Mr.Relax ! (مشاركة 17676775)

س \ آلرحله ككلَ كم كلفتك

س\ آللغه آلأنجليزيه لأزم تكون توبَ علشأن تتعآمل معهم ولأ عأدي تلكيشَ :d:smilie47::smilie47:

إقتباس:

الرسالة الأصلية كتبت بواسطة المعاتب (مشاركة 17677700)

.. ومثل مال سألك أحد الآعضآء الرحلة ككل كم كلفت ,
عشآن نرعف نجمع ولا نهون أو نأجلهآ :d ؟

إقتباس:

الرسالة الأصلية كتبت بواسطة Ops (مشاركة 17678638)

^
ماشاء الله فآل خير ع الأرسونال يا يحيى :d

بس كيف اللغه ..؟ يعني يمدي الواحد يسلك لعمره هناك ؟

بالنسبة للأسعار تفاصيلها كـ التالي :

480 ريال قيمة الفيزا البريطانية

تقدمها عن طريق مكتبهم اللي في السليمانية
صورتين 4*6 عاري الرأس <خخخ يعني ماعليك شماغ مصلّع بالعامية
طلب التقديم < هذا تلقاه عندهم وفيه ناس برا تعبيه لك بـ 50 ريال للطلب
كشف حساب .. باللغة الانجليزية لأخر 3 شهور .. وفيه ناس قالت لي لازم يكون بحسابك 10 الف ريال.. فحولت لحسابي 10 الف رغم انهم ماطلبوا مننا شي بس انا حولت عشان مايقعدون لنا شي
تعريف من العمل انك على رأس العمل وبراتبك باللغة الانجليزية

طبعاً هذا الكلام للموظفين .. لكن الطلاب او العاطلين الله يوظفهم .. ماادري والله هل لازم نفس المتطلبات او يختلف الموضوع

تذكرة الطيارة :

انا حجزت تذكرة بـ 1900 ريال من الرياض الى لندن .. لندن الرياض دايركت مافيها ترانزيت لاي بلد ثاني

بس تأخرت بقص التذاكر فراح علي الحجز وارتفع السعر وقصيت التذاكر بـ 2650 ريال للشخص .. انا غلطان يوم اكتبها 2900 بالموضوع .. انا اسف :(

الفندق 4900 ريال من يوم الخميس 8 ايام الى الجمعة اللي بعدها طبعاً قطية بيني وبين خويي يعني قطيتي 2450 ريال

مصاريفي هناك ماتعدت 3000 ريال
لاني كل روحتي عشان المباريات

المباراتين قصينا تذاكرهم غاليات شوي لاننا انضحك علينا خخخ

الفندق عطانا تذكرة وولفرهامبتون بـ 150 باوند = 900 ريال تقريباً

مباراة برشلونة لقيناها بالسوق السوداء بـ 200 باوند = 1200 ريال تقريباً

يعني كلها كلفتنا 2100 ريال للشخص الواحد تذكرتين للمباراتين

طبعاً سألنا النادي بكم التذاكر اسعارها الرسمي
صارت مباراة ولفرهامبتون = 40 باوند = 240 ريال
مباراة برشلونة = 70 باوند = 420 ريال

بس طبعاً لازم تكون عندك عضوية وكذا وتشتريها من الموقع الرسمي وسفرتنا جاية سريع سريع فما قدرنا نسوي هالحاجات

طبعاً لندن كلها تتمشى فيها على رجليك والمشاوير البعيدة بالميترو

الميترو اشترينا من محطة الميترو اللي بالمطار بطاقة اسبوعية لكل شخص مننا قيمتها 30 باوند = 180 ريال .. تدور فيها لندن مدة اسبوع وتركب الميترو من اي مكان تبيه في لندن وتنزل باي مكان تبيه بأي وقت دام الميترو شغّال
واذا قفل الميترو الساعة 12 بالليل

البطاقة تتضمن الباصات اللي موجودة مدة 24 ساعة
يعني ماراح تبلش ابد

مرة توهقنا وركبنا تاكسي من مكان تقريباً كأنك بمخرج 14 .. ورحنا لمخرج 16 عن طريق الدايري الشرقي بـ 120 ريال خخخخ قلنا عقبها توبة ههههههههه

بشكل عام تكاليف السفرة كالتالي :

480 فيزا بريطانيا + 2650 تذكرة طيران + 2450 قطية فندق + 2100 تذاكر مباريات + 3000 مصروف جيب = 10680 ريال

اسبوع كامل لفيت فيه اغلب لندن

طبعاً بالنسبة لـ اللغة الحمد لله انا ماعندي مشكلة باللغة .. لكن خوينا اللي راح قبلنا دااااج لالغة ولاشي .. ويقول مشت اموري .. بس اللي يطقطق انقليش يبي يمشي حتى انا اللي يقالي اوكي بالانقلش اكلت تراب مع لهجتهم البايخه .. واوك ياجابوا لي المرض وعجزت افهم شي .. قلت شكلي دلخ مااعرف انجليش وبيّنت على حقيقتي يوم جيت بريطانيا .. سألت وطلعوا نص العالم تعاني زيي هههههههه لهجتهم بجد بايخه ومضخمه بشكل بايخ :(
نصيحة .. مامعك لغة كويس لاتتوهق :d

إقتباس:

الرسالة الأصلية كتبت بواسطة الخبراء (مشاركة 17681520)

صح اخوي :smilie47:منتب سهل .. خابرك تقول ابطلع عمرة !!:d وش هالعمرة اللي تقعد اسبوع :s2:

