[مغاط]

مغاط شاب وسيم .. يتميز بطوله الفارع لدرجة إنه يقدر يكبس بالطائرة وهو مبوبز .. ينادونه في أوساطه الأسرية بألقاب عدة منها على سبيل المثال لا الحصر .. أبو خدود تجنن .. و أحيانا ينادونه المدبدب المملوح .. وفي العزايم ينادونه أشرف .. على أشرف قاسم لاعب الهلال المصري منول <<- أمحق وسامة ..
ومن يومه صغير .. ما يقولون إلا ( هات الاطخم .. رد الاطخم ) ..

بس سبحان الله دايم الزين ما يكمل حلاه !! ولم يشأ القدر أن يكون مغاط استثناءا من هذه القاعدة !! فقد كانت مشكلة مغاط أنه ( طبل) !! ما ودّك إلا تناظره بس (لا يحتسى ) !! لأنه يبي يحوقها !!



كبر مغاط وكبرت معه أحلام أمه وأبوه !! اللي دفعوا عليه دم قلوبهم يبونه يصير شي !! ويحقق طموحاتهم وإلا هو فاق إثمه وما يدري وين (رجل) النعجة معه !!

استشار أبوه .. أخوياه وربعه !! عن أنسب مكان يتوظف فيه هالـ ( درو ) ؟! فيه ناس قالوا وظفه بالخطوط السعودية .. ناس فاضية لا شغل ولا مشغلة .. ويتهاوشون مع العالم أكثر من شغلهم .. ولا ترجي منهم لا حق ولا باطل .. والصراحة إن مغاط يبي ينبسط .. ووجهه راكب مع هالوظيفة .. لأنه لا يعرف يتكلم ولا يعرف يبتسم !!


واللي اقترح على أبوه إنه يوظفه بأمانة جدة !! منها إنه يجمع له قرشين حلوات ويأمن مستقبله !! كلها كم مشروع صرف صحي على الطاير .. ويعزّ نفسه ولا من شاف ولا من دري !!



المهم إن أبوه بالأخير .. اقتنع إنه يدوّر له واسطة ويخلونه عضو بـ(لجنة) الانضباط !!
عاد والله من العز اللي يبي يجي مغاط هو وكرشته !! والله يا من التسدح !!
يبي يطقه الفرااااااغ الين يأذن !!
وبيني وبينكم هذي أنسب وظيفة له !! لا يبي لها ذهانة !! ولا يبي لها تفكير !!





" رحلة البحث عن وظيفة" !!


حويس صديق قديم لأبو مغاط وهو مدرس رياضة في معهد صم وبكم كان يدرس به مغاط إلى صف ثالث إبتدائي (لأن أهله يحسبونه أطرم .. الين وصل لرابع وبدا بالعطلة الكبيرة يقول أغــّا و ماما بابا .. وفرحوا أهله ونقلوه لمدرسة حول بيتهم) !! دخل مغاط وأبوه على حويس وعرضوا عليه الفكرة !! وشكى له أبوه حال ولده .. وعلمـّه أن ولده ما تصلح له إلا مثل هالوظائف اللي ما فيها (لا مسؤولية ولا فيها محاسبة ) !! ولا أحد لمهم !!

