هلالية إيطاليه../

يامرحبا والله بالمكالمات التي تجيب لمجلسنا مثل الإبداع والفن ..

الله يكثر اتصالات الأعضاء علشان نشوف هالإبداعات..
والله أسلوبك جدا جدا جدا مشوق وسلس وفكاهي و..بالعربي أسلوبك رهيييييب..ماشاء الله..

نجي لموضوعك..//
شوفي أنا بتكلم بلهجة عامية وبترك الكلام الأدبي على جنب علشان أطلع حررررررتي كلها ..زين..؟!!

شوفي بالنسبة لمنع أهلك لرسوماتك وعدم تتنميتها وكذلك زميلتك الي طلعت من المحاسبة علشان أبوها..فوالله العظيم تنرفزت جدا<<تراني معصب أقسم بالله لحد يكلمني..
تدرون وش مشكلتنا ..؟!! مشكلتنا في هالعادات والتقاليد الماضية كونها سيف على رقابنا وقلوبنا ومواهبنا..يعني صارت العادات والتقاليد مثل الشرع عندنا..؟!! ياناس العادات والتقاليد من طبعها التغير والتبدل ..
اسمعوا وش يقول ابن خلودن في مقدمته : ((..والعادة من شأنها التبدل والتلون..ولاتبقى على حال واحد أبد الدهر..فهي عادة وعرف في زمن ومكان وأناس معينين..سيتغير هؤلاء الناس وتتغير أحلامهم وتطلعاتهم وأنماط حياتهم وبالتالي تتغير عاداتهم تبعا لذلك..فالعادة تتغير..)) هذا كلام ابن خلدون..
وحنا شيباننا معلقين على عاداتهم الي لها سنين ويبونا نكون مثلهم..!!
طيب الدنيا تغيرت والعالم تغير..ياناس السعودية في تركيبتها الثقافية والفكرية والسلوكية والاجتماعية تغيرت لأنها واحدة من دول العالم المتطور ..فكيف بالله تبونا نعيش عاداتكم وتقاليدكم..؟!!
أنا ما أتكلم عن الشرع..فالشريعة لاتتغير..ولكن أتكلم عن آراء وأفكار كانت صالحة في زمان ماضي..فلماذا نعممها على كل زمان..؟!!
والله تراك أثرتي جراحا ملتهبة في نفسي من أيام المتوسط والثانوية ولكني كنت ماكل تبن وعاض على شحم وساكت<<قمة القهر ياعبدالعزيز والله..

بقول لك سالفة بسيييطة :

عندي عمي رجل متدين دا هو وأبناؤه كلهم مطاوعه ماشاء الله..ولايلبسون عقل ولاعندهم تليفيزيون حتى المجد ماعندهم ولاعندهم فيديو ولاشيئ أبدا..
المهم واحد من عياله اسمه عبدالرحمن بأول جامعه الحين..مو زيهم في التدين لكنه محافظ وعاقل..الولد هذا يبي يلبس عقال وأهله رافضين..قابلته في عيد الأضحى الماضي وكان لي معه هالحوار :
- أنا : عبدالرحمن وين شماغك..؟
-عبدالرحمن : في المجلس حاطه هناك..
- أنا: طيب رح البسه بسرعة الرجال عند الباب ..
- عبدالرحمن : ماني لابسه بطلع لهم كذا..
- أنا : ليش إن شاء الله<<قلتها بزعل والله..
عبدالرحمن : أبوي واخواني مايبوني ألبس عقال وأنا ما أحب الشماغ من دونه..
انتهى..
طيب ياعالم أبسألكم..: وش فيها إذا لبس عقااااااااال..؟!! بيكفر مثلا..؟ بيفسق..؟ بيعيبونه الناس..؟
والله حرام الي يصير فينا بعض الأحيان..

* أنا مؤمن بشي في حياتي : دامك ماعصيت رب العالمين سو الي تبغاه وماعليك من الناس..ياناس هذي حياتي أنا.. ليش تبوني أعيشها بأسلوبكم..؟!!
فيه أغنية لنيكول سابا اسمها (أنا طبعي كده) مررررررررررررة حلوة وتحكي الي في نفسي ..

** نصيحتي : طوري موهبتك في الرسم واصقليها ..وخلي رفض أهلك لك دافع وتحدي لتصعدي بها في سلم النجاح..
صحيح لاتواجهين أبوك وأمك بهالشئ لأنه بيضايقهم وهم في الأول والأخير والديك وطاعتهم واجبة..علشان كذا سايريهم وراضيهم ..وفي السر طوري موهبتك ونميها ..دامك ماعصيتي رب العالمين ..ودام هالشيئ مايضرهم في سمعتهم ومكانتهم الاجتماعية وغيره..

** رسماتك مرة حلوة ماشاء الله..وعندك خيال وعاطفة واضحة في رسوماتك..طوريها الله يخليك يا محاسبتنا ..ويارسامة مجلسنا.. علشان إذا تزوجت وجاني عيال إن شاء الله وكلفوهم مدرسين الفنية برسومات أرسلهم لك ترسمين لهم <<مصلحجي هههه
** السديس : إذا سمعت صوته وأنا في الحرم ..أقسم بالله أحس بشعور غريب ..أتخيل نفسي في الجنه<<أقول اسكت بس انت وخيالك هذا..مرة ثانية لاعاد تتخيل..هههههه
** فيه سؤال : الأبيات والخواطر هذي انتي كتبتيها..؟ وإلا من حفظك..؟!!
آسف على الإطاله والخراط الفاضي الي كتبته بس وش أسوي فيك إنتي مواضيعك تخليني أعصب..هههه

..عبدالعزيز..