سرد قصصي ممتاز .. ولاتنسانا بافتتاح الديلي البي:smilie47: خاصة بعد المكرمة :d

اخوي الصغير :smilie47:
هههههههههههههه اجل عمره يالنصاب؟ .. اشوا اني قايل لك قبل امشي باسبوعين
شف يااخي الجميل .. انت فيك نوع من الغباء .. والا المفروض تستغلني دامي عزابي وماعندي شي , بكرة ان شاء الله باعرس واسحب عليك انت ووجهك .. سبق وعرضت عليك عروض كثيرة بس انت ماتستفيد مني :(
الحين اعرض لك عرض اخر .. اختر اي شهر من الموسم الجاي ان شاء الله وننقز انا وياك نحضر مباراة للريال في اسبانيا .. ونلحقها بطيارة لتورينيو ونحضر مباراة لليوفي .. محفول مكفول يااخي الصغير .. بس طلّع جوازك وقدام :smilie47: كم لي من نايف انا
<< الأخ الحنون ههههههههههه

إقتباس:

الرسالة الأصلية كتبت بواسطة s.Milandini (مشاركة 17687451)

موضوع للمفضلة :smilie47:

أما خويك يوم يطلع قدامه 700 باوند :razz: وأنت تو تقوله ما معنا ألا 400 ههههههههه
رحلة فله ووناسة :s2:إلا ما ودك أصير من أعز أصدقاءك ونحضر في السان سيرو :d

أتوقع كل واحد منكم كلفته الرحلة من الألف إلى الياء ( 10.000 ) ريال .. ولا ؟

تقريباً يابوالعز .. مبلغ مقارب منه زود عليها الف بس

إقتباس:

الرسالة الأصلية كتبت بواسطة hilalemooot (مشاركة 17688189)

.

السلام عليكم
هلا يحيى .. هلا بالبومة (بشهادة مشجعين الريال انا مالي دخل :s2:)
يسعدك ربي وعدت و أوفيت وكفيت و وفيّت :razz:
تقرير بطل ويعجبني انه جاي كذا بالعامي اطلق بكثير .. بالنسبة للملعب فخم .. للاسف ما حصلي فرصه ازوره مع اننا ضربنا مشوار للنادي بس لما وصلنا قالوا مقفلين تعالوا بعد يومين .. وللاسف بعد يومين كنا رايحين لمدينة ثانية فما حصل فرصه .. غير كذا اللي معي مالهم كثير بالكورة فـ قلت ما بدهاش الديرة يبيلها زيارة ثانية ومعك واحد حق كورة ومخمخ انت وياه ومر مانشستر بعد s121s:smilie47:

بالنسبة للتكاليف كثيرين يظنون ان السالفه يبيلها مبلغ جامد وانا واحد كنت افكر كذا بس لما رحت لقيت عكس هالشي تماماً .. هو اهم شي الواحد يفتك من التسّوق ولا يعلم احد انه رايح علشان محد يطلب منك شي خخخخخخخخ :s2: .. فـ نصيحة لاي واحد لندن وملعب الامارات يستحقون الزيارة :smilie47:

ماسويت شي يا خلفهم تستاهل كل خير :smilie47:
اشكرك على التقرير .. وكذلك على التقارير اللي كنت ترسلها بالبي بي كانت بطلة صراحة .. وان شاء الله يصير لنا فرصه ونروح سوا :wub:

:smilie47:

افا :( .. منيب بومه حرام عليك .. شف القنرز مغطوا الدريم تيم لأني حاضر .. لكن لو اني ماجيت كان مسخروهم :(

ولو يابوحميد بيّض الله وجهك يابعدي ماقصرت والله .. عطيتني معلومات كثيرة افادتني كثير.. وان شاء الله ننقز لمدريد انا وياك .. وش رايك ؟ :d

إقتباس:

الرسالة الأصلية كتبت بواسطة فتـى بريده (مشاركة 17688181)

s2:

الحمد لله على السلامة ولو أن وجهـتكـ لم تروق لي ولكـن الف حمد لله على السلامة .,:smilie47:

ونسيــت يوم أهســك بالسـوني ولا ماتبي أذكـركـ:naughty:

يحي مارديـت على الرسالة الخاصة:mad:.,

المهـم بسألكـ .,

أنا عطيل ومبسوط :d المهم ودي أطلع فيزه سياحيـه أوربيـــه , شلون أدري تقول شرحته لكـن

ماعندي رأس عمل ومدري وش بعد ,يصلح أجيب أني عند عمي بمحل تمر مثلاً:s2:

المهم وش اسوي بالظبــط ,

فهد .. بخصوص السوني .. الشهود كثير اني فاسّك فسّ :d .. لذلك لاتجيب الكلام لنفسك ياصاحبي

اما بالنسبة لتساؤولاتك الجميلة صار بيننا الو وعلمتك باللي اعرفه .. وان بغيت شي ابد دق علي بأي وقت تبيه

إقتباس:

الرسالة الأصلية كتبت بواسطة فتـى بريده (مشاركة 17688440)

ثانكيـــو ., يالغالي بس نبي العلم الأكيد .,

الشي الثاني بسألكم عندهم شغل الرائد والهلال يعني مثلا لو أجي قبل المباراة بكم ساعه أقدر أحصل تذاكر

ولا لازم تحجز ومدري وش بعــد .,

لا ابد لاقصيت تذكرتك ورسمية .. لانو فيه ناس تبيع تزوير لكن لاصارت تذكرتك رسمية ومامنها خوف .. تعال قبل المباراة بـ 3 دقايق بتلقى مقعدك جاهز لك

لبى النظام اللي عندهم ياشيخ

عموماً اللي عنده استفسار او اي شي .. يسأل حتى لو في الرسايل الخاصة او الجوال

وبالتوفيق للجميع

سلاام