قال حويس .. طيب هو وش معه شهادة !!
أبو مغاط : هههه يا حبك للتدقيق !! لا تعقد الأمور أنت عاد !!
حويس : طيب هل هو على إطلاع بالقانون !! أو قد شارك في إعداد لائحة تنظيمية معمول بها أو ساهم في نقلة نوعية على مر حياته .. ومشهود له بالنزاهة والأمانة !!
أبو مغاط : والله لو إننا قايلين لك عينــّه (قاضي تمييز) وإلا محقق فدرالي !! ترا كلها لجنة انضباط يا رجال !!
حويس : طيب يعرف وش الهدف الأسمى من أي ملتقى اجتماعي أو تجمع رياضي ، و هل هو على وعي واطلاع بروح اللعبة وأبعادها و على دراية بالمسؤولية الاجتماعية المرجوّه من تمثيله لهذه اللجنة والعمل بها ؟؟
مغاط : ههههههههه يبه والله لو إنهم يبي يعينوني رئيس تنفيذي لهيئة الدواء والغذاء !!
أبو مغاط : على شحم !! ولكن يا أ.حويس تراك مكبّر الموضوع حبتيّن .. ولد خالته وهو متخرج تكييف وتبريد من التقنية .. شفه باللجنة الفنية !! ترا الشهادة والكفاءة مهيب كل شي !!
حويس : طيب هل عنده أي دورات أو شهادات في دراسة السلوك البشري أو العلم الجنائي أو أي دورة تحقيق ؟!
مغاط : هههههه والله لو أني بتوظف بدال أسعد عبدالكريم !! ومزنوقين ولا فيه إلا أنا !!
الأبو : أنثبر وأنا أبوك !! ولكن يا م.حويس ترانا عارفين البير وغطاه .. و يا رجال ترا ربعنا ما معهم ولا دورة اسعافات أولية !!
حويس : طيب ولدك وش يعرف ؟!
الأبو : لا حول ولا قوة إلا بالله !! تراك متغير يا د.حويس !! وولدي ناقص يد وإلا رجل !! يعني هو اللي بلحاله لازم (يعرف) وغيره لا !! حنا نبي للولد وظيفة تستره والعلم يجي بعدين !!
حويس : طيب عساه مهوب هلالي بس ؟ وإلا فيه أحد من عائلتكم هلالي وإلا حدا جيرانكم !!
الابو : لا أعوذ بالله فال الله ولا فالك !!

حويس : لا أجل الأمر هينّ إن شاء الله ..

وراح هو ومغاط وأبوه .. وأنهوا إجراءات توظيفه وشروا له ذاك البشت الحليبي وذيك الغترة اللي ما عندك بأزين منها .. و صدر قرار مباشرة مغاط من بكرة ..




" مغاط على رأس العمل " !!


- خذ يا مغاط هذي دباستك وأقلامك .. وهذا جدول مباريات (نادي الهلال) وهذي مفاتيح درج مكتبك.. يالله تبي شي ؟!!
- مغاط : تعال وش معنى جدول الهلال ؟؟!
- تحسبنا فاضين أنت وخدودك !! وإلا ما قال لك (حويس) إن أيام الأسبوع كلها off إلا إذا صادفت ليلة مباراة الهلال !! إلا تعال لا تصير هلالي أنت ووجهك .. والله إنه باين عليك من يوم سألت !! ياحبكم للأسئلة يالهلاليين !!
- مغاط : لا وين هلالي والله لو إني خالد مسعد ؟! <<-- وش دخله بالسالفة !!
- المهم رح لبيتكم إذا جت مباراة الهلال دقينا عليك !!




" أجندة اجتماعات اللجنة " !!


- بسم الله وعلى بركة الله .. ومثل ما أنتم عارفين !! ترا عيون الصحافة والأعلام مبققة علينا !! كن ما في هالدنيا إلا لجنة الانضباط !! راح نرد أعتبارنا بهالمباراة ونثبت للعالم أجمع أننا قدها !!
- مغاط : يعني فيه دوام بكرة وبعده وباقي المباريات ؟!
- بالله ذا من جايبه ؟! و من هو واسطته ؟!
- يا طويل العمر ذا من طرف حويس .. ولا تخاف مضمون ولا يفتح إثمه بكلمة !!
- المهم .. شدوّا حيلكم وأبي ما تتركون شاردة ولا واردة .. حتى الجمهور أبي بكل زاوية من مدرجات الهلال واحد منكم !! وأنت يا وش اسمك ( يقصد مغاط ) !! أبيك بالدرجة الأولى .. خلهم يقشموّن عليك حب .. ويرجموّنك بـ كيك جبن !! وشف لي أي واحد من الجماهير يقول كلمة !! هاه وإلا هاه !! وأبي تدقون على المصورين ربعنا اللي في القنوات اللي تبي تنقل مباريات الهلال وتخصصون 8 كاميرات ثابته على الجمهور .. يمكن نلقط لنا هاه وإلا هاه !! ؟!
- مغاط : يعني تتوقعون إن جماهيرهم يبيعون ( كوكايين) بالمدرجات ؟!!
- تنكت ؟!
- مغاط : لا وش أنكت ذا مكان عمل طال عمرك ..
- يالله انقلعوا كل واحد يشوف شغله .. مطلعين قرار مطلعينه ضدهم !! ويا حنا يا هم !! قال أيه قال لعب نظيف !!





