جده تغرق .. بس مع الزعيم حاضر وما بتفرق ..
بسم الله الرحمن الرحيم
مساء الورد / صباح الورد ... للزعماااااااااااء
لن أوضح وأزيد على كلام أخواني الأعضاء وعلى رأسهم (نقوشي) عن تفاصيل تقسيم المدرجات ونقاط بيع التذاكر ..
ولكن تضامنا مع حملة نبيها بدري للعضو ( البايسن ) ..
قبل قليل كنت أتجول في منتديات اتحاديه .. ( بشوف في احد جايب طاري الخمسه
)
وفيه حمله من قبل الجماهير الإتحاديه بالحضور المبكر والإستيلاء على واجهة الملعب بأكبر عدد من المقاعد ..
من حقهم يقومون حملات وتحفيز زي مانسوي حنا بمنتدانا ..
ولكن .. بالنسبه للهلاليين ... أهل جده وضواحيها .. أهل مكه وضواحيها .. واللي جاي من خارج المنطقه .. كلكم عارفين الوقت اللي تباع فيه التذاكر ( يوم الجمعه والسبت من الساعه الـ4 عصرا وحتى الـ10 مساء ويوم المباراه الأحد من الـ4 إلى نفاذ التذاكر ) ..
بالنسبه للمدرجات اللي بالواجهه مقسمه بين الفريقين بالنصف .. وهناك رجال أمن عند البوابات ( يعني اذا انت هلالي ماتدخل من بوابة الإتحادي والعكس ).. يعني مقاعدنا محجوزه مو باقي الا نشتري التذاكر وندخل للملعب
سيتم فتح أبواب الأستاد بعد صلاة العصر في تمام الساعة الرابعة عصرآ .
نبي يأذن المغرب والمدرجات الهلاليه فل ونبي أهازيج وتحميس للاعبين ..
أتمنى للحاضرين إنهم يحضرون بتيشيرت الهلال أو بالشال الهلالي .. موبايلي بتوزع شالات وبالونات كالعاده .. نبي الكل يرفع الشالات مع دخول اللاعبين لإجراء عمليات الإحماء ومع دخولهم في بداية المباراه .. نبيها فل وبلون أزررررررق وبس ..
نبي الرابطه تكون جاهزه من بعد صلاة المغرب مباشره ..
مانبي حضور إذا جا هدف هلالي تقوم تصفق وتجلس .. لا غيرك يتمنى يحضر مكانك ومالقي تذاكر .. توقف طوال الشوطين وتصرخ وتشجع وتحمس اللاعبين .. ومانبي اتكاليه وتقول لا الرابطه تحمس لا اللي هناك قاعدين يشجعوا يكفون .. والله الله باللافتات المحفزه .. وأعلام دول اللاعبين الأجانب
التفاعل نبيه لآخر دقيقه بالمباراه .. التشويش على لاعبين الإتحاد عند استلام الكره ( تصفير وتشتيت ذهن اللاعب الإتحادي ) ..
الضغط على الحكام بإحتساب ركلات جزاء وأخطاء قريبه ..
والأهم من كل هذا ..
إذا انهزم الهلال أو تعادل ( لاسمح الله ) نبي تصفيق وتحيه للاعبين ومانبي سخط وتجريح .. اللي يلعب قدامنا فريق كبير وعلى أرضه لاعب يعني الفوز والخساره بكرة القدم شي طبيعي والخساره ماهي نهاية المشوار بنكون المتصدرين لو انهزمنا ( لا سمح الله ) وبمباراة مؤجله .. متى ما احترمنا الإتحاد وحضرت الروح العاليه والحماس للاعبين وحضور الجمهور ندك مرماهم دك .. والدليل مباراة الـ 5 الموسم الماضي ..( حضور جماهيري كبير - روح عاليه من اللاعبين - حماس وقتاليه داخل الملعب - تفاعل من الجمهور - عدم الإتكاليه على البعض من الجماهير واللاعبين ) والنتيجه 5-0 على حامل اللقب ..
بإذن الله الفوز هلالي وأتوقعه بفارق هدفين والفريدي وويلي بيكونوا نجوم المباراه ( أتمنى كل اللاعبين يكونوا نجوم المباراه )..
بالتوفيق لهلالنا ..
تحياتي للجميع
وأبي تفاعلكم في المدرجات مو في الردود بس........
يعطيكم العافيه
الوضع المتطور
