المحور الأول :
هل وفق المدرب بأختيار التشيكلة المناسبة للمباراه؟وهل تم توظيف اللاعبين بالشكل المناسب؟ وما رأيك في تغييرات المدرب كوزمين؟
قبل ما أبدأ أنتقد المدرب في المباراة هذي والمباراة اللي قبلها لازم أبدي احترامي لأسلوبه التدريبي الراقي ، ولفريقه المتكامل واللي قدر يحقق من خلاله بطولتين ، يعني نقدر نقول 50% من بطولات الموسم رغم كل الضغوط اللي واجهها وهذا يدل على انه مدرب فاهم ، وفهمه يتجاوز حدود المستطيل الاخضر إلى فهم الروزنامة الهيروقليفية اللي مألفها الاتحاد السعودي والي تصعب قراءتها على أي مشعوذ ...
بالنسبة للمباراة .. التشكيلة طبعا ما كانت تدل على جدية المدرب في الهجوم ، بل حاول يظهر للفريق الاتحادي ان طريقته ما تغيرت ، يعني مفاجأة بطريقة عكسية ، لأن الاتحاد أكيد منطقيا راح يكون مستعد لتشكيلية هلالية كاسحة ، وهذا طبعا خطأ من مدرب الهلال والمفروض يدخل المباراة بهجوم ناري حتى لو لعب بنفس الأسماء يعني مثلا بدال ما يلعب بخمسة وسط وياسر لحاله في الهجوم كان ممكن يلعب بثلاثة مهاجمين صريحين ، بمعنى ان ياسر يتم مساندته هجوميا من قبل الشلهوب على اليسار والفريدي على اليمين واستعمال المثلثات على حدود منطقة الجزاء خصوصا وان دفاع الاتحاد ممكن اختراقه بسهولة ... وما يحتاج يركز على صناعة اللعب كثير يعني يكون واف وعزيز والغامدي كوسط مساند للدفاع ويستخدم الهجمات السريعة المرتدة اللي تعتبر في صالح الهلال ، وميزة الهجمات هذي انها ما تفتح اللعب للاتحاد اللي تعتبر 95% من خطورته هي في المساحات المعطاة للحسن كيتا ..
أما تغييراته ماكانت تدل على رغبته في تسريع اللعب ، وإدخاله للاعب ليلو يدل على انه يحاول يقنع نفسه بالغصب في مستوى ليلو مع انه اصلا غير مقتنع فيه ،،، ومالها تفسير غير هذا خصوصا وان اللاعب مستواه غير مرضي وما كان يطقها لا اساسي ولا احتياطي في كثير من المباريات


المحور الثاني :
هل كان ضعف في خط الهجوم رغم مشاركة (ياسر و ليلو) أو ان الوسط لم يكن بالصوره المطلوبه مما سبب
تأثير كبير على خط الهجوم؟
ماهو رأيك في التنظيم الدفاعي للفريق,وهل كان الهدف الاتحادي مبكر سبب تأثير على اداء الفريق في بقية المباراة
أم ان هناك عدم ترابط وانسجام في بقية المراكز الاخرى ؟
النقطة الأولى تم الاجابة عليها سابقا ، وبالنسبة للتنظيم الدفاعي بصراحة اذا هدف دخل في الثانية 30 فهذا أكبر دليل على عدم التنظيم الدفاعي



المحور الثالث :
هل اجانب فريق الاتحاد احدثوا الفارق الكبير في النتيجة والأداء مقارنه بأجانب الهلال ؟
وماهو تقييمك لأداء لاعبين الهلال ومن هو اللاعب الذي ترى أنه كان من نجوم المباراة ؟
ومن اللاعب الذي ترى أنه لم يقدم المستوى المأمول؟
ليس اجانب الاتحاد بشكل عام ، ولكن كيتا بشكل خاص لأنه سريع جدا ، الفريق الاتحادي ما يحتاج إلى أي مهارات أو تكتيك أو أي شي ، فقط مهارات فردية وارسال الكرات بشكل عشوائي لكيتا اللي يستفيد من تقدم الهلاليين الغير محسوب ، وبالنسبة للاعبين الهلال كلهم ما قصروا باستثناء العنقري لأن أداءه متوضاع الله يعينه ، وما أجد أي مبرر صغير لاقتناع المدرب فيه ، لكن المفرج ورغم عدم رضاي عن امكانياته الا انه قدم مباراة كبيرة







المحور الرابع :
ماهي رؤيتك الخاصه عن ماحدث بالمباراه (( مساحه حره للعضو ))
الحقيقة بغض النظر عن المباراة السابقة أو التحكيم غير المرضي أو القرارات الإدارية اللي استهدفت الهلال ... لكن المباراة هذي احنا عارفين قبل ما ندخل ان الاداء لوحده ما يكفي ... الاداء والنتيجة ايضا ما تكفي ... الاداء والنتيجة الكبيرة والمحافظة على النتيجة الكبيرة فقط هو اللي ممكن يرضي الجمهور الهلالي ... عشان كذا اللاعبين قدمو مباراة كبيرة ، ولكنها غير كافية لمسح آثار المباراة السابقة .. أضف إلى ذلك ان النتيجة أصلا كانت مخيبة للآمال في هالمباراة
لكن بعيد عن هالمباراة .. الهلال هو نجم الموسم طبعا ... ومدرب الهلال هو أفضل مدرب في السعودية بدون شك .. وربما في الشرق الأوسط كله .. ولا يعتبر من الحكمة اننا نحكم على مدرب كبير وفاهم بسبب مباراة أو مباراتين .. خصوصا اذا كان حقق لنا بطولتين لدرجة الكبار وتجاوز الصعوبات المخجلة اللي يتمتع بها الدوري السعودي


سلام