" الواقع المخجل والنتائج المأمولة " !!


بغض النظر عن المزايا التي أهلت مغاط للحصول على هذه الوظيفة (الكوميدية)!! التي تفتقد لأبسط أبجديات (المهنة) !! وأدنى مستويات (الأمانة) !! فإن أنين الكرة السعودية سيعلو حداءه !! وصرخاته سيستمر عويلها !! قـ ( الحرية المطلقة فساد مطلق ) !! لنفعل دور الرقيب !! و ليقطع دابر الفتنة من جذورها !! لنعود للوراء قليلا ولنكن (أنقياء) في تساؤلاتنا ولنبحث عن مسوغات لهذا التردي الرياضي الذي طحنتنا رحاه !! فحينما تستمر بالعمل بنفس الآلية !! فلا تتوقع أبدا أن تتغير النتائج !! الشارع الرياضي بات أكثر فطنة و المشاهد البسيط أضحى أكثر وعيا وإدراكا !! إذا فلتحترم عقليته !! وليتم انتقاء ( أعضاء لجاننا ) بكل ( أمانة ) و كل ( مهنية ) !! و إن كان هناك من ثقة تطرح !! فلنطرحها في شخصيات غير تلك التي أكل عليها الدهر وشرب والتي وبشهادة الجميع - أثبتت أنها السبب الرئيسي لجميع أمراض الشارع السعودي وانسداد شرايينه !! استجوبوهم !! حاسبوهم !! وحينما يتألقوا ويبدعوا كافؤوهم !!

[شجون الزعيم]

فاقدينك يالاطخم

اشوف خدودك و احسب انك مسوي تفخ لخدودك




ما حاس الرياضة الا حويس ابو الوسايد من يوم هو بزر

واحس ان مغاط لو هو في اللجنه كان صار اذهن منهم




شكرا لقلمك الرائع

[..الاخطبوط الازرق..]

سلمت اياديك ...
مقال رائع ...
تحياتي وودي ...

[ThE HoRizoN]

خذووا مغاط ... ردووا مغاط

في الاول قصه طريفه ولااروع .. تحكي الحال !

وفي الاخير جزئيه تكتب بماءٍ من ذهب ..


رأي
اقسم بالله ان الشق اكبر من الرقعه يااخوان !
ياناس ياعالم ياجمهور يازعماء ..
عدوكم موب ذاا !
والله عدوكم موب ذاا
هذا امعه وحطوه بالواجهه .. والا تخيلوا معاي .. كل شخص الان يحط نفسه مثل مغاط عضو في لجنه !!
وبعد جلسه اللجنه لاتخاذ قرار .. يقرر شخص واحد ؟ انت .. أنت .. ايه انت ياعضو اللجنه ! وش بتكون ردة فعلك ؟؟ على المستوى الشخصي بتكون عنددك ردة فعل حتى لو انك موب هلالي !
لكن اللي ابي الناس تفهمه ان العضو القحطاني .. محطوط على شان الهلال .. ولاهو عدونا ..


سلمت اناملك
مغاط

[السحاب22]

اهلا بكاتبنا الغالي مغاط
كالعاده مبدع
سلمت اناملك

[كريم المشاعر]

شكراً على موضوعك الرآئع مغاط
وهذا هو حالنا في كل مكآن
الوآسطآت فوق الجميع

ولجنه الانظباط شغلها الشآغل الهلال
وعقبال مايكون الفوز هلالي اليوم


شكراً

[الاسطوره ''SAMI ''9]

اهنيك مغاط على الاسلوب الذي شخص واقع اللجان عندنا

وهي أبعد بخمسين سنه ضوئيه عن مايعمل به في الاتحادات

واللجان من حولنا في عالم كرة القدم ....


مغاط (عضو لجنة الانضباط) يمثل 90% من اعضاء اللجان

في الاتحاد السعودي للاسف ..

اتمنى ان تكون هناك حملة تنظيف واسعه لإجتثاث من هم على

هذه الشاكله ...


شكرآ مغاط

[ابو سليمان 14]

..

...

....


مآشآءالله قلمـك جدآأَ جميل .. بآآرك الله فيك



....

...

..

[Clasic]

المقال كوم و العباره كوم

إقتباس بسم الله وعلى بركة الله نبدأ ...و مثل ما أنتم عارفين

تشخيص دقيق لواقع عشناه ورأينا انعكاساته السلبيه , على القرارات التي
تصدر من لجنتي الإنضباط والفنية ..

ولكن أراد الله بذلك أن يكشف عن الوجه القبيح الذي يتخر في جسد
الرياضة , وما بعض العاملون في تلك اللجان سوى أبواق وأجنده تتحكم فيهم الألوان ولغة الميول!


أشكرك جداً عزيزي مغاط , ونتمنى منك عدم الإبتعاد كثيراً
لك أطيب الأماني ..

[أعترفلك.]

لي عوووووووده أيها المغاااط

[عاشق هلاله]

آبلغ وصف ي آلآطخم !

وكلامك مآ بآقول منطقي .. ولكن الى حد كبير يصل للمنطقية !

حسبي آلله ونعم آلوكيل

ترآك نسيت فقره ( ما يستفاد منه )


مآ قصرت وعساك عالقووه

[عاشق الزعييييييييم]

ابداااع بمعنى الكلمه
اشكرك من اعماق قلبي
واتمنى منك اتتحافنا بكتابتك باستمرار
عن احوال الساحه الرياضيه وبالتوفيق لزعيمنا الليله امام فريق الطحاااالب

[هيلاوي هلالي]

---------------
-------

والله ياخوي الأطخم "مغاط" ماتصير صديقي ؟
وش نقول وش نعيد


هذي لجان أبو ريالين

لكن الأمل بالله ثم هالنصراوي انه يغير ولو بعض الشي


تقبل مداخلتي ومتابعتي الدائمة لقلمك الرائع ونوادرك


-----------
-----

[المسـك]

صورة طبق الاصل لمايحدث من مهازل اللجان

مقال رائع بانتظار مزيد من الابداع

إقتباس ولم يشأ القدر

من المناهي اللفظية أن يقال :

(شاءت الظروف) أو (شاء القدر) ؛

لأن القدر والظروف ليس لها لها مشيئة ، ومصرف الأكوان هو الله تبارك وتعالى ومشيئته نافذة .
ويلتحق بهذا الباب السخرية بالقدر أو كما يقال : (من سخرية القدر) أو (سخرية الأقدار) ونحوها ..
وكذا (شاءت الطبيعة) ، ومثلها : (شاءت عناية الله) أو (شاءت قدرة الله) أو (القدرة الإلهية) .
يقول الشيخ بكر بن عبد الله أبو زيد حفظه الله في (معجم المناهي اللفظية) صـ 313 :
المشيئة من صفات الله تعالى ، والصفة تضاف إلى من يستحقها ...... ولا يقال : (شاءت حكمة الله) ،
ولا يقال : (شاءت قدرة الله) ، ولا (شاء القدر) ، ولا (شاءت عناية الله) ،

وهكذا من كل ما فيه نسبة الفعل إلى الصفة ... . أ.هـ

ويقول العلامة محمد بن صالح العثيمين رحمه الله في مجموع فتاواه 3/131-132 :
وقد سئل عن هذه الألفاظ فقال :
( شاءت الأقدار ، وشاءت الظروف ألفاظ منكرة ،لأن الظروف جمع ظرف ، وهو الزمن ، والزمن لا مشيئة له ، وكذلك الأقدار جمع قدر ، والقدر لا مشيئة له .

وإنما الذي يشاء هو الله عز وجل نعم لو قال الإنسان : اقتضى قدر الله كذا وكذا فلا بأس ،

أما المشيئة فلا يجوز أن تضاف للأقدار ،

لأن المشيئة هي الإرادة ، ولا إرادة للوصف ،وإنما هي للموصوف ) . أ.هـ

والله تعالى أعلم .
منقول

[اشقيت قلبي]

يآآآآآآآآآآآآآآآآآآآآآآآآآآآهـ

رووووووووعه روووووووووووووووووووعه روووووووعه يآاشرف


صرآحه عيشتنآ جو

وننتظر جديدك

مشكووور